ومعاهو حاوي
12-08-2010 12:40 PM

ساخر سبيل

ومعاهو حاوي

الفاتح جبرا

بعد تخرجه من الجامعة عمل (عوض) فى وظيفة (محاسب) بإحدى المؤسسات الحكومية ، تدرج عوض فى السلم الوظيفى حتى صار (رئيس الحسابات) مع تقدم العمر وظهور بوادر (الصلعة) بدأت النقة :

- يا عوض ما تعرس

- يا عوض إنتا ناقصك شنو؟

- يا عوض البنات راقدات

- يا عوض حصل روحك

- يا عوض شفتا ليكا رئيس حسابات لسه ما عرس؟

- يا عوض جيب ليكا جنا ينفعك

وتزوج عوض نزولاً لرغبة (المجتمع) والآن لديه أربعة من الأبناء فى المراحل التعليمية المختلفة ما أن قابلته فى احدى المناسبات مؤخراً حتى بدأ يشكو لى عن صعوبة المعيشة وغلاء الأسعار وعدم كفاية (المعاش) :

- تعرف يا استاذ (الميه وعشرين جنيه) بتاعت المعاش دى ما بتعمل أى حاجه .. نحنا بناكل (عيش وشوربة) أول أسبوع في الشهر .. و تاني أسبوع فى الشهر (عيش وطعميه) ... وتالت أسبوع فى الشهر (عيش حاف) ساااكت ... والأسبوع الأخير من الشهر (بنعديهو صيام ) ... ده غير مصاريف الأولاد .. والموية والجمرة والنفايات وحبوب الضغط وحبوب السكرى والشنو ما عارف !

- وين المشكلة يا عوض ؟ الناس دى هسه كووولها ما كده !

- المشكلة يا أستاذ فى الإحساس مافيش زول عندو دم عاوز يحس بالحالة البطالة دى .. المدام ما عندها حاجة غير جيب وهات وعاوزين وعاوزين ... والأولاد كل يوم طلباتهم زائده !

- طيب ياخى ما تشوف ليك أى شغل ؟

- قالو ليك ما حاولتا .. كل ما أشوف ليكا جريده إعلانية بس أفتح ليك صفحة (وظائف) وأقوم أدور ليك على أى زول عاوز ليهو (محاسب) أو إن شاء الله (سواق) أتصل ليك بى رقم الشركة مما يسمعوا ليكا صوتى يجيهم ليكا إحباط .. طبعن بيكونو عاوزين يسمعوا ليهم (صوت ناعم) وكده ... والعجب لو ما إتصلتا ومشيت ليهم بالدرب يقعدوا يعاينو ليك من فوق لى تحت فى (قرف) ومن الإستقبال يقولو ليك أكتب لينا رقم التليفون وح نتصل فيك وعمرو يوم واحد منهم كلمني مافى ولا حتي بالغلط ...

- وخلاس يعنى إستسلمتا للواقع ؟

- إستسلم شنو دى حالة الواحد يستسلم ليها ... قلت أخاطب المسئولين والعلماء ... أكيد عندهم الحل المناسب بعثت لى (ديوان المظالم) ردوا قالو ليا (زى حالتك دى ما إختصاصنا) ، بعتا لوزير الإقتصاد رد عليا وقالي ... الله معاك ... فهمت من كلامو إنو زول (متدين) شديد وإيمانو (قوى) .. بعت إيميل لرئاسة الجمهورية ما ردوا عليا قلت إحتمال يكونو مشغولين بحكاية الإستفتاء دى ، قلتا أبعت لديوان الزكاة واحد صاحبى قال ليا لو عاوزهم يدوك أعمل ليك (قناة فضائية) !

- طيب كان تخاطب جهات عالمية

- القال ليك ما خاطبتا منو بعتا إيميل للأمم المتحدة علي أساس إني إنسان وعندى حق فى الحياة الكريمة ... ردوا وقالوا بإنو جهودهم في السودان كلها موجهه حاليا لأماكن الشده وأنا ما أماكن شده !

- طيب ما فكرتا تغترب ليه؟

- القال ليك منو .. والله بعد العمر ده فكرتا ولقيت ليا عقد بتاع (راعى) قلتا برضو (ما بطال) الواحد ممكن يقعد (يرعى) بالبهائم وكمان يحسبا ليهم .. لكن

- لكن شنو؟

- الفيزاء بى قالوا بى ستة ألف ريال وطبعن أنا كان عندى خمسة ألف قرش دى حالتى؟

- أها وهسه ناوى تعمل شنو؟

- والله قررتا أقوم أشيل الأولاد ديل ومعاهم أمهم وأسلمهم (للدولة) ومعاهم (المية وعشرين جنيه) بتاعت المعاش !!



كسرة :

حقو المسئولين عن المعاشات يصرفو للزول المعاش بتاعو ومعاهو (حاوى) !!


تعليقات 8 | إهداء 5 | زيارات 3758

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#56467 [فائزة ]
0.00/5 (0 صوت)

12-10-2010 08:43 PM
يا حبيبتى السودانية الرجال ديل يا مفلسين وإلا معرسين ،،، والله حقه نعمل دراسة في الراجل السوداني ده الما حاسى بالبتعمل في المرأة السودانية وأولهم الفاتح جبره
كلهم من نظام عام وعساكر وقضاة ورجال الشارع كل همهم نفسهم ،، إنشاء الله الفلس يطلع روحكم زى ما طلعتوا روحنا بسلبيتكم والحاصل في البلد ده كله بسببكم

،، ويا حليل زمن الرجال رجال


#56434 [محمدعبدالله]
0.00/5 (0 صوت)

12-10-2010 07:08 PM
يامحمود عطيه القرايه في البيت وليس في المكتب يامثقف


#56369 [عبدو]
0.00/5 (0 صوت)

12-10-2010 03:59 PM
والله ياسودانيه اذا قررنا نكتب سوف نكتب وجهة نظرنا نحن لا ماتمليه علينا انتى وامثالك....كميه غير محدوده من الفتيات فى الطرقات والحدائق العامه لا هم لهن سوى اغرا المسلمين بلبسهن الفاضح وبرضو نجى نلوم الدوله ليه فصلت ليهم اللبس المحذق ...اتقو الله فيما تقولون




#55894 [سيف ضوينا ]
0.00/5 (0 صوت)

12-09-2010 05:54 PM
يا استاز جبرا
لك التحية بحجم المليون ميل مربع
اخي هزا هو الحال البائس لغالبية الشعب السوداني وليس عوض وحدة
وخلي لو يصرفو ليهو مرتبو ومعاهو حاوي دا كان ادو معاهو عصا موسي ما تحل مشكلة ( )


#55816 [سودانية]
0.00/5 (0 صوت)

12-09-2010 03:57 PM
الى كل رجل سودانى حر وشريف...لكل سودانى يرى نفسة مقنع الكاشفات..اكتبو فى اللذين يجلدون عروضكم فقد طفح الكيل..اكتبو فذلك اضعف الايمان


#55279 [المسافر]
0.00/5 (0 صوت)

12-08-2010 08:48 PM
(؟) الحاوي ذاتو مع الجماعة ديل عايز مساعدة ههههههههههههههههههههههههههههههههههههههههههههههههههههههههههههههه


#55182 [بت ملوك النيل]
0.00/5 (0 صوت)

12-08-2010 05:06 PM
واااااااااي من كسرتك يا استاذ كسرتنا بالضحك..وعليك الله رسل معاك حاوي للمغتربين:D :D :D :D :D :D :D :D :D :D


#55044 [محمود عطية الله حسن]
0.00/5 (0 صوت)

12-08-2010 01:13 PM
أستاذى جبرا
قريت الموضوع ولما جيت عند كسرتك ما قدرت أمسك نفسى من الضحك حتى الزملاء فى المكتب إستغربوا قالوا يمكن الزول ده جنًا.
والمية وعشرين جنيه دى ياربى بالقديم والا بالجديد؟
إذا كانت بالقديم بفضل منها أربعين بعد حصول الأربعة أبناء على التمانين الباقية بواقع ألفين جنيه مصاريف مدرسة ومواصلات .
تصدق لو الكريم سبحانه بعث قارون الذى تنوء العصبة بحمل مفاتيح خزاينة عشان يعيش فى السودان تلقاهو بعد شهرين قدام الجامع الكبير يقول (لله يامحسنين)


الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة