المقالات
السياسة
قالو البلد مستهدفه!؟
قالو البلد مستهدفه!؟
08-06-2013 05:48 PM

يا حليلا أيام الصفا
لا تشوف زعل.. لا تشوف جفا
كل زول سعيد راقد قفا
ماكل تمام...
لابس تمام...
ساكن تمام...
أولادو جوا المدرسه
وبناتو قاريات العلم
ديك إقتصاد
والباقي قاريات هندسه
...
من الصباح.. فتاح عليم
كل البيوت..
ما فيها شيتن ناقصا
حق الفطور مالى الجيوب
تلقى القراريص والملاح
ما لاقيا زولن يهرسا
...
يتغدو باللحم السمين
والفضله والله العظيم
تلقى الكلب.. والله الكديس
مستنى واقف حارسا
...
كل ها البطر.. وكل ها النعم
ما جانا زول قال البلد مستهدفه!!
معقوله بس..
بعد المجاعات عشعشت
وحتى الكلاب غلبا النبيح
وحتى الكدايس هاجرت
وأصبحنا فعلن ملطشه
نصبح بلاد مستهدفه؟!
...
يستهدفونا فشان شنو؟!
سألوهو شفعنا الصغار
نان فى شنو؟!
يا ربي مانا برانا..
من دون الخلق..
مستهدفين وحاسدننا؟؟!
يا ربي شان مالنا الكتير؟
يا ربي شان خيرنا الوفير؟
والله البطينين الصغار
شربو العسل زي العصير!!
والله الشباب سابو الجهاد
سابوها ساحات الفدا
ودخلو المدارس والمعاهد
ما فيش فرق..
ولد الغفير دارس العلم
والله زي ولد الوزير!
لكين أهااا..
يمكن عشان بترولنا مدفق يسيل
ضاخنو من مليون ألف بير!!
والله السبب يمكن يكون
فى غفله.. حاكمنا المشير؟!

...
بس ده السبب..
مين غيرنا فى كل البلاد
حكمن مشير؟!
مين غيرنا فى كل البلاد
حكمن عوير؟!
مين غيرنا يفرح دار يطير
لو لما فى علبة عصير!!
أو لما فى قطعة فطير!!
أو بل ريقو من الكبيق
ما عمرو ما شاف ليهو زير!!
...
بالله بس إتخيلوا
مين بس يكون حاسدننا؟!
قالونا ديل الإنقليز..
والأمريكان..
وناس السويد..
إتخيلوا..
ناس السويد حاسدننا؟؟!
...
مين قال كده؟؟
قال المشير..
قال العوير..
بعد الرقيص والدهنسه
لمولو.. كم شفع صغار
واقفين يصفقو للعوير
بدل العلم والمدرسه!!
...
ما أصلو قاعدين فوق تراب
ما فيش فصول.. ولا حتى باب
كسروها جارين يحضرو
حصة رقيص..
ما سمعو بى حصة حساب
والكيميا والجغرافيا..
زي موية السراب
والفيزياء ديك ’داكنها‘
كل الفصل سجل غياب!!
...
كل البلاد خيرن كتير
المطره صابي بلا حدود
مالي السدود..
والحكمة ديك..
ما فيش وزارة اللت سدود!
لكنو فى بلد المصايب والغرايب والحدود
تلقى الوزارة محكره من دون قيود
و الحكمة ما بتلقى السدود!!
...
النيل يفيض.. ما فيش سدود
المطره جات.. ما فيش سدود
السيل كسر.. ما فيش سدود
تلقى البيوت إتهدمت..
وما فيش سدود!!
...
الشعب يسأل فى العوير
وين السدود؟!
شان البيوت إتهدمت..
وين السدود؟!
"ود الخدر" قام قالهن
كل المصايب والمحن
جايانا من عدم التهجد والسجود!!
...
ومسك الختام..
قام العوير..
قال عندو حل..
للإبتلاء وفك القيود..
الحل شنو؟!
سألوا الصغار؟!
قام قالهن..
"شرع الله..تطبيق الحدود"!
وكل زول من الشعب الفضل
يمسكلو عود الليل حراز
ويغزو فى عين الحسود!!؟


إبراهيم الكرسني
[email protected]
6/8/2013م


تعليقات 3 | إهداء 0 | زيارات 1212

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#739447 [ابو كزيمة]
2.00/5 (1 صوت)

08-07-2013 04:53 PM
التحيةوالتجلة والتقدير استاذ ابراهيم الكرسني
سعدنا بهذه الكلمات فهي مرآة للواقع المر الملموس.
نعم الكلاب غلبا النباح من اللغف والبلغ.
والكدايس هااااااجرت من غير رجعة
تحياتي


#738999 [حمد]
0.00/5 (0 صوت)

08-06-2013 11:08 PM
رائع يا استاذ ، مآل الحال المايل فى مرآة الزمن الجميل. والحكمة الكضابين دايرننا نصدق ان الخير كان على قدومهم.كضبوا وصدقوا فعلا انهم رساليين.


#738894 [ابو كريم]
3.00/5 (1 صوت)

08-06-2013 07:23 PM
جميل رينا يديك الصحة والعافية


إبراهيم الكرسني
 إبراهيم الكرسني

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة