ناقوس الخطر
07-06-2013 02:23 PM


تلقيت إتصالاً هاتفياً من الإبن (ع) وبعد التحية والسلام قال لي :
- والله يا استاذ (الجماعة) لسه ما عملوا ليا حاجة وكل يوم في أمشي وتعال
والجماعة الذين عناهم إبننا (ع) هم (ناس الشرطة) والقصة عزيزي القارئ كالآتي :
إتصل بي قبل حوالى ثلاث اشهر الإبن (ع) وبعد أن عرفني بنفسه أخبرني بان لديه مشكلة طالباً مني مساعدته في حلها و(المشكلة) هي أنه قد إستيقظ صباحاً فوجد زجاج عربته التي كانت تقبع أمام المنزل (مهشماً) وبعض المقتنيات الثمينة والفلوس قد سرقت منها وأنه بينما كان يقوم بمعاينة العربة إقترب منه عمال المخبز (الذين كانوا يعملون ليلاً) وأخبروه أن عددا من الأشخاص يرتدون زي الشرطة قد ترجلوا من عربتهم (آخر الليل) وقاموا بكسر الزجاج وفتح العربة وقد قاموا برؤيتهم وهم مستعدون للإدلاء بشهادتهم إذا لزم الأمر يواصل إبننا (ع) قائلاً أنه قد ذهب لقسم (مدينة النيل) الذي يتبع له الحي ليقوم بفتح بلاغ بالحادثة إلا أن العاملين بالقسم رفضوا بل تعاملوا معه بخشونة لأنه يتهم (الشرطة) !
- هسه انا أعمل شنو يا استاذ؟
- أديني دقائق وأرجع ليك يا إبني
قمت فوراً بالإتصال بالأخ الصديق الدكتور عميد شرطة هاشم علي عبدالرحيم وقصصت عليه (القصة) فطلب مني رقم هاتف ولدنا (ع) وأخبرني بأنه سوف يتحدث إلى رئيس شرطة محليه كرري الذي يتبع له القسم والذي بدوره سوف يتصل بإبننا (ع) ليعرف منه الحكاية .
بالفعل إتصل بي الإبن (ع) وأخبرني بان رئيس قسم محلية كرري قد قام بإستدعائه وانه قد قص عليه الحكاية وقد طلب رئيس القسم من أحد الضباط برتبة (رائد) أن يقوم بالتحقيق مع أفراد القسم وكذلك الشهود عمال المخبز وقد كان .
إلى هنا والعبدلله مطمئن إلى ان مقتنيات الإبن (ع) سوف تعود إليه وان (اللصوص) سوف تطالهم يد العدالة بعد أن تفلح الشرطة في القبض عليهم خاصة وان معالم الجريمة واضحة وأي زول في سنة أولى (بوليس) ممكن يحلها !
لكن يبدو أن العبدلله كان متفائلاً أكثر من اللازم فها هو ولدنا (ع) يتصل (بعد أكثر من ثلاث أشهر) ويخبرني بأنه (فتر) من المساسقة بين منزله ومبني محلية كرري حيث توجد الأوراق !!
من أمن العقاب ساء الأدب .. لا يعجبني ابداً تعامل جهاز الشرطة مع المتفلتين من منسوبيه بداية من التحقيق الذي يستمر شهوراً بل سنينا (كما حادثة العبدلله المشهورة) نهاية بالعقوبات التي لا تتناسب مع الجرم ولذلك لابد ِأن نقرأ خبرا كالذي نشرته صحيفة القرار بتاريخ 25 يونيو 2013 والذي يقول بان إثنين يرتديان الزي الرسمي للشرطة قد تناوبا في إغتصاب فتاة تبلغ من العمر 16 عاماً ولعمري أن حدثاً كهذا كفيل بان تقوم وزارة الداخليه وجهاز الشرطة بعقد مؤتمر صحفي عاجل يوضح ملابساته ويؤكد القبض على مرتكبي الجريمة ومدي صحة إنتسابهم للشرطة من عدمه وذلك حتى لا تهتز ثقة المواطن في هذا الجهاز الحساس الذي ناتمنه على كل شئ لدينا .
ومثالاً آخر .. إتصل بي أحد المواطنين وهو يمتلك (كافتيريا) بام درمان وأخبرني (وهو زعلان زعل شديد) بان إثنين من عماله وهم من العمالة الوافدة قد تعرضا لنهب موبايلاتهم بالقوة من قبل إثنين من أفراد الشرطة يرتديان الزي الرسمي وذلك بمنطقة الشهداء (المكتظة بالمارة) .. (قلتا أحسن إتحقق من الكلام بنفسي) ذهبت إلى حيث الكافتيريا وقابلت العاملين وتأكدت من الواقعة ثم سألتهم لماذا لم تذهبا لقسم الشرطة وتفتحا بلاغاً فردا علي في خوف شديد : لا لا نحنا ما نمشي .. شرته تشيل موبايل .. شرته ما تفتح بلاغ ؟ (العبد لله يفتكر برضو كلامهم معقول وللا شنو يا جماعة الخير ) ؟
حكاية (التفلتات دي كترت) ولابد أن ندق ناقوس الخطر .. فحقو أخواننا في الشرطة يقعدوا في الواطة ويشوفوا الأسباب شنو ؟ وحتي ذلك الحين يجب عليهم الإنتباه إلى هذه الخروقات والتفلتات التي تحدث من منسوبيهم وتقيم على من يرتكبونها عقاباً رادعاً ليكونوا عظة وعبرة لغيرهم أما هذا التعامل (المرن) الذي نشهده فسوف يؤدي إلى كوارث لا يعلم مداها إلا الله .
كسرة :
السيد رئيس شرطة محلية كرري الحصل في التحقيق بتاع ولدنا (ع) شنوووو؟ .. أنا ما عارف قصة التحقيقات في بلدنا دي شنو ؟ .. إي تحقيق يبدأ وما ينتهي ؟ مش حكاية عجيبة ؟
كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو)؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو)؟


تعليقات 12 | إهداء 0 | زيارات 7170

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#715853 [mansour]
5.00/5 (1 صوت)

07-07-2013 01:01 PM
في واحد جنو سكر وكل مره يمشي يسكر يلمو فيهو ناس الشرطه يودوه ليك المحكمهيجلوه 40جلده قام عمك كبير قال ليه نحن زمان عمك فلان لمن يسكر شديد ننادي ناس شرطه السواري يوصلوه لحدي البيت قام الولد قال ليه دا زمن كانت الشرطه في خدمه الشعب


#715446 [كارورى]
5.00/5 (1 صوت)

07-06-2013 11:42 PM
جبرا الله يجبر بخاطرك والله انا خايف عليك الحاجات البتهبشا دى بتجيب ليك الهوا وربنا يسترك من مغصه توصلك ابوى الله يحفظك


#715435 [ود الباشا]
5.00/5 (1 صوت)

07-06-2013 11:29 PM
الحراميه وبتاعين البنقو وكل المجرمين يمشوا يدخلوا الشرطة يحموا نفسهم يااستاذ الكلام دا من زمان ما شى جديد يعنى حاميها حراميها انا متأكد كل القراء لديهم قصص تشيب عن رجال الشرطة حتى بعض الضباط للاسف الشديد بستغلوا وظائفهم الكلام دا شوف عين عديييييل كده شرطة شنو دى ورطة البلد الداخلية تعين فى المجرمين يا الفاتح يا اخوى البلد بقت زى كوشة المسلخ العفانة فى اى حتة


#715313 [عدو الكذابين]
5.00/5 (1 صوت)

07-06-2013 07:14 PM
والله يا إستاذ مع إحترامي الشديد ليك ولك كلمة كتبتها ... إسمع مني الجماعة ديل ما بسألوا الروح (قتل رقبة) عياناً بياناً يجوا يسألوا ليك في حديد قزاز ... زول سارق منك دجاجة تقول ليه رجع لي القوانص. الله يرحمك يا سودان ويا شرطة السودان.
أسمعو مني القصة :
في طريق أد درمان دنقلا يتم إيقاف بص كامل بركابه ويتم إنزال الركاب ويطلب منعهم فتح شنطهم والوقوف صفاً واحداً بعيداً عن الشنط وكل الركاب الواقفين شايفين العسكري يطلع شيئ من جيبه ويده في الشنطة وينادي الركاب الشنطة حقة منو؟؟ وإذا بها تتبع لإحدى الطالبات الجامعيات، قروية من أسرة معروفة بالإستقامة... ويبلغها العسكري لقينا بنقو في شنطتك، وتتحدى البنت الشرطي، ثم يتدخل سائق البص ويقول للركاب الراجل دا داير حق الفطور بعد ما يضرب السيجارة ويدفع بعض الشباب للسائق ما يستطيعون وعياناً بيانا العسكري يستلم الرشوة من السائق، ويشيل البنقو في جيبو مرة أخرى ... ويترك البص يتحرك كأن شيئاً لم يكن..
الله يعينك يا سودان .. الله يعينك يا شرطة السودان في ظل المشروع الحضاري..


#715293 [سلوى حجازى]
5.00/5 (1 صوت)

07-06-2013 06:45 PM
وبالله الباقى شنو تانى ,, ؟؟؟ وإنتوا قاعدين ولاهماكم .. سبحان الله


#715271 [أبوالكجص]
5.00/5 (1 صوت)

07-06-2013 06:29 PM
اللهط الإتعودوهو في ظل حكومة عايره وأدوها سوط دي يخلوهو كيف ياجبره؟ أليست هذه الحكومة هي التي تركت الفرصة لأي واحد في إيدو سلطة يستغلها زي ما داير، لا مساءلة ولا عقاب؟ ماذا نتوقع غير ذلك؟


#715266 [شرطي سابق]
5.00/5 (1 صوت)

07-06-2013 06:27 PM
الماهية وما إدراك ماالماهية والحقد الطبقي دي اصل المشكلة


#715254 [امين]
5.00/5 (1 صوت)

07-06-2013 06:13 PM
مشى الطاؤؤس يوما باختيال فقلد شكل مشيته بنوه وحضرة الطاؤؤس ماشي على طول بالاختيال وبرضو انتم عايزين الابناء يمشو مشي السلحفاة ارجو من هذا الشاب ان يحتسب امره لله وربنا سيعوضه قريبا


#715247 [هميم]
5.00/5 (3 صوت)

07-06-2013 06:05 PM
يا أستاذ جبرة، إنت فعلاً متفائلاً! الرئيس البشير الآن يدلل الشرطة لأنه يعتمد عليها في بقاء نظامه ويظن أنها تمنعه من أمر الله ولذلك لا تتوقع أن يطال الشرطة عقاب مهما فسدت. الناس على دين ملوكها ومن الشرطة الآن من يقتسم المسروقات مع الحرامية ... عااااااااادي ... ويسرق موبايلات، مقتنيات سيارة ملاكي وما شابه بينما يسرق ولاة أمورنا حتى أحلام شبابنا في العيش الكريم ناهيك عما يوفر لهم العيش الكريم من عمل لائق وأجر مناسب لبناء مستقبل يتضمن الزواج والبيت والزوجة - والمعيشة!!! الآن ولاة أمورنا يسعون لسرقة حياة أبنائنا نفسها بقانون التجنيد الإجباري الجديد .. لكن هيهات فنحن لهم بالمرصاد، وقد طفح الكيل!


#715149 [حمدي]
5.00/5 (1 صوت)

07-06-2013 03:31 PM
قصة قديمة حكاية حاميها حراميها لكن كانت نسبة افراد الشرطة الفاسدين لا تزيد عن 0.05% الان حدث و لا حرج الحرامية في القوات النظامية نسبتهم لا تقل عن 60% -- الضباط الكبار يقولوا ليك يعملوا شنو الناس ديل مرتباتهم ضعيفة شديد و عندهم اسر و عليهم التزامات --


#715128 [hamid]
5.00/5 (5 صوت)

07-06-2013 03:16 PM
شرطة إيه اللي إنت جاي تقول عليها( لو كان عليك الإختيار بين الشرطة و الرباطه تختار منو؟ طبعا الرباطة يدقوك و يشيلو قروشك لكن الشرطة يدقوك و يشيلو قروشك و يدخلوك السجن و تاني جو الحراسة لو إكتفوا بالدق بس معاك برضك محظوظ)


#715093 [محمدأقداوي]
5.00/5 (2 صوت)

07-06-2013 02:41 PM
اذا كان رب البيت للدف ضاربا فشيمة أهل البيت كلهم...شنوووووووو؟؟؟؟


ردود على محمدأقداوي
[fadeil] 07-06-2013 07:11 PM
اذا كان رب البيت بالدف ضاربا فشيمة أهل البيت كلهمو القص وهذا خالنا في عهد المشروع الحضارى .. أين سيسينا ؟ .


الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة