المقالات
السياسة
شمارات النسوان في الطيارة الماشة لايران
شمارات النسوان في الطيارة الماشة لايران
08-06-2013 02:12 PM

السرة: هلو يا سعدية .. ما تقولي أي حاجة أنا عازماك و عازمة الشلة قهوة و شمارات وزنها بالطن .. ربع ساعة و نتلم في البيت
سعدية: غايتو دي أول مرة ما تعملي مسكول يا السرة .. ده معناه أكيد حالة ما عادية .. النبي كان قلتي حرف قبال ما أجي
السرة: يا سعدية خلي النضمي و خليني افتح الباب لناس فتحية و بتول
بتول: في شنو يا حاجة السرة؟ قولي لينا بسراع و الله صبرنا نفد
السرة: الزول ما بهدلو و بهدلنا .. إنتن ما بتتابعن النشرات و لا شنو؟
فتحية: يطرشني كان سمعت حاجة .. إلا الزول ده منو البتتكلمي عنو .. ما يكون عبد .. عبد .. عبد المنو؟
السرة: عليكي الله كماكي غبيانة وزير الدفاع ده كمان بستاهل قعدة بقهوتها كمان؟ إنتي قايلانا فاضيات للدرجة يعني ولا شنو؟
سعدية: يا أخواتي ما تقولن الزول البهدلو منو؟ غايتو في في نشرة قناة الِABC مافي أي حاجة
فتحية: يا بتول قولي الـ MBC عليكي الله ما تفضحينا كل مرة
السرة: الزول البهدلو الزول الكبير زاتو .. قال ماشي وين ماشي لييييييي ايران .. عشان يبارك .. الا ما رجّعوا أول ما قطع البحر الأحمر
سعدية: أصلو ما بصدق! يمكن ما عرفو إنو الرئيس في الطيارة دي؟
السرة: يا حليلك و حليل الما عارفين .. ديل رجعو عشان هو بالذات فيها
بتول: يا بنات أمي تلفون واحد منو ليهم ما بحل المشكلة؟
السرة: تلفون شنو ديل قفلوه في وشو و لا نضمو معاهو تاني
فتحية: حي لكن هو ما بالغ حبيتن كدي .. شلاقة شنو التوديهو لايران و البلد غرقانة
السرة: و من بتين قلبو على بلدو ما قاعد يقتل القتيل و يرقص زي المافي حاجة
سعدية: الشي بالزعل بالجد بعد ما رجعو قال نحلق فوق السيول .. السيل التخمك و تخم الجابوك
السرة: و الله كان تزعلي كده تطقي عديل و هو فايق و رايق .. لا هاميهو الهم و لا خشمو بنطم
بتول: ما قلتن لي .. كان معاه منو في الطيارة دي؟
السرة: طبعا معاه مرتو ودو .. سمعنا قالو ماشة تشتري تياب العيد من طهران ..
فتحية: ودو براها؟ و الله قالوا معاه وفد كامل تخصص شحدة و بلع
السرة: يبلعو اليخنقهم بركة الله في الشهر الفضيل ده
سعدية: لكن المستغربة ليهو .. قالو الطيارة أجرها تأجير .. معقول الكلام ده صحيح؟
بتول: هي شنو هي؟.. الطيارة دي عجلة كمان عشان يأجروها وين طياراتنا؟
السرة: عندك فط طيارتين واحدة دخلوها الورشة و التانية بقت خردة .. في ذمتك قهوتنا دي ما كملناها في طيارة وقعت و طيارة انقلبت و طيارة ولعت
فتحية: الراجل الما بخاف الله ده باع كل حاجة التقل وارثها وراثة .. شيتا سكة حديد .. شيتا أرض .. شيتا بحرية .. الله يستر على النيل
بتول: كان أشوف ودو عاملة كيف؟ .. تلقنها المغصة قاتلاها
السرة: ودو بس المغصة قاتلاها و الله صاحبنا زاتو .. التلقوه بنفخ زيي التور و مادي شلوفتو متر ..
فتحية: غايتو أنا شامّة لي ريحة طلاق .. إلا ياتا فيهن ما قادرة أقول
سعدية: ما قادرة أصدق تاني يكون عندو وش و يقابل الناس
السرة: إنتي ما عارفاهو جلدو تخين و ما بختشي .. أول أمس ما جرى عديل كدي من نيجريا؟
بتول: يا اخواتي الراجل ده يبقى جاري ز يده لحدة بتين؟
السرة: و الله قربت بالحين إلا كترن البن .. و قريب ده برنامج الشمارات حيكون حافل
سعدية: آمين يا رب العالمين.
السرة: و الله كان يجي ماشي بشارع بيتنا ده .. ما أكون بت أبوي لو ما رجعتو لمحل ما جا
بتول: و الله كما لقيتيني قدامك أدحر فيهو.
(و إلى شمارات أخرى بنكهة البن)

شريفة شرف الدين
sharifah777@yahoo.com


تعليقات 11 | إهداء 0 | زيارات 5929

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#739703 [abusafarouq]
5.00/5 (1 صوت)

08-08-2013 03:11 AM
عال العال شمار صح لكن ..كلام نواعم بعنى الكلمة . شكرا شريفة..


#739541 [طه]
1.00/5 (1 صوت)

08-07-2013 08:22 PM
و الله شمار و نص و خمسة ..مبدعة بامتياز يا شريفة بت شرغ


#739421 [المستغرب جداً جداً]
4.50/5 (2 صوت)

08-07-2013 04:01 PM
محاولة غريبة لكوميديا اصبحت تبكي ، صار كل مافينامضحك لدرجة العويل شي دفاع النظر وشي قفل البلف يا عوض وشي جري من نيجيريا اصبحنا مسخرة البلاد والعباد بعد ما كنا اجاويد الدنيا وحلالين مشاكلها، وانت تشربي في القهوة وشمارات ياهو دا الفضل ولا مجال للتغيير


#739387 [الكابتن]
3.50/5 (2 صوت)

08-07-2013 03:00 PM
موضوع هايف ودمه مسيخ وتقيل وقلمك تعيس زيك بس ممكن تلحقى جبرة لو قلدتى حبتين كمان


#739266 [ابوبكرنك]
3.50/5 (2 صوت)

08-07-2013 11:29 AM
هائيل يا شريفة. ودو ما ماشه تجيب تياب من ايران ماشه تجيب حلاوة العيد ومكسرات.وتجيب تحف للعيد.


#738872 [Adam Ibrahim]
0.00/5 (0 صوت)

08-06-2013 06:41 PM
كترى البن بس.. الشمار الجاى بشة حيكون فى القفص الحديدى..


#738825 [سيف]
3.00/5 (1 صوت)

08-06-2013 05:12 PM
رائعة جدا


#738782 [بيكو]
2.00/5 (1 صوت)

08-06-2013 04:08 PM
احبك بت شرف الدين الشريفة


#738723 [AHMEDJALAL]
4.25/5 (3 صوت)

08-06-2013 03:19 PM
شماراتك عجيبه يابت شرف الدين


#738704 [الكلس]
3.00/5 (3 صوت)

08-06-2013 03:00 PM
رائع انت يا جميل


#738678 [عماد شرفي]
4.13/5 (5 صوت)

08-06-2013 02:38 PM
الشريفة بت بلال ست العسكر والعدال
والله كفيتى ووفيتى والله يديك العافية شمارك ناعم ورهيب


شريفة شرف الدين
شريفة شرف الدين

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة