المقالات
السياسة
فنان الطنبور المعروف عبود تبوري ضيفاً خفيف الظل
فنان الطنبور المعروف عبود تبوري ضيفاً خفيف الظل
07-24-2013 08:33 PM

علي خيمة صحيفة (الاوائل) الرمضانية اليومية والتي تستضيف طوال الشهر الكريم كل يوم واحد من نجوم العالم .. تخصص عددها اليوم (الاحد) لاهل الطنبور وفي مقدمة نجوم الطنبور يأتي اليوم الفنان (الفنان) عبود تبوري
ـــــــ ــــــ ــــــ ــــ
(الحاره ما مرقت) ذكري رمضانيه عالقه بمخيلتي
أحرص جداً علي ختم القران اكثر من مره
جعفر السقيد (فرفورنا) والنصري مصطفي سيداحمد وود الشريف سيد الاداء الحركي والنفس الطويل وصديق احمد (وردي) غناء الطنبور
ــــــــــــــــــــــــــــــــــــــــــ
في البداية نرحب بك ونشكرك على قبول دعوتنا لك
انا الذي يجب ان ابدأ بشكركم وتقديرنا لكم البلا حدود .. نشكركم ونقدركم وانتم تحملون هذه الامانة وهذا العبئ الكبير .. ربنا يعينكم ويقدرنا علي جزاكم .. واتمني انو ربنا يوفقنا وكل ما طلبتمونا تجدونا تحت الخدمه انشاء الله .
عبود تبوري او (عبود القرير) هو الاسم الفني .. ما هو الاسم الأصلي ؟؟
ــ ابراهيم محمد عثمان ..

ماذا يعني لك رمضان؟
ــ هو شهر التوبه والغفران .. وهو شهر الجلوس مع النفس ومحاسبتها (وزي ما تقول) الواحد بيكون قريب من ربو .. وهو في نفس الوقت فترة استجمام ونقاهه ومراجعه لكل أيام السنه المتبقيه وما قام بعمله فيه .. ومحطه لتجديد النشاط .. وتفرغ نفسك للإنطلاق الجديد .

اول سنه بدات فيها الصيام.. متى كانت؟
ــ وانا عمري حوالي تسعه سنوات .. وطبعاً البدايات العاديه .. تصوم وتفطر .. يوم يومين .. الخميس والجمعه ونحن آنذاك مع شقاوة الصبا الاول وبرنامج الأطفال في البلد .

من هو أول شخص فكرت أن تقول له.. كل عام وأنت بخير بحلول الشهر.. ؟
ــ المدام (انتصار سعيد نوار ــ أم محمد وعسجد) ربنا يديها الصحه والعافي

شخص توجه له التهاني الآن مباشر !؟
ــ أخواني وأخواتي وكل الأحباب والاصحاب بالداخل وبدول المهجر .

من أول من تستقبل منه عادة تهنئة رمضان ؟
ــ الحاجه الوالده (رحمة الله عليها) والوالد (أيضاً له الرحمة والمغفرة ونسال الكريم ان يتقبلهما القبول الحسن) .. كنت احرص وأينما كان تواجدي داخل او خارج السودان .
ماالاختلاف بين رمضان زمان ورمضان الان ؟
ــ زمان ما كان في مويه بارده ولا مكيف ولا مروحه .. كان صيام (معلوم) .. أصلي .. مشقه شديده خالص .. طول النهار وانت صائم وتعبان وفي الاخر تجي المساء مويه من الزير .. الليمون والحلومر كلو مويه من الزير (بس) .. كان في قناعه شديده .
اما الان فالحمد لله .. المكيفات والماء البارد .. حتي في كل الاقاليم .. الامور متيسره والما عندو تلاجه التلج بيجي .. والكهرباء والحاجات دي كلها سهلت وجعلت للصيام طعم مختلف شديد من صيام زمان .
ما أكثر الأوقات روحانية لديك؟ .. صف شعورك وقتها ؟
ــ بين العصر والمغرب .. الزمن ده بالتحديد بتسبقه قراية القران .. أجد نفسي فيه شديد .
على ماذا تشمل مائدة إفطاركم ؟
ــ الأساس البليله .. ويتبادل اللقمه (العصيده) والقراصه .. وكذلك لا ننسي السلطات والشوربه (ودي بقي أهم حاجه) .

ذكريات طفولتك في رمضان هل ما زلت تحتفظ بشي منها.. ؟؟ أول صيام لك.. هل كنت تأكل من ورا أهلك..؟؟
ــ هذه من الطرائف .. طبعاً عوم البحر في رمضان شئ أساسي .. وكنت اغتس (أغوص) وأكركع الفيهو النصيب (قالها ضاحكاً) .
وفي البلد كانت قديماً (لا أدري أهي مستمره حتي الان أم انها اندثرت) هي الحاره (الحاره ما مرقت) ده كان يوم اساسي ولازم تفطر فيهو .. يتلملم الصغار ويدخلون جميع بيوت الحله .. ويأكلون منها جميعاً .. (غالباً وشي الفته ـ تلقط اللحيمات وتنطلق للبيت الاخر) .
أفضل أطباقك الرمضانية..??
ــ البليله (هذه وارثناها من الاباء والجدود)
والطبق الثاني (القراصه) .. أكل خفيف وبيريح الزول ولا يغلط عليك ولا شئ .
يتضايق الكثيرين من العمل او الدراسة في ايام رمضان ويقولون الصيام شاق ::: ومتعب .. هل تعتقد انك منهم .. ؟
ــ انا لست منهم .. لازم الزول يتحرك ويشتغل اقلاها حتي يحس بي طعم وحلاوة الصيام .
::: هل تحرص على أخذ إجازه في رمضان أو تفضل الدوام خلال هذا الشهر ؟
ــ أفضل الدوام
::: هل تتابع التلفاز ... أفضل البرامج عندك..?
ــ ما كتير (حاجات بسيطه) .. لو وجدت مسلسلات دينيه (رياضه طبعاً في رمضان "الحمد لله" مافي) .. وغالباً بعض البرامج الحواريه .

::: ذكرى ما تنساها في رمضان.؟
ــ ذكري زياره مع الاستاذ صديق احمد (ربنا يديهو الصحة والعافي ويمد في ايامو .. ومن هنا نقول له كل سنه وانت طيب) للأستاذ الراحل محمد وردي (له الرحمه والمغفره) في منزله .. دي ما انساها ابداً .. وكانت سهره وأمسيه ولا اروع .
::: كيف يكون برنامجك أول يوم بالعيد ؟
ــ البرنامج المعتاد .. صلاة الصبح وتستعد لصلاة العيد وبعد داك المعايده علي الجيران وبعدو ترجع البيت تفطر ويبدا البرنامج الاسري الممتد .
::: موقف محزن حدث معك في الشهر الكريم؟
ــ (... ده خلو ده ...)
::: أشياء تتجنب فعلها برمضان؟
ــ الإختلاط المجتمعي المن غير حدود .. والمكيفات لست من ناسها "الحمد لله" .. والاهم لعب الورق .

::: اشياء تحرص على فعلها برمضان ؟
ــ أحرص جداً علي ختم المصحف الشريف أكثر من مره .
::: هل تفضل الإفطار في منزلك أم عند الأهل أو الأصدقاء؟
ــ في الشارع .. أمام المنزل .. ودي احلي حاجه .. مع الجيران وكده .
::: شخص تحب ان تدعوه على مائدة الافطار ؟
ــ كل الاسره .. لمة الاهل هذه شئ اقدسه انا تماماً
::: هل تمارس الرياضة في هذا الشهر المبارك؟
ــ نعم (خارج النص : بهذه المناسبه .. كنت انا زمن الشباب لاعب كره ماهر .. لعبت درجه) لكن الان بقينا علي الرياضه البسيطه .
::: من الشخص الذي غاب عنك وتتذكره في هذا الشهر الكريم؟
ــ والدي (رحمة الله عليهم)
:::: هل تقل ساعات دخولك للنت برمضان.. وماهي الاوقات المفضله؟
ــ خفيف خفيف .. فقط للتواصل وتشوف الحاصل شنو .. ليس هناك زمن معين .
::: هل سبق أن أكلت أو شربت وأنت ناسي ..؟
ــ نعم
::: إذا كانت الإجابة بنعم ، أذكر الموقف ؟
ــ كلها مواقف عاديه وتنتهي بالضحك والونسي
ماهي البرامج والمسلسلات الرمضانيه التي تحرص على مشاهدتها؟
ــ المسلسلات الدينيه
::: عادة سيئة تتمنى زوالها في رمضان ؟
ــ والله المعاكسات في التلفون دي اكتر حاجه اتمني انها تختفي .. والأكل "التيك اوي" والكاشف الفي الشارع .. والغيبه والنميمه وكده .
::: عادة حسنة في رمضان تتمنى استمرارها في باقي الشهور ؟
ــ النظافه خاصةً في الشوارع والنظام والهدوء الذي يسود المجتمع في رمضان .. والتسامح .
::: ماذا تفعل بعد صلاة التراويح ؟
ــ الإلتزام الاسري في رمضان بيكون صارم جداً وبيكون عندها مساحات كبيره .. بعد التراويح دي لازم اتواجد فيها في المنزل مع الاسره ..ولا باس من بعض الزيارات الخفيفه بصحبة الاسره .
::: تحرص على التواصل مع الاهل والاقارب؟
ــ أكيد .. أكيد
:::: نخرج بك قليلاً من جو الصيام ورمضان .. كثير من فناني الطنبور طريقة اداءهم تشبه اخرين من الغناء الحديث او ساحة الوسط .. رايك في هذا الكلام ؟؟
ــ والله دي حقيقه .. وانا اذكر قلت حديث قريب من هذا قبل ذلك .. وقبل ذلك احب ان اتوجه اليهم جميعاً بالتهاني القلبية الصادقه بمناسبة الشهر الكريم .. وربنا يقدرهم علي حمل المسئوليه والعبور بفننا وتراثنا هذا لساحات ارفع وأرضٍ جديده .
ــ مثلاً :
* الأستاذ صديق احمد (مد الله في اايمه) هو كبيرنا ومحمد وردي اغنية الطنبور .
* وقرشي الحجير : دائماً بيذكرني الاستاذ عوض الكريم عبد الله .. طريقته في الاداء والصوت .
* جعفر السقيد : فرفورنا .. حبيبنا وصديقنا صاحب القلب الابيض والابداع الشباب
* محمد النصري : الأداء الرايق المميز يذكرني الاستاذ الفنان (الراحل المقيم ــ له الرحم) مصطفي سيداحمد .
* عبد القيوم الشريف : النور الجيلاني .. هو سيد الاداء الحركي والنفس الطويل .
* ميرغني النجار (الاستاذ) ده ملك التطريب والاداء الراقي .. حبيبنا وصديقنا وأهمس في اذنك (ده المفروض يكون فنان الطنبور الاول .. الا الدنيا ما بتدي حريف) وهو في قلوبنا وعند اطراف اشتهاء الطرب والابداع فينا .. ربنا يديهو الصحة والعافي .
ــ كلمه توجهها لعباد الرحمن في هذ الشهر الكريم؟
الالتزام بالشهر الفضيل .. أمور الدين ، واهم شئ الصدقات وقراءت القران .. والمساكين ديل اهم شئ

عبد العزيز الننقة
[email protected]


تعليقات 5 | إهداء 0 | زيارات 2027

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#729554 [ابو عفان]
1.00/5 (1 صوت)

07-25-2013 11:02 AM
حرام عليك ما تذكر محمد جبارة ودا احرف من يعزف الة الطمبور في السودان وصاحب الحنجرة الذهبية
ام عنك شلليات يا تبوري .. التحية للفنان محمد جبارة ورمضان كريم .


#729470 [العمده قاسم امين]
2.50/5 (2 صوت)

07-25-2013 07:24 AM
عبود تبورى الرجل القريب للقلب كل سنه وانت طيب ورمضان كريم واخونا الرائع الننقه لك عاطر ودنا وانت تلامس الوجدان عبر الرائعين من الشعب والقريبين لى وجدانه
عبود تبورى كلامك لامس ويلامس دائما الوجدان والله نزلت دمعه حزينه عند اجابتك من هو الشخص الذى تتمنى وجوده ف رمضان وكان ردك الوالد له الرحمه غالبتنى دموعى ونزلت لوالدنا ووالدك الف رحمه على ارواحهم وجميع اموات المسلمين
تبورى ما عارف ليه دائما احسك زى النيل الفى البلد الاصلو ما بفارق ضفافنا
بعد بقت الخرطوم قريبى والجنيات بقو هناك ناس السقيد والنصرى وباقى العقد الفريد منهم بقيت احس انهم شايقية بندر بس تبورى يظل دائما ملح البلد وريح ترابها
تبورى الكلام معك وعنك ذو شجون وانت قريب قريب للوجدان لانك صوره للبلد الشماليه اتمنى ان القى متسع واكتب عنك لانك اهل لكل جميل لكم ودنا تبورى والننقه


#729333 [ما عندى اى اسم]
1.00/5 (1 صوت)

07-25-2013 12:26 AM
الفنان عبود تبورى مبدع بحق وحقيقة جمال ابوشمة


#729301 [البعاتي]
1.00/5 (1 صوت)

07-24-2013 11:35 PM
عبود تبوري صوت مميز، دائماً ما استمع له في اغنية " ريدكم لي شديـد يـا يابـا ريـدي أنـا للبريـدو شديـد "، مع الأستاذ صديق احمد ...


#729243 [سودانى طافش]
5.00/5 (3 صوت)

07-24-2013 09:25 PM
( تستضيف فيه كل يوم واحد من ( نجوم ) العالم ) .. والله حيرتونا !


ردود على سودانى طافش
United States [عبد العزيز الننقة] 07-30-2013 05:29 PM
ايوه واحد من نجوم العالم
شنو المشكله ؟؟؟


عبد العزيز الننقة
عبد العزيز الننقة

مساحة اعلانية




الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة