المقالات
السياسة
روشتة كيزانية : كبسولة ( دين ) عند اللزوم !!!
روشتة كيزانية : كبسولة ( دين ) عند اللزوم !!!
06-28-2013 12:39 PM


* لما تغتصب السلطة بقوة الدبابة و تبدا عهدك بكذب و خداع ( اذهب الى القصر رئيسا .... و ساذهب الى السجن حبيسا ).
- بلع شعبك كبسولة ( دين ) حيهلل و يكبر و يقول :
هى لله ..هى لله ... لا للسلطة و لا للجاه
رئيسكم يصلي الصبح حاضر ... افلا تكبرون
* لمل تحل كل الاحزاب السياسية بجرة قلم , عشان ما تنفرد بالسلطة لوحدك .
- بلع شعبك كبسولة ( دين ) حيهلل و يكبر و يقول :
دى احزاب كافرة ( اكيد المقصود الحزب الشيوعي ) و دى احزاب منافقة ( حزب الامة و الاتحادي ) بس في الحتة دى ليك حق يا شعب , الامة و الاتحادي فعلا احزاب منافقة , بس ما النفاق بالمعني الديني , دى احزاب منافقة اجتماعيا و سياسيا , و ببساطة الدين علاقة بين الفرد و ربه , تقيمها مرده الى الله عز و جل , و برضو الاحزاب السياسية ما موضوع قابل لتقيمنا الديني , و مافي حزب سياسي بدخل زول الجنة و لا النار .
* لما تفصل و تشرد الاف الموظفين و العمال من وظائفهم , و تقطع ارزاقهم .
- بلع شعبك كبسولة ( دين ) حيهلل و يكبر و يقول :
الرزق من رب العباد , و مافي زول بقطع رزق زول , و الله ما شقالو حنك ضيعوا .
* لما تنسف عملية السلام و تنقض الاتفاقيات السابقة بين الحكومة السابقة و الجيش الشعبي لتحرير السودان , و تشغل حرب ضروس بين ابناء الوطن الواحد .
- بلع شعبك كبسولة ( دين ) حيهلل و يكبر و يقول :
الجهاد فرض عين , و اولادنا حيموتوا شهداء و حيعرسوا الحور العين .
* لما تكون عميل للامريكان و بني صهيون .
- بلع شعبك كبسولة ( دين ) حيهلل و يكبر و يقول :
امريكا روسيا قد دنا عذابها ( هسة روسيا الدخله هنا شنو ).
* لما تسرق و تنهب خيرات البلد .
- بلع شعبك كبسولة ( دين ) حيهلل و يكبر و يقول :
سيدنا عمر بن الخطاب ما لغى حد السرقة في عام المجاعة .
* لما تحلل الربا في معاملاتك المالية .
- بلع شعبك كبسولة ( دين ) حيهلل و يكبر و يقول :
فقة الضرورة و كدا , و للضرورة احكام .
* لما ترطب و تربي ( كروش ) و تبني قصور و تعرس مثنى و ثلاث و رباع , و شعبك جعان .
- بلع شعبك كبسولة ( دين ) حيهلل و يكبر و يقول :
المال و البنون زينة الحياة الدنيا , و ربنا حلل للراجل اربعه نسوان .
* لما تقسم بلدك لدويلات صغيرة ( انفصال جنوب السودان البدايه و القادم اخطر و ابشع ).
- بلع شعبك كبسولة ( دين ) حيهلل و يكبر و يقول :
ديل ذاتهم كفار , الحمد لله , الله حلانا منهم , عليهم يسهل و علينا يمهل .
* لما تفرط في ارض بلدك و كمان تجود و تهديها للبلدان التانية ( حلايب .. عربون محبة للمصريين ).
- بلع شعبك كبسولة ( دين ) حيهلل و يكبر و يقول :
حب لاخيك ما تحب لنفسك ( نحنا و مصر اخوات )
* لما تقتل و تشرد و تغتصب شعبك في دارفور .
- بلع شعبك كبسولة ( دين ) حيهلل و يكبر و يقول :
ديل خونة و عملاء للامريكان .
* لما الاقتصاد انهار و عملتك الوطنية تقع ( الواطة ) لدرجة انو الدولار يساوي ( 7 الف بالقديم ) .
- بلع شعبك كبسولة ( دين ) حيهلل و يكبر و يقول :
ده امتحان من رب العالمين و المؤمن مصاب .
* لما الجبهة الثورية تعصرك لمن تجيب الزيت .
- بلع شعبك كبسولة ( دين ) حيهلل و يكبر و يقول :
ديل برضو كفار و منافقين و عملاء للامريكان .
* لما تكون عايش في القرن 21 , و انت رئيس ليك قريب ال 25 سنة , و لسه في مناطق في بلدك مافيها لا كهرباء لا مويه
- بلع شعبك كبسولة ( دين ) حيهلل و يكبر و يقول :# يا كيزان و الله قرفنا من كذبكم الكتير ده , و عملتوا لينا طمام بكبسولاتكم دى , ياخي العالم اتطور و العلم اتطور , اطورا انتو كمان و طوروا خطابكم السياسي ( دق الحنك ) خلاص الروشتة بتاعتكم دى اصبحت غير سارية المفعول
اقول ليكم نصيحة اخويه و كدا :

سير ... سير... سير يا البشير .
# معقولة يا بشة لسه قاعد تكذب , 25 سنة ما زهجت من الكذب , و بعد ما حلقك قفل من الكذب الكتير , لسه مصر تكذب
ركوزا علي الخطاب ذات الابعاد البلفية و انسوا الخطاب ذات الابعاد الدينيه , لانكم بصراحه كدا ما عارفين حاجه عن الدين ( يا عوض اقفل البلف ..... يا عوض افتح البلف ).


[email protected]


تعليقات 0 | إهداء 0 | زيارات 1004

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




عفيف الدين مضوي ارباب
مساحة اعلانية






الرئيسة |المقالات |الأخبار |الفيديو |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة