فتح دولابو
07-13-2013 05:08 PM


فوجئت كما فوجئ الكثيرون غيري بالتصريح الذي أدلى به رئيس القطاع السياسي بالمؤتمر الوطني د. “الحاج آدم يوسف” مؤخراً وتناقلته الصحف ووكالات الأنباء والذي قال فيه بأن المقارنة معدومة بين واقع السودان قبل مجيء الإنقاذ إلى سدة الحكم والوقت الحالي وأن الناس قد انتقلوا من خير إلى خير على المستوى المادي والروحي – لحدت هنا كويسين – غير ان سيادته أضاف : (لم يكن اى مواطن يمتلك اكثر من قميص والآن الدواليب مليانة) او كما قال .
بعد قراءته لهذا التصريح قام العبدلله بتركيب (الفهامة) بعد أن قام بأخذ حبوب الضغط والقلب والسكري تحسباً لأي مضاعفات وهو يطرح على فهامته هذه الأسئلة :
- لماذا إختار سيادته (القمصان) للإستدلال على رفاهية المواطن (الآن) دون غيرها من الأشياء .. يعني كان ممكن ( جلاليب) .. جزم .. بناطلين ؟

هل ثبت علمياً (ونحنا ما عرفين) أن عدد القمصان يتناسب طردياً مع زيادة المرتبات التي تتناسب عكسياً مع معدلات التضخم !

- كم كان الجنيه يساوي في مقابل الدولار عندما كان المواطن عندو (قميصين) وكم أصبح عندما أصبحت (الدواليب مليانة)؟

- خليك من القمصان .. كم كان ثمن (الدولاب ذااااتو) حينها وكم أصبح الآن ؟

- كيف يمكن للمواطن أن يملأ (دولابو) وهو ما قادر يملأ (معدتو) بعد أن أصبح (كيلو اللحم) بي ستين ألف والليمونة (بألف جنيه) !

- كم قميصاً ممكن أن يشتري المواطن (الآن) إذا كا يصرف الحد الأدني للأجور ؟

- هل القصة مقتصرة بس على القمصان بس وللا معاها الجلاليب (الزبدة) و(الشالات المطرزه) والعمم (التوتال الأأصلي) والمراكيب (النمر الفاشري) والعصي (الأبنوس)؟

- هل (القميصين) الذين عناهما (الحاج) كم قصير أم كم طويل لأنو (بتفرق كتير وكده)

- من أين يأتي المواطن (الآن) بثمن صابون غسيل هذه الدواليب المليانة (وكمان فحم المكوة) بعد أن أصبح شوال الفحم بي 400 ألف جنيه !

- هل الدواليب المليانه دي دواليب المواطن براااهو (يا ربي) وللا كمان معاهو العيال ودواليبهم برضو ملاها ليهم ( طبعن بعد ما سكنهم وأكلهم وشربهم وقراهم وعالجهم) وكمان إشتري ليهم (الجمرة) !

- هل برضو المواطنات كانن عندهن (توبين) وهسه دواليبهن (مليانه تياب) أم أن المسالة مقتصرة على الرجال بس ! وهل يستطيع المرتب الآن أن يشتري ليهن (توب وااااحد)؟ إن شاء الله (ربط) !!

- لماذا ضرب (الحاج) لنا مثلاً (بالقمصان) ونسي أن يضرب لنا مثلاً (بالوجبات) ؟ يكون من أنصار (الكساء قبل الغذاء) وللا الفهم شنووو؟

- إذا كان المرتب (الآن) ينتهي قبل يوم خمسة في الشهر .. متي يستطيع المواطن أن يشتري قميصاً (إجابة الفهامة ح تكون : أكيد يوم واحد في الشهر) !

إنتهت أسئلتي التي ألقيتها على الفهامة ولما تأخر الرد وضعت يدي عليها لأجد أن حرارتها مرتفعة وسرعان ما إنطلق منها دخان كثيف عرفت بعده إنها لحقت أمات طه !!

كسرة :
يكون الحاج (فتح دولابو) !

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو)؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو)؟


تعليقات 39 | إهداء 0 | زيارات 8931

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#722054 [المظلوم السوداني]
3.00/5 (1 صوت)

07-15-2013 01:30 PM
أنا عايز أعرف حاجة واحدة ... كم من الزمن يستغرق الحاج ساطور لظبط ديكور دقنه كل يوم ؟؟


#721791 [omar tomsah]
0.00/5 (0 صوت)

07-15-2013 06:02 AM
عجبوني أولاد السودان ... ملصو البدل والقمصان


#721602 [القفرف ده اى]
5.00/5 (2 صوت)

07-14-2013 11:29 PM
كل يوم بتثبت وبجدارة انك زول ما عندك اى موضوع
ديمغووووووغى لمن تخلى الواحد يطرش

وده كمان قالوا عليك ساخر ودمك خفيف

دتوك كبا

[email protected]


#721418 [ود البوب]
3.00/5 (1 صوت)

07-14-2013 04:27 PM
اظن كان افيد للعباد ان يظل الحاج ادم استاذا في الجامعة
!!!!!!!!!!

واحد بيقول كلام زي دا ، بالله ينفع استاذ جامعة؟


#721342 [Omar]
5.00/5 (1 صوت)

07-14-2013 03:09 PM
فتح دولابو شايلا قليبي وين ماشابو

ياعملات اللحو.......
ههههههههههههههههههه


#721248 [حاتم]
5.00/5 (1 صوت)

07-14-2013 01:47 PM
ده راجل كمالة عدد ساي وماعندو لازمه وزول ارزقي وضيع هذا السبب الذي أتى به للانقاذ ليتزلف ويعيش على فتات الموائد ويملا دولابو ودولاب من يعول بمال هذا الشعب


#721182 [الله جابو]
3.00/5 (1 صوت)

07-14-2013 01:02 PM
اظن كان افيد للعباد ان يظل الحاج ادم استاذا في الجامعة من ان يصبح سياسي يخرمج في الكلام ولا السياسة دي بتبلد الزول


#721141 [ابو محمد]
3.50/5 (2 صوت)

07-14-2013 12:37 PM
الزول ده شكلو بتكلم عن دولابو.... قبل المنصب ( لمن هرب يكون جري بقميصين) وبعد المنصب.


#721115 [جاكوما]
4.00/5 (1 صوت)

07-14-2013 12:19 PM
يا استاذ جبرة تحية

دا كان اهم بند فى الاتفاقية مع الحكومة, انه يملوا ليهو الدولاب قمصان!!


#720978 [ود الريف]
2.00/5 (1 صوت)

07-14-2013 10:25 AM
انا بقترح يا ناس الراكوبة بدل الحاج ساطور نسميهو الحاج دولاب ولا الحاج قمصان ولا الحاج دلقان ولا الحاج بترينة


#720972 [ود الريف]
3.00/5 (2 صوت)

07-14-2013 10:17 AM
يا أستاذ جبرة : الناس في العروض ما تقيسا بي تيبانة £ ما يهمك لباسم والعروض عريانة ( ديل جماعة عصام العريان )


#720920 [وهلم جـــــرا]
3.00/5 (2 صوت)

07-14-2013 08:47 AM
الدولاب اصبح من الرفاهيات فى الزمن الاغلف دة الناس بقت تطبق الملابس وتنوم عليها عشان الحرامى ما يجازفه


#720887 [سماسم طيبة]
5.00/5 (2 صوت)

07-14-2013 06:25 AM
والله يا جماعة في السبعينات الوالد رحمه الله كان يشتري لينا كسوة ثلاث مرات في السنه في العيدين وموسم المدارس وكنا بنمشي محل أحذية انجليزييييية اسمها لاركو وباتا والله المحل كان في منتهى الأناقة واجهة زجاج وأرضية رخام لوحات المحل شفتها الآن في السعودية وفي كرسي جلوس فخم تقعد عشان تقيس الحذاء وكنا بنشتري ثلاثة لبسات على عدد الأيام العيد والله كنا بنلبس موديلات طالعة موضة الأيام دي والكلام ده كلو في مدينة سنار الرائعة.وما أنسى محل خزان سنار للأقمشة والله نفس تصميم محلات الأقمشة الآن في السعودية زمن رسالة لندن والتريفيرا والاسموكن وبناطيل الكوردرايد للأولاد وكنا بنفصل منها أسكيرتات اااااه يا زمن وقف شوية والآن مدينة سنار الحبيبة حولها الفاسد الظالم احمد عباس لمدينة أشباح لكن الله يمهل ولا يهمل ولابد لليل أن ينجلي . على فكرة ده كلو والوالد رحمه الله كان سائق آلات ثقيلة في الري مش حرامي إنقاذي زي الحاج ساطور


#720791 [المتفائلة جدا]
2.00/5 (2 صوت)

07-14-2013 12:31 AM
كسرة :
يكون الحاج (فتح دولابو) !
الإجابة فى الكسرة دى فعلا الحاج فتح دولابو بعدين زى ما بتقول حبوبتى أعضية المؤتمر اللاوطنى لما بتزاوروا أظنهم كل زول بيتفرج فى دولاب صاحبهو يشوفوا كل واحد عمل كم قميص ومن كترة القمصان وبسطتهم بيها بيتخيلوا إنه كل الشعب دواليبه مليانة قمصان
وهو الشعب يا حسرة عليه جعان ملاقى ياكل !!قال قمصان قال




ة


#720787 [حامدين]
0.00/5 (0 صوت)

07-14-2013 12:17 AM
يا جماعة النلس ديل اصحاب شهادات عليا ما بتكلموا ساكت بس انتوا ما بتفهموا المقصود طبعا انا كنت مستغرب زييكم بس بعد الفطور شربت كباية شى وافكر وادبل فى الشايات والقهوة وحك فى راسى لمن جاي وتنفست الصعداء وقلت الحق اخوانى فى الراكوباب اريحهم القمصان ملت الدواليب بعنى مليناكم مغصة لمن دودوتوا


#720775 [fato]
2.00/5 (1 صوت)

07-13-2013 11:49 PM
أخوي/الغاتح جبرة وااله تباري كلام ناس حاج ساطور والساطور أنشاء الله يكسروا بيه رأسه وكلام المتعابط ربيع وأبو العفين تقوم طابي ساكت ونحن في حوجة كلامك وكتابتك زي العسل دي ليوم يعم الفرح بيتنا الكبير السودان بعد ذهاب شياطين اﻷنس القاعدين لينا في زورنا وأنشاء الله تاني ماتحتاج لحبوب ضغط وسكري ولا لفهامة.


#720759 [ماسوره]
0.00/5 (0 صوت)

07-13-2013 10:57 PM
فتح (دولابو) ولاّ فتح (بلفيهو) يا جبرا ؟؟؟


#720752 [حاجة عجيبة!!]
0.00/5 (0 صوت)

07-13-2013 10:36 PM
يا عمّك بعنا الدولاب زماااان عشان نغطّى المصاريف وبقينا بس بالسحّارة انا والمدام والاولاد.. كدى بالله خلينا فى موضوع اخبار هيثرو شنوووووووو؟..


#720727 [ابو قمبور]
0.00/5 (0 صوت)

07-13-2013 09:32 PM
يا جيره رمضان كريم انا شخصيا فهامتى عرفت الحاج ساطور بقصد شنو طبعا بقصد قمصان المؤتمر الوطنى حيث لكل مناسبه الحاج ساطور يغير قميصه كما الافعى تغير جلدها عشان كده بقى ما عارق هو شايت وين مشكلته كل يوم قميص على مقاس المناسبه التى يود ان يصرح فيها ومعاهو حق لان كتير من الموطنين بقو يلبسو قمصان المؤتمر الوطنى وبرضو قبادات المعارضه عشان كده بقت فى زحمه قمصان والوان (شعار العصابه الشجره فى تى شيرتات لاتباع العصابه وعيالهم )


#720707 [alarain]
2.50/5 (2 صوت)

07-13-2013 08:48 PM
دا بتكلم عن نفسو لكن ابن الو٠٠٠ خجل ولو انو دى ماعيب اكون عندك قميص واحد ولا سرول واحد العيب فى الحاصل دا ياناس الحكومة بنيلنا وقمحنا والناس جعانة اللة يقطع دابركم واقول للحاج اختونا خلونا عراية عراكم اللة على الاقل نرطب شوية لانو الدنيا سخانة وكهربتكم مافايتة قصوركم ياسجم اعوذباللة منكم


#720706 [ابوعبدالله]
4.00/5 (1 صوت)

07-13-2013 08:47 PM
اشرب ليك (كوز)ليمون وهدئ اعصابك نحن محتاجين ليك تمتعنا في ايام الرخاء


#720695 [سلوى بوتيك]
0.00/5 (0 صوت)

07-13-2013 08:13 PM
ياترى هل يدري فخامة الساطور أن هناك كم من فقير يجول عارياًويكلم نفسه في طرقات الخرطوم ، هل قدمت له كسوة العيدياهذا ؟أنعل أ..............."اللهم إني صائم"


#720693 [خليل الخير]
4.00/5 (3 صوت)

07-13-2013 08:03 PM
الفاتح اللهم إني صائم.لكن علي الطلاق مابراك.لكن هي في رمضان زمنا متين؟


#720670 [الفاتح الجاركوك]
4.00/5 (1 صوت)

07-13-2013 07:16 PM
يكفى انه الحاج ساطووووووووور


#720661 [ahmmed]
3.50/5 (3 صوت)

07-13-2013 07:01 PM
سيبك منو ده مخو ضارب،ياخي بلقي لي عندك دين ،ياخي علي الطلاق نعلاتي النغلتي اباهن،وعدمان الله من عمة فوق راسي،ياخ خايف من الناس،انا كنت مدير مدرسة ثانوية،وهسع معاش،وطالب حق الله ياجماعة،نسرق،لا طلق،السرقة دي حقت الكيزان،نحن بنشحد.


ردود على ahmmed
United States [fattah] 07-14-2013 11:54 AM
يااخى احمد كلامك والله يوجع القلب ولكن ماذا نقول فى الذين عميت قلوبهم واحب ان اقول لك ان قدوتى فى هذه الحياه طبعا بعد رسولنا الكريم عليه افضل الصلاة واتم التسليم هو مدير مدرستى الابتدائيه فقد كان هذا الانسان ونحن اول دفعه عند تنفيذ السلم التعليمى وجوده فى المدرسه اكثر من تواجده فى منزله وكل تلك الاوقات كان يسخرها للحصص الاضافيه وقبل موعد الامتحان بلاثه اشهر كنا قد انتهينا من كل المواد واصبح البنامج مراجعات وفقرات ترفيهيه وجمعيات ادبيه وعند الامتحان كان الجميع فى نفسيه جيده وبحمد الله كانت النتيجه كل الفصل نجاح وبتفوق عدا واحد كان قد تم قبوله محولا من احدى المدارس المصريه فى اواخر العام. انه اخوتى الاستاز الجليل النور خضر النور والذى بحمدالله تم تكريمه بان سميت كل كل مدارس الاولاد فى المنطقه باسمه...تحياتى لك ايها المربى الجليل ولكل معلمى بلادى الاجلاء

United States [yasir abdelwahab] 07-13-2013 09:43 PM
والله مصدقك استاذ احمد


#720653 [couman]
2.50/5 (4 صوت)

07-13-2013 06:53 PM
وهل الدولاب ده موكد مليان من حلال الحلال..ولا الناس خلاص اصبحت مطرة لغير الحلال.؟؟؟؟؟؟؟؟؟


#720621 [tarig]
3.25/5 (3 صوت)

07-13-2013 06:22 PM
والله انها لمهازل الزمن ان يكون امثال هولاء فى سده الحكم ولعمرى انى لاخجل ان يكون هولاء فى سده حكم السودان والتاريخ كذلك يستحى ان يسجل سيرة هولاء فى حكم السودان عليه اقترح لم العالم دى كلها وناس ربيع عبد العاطى وماشابههم ويعملوا ليهم كورس صيفى فى الاقتصاد والادارة والصدق والامانة ويفهموهم ابجديات الحاجات دى طالما انه ربنا ابتلانا بيهم وماقدرنا نقتلعهم عشان الواحد تانى لمن يجى يصرح يكون على الاقل فاهم هو بقول فى شنو وان اى واحد من مرحلة الاساس على الاقل يكون مقتنع بتصريحاته البقول فيها عشان الضغط والفشفاش والحاجات دى مابتستحمل جنس دا. وكمان قالوا كان استاذ جامعى دى نسيتها والله لانه مافى اى دلالة عليها


ردود على tarig
United States [fadeil] 07-14-2013 02:20 PM
ديل ا أخي الكريم مش يلموهم ويعملوا ليهم كورس ، دول يلموهم ويودوهم الكوشه ويحرقوهم بالنفايات عشان الشعب يرتاح من هذه القاذورات .


#720618 [ابو نصر الشمالي]
2.00/5 (1 صوت)

07-13-2013 06:15 PM
حاج ساطور بيتكلم عن نفسه يامعلم


#720602 [yasir abdelwahab]
3.00/5 (2 صوت)

07-13-2013 05:42 PM
بعيد عنك الضغط والسكري يا رائع...كل الحكاية انو سيادة النائب لمن بقوه نائب..ما كان عندو غير قميصين وكرفته..رسل لي واحد قريبو في دبي وهو رئيس جالية ابناء......... بان يرسل له شوية قمصان وكرفتات...ويظهر انو قريبو كلم ناس الجالية بالموضوع...ويظهر انو كل واحد داير يقدم السبت..وبدا كل واحد يرسل بطريقتو البقج والطرود شي قمصان شي بدل شي كرفتات لمن دواليب عمنا امتلات وفاضت وطفحت....


#720598 [العريان]
5.00/5 (4 صوت)

07-13-2013 05:37 PM
الحاج آدم يحكي عن نفسه .. عندما كان لديه قميصان قبل 89 .. و دواليب الخلق مليانة ..

اما بعد ربع قرن فقد امتلأ دولابه .. بينما جفت دواليب الخلق ..

و كل اناء بما فيه ينضح ..


ردود على العريان
United States [عمر] 07-14-2013 06:52 PM
معظم الإنقاذيين يخونهم التعبير في مبتغاهم عند المخاطبة لأن فاقد الشئ ليس عندهـ مايعطيه، عليه تجد كل مخاطباتهم مرتجلة، مكرورهـ و خالية من المضامين التي يرجاها المواطن والغرض منها شغل و إستهلاك الوقت.


الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة