المقالات
منوعات
صمت الخوف ... عيدية
صمت الخوف ... عيدية
08-08-2013 01:13 PM


عيدية .... كلمات احمد محمد ادريس
انت مدينة وصمتك خوفى
سافرى معاي فى اوطاني منافي
وانسجي من احلام الشعب قوافي
وانت مدينة وصمتك خوفي
سافر صمت الليل الجارف
جوه عيون السهر المافي
وفى ذكراك عيون بتخالف
عمال مصنع ورؤساء مدارس
والسادة ضباط الالم
والساسه مسؤولي الجراح
ياساسه يا سواح
الهمهم نرتاح
سؤالي يالعارفين
صمت الحقيقة الشين
باب المروق بي وين
من الفقر والبين
يا ساسه يا سواح
سعر الجنوب بي كم
صوت الحروب لمتين
سعر الخضار بيكم
وحسابنا كم فى الدين
وكفايه يا صمتي
وكفايه يا خوفي
وانت مدينة وانت وطن
خلاص فتينا وفتي زمن
وفطي الصبر معاهو سطور
انت مدينة وانت عبور
سافري المرسي ومدنك كوه
لشعلت نور
حارسك الله فى زحمت رسل
بصرفوا دموعك فى صف طابور
وانت مدينة وانت عبور
وقبلك الالم اترتل ايه
وانت مدينة لفقراء كفاية
وعمال الجبايه
الفى نفسهم الف غاية
فى العيد الكبير
بس جوزين ملاية
ما اصل الحكاية
عمال السعاية
صباره وضحايا وفيهم الف غاية
طلبات للمدير بسلفية ورواية
وبنفس العشم ديل طلبات قراية
والحل البحير قال شربت محاية
تميمتين للعيال بقلم الدواية
وفجاءة صمتي
وده الصمت المعاي
وانت مدينة
وديل غنواكي وانت غناي
وانت مدينة وغني معانا
بطعم الخوف نغني غنانا
بلون الحزن الكان جوانا
لو املك كان فى يوم ودانا
لمدينة الهم الراحلة ورانا
مشينا الشوق وانت خطانا
خطي الماشين والرجعوا معانا
واطفالنا يغنوا صباح العيد
على صوت مولانا
انت مدينة وانت وطن
وطني القاعد فى لمة شاي
وطن موال بنسأل فيهو
كيف الحال ؟
يقيف شامخ يرد بكل همة وحق
تسألوا فى كيف الحال
ما هو الحال صبح بطال
لا خبراً يسر ناس ديل
لا فرجاً قريب للبال
اخير فيني العشق ترحال
سئمت الموت نواح عجزه
وبكاء الاطفال
سئمت شعارات العمال
منو الفيكم كتب ما قال
منو الفيكم حكم ما شال
منو القسم اراضيكم
ديل غرب وهم شمال
منو القال لى احب غيركم
وانحت للسفر تمثال
انتو ما انتو وانتو
البكم الوطن غرق فى الحال
بالاحلام صبح محتال
بالوعد الهفافه تعال
بتلقي الزحمة فى الاهات غباشات حال
وناساً همها بس جوزين نعال
شتان ما بين وبين
ما بين الوصول وتباريح الوصال
وما بين
الاماني وشحطت السؤال
ما بين
صمتك وخوفي واماني الوصال
وانت مدينة وغناك وجوفي
ووجع الشوق بيناتنا يغني غناوي
غناوينا وحكاوينا
كلام فى الشوق ينسينا
ليالي الخوف
يعمر بيك ماضينا
ومهما جابت سفاين الليل
لابد فى يوم ترسينا
واكيد نتلاقي فى المرسي
وتتشابك ايادينا
انت مدينة وصمتك خوفي
وانت وطن وانت ....

[email protected]


تعليقات 0 | إهداء 0 | زيارات 1282

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




احمد محمد ادريس محمود
مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة