المقالات
الشعر
قصيدة ...الضحية والجلاد
قصيدة ...الضحية والجلاد
12-15-2010 08:12 AM

الضحية والجلَّاد
عيسى إبراهيم


إلى \"البِنَيَّة\" الرمز والقضيَّة ، إلى \"القشَّة التي قصمت ظهر البعير السوداني\"، إلى التي كشفت دعاوى النخوة والرجولة، إلى التي كشفت المستور، وأخرجت المقبور، وفدت حرائرنا، أُفدِّيك بكلِ غالٍ ونفيس، إن كان هناك من غالٍ ومن نفيس سواك، ولن تكوني وحدك أبداً في الميدان..(يبقالي فتحتي الما بنسده)..(إلا بي راجلاً تِلِب راضع لِبا أمُّو) هل تذكرين حبيبتي، ونور عيني، \"مقتل أنديرا غاندي؟!!\"..

نادت أُمَّها وقِنْعَتْ من الباقِين
والسوط داهَمَا من راسا للكرعين
لا خلا الأباط لا النَحْرِ لا الخدين
والحولك وحوش لا زين ولا زينين
فرتاق حافِلُنْ أنا في رجاك لِمتين؟!
بنعيلك رُجال كانوا بيكيلوا العين
أنا ما مِنَّهُم أنا في الخَرابْ كومين
هطَّال للدموع أمسح شمال ويمين

يا شعبي الكريم قشَّاش دموع العين
رحَّام لليتيم لَحَّام كسور البين
لَحَّاق للضُعَاف غَتَّاي عُروض أم زين
ستَّار للعرايا كشَّاف فعايل الشين
انا راجيك دَهَرْ حرَّمت ماك ضنين
أزْأرْ زَأرتك وكسِّر فروع النيم
واطلع طلعتك علِّم بليد وغشيم
شِنْ راجيهو بس؟ باطِل معاهو لئيم
والشيطان يمين في كيدو ما هو عظيم
أهون من هوان ضعيف هزيل وسقيم
والوالاهو زَيُّو ذميم مصاحبو زنيم

البت أم وضيب اتعاوروها عساكر
بي سوط العنج إلا الضمير مو حاضر
داك يضرب شمال والتاني ضربو مشاتر
والمسكينة تصرخ يا يُمَّة دايراك ساتر
ما رحمو البنية \"غزال تهاجمو كواسِر\"
شقيش ما يقبِّل يلقاهو سوطاً جاسر
والقاضي اللئيم واقف حداهو دساكر
لا سِمعو الصياح لا بجبرولُن خاتر
الجُرم الأكيد قالو اللباس مو ساتر
واللابسين عرايا من الضمير الظاهر

يا شعبي العظيم جاييك عندي شكيَّه
إنت الصبر فُتُّو بقياسنا فُتَّ الميَّه
صابر راجي مين الشينه ما محريَّه
ديل أنجال لهب ما جابتُم مرضيَّه
أكتر من كِلاب طرَّاد أمامو ضحيَّه
في ظاهرو الضحك وفي باطنو ألف أذيَّه
أصحا كفاك صبُر ما تخدِّرك شرعيه
الكِضِب انكشف مو دين هديك دنِيَّه
أكلو الدنيا بي دينك وزادو شويَّه
عَرضَك ما حموهو وطَبَقُولَك إنتَ الكيَّه

عيسى إبراهيم


تعليقات 3 | إهداء 1 | زيارات 5794

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#59327 [احلى الامسيات]
1.00/5 (1 صوت)

12-15-2010 05:14 PM
انا انتا من الناس البكسرو التلج لنافع المانافع
صح ماتنكر وماتجى لراكبتنا تانى @عارف المقف الحصل دة والبت الدقوها دى لو الواحد علق ب لفظ تفووووووووووو عليكم بيكفى @بس يا انا ماتوقعتها منك ارجل وربنا مايوقعك وحدة من بنات اهلك فى ورطة مع عينت قدو قدو@سلاااااام


#59216 [انا]
1.00/5 (1 صوت)

12-15-2010 01:48 PM
معبرة شنو ياخ -ماسمحة ولا اي حاجة-قصيدة زي الدقداق تقول كتبهافي لوري-وانا استعديت قال اقرا لي حاجة في المليان دا متشاعر ساكت ويستاهل الجلد-ضرستنا عديل لافصحي لاعاميةاظنك خريج مرحلة الاساس بتاعت الانقاذ من مساؤي التعليم ودا نموذج


ردود على انا
United Arab Emirates [عمر] 12-16-2010 08:57 PM
أنا؟؟؟؟ قال أنا انت ماعارف اسمك دا اتعوزو منو؟ انت شنو ياخي تعرف انت منو ؟ انت تافــــــــــــــــــــــــــــــــــــــــــــــــــــــــــــــــــــه

United Arab Emirates [القذافى ] 12-15-2010 02:39 PM
اولا انت ياانا ما عندك موضوع والقصيدة بسيطة ومعبرة وانتة يظهر عليك من الرجال الفقدو نخوتهم او تكون من المؤتمرجية لانك بايخ جداً ونحترم الشاب الكتب القصيدة والله معبرة جداً لاى يزول برفض الظلم وان شاء الله يانا ربنا ما يوقع قريبتك فى جلدة زى دى


#59091 [عدو الظلم]
1.00/5 (1 صوت)

12-15-2010 11:03 AM
قصيدة والله معبرة تنم عن انفعال صادق استفزه غدر الغادرين شواذ وعار السودان المافهيم راجل اشباه الرجال وما رجال والله الواحد لو ختوا في موقف البت ده كان صرح اكتر منها


عيسى إبراهيم
مساحة اعلانية






الرئيسة |المقالات |الأخبار |الفيديو |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2016 www.alrakoba.net - All rights reserved

صحيفة الراكوبة