عزيزي وزير الداخلية
07-31-2013 02:49 PM


(السيدة نسرين) مغتربة حضرت إلى الخرطوم في إجازتها ، تقول الحكاية أنها في يوم الأربعاء 17/7/2013م الموافق 9 رمضان الحالي 1434هـ ذهبت لمكينة الصراف الآلي (ATM) لتصرف بعض المال وبعد أن قامت بالسحب وخرجت لاحظت أن هناك شخصين يراقبانها وهما يمتطيان دراجة بخارية (موتر) !!
ركبت سيارتها وانطلقت نحو شارع النيل ظناً منها بأن ذاك الشارع مأهول وآمن لا سيما أن الساعة كانت الثانية عشر والنصف ظهراً (منتصف النهار) !! لكنها أخطأت التقدير حيث لحقا بها وطلبا منها الوقوف !! لكنها لم تستجب لهم فزادا من سرعة الموتر ووقفا أمامها مباشرة وأوقفاها تحت تهديد السلاح (مسدس) ووضعا الموتر أمام السيارة حتى لا تهرب !
تقول السيدة (نسرين) : العربات كانت تمر قدامنا عااادي والناس تبحلق فينا وتمشي كأنو مافي حاجة واحد ساكت كلف نفسو يقيف يسأل مافي !!
جاءها (المجرمان) ووقفا بجانب أبواب السيارة:
- إنتو منو ؟ وعاوزين مني شنو؟
- معاك الإستخبارات (بطاقات عليها صورهم)
- عاوزين مني شنو؟
- العربية دي مشبوهة ولازم نفتشا .. جيبي رخصتك
- رخصتي نسيتا في البيت
- سوقي قدامنا وأمشي معانا القسم عشان نوريك الأدب هناك (بعد ما ركب واحد معاها) !

تقول السيدة (نسرين) : مشينا في شارع النيل الزول السايق الموتر (ورانا) وزميلة في الكرسي القدام معاي .. ولمن جينا لى شارع فرعي كده قال ليا أدخلي بالشارع ده بعد ما دخلتا قال ليا أقيفي هنا قمتا وقفتا وفي اللحظة دي الزول السايق الموتر الكان مبارينا وقف (الموتر) وقال ليا (أنزلي) قلتا ليهو (ما بنزل) طوااالي فتح الباب الوراء وقعد يضرب فيني في راسي ووجهى وزميلو القاعد في الكرسي القدام حاول يسحب (مفتاح العربية) لكني كنتا أسرع منو شلتو ختيتو في شنطتي قام ختف الشنطة وطلع ليا المسدس وقال ليا :
- (الليلة ح نعلقك من عراقيبك عشان تقاومي تاني) !!
تقول السيدة (نسرين) : بينما أنا على تلك الحالة من الخوف والذهول والبكاء والنحيب مر شاب يسير على رجليه وبشهامة السودانين أراد أن يتدخل لإنقاذي من هذه العصابة فشهرا في وجهه السلاح قائلين له :
- يا زول زح بعيد أوعك تتدخل نحنا إستخبارات
ولم يكتفيا بذلك بل أوسعاه ضرباً وركلاً حتى جري أمامهما ثم ركبا (الموتر) مبتعدين عن مسرح الحادث بعد أن أخذوا الشنطة والتي كان فيها مبلغ 4 مليون و100 ألف جنيه + جوال سامنسونق S-4 + جهاز جالكسي Note-1 إضافة لمفتاح السيارة !!

لم تستطع المسكينة أن تتصل على أي أحد من معارفها ليحضر لنجدتها نظراً لعدم وجود جوال معها ولا تحفظ أي رقم لتتصل عليه من جوال أي شخص يمر بالطريق !! إلى أن قيض الله لها رجلاً شهماً كريم الخلق جاء إليها وسألها عما بها فقصت عليه قصتها فأخذها في سيارته وأوصلها لبيت أختها في (العمارات) بل لم يكتف بذلك بل قام بأحضار ونش سحب به سيارتها من مكانها الذي نهبوها فيه لكيلا يعودوا ويأخذوها حيث معهم (المفتاح) ووضعها بالقرب من بيت أختها ووقام بدفع أجرة الونش من (جيبه الخاص) وقد ذكر لها بأنه قد تعرض لموقف مشابه قبل فترة حيث تم إيقافه بواسطة أشخاص يحملون بطاقات (رجال أمن) أيضاً، لكن لطف الله أعماهم عن المبلغ الكبير من المال الذي يخص الشركة التي يعمل بها والذي كان في (ضهرية العربة) !!

تواصل السيدة (نسرين) :
بعد فترة جاء عمي وزوج أختي وأبن عمي وذهبنا للشرطة والمباحث والإستخبارات الذين عرضوا علينا صوراً لبعض المشتبهين لكنني لم أتعرف على أي احد منهم وأعترفوا لنا بأن هناك حالات كثيرة من الإختطاف والقتل والسلب والنهب أرتكبت من أشخاص يدعون أنهم يتبعون لجهات أمنية !!!!!

سؤال للأغبياء :
إذا كان بالإمكان نهب مواطن في (شارع النيل) وعلى مقربة من (القصر) في منتصف النهار فهل يمكن نجدة مواطن في شارع (الوادي) وعلى مقربة من (المقابر) في منتصف الليل؟

كسرة :
لو الناس ديل من (جهات أمنية) تكون مصيبة .. ولو كمان (منتحلين) شخصية (جهات أمنية) فالمصيبة أعظم يا عزيزي وزير الداخلية .. !

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو)؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو)؟
About these ads


تعليقات 35 | إهداء 0 | زيارات 8098

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#735450 [انيه جوادا انيه كيرادا]
3.13/5 (5 صوت)

08-02-2013 02:50 PM
يالفاتح جبرا
كل يوم بتثبت وبجدارة انك " اس هووووووووووووول من الفيرست كلاس" زى خط هيثرو البتبكى عليهو


#735025 [هاجر حمد]
2.88/5 (5 صوت)

08-01-2013 10:07 PM
الساخر المعروف الصحفي محمد توفيق اتهموه بالسطلي فرد ساخرا وشنو الما بخليك تسطل؟ ونسوان اتنين سمعن ودالفراش في الراديو يقول :
انا شوك الكتر كان جرجروني
انا رحل الكحل ان ميلوني
انا الجن البخلي الزول ينوني
التفتت احداهما الي الاخري يحرقة وغيظ : في ذمتك دحين دا ما سوق الايامات ديل ؟ وشنو الما يخليهن يسطلن ؟


#734918 [Adam Ibrahim]
2.75/5 (5 صوت)

08-01-2013 05:55 PM
على الارجح هم فعلاً جهات امنية.. فى الزمن ده اغلب منتسبى القوات النظامية بيسيئوا استخدام صلاحياتهم بلا حسيب او رقيب.. وكل يوم تحدث حالات نهب وابتزاز وتحرش جنسى تحت غطاء البطاقة النظامية(الكارنيه).. والمؤسف انو المواطن لا يعلم حقوقه وواجباته بما يتعلق بالتعامل مع الاجهزة الامنية ومافى اى توعية من وزارة الداخلية بهذا الخصوص.. مثلاً هل يحق لعنصر استخبارات توقيف اى مواطن وتفتيشه فى الشارع العام بدعوى الاشتباه؟.. هل يحق لعناصر الشرطة تسور حائط المنزل دون امر تفتيش من النيابة؟.. ولماذا لا يطرقون الباب؟.. هل هناك وحدة تابعة للداخلية مختصة للتعامل مع مثل هذه الجرائم وتتلقى شكاوى الضحايا عبر خطوط هاتف مباشرة؟..


#734866 [8855]
2.88/5 (5 صوت)

08-01-2013 04:30 PM
في الحقيقه انه لشئ مؤسف جدا ان يحدث هذا في السودان الذي عرف عنه الكرم والشجاعه والمروءهه والحمد لله السوداني في بلاد الغربه كاانت ومازالت سمعته طيبه جدا, ولكنها الضاءقه الماليه والانفلات الامني وانتشار السلاح وتعدد الاجهزة الامنيه بلا ضبط ولا رقيب وهذه مشكله كبيره ومسؤلية الحكومه التي جندت هؤلاء وتركتهم دون مراقبه ومساله .


#734693 [الصادق]
3.13/5 (5 صوت)

08-01-2013 01:30 PM
اين رجل الامن من المفروض يكون امام كل صراف الى وبنك وان لا يكون حاملا لموبايل مثل رجال المرور الذين ينشغلون بالموبايل والجريده ولا يهتمون بالمرور


#734663 [ابو نصر الشمالي]
3.25/5 (5 صوت)

08-01-2013 01:07 PM
يا استاذ جبر ا ديل من جهات امنية وبطاقتهم صحيحة .. النهب حاليا في الحرطوم من السادة الامنيين


#734627 [محجوب عبد المنعم حسن معني]
2.25/5 (5 صوت)

08-01-2013 12:35 PM
الاربعاء كان 8 رمضان يا عم جبرة


#734607 [ود الجد]
2.88/5 (5 صوت)

08-01-2013 12:13 PM
اطلب من البنوك عمل كاميرات مراقبة خارجية للصرافات لانها اصبحت اماكن يتم معرفة من المعاهو فلوس ومنثم التهجم عليه


#734511 [ابو ابراهيم]
3.25/5 (6 صوت)

08-01-2013 10:39 AM
يا اخوي انت قاعد تنفخ في قربه مقدوده الله المستعان صدقني مع هؤلاء الناس كل واحد يحمل سلاحو عشان يحمي نفسو


#734470 [شطة حارة جدا]
2.85/5 (6 صوت)

08-01-2013 08:00 AM
بتمباكم ووساختكم تستاهلوا رئيس دكتاتورى يرميكم فى الافران


#734454 [دقن محننه وكروش مجننه!!]
2.75/5 (5 صوت)

08-01-2013 05:36 AM
بكره مكتب وزير الداخليه يجيب ليك رد بانو تم القبض علي اللصان واعترفوا بزنبهم وتمت مصادرة الموتر!!طبعا ات ما حتمشي تشوف ويدوا المره اربعة مليونه انشاء من حافز اللؤات مش من حافز الوزير !!ويقوليهم ده عشان نغطي فضيحتكم والزعلان منشيل باقي الحوافز البتاخدوها عمال علي بطال وله منشيل الكاكي كلو!!!!


#734449 [دقن محننه وكروش مجننه!!]
2.88/5 (6 صوت)

08-01-2013 05:29 AM
يعني الصراف بقه مراقب من قبل اللصوص!!وممكن يقطروك من البنك!!الغريبة شارع النيل ملان مرور ديل ماشرطه مركزين مع الهايس بس وجباية كل يوم!!!


#734441 [المتفائلة جدا]
3.75/5 (5 صوت)

08-01-2013 05:01 AM
يارب خذ هذه العصابة التى تحكم السودان أخذ عزيز مقتدر اللهم يا على يا قدير نسألك ببركة هذا الشهر الفضيل أن تتطيرهم مثل طيرة مرسى من الكرسى...
اللهم ندعوك مثلما دعتك إمرأة مصرية يارب نصوم رمضان بدون إخوان ونحن ندعو الله أن نصوم رمضان بدون كيزان وأن يعيش الشعب بعدهم فى أمن وأمان يا عزيز يامنان..


ردود على المتفائلة جدا
United States [osama dai elnaiem] 08-01-2013 12:06 PM
اللهم امين يارب العالمين فانهم لا يعجزونك فقد منع فسادهم عنا المطر وباعترافهم وجف الضرع واغتصبت الحرائر اللهم شتت شملهم وانزل عليهم من جنودك ما يقصفهم كما اصحاب الفيل بحجارة من سجيل مسومة باسم كل منافق منهم واخر دعوانا ان الحمد لله رب العالمين .


#734408 [هنويه]
3.13/5 (5 صوت)

08-01-2013 03:10 AM
لو كان البوليس يريد محاربة هذه الظاهره قبل ان تستفحل لما غلبه ذلك.

حمله لمدة شهرين وبعدد 20 او 30 بوليس ومعاهم كم متطوع يعملوا كمين فى المناطق المشبوهه امام اجهزة الصرافات او البنوك او السوق مع مراقبه لاصحاب المواتر....الخ وح يقبضوا على عدد من المجرمين ويبثوا الرعب فى قلوب البقيه ولكن صمت البوليس وعدم التحرك او حتى نشر تحذير للمواطنين امر يدعو للشك فعلا

االله يكضب الشينه


#734364 [ود نفاش]
3.00/5 (5 صوت)

08-01-2013 01:34 AM
هذه بسيطه واتوقع اكثر من ذلك
ثم من هو وزير الداخلية
ان الامن مفقود وعرباتهم تتجول فى الشوارع بمال هذا الشعب والبشير يرقص ونافع يتنتر
الناس ما عايشه معانا فى السودان عايشة فى دولة التمكين والنفره الكذابة
كما قلت مرارا هذه اسوء حكومة تمر على السودان والله اعلم يكون فى اسوء منهم
وللعلم المواتر 99 منها غير مرخص ولا يحمل نمرة اصلا
ولسع الساقية مدوره
الشرطة تحتاج لتطهير والامن عصابة
والله يكون فى عون السودان ما دام البشير فى الحكم


#734359 [مقبون]
3.79/5 (6 صوت)

08-01-2013 01:15 AM
قصة قصيرة:
جاء الرائد ........ الي طابور الدفعة الجديدة المشكل في شكل قلعة
للدفعة ... شرطة والمكونة من اكثر من 500 شرطي
الرائد : ياحضرة المساعد الليلة حصلت لي حاجة غريبة خلاص
المساعد:
شنو يا سعادتك ,,,؟
الرائد :
عارف لفيت الخرطوم دي زقاق زقاق وحراسة حراسة وسجن سجن
لقيتلك البلد آمنة ولا مجرم واحد مافي , ولا نشال , ولا حرامي , ولا سكران ,لا شماشي
المساعد :
كيف الكلام ده سعادتك ؟؟؟
الرائد:
ايوه لكن بعد ماجيت مركز التدريب هنا عرفت السبب . اتاري المجرمين كلهم لميتهم هنا
في الدفعة دي !!!
الطابور:
هممممممممم
المساعد:
امنع الكلام هناك . هور للخاريييج دور.

انتهت القصة.

صدق الرائد دون قصد.


#734325 [cour]
2.25/5 (5 صوت)

07-31-2013 11:49 PM
سير سير يابشير نحن وراك لحماية الدين والعقيدة. على فكرة البطلة دى انا بعرفة كويس وهى طابور خامس من الماجورين


#734324 [لبيب]
2.91/5 (6 صوت)

07-31-2013 11:48 PM
والله خليك من هؤلاء المزيفين والمحتالين الواحد يخاف من الشرطة والمباحث الاصلية.لو السيدة دى مشت عشان تعمل بلاغ واجراءات رسمية سوف تخسر ضعف المبلغ واديكم من الشعر بيت ناس المباحث عارفين اى حاجة وعشان يرجعوا ليك حاجاتك ستكون هنالك مساومة وادينا حق الفطور والامجاد والليلة وبكرة وعيييييك.


#734322 [ابو عبد الله]
2.94/5 (5 صوت)

07-31-2013 11:47 PM
عشان كدا عايزين ليكم واحد زى صدام حسين يحكمكم ويرمى اى مجرم فى الفرن.. تقولوا لى عايزين ديمقراطية؟؟


ردود على ابو عبد الله
United States [sadamhusain] 08-01-2013 03:21 PM
انا جاهز يا معلم


#734309 [ودالشريف]
3.75/5 (5 صوت)

07-31-2013 11:17 PM
عزيزى الفاتح جبرا هذا هو حال السودان في ظل المشروع الحضارى نهب وسلب في وضح النهار والعجيب انهم يحملون بطاقات امنية او شرطية تعرف لييه لانه البلد خربانة من كبارها والفساد في اى شي حتى في تعين رجال الشرطة والمباحث يهمهم الولاء ولايهمهم امن المواطن لانه من الاستحالة يقبل شريف ان يعمل بلطجى ونحن في دولتنا حاميها حراميها نسال الله ان يعجل برحيلهم فقد افسدو البلاد والعباد


#734235 [حامدين]
3.54/5 (7 صوت)

07-31-2013 06:19 PM
مليون الف مره قلنا ليكم ناس الامن والاستجبارت والشرطه كل منتسبى هذه الاجهزه الامنية هم ذاااااتم مجرمين و لصوص محترفين و اهل سوابق دخوا هذا الاجهزه حتى يحموا انفسهم ويمارسوا اجرامهم بارتياح وتحت غطاء القانون لذالك اذا فى شارع النيل او امام باب الداخلية وحتى لو الضحى شو المشكلة مادام هم فى حماية القانون نفسه وبعد شوية حاتكون الخرطوم زى كولمبيا





بعدين انت يا بتاع امريكانى عايز تقارن واشطن بالخرطوم معقول بس لكن ممكن تشبها باحياء الزنوج وكر الجريمة والمخدرات والدعارة وتقبل الله صيامك وانت هنااااك


#734204 [سودان جديد]
2.85/5 (7 صوت)

07-31-2013 05:10 PM
من الاول لو القوات النظامية اولاد ناس و بتكلمو مع المجرم والهمباتي وكتال الكتلة بي اسلوب ما كان ادو زول فرصة يحتال على زول .
بمعنى اخر
القوات النظامية هم الادو الفكرة للمحتالين بالاسلوب اياه جنب العربية . اطلع من العربية
اقفل خشمك . الليلة ح نوريك . معاك امن . معاك مباحث . معاك استخبارات . معاك معاك معاك وطبعا كلو بي تخلع ووهمات مصاحبة


#734179 [رمضان]
3.41/5 (6 صوت)

07-31-2013 04:33 PM
لا حول ولاقوة إلا بالله العلي العظيم, وفي نهار رمضاان !!!! , المفترض من المباحث وباقي الجهات الأمنية تتابع الموضوع ده وماتعديهو بالساهل , المسألة وصلت لترويع المواطنين , لازم التعامل مع القضية دي بحسم , وبعدين جهاز الأمن في كل بقاع الأرض مهمته الأساسية جمع المعلومات وتحليلها من غير التعرض للمواطنيين , عشان كده يجب اعادة تنظيم صلاحيات الجهات الامنية وطريقة تعاملها مع المواطنيين لكي لا يستغل ضعاف النفوس أمثال هؤلاء المجرمين البطاقات الرسمية في أعمال كهذه, مثلا في الخليج وأمريكا وكندا واوروبا لايستطيع اي أحد كائنا من كان أن ينتحل صفة رسمية إطلاقا إلا في حالات نادرة جدا ويتم التعامل معها بالحسم المطلوب وأهم من ذلك بالسرعة المطلوبة, لان الصفة الرسمية لاتعني في تلك الدول المحترمة سوى انها تكليف بمهام معينة وواضحة ومراقبة من قبل الجهات العليا ووفقا للدستور ... موضوع مهم جدا ويجب أن يجد منا تفاعل كبير جدا, كل شخص بما يستطيع, واجعلوا مساهمتكم في نشر الموضوع و وردع هذه الطرق الاجرامية الخطيرة صدقة تبتغون بها وجه الله عز وجل في هذه العشر الأواخر من هذا الشهر الكريم ........ بارك الله فيكم وتقبل منا ومنكم الصيام والقيام وجزاك الله عنا خير الجزاء أخي الفاتح جبرا


#734175 [Faroog]
3.00/5 (10 صوت)

07-31-2013 04:25 PM
في مثل هذه نأمل أن تصدر الجهات المختصة تعميم لكل المواطنين عن كيفية التعامل مع مثل هذه الحالات مستقبلا
أعتقد الله لا قدر لو تكررت مثل هذه الحالات ألا يستجيب الضحية وأن يؤمن الأبواب ويتصل على رقم تحدده الجهات المختصة لتلقي البلاغات الفورية
والمسالة عاوزة قوة قلب ورباطة جأش فلا يمكن أن يتورط المجرمون باطلاق نار على الضحية عليه ليس هناك سبب للإستسلام لهم
واضح دائما أو كثيرا ما تكون الضحية إمراة كما سبق وحدث مع د/حرم شداد أيضا في شارع المك نمر
وليعلم الضحية أن الخطورة الأكبر في الاستجابة للإبتزاز وفتح الابواب وجلوس مجرم بجوارك.

نصيحة لا تتوقف أصلا لمثل هذه الملاحقات وإذا أشتدت واستمرت التحرك فورا لأقرب مركز شرطة أو قوة نظامية أو تجمع بشري وطلب النجدة
والله المستعان


ردود على Faroog
[حمودي أبو أحمد] 07-31-2013 09:01 PM
يا خوي شن عرفك إنو ديل ما الأمن زااااتو ؟؟؟ وبعدين الضمنك شنو إنو ما يطلقوا عليك النار !! والبت المسكينة دي مشت شارع (النيل) يعني محل القصر الجمهوري ووزارة الداخلية وكتر من الوزارات !! وأصلو ديل مجرمين ودخلوهم المؤسات الأمنيةفبقوا على عينك يا تاجر يسرقوا وينهبوا وبقا (حاميها حراميها) على قول المثل ودقي يا مزييييكة ...


#734164 [yasir abdelwahab]
3.08/5 (8 صوت)

07-31-2013 04:09 PM
إذا كان بالإمكان نهب مواطن في (شارع النيل) وعلى مقربة من (القصر) في منتصف النهار فهل يمكن نجدة مواطن في شارع (الوادي) وعلى مقربة من (المقابر) في منتصف الليل؟



تعرف يا استاذ جبره وزير داخليتنا الهمام حيرد عليك يقول شنو....
هو المودي المواطن شارع الوادي في نص الليل شنو؟؟؟ ويقفل المحضر في تاريخو المدون....ورقصني يا علي..


#734149 [القافل على كرت ميت]
3.13/5 (9 صوت)

07-31-2013 03:47 PM
تفتكر يا جبرا مثل هذا الوزير (الجعلتي) بكون موجوع على البلد؟!!!


#734134 [ABOALKALAM]
2.88/5 (5 صوت)

07-31-2013 03:34 PM
الجذر الحذر الحذر خاصة ابنائي وبناتي المغتربين هذه حيلة قديمة

يلجاء اليها الحرامية وقطاع الطرق في الخرطوم لنهب الأموال

من الناس ونرجوا من الجميع قبل ان يسحب مبلغ كبير من جهاز الصراف ان

ينتبه اذا كان احد يراقبه فلايسحب شيء وهم يراقبونك في منطقة تغيير العملة

في السوق العربي للهجوم عليك ويدعون انهم من جهاز المخابرات او جهاز الأمن

وتسطيع كشفهم بظهور العصبية الشديدة عليهم والخوف وهم قد يكونوا خائفين

اكثر منك وشايلين بطاقات مزورة يسهل كشفها يجب علي المواطن ان يحمل

رقم شرطة النجدة ايضا للأبلاغ لعل وعسي ورغم انني اعارض دايما في الراكوبة

ولكن جهاز المخابرات والامن لايحتاج ان يطاردك في الشوارع للقبض عليك

بل يجيك في بيتك ويتفاهم معاك الحذر الحذر الحذر


#734132 [أبو محمد]
2.74/5 (7 صوت)

07-31-2013 03:33 PM
علي الطلاق انا بقراء كلامك ده وقاعد في نص العاصمة الأميركية واشنطن علي الحرام الكلام ده ما عندنا والله يعينكم كت دي الحالة ووزير الداخلية ومن خلفه الي آخر عسكري نفر ماتتوقع منهم مساعدة وحتخسر البنت دي مبلغ خرافي ثاني لانه حيجوها ناس المباحث كل مرك مواعيد وادينا حق الفطور وحق أمجاد وانسي وارفعي أيديك لله سبحانه وتعالي وانسي الوزير وشرطته لأنهم مافاضين وقدر أولاد الحلال الموجودين مغلوب علي أمرهم لأنهم اغلية


#734131 [حليل السودان في زمن الانقاذ]
2.94/5 (7 صوت)

07-31-2013 03:30 PM
يا استاذ الفاتح المرة دي وقعت في الفخ اذ ان هنالك انات في هذا الموضوع فكيف لهذه السيدة وبمنتهي البساطة تنفذ اوامر هؤلاء الاشخاص؟؟؟ ولماذا لم تتجه نحو اقرب نقطة بوليسية بدا عن الانقياد لهم وتقود السيارة الي طريق فرعي؟؟؟؟؟؟؟؟ هذه القصة من فبركات سيجارة الافطار...... والله اعلم؟؟؟؟؟؟؟؟؟؟؟


ردود على حليل السودان في زمن الانقاذ
United States [حمودي أبو أحمد] 07-31-2013 09:17 PM
يا ولدناعيب عليك تقول دي قصة من فبركات سجارة الفطور !! شكلوسجارتك كانت قويية الليلةخلتك تقول كدي!! على العموم القصة دي حقيقية وأناواقف على كل تفاصيلها ولصيق صلة ببطلة القصة.. وأنا معاك حليل السودان وحليل أهل الشهامة والرجولة والنخوة الماتو زماااان ..

[واحد] 07-31-2013 06:32 PM
إنت كنت وين ؟قال ليك الناس دى شاهرين ليها المسدس,تقول ماكان تنفِذ؟


#734124 [ودالماحى]
2.75/5 (5 صوت)

07-31-2013 03:22 PM
السيد وزير الداخليه كل عام وانتم بخير -نعم ماحصل يمكن يحصل في كينيا- يوغندا جنوب السودان ولكن ان يحصل في قلب الخرطوم فهذه مصيبه وفى شارع رئيسى - عرفنا الغلاء الذى طحن خلق الله في السودان اليس عيبا في في دوله لها في كل ولايه حكومه بكل اجهزتها وخاصة ان الخرطوم فيها حكومتان وبرلمانان وعدد وزرائهما - اى الحكومتان - اكثر من عدد وزرا الصين - والله عيب .ليس غريبا ان يحدث ان تهاجم امراة هاجمها لصان ايا كان موقعهما عطاله او نظاميين اذ كانا يعلمان ان مسئولين كبار يسرقون المليارات ولا يعاقبون بل تتم ترقيتهم وتحويلهم الى جهة اخرى ليواصلوا نهبهم - قل ماذا حدث لميزانية ولاية سنار وماذا حدث للاقطان والزكاة والحج والاوقاف ومدحت ووووووووو لك الله ياوطنى


#734122 [محمدأقداوي]
2.32/5 (7 صوت)

07-31-2013 03:19 PM
انا لله وانا اليه راجعون...
وصدق الرسول الكريم صلوات ربي وسلامه عليه:
من بات آمنا في سربه معافى في بدنه عنده قوت يومه فكأنما حيزت له الدنيا.. أو كمات قال صلى الله عليه وآله وصحبه وسلم.
الأمن لا يتوافر للمواطن حتى بجوار اهم مكتب من مكاتب الدولة!!
اللهم لطفك بنا يا الله..


#734120 [سامر المدنى]
3.75/5 (5 صوت)

07-31-2013 03:15 PM
ولا حول ولاقوة الا بالله العلى العظيم


#734118 [بابكر عوض الشيخ]
3.38/5 (6 صوت)

07-31-2013 03:14 PM
ماذا حدث في السودان وأين أهل الشهامة والرجولة هل أكلت الخرطوم حراماً نزع الغيرة من أهلهاوماتت قلوبهم وقد صدق الشاعرحين قال :
مررت بالمروءة وهي تبكي فقلت علام تنتجب الفتاة!!!!!!

فقالت كيف لا أبكي وأهلي جميعاً دون خلق الله ماتوا!!!!!


#734113 [غلبان]
2.33/5 (9 صوت)

07-31-2013 03:11 PM
يا جبرة انت بتكلم فى منو ؟!! انا خايف لو الموقف دا حصل لى مرتو ما يعمل حاجة ؟!! و لو قرأ تعليقى دا حا يقول انا زاتى ما بخلى مرتى تحوم براها بالعربية !!!


#734103 [بكري حمد]
3.44/5 (8 صوت)

07-31-2013 03:01 PM
البلد ما فيها امان . عمي نهبوا كل فلوسوا بنفس الاسلوب اشخاص يحملون بطاقات امن في قلب سوق الكلاكة اللفه في عز النهار .


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة