المقالات
السياسة
رسالة لفخامة الرئيس البشير بعد المراجعة
رسالة لفخامة الرئيس البشير بعد المراجعة
08-11-2013 11:35 AM


رسالة لفخامة الرئيس عمر البشير
بقلم المهندس
سلمان إسماعيل بخيت على
سودانى يقيم بمدينة الرياض السعودية

الى متى سيظل دكتور مصطفى عثمان إسماعيل حاملآ حقيبة الإستثمار فى السودان ؟
والى متى سيظل دكتور عبد الرحمن الخضر واليا لولاية الخرطوم ؟
ألا تخشى أن يتعدى الدولار حاجز الـ 10 ألف جنيه مع سياسة طبيب الأسنان الإستثمارية ؟
ألا تخشى أن تقطع سيول البطانة النيل الأزرق تدخل مكتب فخامتكم بالقصر الجمهورى ؟
أخى الرئيس أرجو أن تطلع على المرسوم الملكي الذى أصدره خادم الحرمين الشريفين لمان السيول إجتاحت بيوت بشارع واحد بمدينة جدة - كل مسئول بالمحافظة عن الطرق السدود التخطيط العمرانى وخلافة زج به بالسجن وشكلت لجنة تحقيق عليا برئاسة الأمير خالد الفيصل أمير منطقة مكة المكرمة وصدرت تعازى لمن فقد عزيز وصدرت اوامر بالتعويض عن الأنفس والمال والبيوت والمنقولات التى تضررت جراء تلك السيول
تلك القرارات جاءت بردا وسلاما على المتضررين
ونحن نقارب أن ننهى الإسبوع على كارثة أهلنا بشرق النيل ومازلنا نقرأ البؤس والمعاناة على أوجه أهلها لينضم إليهم أهلنا بأمبده والفتح ..
متى يفتح الله عليكم وتصدرون قرارا جمهوريا بإقالة الوالى الخضر والكاست العامل معه ؟
وقرار آخر بإقالة خبير الإستثمار مصطفى عثمان إسماعيل عشان يمشى يفتح عيادة أسنان ؟
نطلب من الدكتور مصطفى عثمان إسماعيل وزيركم لملف الإستثمار خاصة فيما يتعلق بالإستثمارات السعودية فى مجال الزراعة التى نحدث عنها وبشرنا بها ، فهل مازال هذا العرض قائم وأن 13 مليار دولار ستدخل السودان ؟ - لا أظن ذلك - يادكتور مصطفى العاوز يخطب بنت بيديها الكلمة الطيبة ويكثر لها من المدح والإطراء ويقدم نفسه فى أحسن صوره ويقدم كل مايقربه إليها - إنتو عاوزين إستثمارات زراعية بالمليارات من السعودية وسياستكم الخارجية تتجه نحو التقارب مع إيران وتقاربكم مع إيران يعنى تباعدكم مع السعودية وبقية دول الخليج دا ماعاوزه أى فهم ، فصديق عدوي عدوي ، دى ألف باء تاء ثاء وابجديات السياسة والله يارئيس الناس الحواليك ديل كلهم لايعرفوا سياسة ولا إقتصاد وحيضيعوك اصلوا البلد ضاعت خلاص
إنت محتاج لزول شاطر زي أنا وأنا خلاص سنتين وفى الباي باي قفلت الـ 65 وماشى للـ 66 ، حاول إستعجل الموضوع وفى سنة واحدة بس يارفعتك فوق فوق وبقى السودان زى ماليزيا وسنغافوره ، يا وديتك فى داهية وريحتك من الغلبة دى كلها اصلى أنا عملى وأى قرار أتخذه لا أتردد فيه
ولكن فخامة الرئيس عندى شرط عشان اقبل أعمل معاك وهى
تغلق سفارة إيران وتطردهم وتجفف الحسينيات التى ملأت الخرطوم وحتى الـ 8000 كتاب الدخلوها السودان يشيلوها معاهم
تسحب أى قوات عسكرية لديهم من أى موقع سودانى واولادنا فى القوات المسلحة فيهم الخير والبركة قادرين على حراسة حدودنا من ايام كرن مشهود لهم ، وصدقنى عون أهلنا من السنة من دول الخليج عسكرى ومالى يصلك بأسرع مما وصل لمملكة البحرين وهو عون دون من أو أذى
مجلس الوزراء تلغيه وتكلف كل وكيل وزارة بإدارة شئون وزارته
كمان تشيل عبد الرحمن الخضر والكاست الشغال معاه كله وتلغى نظام الولايات وتعين حكام عسكريين لفترة مؤقته بجميع الولايات بقيادة رتبة لاتقل عن لواء مع 5 عسكريين و5 مدنيين من أبناء الولاية ينتخبهم أهلها كمجلس تسيير مؤقت
تشيل كوم النواب والمساعدين والمستشارين وتنظف القصر منهم وتشكل مجلس سيادة برئاستك وعضوية كل من السيد الصادق ، السيد محمد عثمان ، رئيس الحزب الشيوعى ، ممثل للمؤتمر الشعبى وألا يكون هذا الشخص حسن الترابى لأنه لاينفع وحيعيق برنامجنا ، بالإضافة لرئيس كل حزب من الأحزاب التى تشكل معكم حكومة القاعدة العريضة ( القاعدة الضيقة ) مع المؤتمر الوطنى + مستشارين لمجلس السيادة من المستشاريات التالى : أمنى ، قانونى ، إقتصادى ، زراعى ، صناعى ، تعليمى ، صحة ، المرأة والطفل
هذا المجلس يحكم البلاد بطريقة مركزية لمدة تتراواح من 3 الى 4 سنوات شريطة ألا يحق لأى عضو فيه بما فيه رئيسه وهو فخامتكم ممارسة أى عمل سياسى طيلة حياته بعد إنتهاء هذه المدة
هذا المجلس يشكل لجنة من قانونين مختصين فى الفقه الدستورى لصياغة دستور دائم للبلاد
البشير وحزبه المؤتمر الوطنى
الصادق وحزبه الامة القومى
الميرغنى وحزبه الإتحادى الديمقراطى
الترابى وحزبه المؤتمر الشعبى
الحزب الشيوعى
البعث
الناصرى
إلخ ......
وأى حزب آخر مسجل يعقد مؤتمره العام بعد أن يتسلم كل حزب مال من خزينة الدولة يمكنه من قيام مؤتمر العام
بنهاية المؤتمر العام لهذه الأحزاب
يسلم البشير الراية لرئيس جديد للمؤتمر الوطنى ويذهب لمزرعته أو يمشى أى محل يعجبه ويحرم من ممارسة أى عمل سياسى إلا فيما يتعلق بنشر افكاره وأراءه على الصحف أو فى مذكراته الخاصة - وعشان نؤمن له مستقبله تكتب وثيقة عهد وميثاق قومية بحمايتة وعدم تسليمه للمحكمة الجنائية حتى نضمن خروجه من الحكم بسلام - حيقول آخر ليه نحميه خلونا نسلمه للجنائية - حيقول ليكم لو حتسلمونى الجنائية مش حاسلمكم الحكم وما حأخرج منها والراجل يجى يمقرنى _ موضوع الجنائية هذا ياجماعة حيشكل لينا نحن مشكلة عويصة ببقاء البشير للابد وحيشكل مشكلة للبشير لو خرج بأخوى وأخوك ممكن بكره يلقى نفسه فى لاهاى وجماعته لن يرضو له بذلك
البشير سلم الراية وخلانا موحدين وبدستور دائم ونظام ديمقراطى عاوزين ايه منو
طيب الناس اللى سرقوا وقتلوا
صبركم على شويه جاييكم ماتضيقوا
الصادق المهدى بنهاية المدة برضو يسلم الراية لشباب الأمة القومى ويتفرغ لإمامة الأنصار والكتابة وعاوزين منك ياسيد الصادق تفسير حديث للقرأن الكريم
مولانا الحسيب النسيب محمد عثمان الميرغنى يسلم الراية لكوادر الإتحادى الشابة ويتفرغ كمرشد للطريقة الختمية والعبادة
الشيخ حسن الترابى يسلم الراية لشباب المؤتمر الوطنى
وبنفس الطريقة كل حزب يعمل غسيل دموى ويجدد نفسه والكادر القديم لانقول يذهب لمزبلة التاريخ ولكن بكل أدب نقول يمشى يرتاح ويكتب لينا مذكراته بالمناسبة بلكلنتون من 8 سنوات حكم باع مذكراته بـ 15 مليون دولار يعنى الريس بتاعنا بـ 24 سنة حكم مذكراته مفروض تجيب أكثر من 40 مليون دولار
بهذه الطريقة سوف نكون قد تخلصنا من أم المشكلات البشير الصادق الميرغنى الترابى أيه رأيكم تصحوا من النوم تلقوا لابشير لاترابى لا صادق لا ميرغنى - صدقونى الجيل الجديد دا حيسوى العجائب وعندى حاجه أديها ليهم سلمنى لها صديقى بارك جونق هو من كوريا الجنوبية لو نفذوها فى 15 سنة الناس تشترى سامسمونج جلاكسي البشاقره 3 صناعة سودانية وتتفرجوا على شاشة تلفزيون أل إي دي أبوحمد 4
طبعا أنا خلال هذه السنوات 3 الى 4 بعمل مع مستشارية الريس وبعدها سأعمل مفوض إنتخابات ثم أحال للمعاش
خلال هذه الفترة يجتهد فخامة الرئيس البشير ما أمكنه ذلك بمساعدة جميع أعضاء مجلس السيادة ومستشاريه ومن داخل قصر الشعب فى بناء جيش قومى شرطة وطنيه جهاز أمن وطنى وقضاء ونيابة نزيهين مستقلين ، يعاد شك الكشتينة وتخرج عناصر ألإخوان من الخدمة العامة خاصة فى قطاع البترول والسدود والماء والكهرباء وجميع المؤسسات الإقتصادية من وزارة المالية والبنك المركزى والبنوك التجارية والأجهزة الأمنية الهامة والجمارك والضرائب حتى من مصنع صك العملة تخرج عشان ماتغرق السوق بعملة ورقية لا مقابل لها من الدهب من جعل التضخم يقفز لأرقام فلكية ، وتعطى فرصة لدخول عناصر تمثل الأحزاب الأخرى من خلال عملية تسمى الصالح العام مرة أخرى بدلا من عملية الضرر العام التى نفذتها حكومة الإنقاذ بقيادة البشير والترابى مما تسبب فى تدمير الخدمة الوطنية حتى قال عنها قبل إسبوع الدكتور يوسف الدقير مساعد رئيس الجمهورية وهو يكرم الكاتب المسرحى حمدنا عبد القادر ( حمدنا عبد القادر عمل بالسلك الإدارى لمان البلد كان فيها سلك إدارى ) فشهد شاهد من أهلها مساعد رئيس الجمهورية ومن داخل القصر عارف انه لاتوجد خدمة وطنية لذا نعيدها سيرتها الأولى
ولو فعلنا ذلك نكون عملنا جيش قومى زى جيش مصر بقيادة السيسى يحرس البلد ما يحرس الرئيس
عندنا شرطة وجهاز أمن تحرس الوطن والمواطن لاتحرس الحاكم
عندنا قضاء حر ونزيه أى شخص سرق مال عام أو إعتدى على مقدرات هذا الشعب يذهب ملفه من المراجع العام للنيابة للقضاء للسجن أو البراءة ليذهب لبيته أو يعود لعمله لو كان مازال يعمل بالدولة الملف ما يدور ويدور ويدخل القصر وحلك لمان يطلع ملف خط هثرو وأخونا جبرا بح صوته من الكسرات حقته
تنتهى الفترة المحددة لمجلس السيادة 3 الى 4 سنوات نكون قد صغنا دستور دائم للبلاد ، بنينا جيش وطنى ، إخوتنا حاملى السلاح فى دارفور وجنوب كردفان وجنوب النيل الأزرق يكونوا تحولوا من مليشيات مقاتله الى أحزاب وطنية مسجلة أو يندمجوا كل حسب الحزب الذى يعبر عن فكره وبتوقف الحرب معهم ينصلح حالنا مع جازنا الجنوبى ، نحول حلايب وابيي لمناطق حره ، ننادى على جهات عالمية معروفه لتشرف إشراف كامل على الإنتخابات الرابعة
وما تفرزه صنادق الإنتخابات نقبل به حتى لو لم يلبى رغبات أناس كانوا يحكمون
يتضمن الدستور الدائم نص واضح يحرم على الجيش الدخول فى إنتخابات ويطلب من الشعب الدخول فى عصيان مدنى متى ماخرج الجيش من سكناته نكون أمه متحضره
نعمل بالديمقراطية والديمقراطية ليست حل مثالى يعجب كل الناس لا لا الديمقراطية معناها الصحيح ديكتاتورية الأغلبية DEMOGRACY IS THE DICTATORSHIP OF THE MAJORITY يعنى لمان نطبق الديمقراطية الحزب الذى يحرز أغلبية يطبق برامجه فى حكم الأقلية لذا النظام الإسلامى أخذ بالشورى ولم يأخذ بالديمقراطية ، أكبر دكتاتوريات العالم افرزتها الديمقراطية وهل شاهدتم ديكتاتور أعتى من جورج بوش الإبن الذى دمر العراق وأفغانسان هذا رئيس منتخب ديمقراطيا
لكن الشعوب المتحضرة لم تهتدى لإسلوب أفضل من صندوق الإنتخابات
الشعب السودانى مارس الديمقراطية ثلاثة مرات وفى المرات الثلاثة مارسها خطأ
عندما ندخل للمرة الرابعة أوصيكم ونفسى بأن نفتح عيوننا جيد
المؤتمر الوطنى سيكون له برنامجه الإنتخابى الخاص به
المؤتمر الشعبى سيكون له برنامجه الإنتخابى الخاص به
حزب الأمة القومى سيكون له برنامجه الإنتخابى الخاص به
الحزب الإتحادى الديمقراطى سيكون له برنامجه الإنتخابى الخاص به
الحزب الشيوعى السودانى سيكون له برنامجه الإنتخابى الخاص به
حزب كذا .......وحزب كذا ... سيكون له برنامجه الإنتخابى الخاص به
المشكلة أن الناخب السودانى ليس بوعى الناخب البريطانى الفرنسى أو الأمريكى يقرأ برنامج الحزب ويضع خياره على حسب مصلحة وطنه العليا من الحزب المعين
نحن كلنا للأسف الشديد فى زريبة الشيخ ............ فى إحدى المرات كنت فى مدينة بربر وكان الشيخ عبد الباسط مرشح نفسه قصاد واحد من أسرة الشيخ الجعلى شيخ الطريقة القادرية قلت لأخينا عبد الرحمن ود السيد بتدى صوتك لمين قال لى ل... الجعلى ، قلت ليهو الشيخ عبد الباسط رجل أعمال وعنده مشاريع إستثمارية زراعية وممكن يعمل نهضة فى المنطقة ، مرت من أمامنا غنماية ، قال لى والله نحن لو الشيخ الجعلى قال لينا أدوا الغنماية دى نديها ... أرجو فى الديمقراطية القادمة ماندى غنماية الشيخ ونقرأ كويس برنامج كل حزب
وأذكر أن السيد الصادق بعد الإنتخابات الثالثة ما أفرزت نفس الطريقة القديمة ونحن نسميها كيمان المرارة لم يحدث أن حقق حزب بعينه أغلبية ميكانيكية داخل البرلمان - المقاعد تقسم ربع وتلت وخمس وسدس وثمن وعشر مما يضطر معه حزب الثلث يشكل حكومة إئتلافية مع الربع والسدس وثمن والعشر يشكلوا أحزاب معارضة
هى فى ظاهرها حكومة إئتلافية ولكن فى داخلها حكومة إختلافية تخيل حزب الصادق مع حزب الترابى مع حزب الميرغنى يشكلوا حكومة - عمرها حيكون كم ؟ شهرين تلاته بالكتير والمشاكل تظهر على السطح ومذكرة القوات المسلحة والتفكير فى تحريك الجيش والبيقوم بدرى يستلمها
السيد الصادق لو تذكرون كان بيحذر من هذا السلوك وقال وهو رئيس وزراء الوضع دا مش مثالى وعلينا نحافظ عليه من الميس للميس لو تذكرون وبالميس للميس يعنى من تاريخ الإنتخابات الى تاريخ الإنتخابات التالية
لكن ناس الجيش ضاقوا الحكم 6 سنوات مع عبود و16 سنة مع نميرى وعجبهم الحال فجاءوا وحكموا 24 سنة لكن المرة دى طارت ليهم فى رأسهم وكثير منهم يقول ياريت اللصار ماكانش
يا أهل السودان لو قادرين تنفكوا من الشيوخ والسجادات وتقرروا برأى حر ونزيه وشريف مرحبا بالديمقراطية الرابعة وأذا كان مصرين تقولوا نحن فى زريبة المكاشفى أو فى زريبة الجعلى لن تحققوا ماتتمنونه للسودان
الحاكم العسكرى أول ما يصل يكرم مشايخ الطرق الصوفية ويغدق عليهم الأموال ويكرمهم ويعالجهم فى الخارج هم يعالجوا مرضاهم بالموية والكسرة والسوط حتى يموتوا لو اصابهم مكروه ذهبوا للندن والأردن والسعودية شفناهم وبنعرفهم بالإسم
لو عاوزين تكونوا شعب لديه حقوق وعليه واجبات تحرروا من التبعية العمياء لمشايخ الصوفية
خذوا منها مايصلح من أذكار وأوراد فليست كلها باطله ولكن حين تأتى لحظة تقرير مصير الوطن وصندوق الإنتخابات أمامك - إتخذ القرار الصحيح - لأن شيخك قابض الثمن من الحاكم - تحرر من عبوديته
خلصنا للتالى
الدستور الدائم سيتضمن نص واضح يحرم على جميع الضباط العمل بالخدمة المدنية فالحكومات العسكرية الثلاثة عبود نميرى البشير تتخلص من ضباط غير موالين لها وهم فى رتب صغيرة الى رتبة لواءوتحيلهم للمعاش المبكر وحتى لايشكلوا لها مشكلة إنقلابات تحيلهم للخدمة المدينة - وبما أنهم عسكريو النشأة يديرونها بالعقلية العسكرية فدمروها
كما يحرم الدستور على الضباط المحالين للمعاش من العمل بالخدمة المدنية وناس اللواء عمر نمر واللواء فلان وفلان يمشوا يعملوا فى الجيش ومن يحال للمعاش عليه بالعمل فى القطاع الخاص
خنقتونا وضيعتوا البلد

[email protected]


تعليقات 13 | إهداء 0 | زيارات 3008

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#741898 [المشتهى السخينه]
0.00/5 (0 صوت)

08-12-2013 12:01 PM
الطرطور اصبح ( صاحب الفخامه ) .. طيب سيد الدكان البيعشينا بوش بالدين يبقى شنو ؟


#741779 [Saeed]
0.00/5 (0 صوت)

08-12-2013 09:30 AM
الأخوة بإدارة الراكوبة,
تحية طيبة وكل سنة وأنتم طيبين
الرجاء رفع هذا الموضوع في مكان مناسب في صحيفتكم الموقرة ليجد المزيد من النقاش والحوار, فما طرحه المهندس سلمان يستحق الوقف عليه, و دمتم في خدمة السودان وإنسانه الحر.
وشكرا


#741675 [شاخور]
0.00/5 (0 صوت)

08-12-2013 12:29 AM
وابوالعفين يخليها ليكم سااااي كدا ، زي ما بقول بعد ما لبّنت ؟؟؟
البلد بقت طيش العالم ولغايه هسي ما عارفين اللبن بتاعو ده وين و بوزعو في ياتو محطه بنزين ؟؟؟

بعدين وين ناس الهامش في حكومتك دي يا باشمهندس ؟؟؟
وبالله واحد زي (رئيسكم) الفاشل ده ، يترأس مجلس سيادة فيهو الصادق المهدي (رغم اختلافنا معه) .
المنطق برضو كويس يا باش .


#741634 [بالله شوف ده!!!]
0.00/5 (0 صوت)

08-11-2013 11:03 PM
البشير وحزبه المؤتمر الوطنى
الصادق وحزبه الامة القومى
الميرغنى وحزبه الإتحادى الديمقراطى
الترابى وحزبه المؤتمر الشعبى
الحزب الشيوعى
البعث
الناصرى
-----------
كلامك كله مرفوض عايز ترجعنا مليون سنة للوراء , كل الذين ذكرتهم يعملون مع النظام و سيحاكمهم الشعب ولا نفع منهم بالله شوف ده !!!


#741485 [a7md]
0.00/5 (0 صوت)

08-11-2013 05:45 PM
السيد الكاتب.. انت طولت بره السودان الظاهر وما سمعت بحركات واحزاب دارفور والجبهه الثوريه..!!؟ دي مكونات جديده انت ما سمعت بيها ولا شنو؟ ليه ما ضمنتها في الحل..!! لانو الحل يكمن في الجميع وبدون فرز ..!!


ردود على a7md
United States [المهندس سلمان إسماعيل بخيت على] 08-11-2013 10:44 PM
الإبن أو الأخ أحمد
عبارة أنت طولت بره السودان الظاهر وما سمعت بحركات واحزاب دارفور والجبهه الثوريه.
أولا من يعيش خارج السودان يكون مطلع ومتابع لكل شىء ومن يعيش داخل السودان محروم من متابعة الراكوبة وسودانيزاونلاين وجميع أخبار العالم وأخبار السودان أضف الى ذلك أنه مهموم بالمعايش ومافاضى لمتابعة الأخبار
أنا متابع لكل المكونات الحديثة التى تنتظم دارفور وجنوب كردفان وجنوب النيل الأزرق
هل الحل فى نظرك أن تدخل كتائب الجبهة الثورية الخرطوم وتستلم الحكم أقول لك هذا لن يحدث
هل الحل فى نظر الإنقاذ أن تقضى قواتها وكتائبها على كتائب الجبهة الثورية ويصفى لها الجو أقول لهم هذا لن يحدث
الحرب بين جيش نظامى وجيش نظامى لها بداية ولها نهاية وفيها منتصر ومهزوم أو توقع إتفاقية سلام توقف الحرب
الحرب بين جيش نظامى وكتائب متمردة تضرب أينما وجدت فرصة ثم تهرب كما فعل الحلو فى أم روابه وابوكرشوله دى حرب أشبه بحرب الغورلا لانهاية لها لا المتمرد سيهزم الدولة ولا الدولة ستقضى نهائيا على المتمرد لأن المتمرد زاده وعتاده يستمده من أهله وقبيلته ومايسلبه فى حله وترحاله
الدولة لها اتباع أو مناصرين ولها مصادرها الثابته من ضرائب وجمارك ورسوم اخرى
أرجو أن تعيد قرأة ماكتبته مرة أخرى بذهنية مختلفة


#741467 [ا لكهف]
0.00/5 (0 صوت)

08-11-2013 05:17 PM
حلم جميل


#741409 [عوض والعوض علي الله]
5.00/5 (1 صوت)

08-11-2013 03:35 PM
صدقني ياباشمهندس كنت اقراء وانا غرقان في حلم انو السودان بطريقتك الطرحتها بقي من الدول المتقدمة مازي ماوعدنا ابو العفين وصدقني شعرت براحة نفسية وانا اقراء في اسطر المقال وكاني اراءالسودان يتقدم من مرحلة الي مرحلة احسن منها لكن العكر مزاجي ذكرت الوطني والشعبي تعرف الاتنين ديل بجيبو لي المصران ديل الاتين بالذات دايرين من الشعب السوداني يوديهم مزبلة التاريخ
والخوف ياباشمهندس تكون منتمي لواحد منهم


ردود على عوض والعوض علي الله
United States [المهندس سلمان إسماعيل بخيت على] 08-11-2013 10:08 PM
اقسم بالله العظيم وأنا فى الـ 65 وقد ألقى الله غدا أو بعد غد أنه لاشىء يربطنى بالوطنى أو الشعبى أو أى حزب سودانى فعلاقتى بالأحزاب السودانية إنتهت بنهاية الحزب الإتحادى ومش الإتحادى الديمقراطى علاقتى إنتهت بموجب الشريف الحسين الهندى ولك أن تعلم أن شقيقه زين العابدين ليس بإتحادى وقد قال لى عمنا المرحوم الحاج مضوى محمد أحمد أنه سمع أزهرى بيقول للحسين : يا الحسين عاوزك تشوف لى زين العابدين دا ميوله شنو أنا أشك فى إتحاديته هذافيما يتعلق بعبارة ( والخوف ياباشمهندس تكون منتمي لواحد منهم )
أما فيما يتعلق بذكرك عبارة ( الوطني والشعبي تعرف الاتنين ديل بجيبو لي المصران ديل الاتين بالذات دايرين من الشعب السوداني يوديهم مزبلة التاريخ ) فدا مش كلام منطقى ولازم نقر بأنهما حزبان موجدان على الأرض وفى يدهما مال وسلاح لايوجد فى يد سواهما ولو عاوزين نوديهم مزبلة التاريخ يكون بالتوجه لتوعية الشعب وإسقاط رموز هذين الحزبين من خلال صناديق الإنتخابات وانا عاوز أى شخص سودانى يريد أن يقول كلام يفكر ويتبدر ثم يفكر ثم يتكلم

United States [a7md] 08-11-2013 05:41 PM
ههههههههههههههه والله انا ما بنفعو معاي برضو


#741363 [مدحت عروة]
0.00/5 (0 صوت)

08-11-2013 02:34 PM
الديمقراطية لو استمرت باخطائها كانت مشت لى قدام واتصلحت وبقت ثقافة شعب وطريق حكم وتداول سلمى للسلطة!!!!!
لكن الله يلعن ابو الكاكى العطل تطورها بحجة انها ما نافعة وتمارس خطا!!!!!!!!!!!
الطفل من ما يتولد بيقوم جارى طوالى ولا بيحبى اولا ثم يتعلم المشى وبعدين الجرى والانطلاق مش بيقوم ويقع لمن يتعلم المشى؟؟؟؟؟
اى سودانى يقول ان الحكم المدنى والديمقراطية وسيادة القانون وفصل السلطات ما بينفعوا ده زول بيكون جاهل وغبى ودلاهة ومكانه مش فى الحكم او الشان السياسى بتاتا!!!
بعدين ما ممكن الناس تحكم على الديمقراطية واطول فترة استمرت فيها بعد اكتوبر هى 3 سنين و7 شهور بعد حكومة سر الختم الخليفة الانتقالية!!!
الحكم العسكرى او العقائدى وكلهم قذارة وعواليق وما عندهم رؤية استمروا 46 سنة ماذا كانت النتيجة؟؟؟؟ ولو استمرت الديمقراطية منذ الاستقلال ولحد الآن كان مياه كثيرة جرت تحت الجسر ويمكن كان فى احزاب اندثرت وكذلك قيادات وظهرت احزاب وقيادات جديدة فى الساحة وكانت المفاهيم اتغيرت فى ظل الحرية وسيادة القانون!!!!!!!
الف مليون تفووووا على اى انقلاب عسكرى عطل التطور الديمقراطى واهو بقينا من افشل دول العالم!!!!!!!!!!!!
تشرشل قال ان الديمقراطية نظام حكم سىء ولكنه احسن السيئين وهو صادق فى كلامه والكمال لله وحده!!
الهند التى لم تعرف الانقلابات العسكرية القذرة والواطية والجاهلة شوفوها وين وانحنا وين!!!


#741350 [الصليحابي]
0.00/5 (0 صوت)

08-11-2013 02:16 PM
إذا هي تطبيق عملي لخطة العنصري ( المسمى بمثلث حمدي ) المشكلة إنكم لا تستطبعون الخروج من جلباب العنصرية والقبلية والجهوية التي تمارسونها ضد باقي أقاليم السودان وقبائله ، وهي عقدة نفسية ياأهل الشمال يصعب علاجها والخروج عنها، هل تفتكر علاج مشكلة السودان تتمحور فقط بما ذكرته من أفكار حزبية ضيقة..........................)


#741311 [الوحدة]
0.00/5 (0 صوت)

08-11-2013 01:11 PM
والله انت فاقد بوصلة الكارثه هي البشير زاتو وحزبه ارجو ان لا تؤذن في مالطا اخي الكريم


#741310 [Saeed]
2.00/5 (1 صوت)

08-11-2013 01:09 PM
كلام واضح وبسيط وفيه من الحكمة ما يكفى حتى نخرج من عنق الزجاجة الضيق. لقد ذكرت في مداخلة لي سابقة أن مشاكل السودان يمكن حلها بالاستعانة بالمغتربين, وهم لديهم تجارب ناجحة في دول المهجر علي شرط أن تكون هناك خدمة مدنية ممتازة وهذا يمكن أن يتم كما قلت بالتدرج بعد إحلالهم بالكفاءات في موقع الموالين للنظام.
متعك الله بالصحة والعافية يا باشمهندس.
أخيراً مع احترامنا لزوجات المسئولين أي كان موقعهم عليهن أن لا يتتدخلن في شئون الدولة من خلال أزواجهن.


#741295 [سعاد خيرى]
0.00/5 (0 صوت)

08-11-2013 12:47 PM
كلامك ده خليهو لى نفسك ,, نحن لانريد أمثالك من كبار السن نحن نريد الشباب الواعى ,, الذى عنده المقدره لقيادة البلد ,, لابشيرك نافع ولا الصادق ولا الميرغنى ولا الترابى ,, كفانا كلهم جرباهم ,, نريد الجيل الفاهم الواعى لهموم الوطن , أمثال شباب حملة نفير ,, شباب واعد,, همه الوطن ,, وليس مثل أصحاب الكروش الكبيره التى لم تمتلى وهى تنهش في لحم الوطن ,, خليك في السعوديه فنحن لسنا محتاجين لك ولا لامثالك ,, لانريد تكرار المأسآة ,, وكفايه بقى خلاص لعب بالشعب الغلبان ,, حتى لوكان كلامك أمانى فإنها أمانى كئيبه لا تناسبنا ,, فالطوفان قادم لكنس كل العفن والوسخ ,, وحنبنيهو وطن شامخ إن شاء الله ,, بس إنتو أطلعوا منها!!!!


ردود على سعاد خيرى
United States [زلوط] 08-12-2013 12:23 AM
اختنا سعاد ، ما الباشمهندس عشان يطلعوا منها العجايز ديل ، عمل برنامجو المكّرب ده ،
بعد المرحلة الانتقاليه دعا قدامى السياسيين بالذهاب لمنازلهم وهذا أمر جيد جداً وحيخلصّنا منهم تماماً
لكن دي كلها اماني .
والكلام النجيض ما في زول بسمعو في البلد دي .

United States [العوض والعوض علي الله] 08-11-2013 06:51 PM
اختي سعاد صدقيني الاحلام الفوق دي لو ما كان فيها المؤتمرين بشقيه وكانت تحققت علي ارض الواقع لتري السودان ده شكل تاني وبعدين ماتستغنوا من الناس الكبار ديل ولا تستهينوا بخبراتهم وانتوا فيكم الخير والبركة ولا لاقصاء الغير وليس من الحكمة ان تقولي انتو اطلعوا منها فهذا عبارة كيزانية نرفضها فالسودان وطن للجميع ويسع الجميع خالص احترامي

[ا لكهف] 08-11-2013 05:24 PM
لا احد يستطيع ان يبنى دوله بل بالجميع بعد الإتفاق على الكيفيه(الدستور)


#741277 [مضغوط]
0.00/5 (0 صوت)

08-11-2013 12:27 PM
والله كلام رهيب ،يأخي زول في عمرك يفكر كده ما عندنا :عاين الترابي ،الصادق ،البشير ،المرغني الخ
وين إنت من سياسة التمكين


المهندس سلمان إسماعيل بخيت على
مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة