المقالات
السياسة
شمارات .. اجتماع مجلس زوجات الوزراء
شمارات .. اجتماع مجلس زوجات الوزراء
08-12-2013 08:21 AM



بسم الله الرحمن الرحيم ده طبعا اجتماعنا الأول بعد الإجتماع التأسيسي لمجلس زوجات الوزراء و بصفتي السيدة الأولى و رئيسة هذا المجلس عايزة أقول ليكن الآتي .. أجندة اجتماع اليوم حتكون العضوية و الانتساب لمجلس الزوجات و الموضوع التاني هو قضية المظهر العام للعضوات الموقرات.
بالنسبة للعضوية طبعا بعد الصراع الرهيب الحسمناهو في الجمعية العمومية عن تكوين الهيكل الإداري و التنظيمي لجمعية زوجات الوزراء أحب أتلو على أسماعكن أهم التوصيات و القرارات.

الرئاسة: بما إنو أنحنا الاتنين زوجات الرئيس و بنستحق رئاسة هذا المجلس مناصفة و بإجماعكن السكوتي فإن المسألة حسمناها أنا و ضرتي بأسلوب ديمقراطي و سلس في اجتماع مغلق عقدناه بقاعة قصر الصداقة و حسمنا المسألة بالقرعة إنو أنا دي حأرأس المجلس لمدة تلاتة شهور بينما تقوم ضرتي بمرافقة الرئيس في أسفارو الخارجية و بعد انقضاء التلاتة شهور نقلب الأدوار و ما أظن في حل أحسن من كده و أرجو أن نكون قدوة حسنة ليكن.

المناصب الأخرى: بالنسبة لبقية الأوصاف الوظيفية فحتكون بصورة من الكربون من مجلس وزراء الرجال .. يعني أي واحدة تشوف راجلها موقعو شنو و نديها نفس الموقع في موقعنا ده و الراجلها متزوج أكتر من واحدة تأخذ النموذج بتاعنا و تمشي عليهو . بس أهم بند في قبول العضوية هو إبراز ما يثبت صحة زواجك من زوجك الدستوري و ذلك بإحضار عقد الزواج و صورة فوتغرافية حديثة يجمعكما و أحب أحذر إنو أنحنا كونا لجنة مسؤولة من كشف التلاعب بالصور. طبعا يا جماعة الثقة موجودة بس الحكاية و ما فيها إنو بعض الرجال عندهم دريبات تحت تحت و يمكن ما تكونن عارفات إنهم متزوجين عليكن فده حفظ لحقوقكن عشان كده العندها ضرة نشترط عليها أن تجيب صورة الزوج و الضرتين معا زي صورتنا المعروضة على البروجكتر للرئيس و شخصي و ضرتي و مسألة إنها بيمين الرئيس و أنا بشمالو ما ليها علاقة بالأهمية لكن برضها كانت بالقرعة و في النهاية لازماً واحدة بيمينو و التانية بشمالو.

طبعا سمعنا من مصادرنا الخاصة إنو في احتجاجات من زوجات ولاة الولايات و زوجات وكلاء الوزارات بحقهن في الإنضمام لهذا المجلس و من حيث المبدأ أنحنا كونا لجنة و حتنبثق منها لجان للنظر في القضية لكن طبعا وفق المبادئ و الأسس و يبقى للرئيسة حق النقض. و لكن بحكم التواجد الجغرافي لحرم والي ولاية الخرطوم فإنها – اسنثناءً- تتمتع بعضوية المجلس كاملة أسوة برصيفاتها من زوجات الوزراء. أما الطلب المقدم من زوجات رجال الأعمال فهو قيد الدراسة و الآمال كبيرة بقبول طلبهن كعضوات بالمجلس.

بالنسبة للموضوع الأهم في نظري هو قصة المظهر العام لأعضاء مجلس زوجات الوزراء .. القضية دي خطيرة و مؤثرة بنحو كبير عشان كده عايزة منكن تاخدنها بجدية شديدة. إذا استثنينا أزواجنا .. فأنحنا بنعتبر الصف التاني مباشرة في المسؤلية يعني بنمثل ركيزة أساسية و واجهة للبلد عشان العالم كلو يعرف إنو السودان أنحنا. و نقصد بالمظهر العام الموقع السكني و نوع السكن و الاستايل بتاع التأثيث و نوع السيارة و موديلها و الأوتوكيت و كل ده مفروض يتوافق مع مكانتك الرسمية كزوجة وزير اتحادي بعد داك بتجي الحاجات الخاصة بيكي كعضوة في مجلسنا ده. أهم القرارات في موضوع زوجة الوزير بالذات الآتي:

1. ممنوع منعا باتا تكرار لبس التوب سواء في الإجتماعات الرسمية أو غيرها مثلا زي اللقاءات التلفزيونية و الحفلات العامة و هلمجرا
2. يجب أن يكون وزن الدهب على الأقل نص كيلو في كل طلعة مع مراعاة تجديد النقش و مواكبة الموضة.
3. لا يجب على عضوة مجلس زوجات الوزراء أن تكون لها علاقاتها من عامة الناس لأن ذلك سيؤثر سلبا و يلقي بظلاله على مجلسكن الموقر هذا و إن كان لابد فبشيئ من الحذر الشديد.
4. يجب كذلك عدم تكرار نقش الحنة و احتطنا للحكاية دي بكادر متخصص في الحنة و قريبا حنضع حجر أساس لكلية الحنانات لأنو في الغالب حتغطي حتى زوجات الولاءة الولائيين.
5. و بما إنو الإجتماع ده خاص بالزوجات فإن الجميع ملزمات بتصفيف شعرهن على آخر صيحة بعدما أخدنا ضمانات إنو مافي تصوير أو نقل مباشر من داخل قاعة الإجتماع.
6. نقطة أخيرة .. أنحنا جبنا من بريطانيا خبيرة في التدريب على الإبتسامة و المشي و جميع العضوات ملزمات بحضور هذا الكورس التدريبي الهام وفق الزمن و المكان.

و ردَّنا كلنا للشامتين حيكون بصوت واحد مستشهدين بنص الآية (و أما بنعمة ربك فحدث)
تم تكوين لجنة لمتابعة النقاط الستة أعلاه و كذلك تم وضع جزاءات في حالة مخالفة أياً من تلك القرارات. و كده يكون اجتماعنا الرئيسي انتهى و حنمشي قاعة الطعام عشان نناقش الحاجات الهامشية. أحب أذكر العضوات الموقرات إنو الموضوع اللي حيتناقش في الإجتماع (الغادم) هو حقوق مجلس زوجات الوزراء و للأهمية المرجو الحرص على الحضور و إلا سجلناكن من (المتخلفات).


[email protected]


تعليقات 9 | إهداء 0 | زيارات 3168

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#742921 [عبدالرازق]
0.00/5 (0 صوت)

08-13-2013 01:00 PM
كلام فارغ واكثر


#742385 [nile]
0.00/5 (0 صوت)

08-13-2013 12:14 AM
كلو شئ جائز في سودان النشير ده


#742383 [النيل]
0.00/5 (0 صوت)

08-13-2013 12:12 AM
كلو شيء جائز في سودان البشير ده


#742290 [ودالباشا]
0.00/5 (0 صوت)

08-12-2013 09:40 PM
انتى يااااااا شربفة مالك جنك شمارات كده والغريبة حرف الشين مزين الاسم


#742131 [الجمكسين قاتل الصراصير]
5.00/5 (1 صوت)

08-12-2013 04:44 PM
والله أنا شايف إنو المقال ده موضوعي وفي وقته! وما نستبعد القصة دي تحصل على أرض الواقع.

إذا كان زوجة الوالي بتعتذر للشعب علي التقصير وبتبرر إنو زوجها الوالي ليهو 24 ساعة ما جا البيت عشان المطرة.

الأستاذة الكاتبة ما لخبطت العام بالخاص، العام والخاص ملخبط من أساسه في البلد العجيبة دي! وود أخت الكوز (طيش دفعته) بيبقى مدير أول دفعته..!!

شكراً يا أستاذة :)


#741968 [م]
0.00/5 (0 صوت)

08-12-2013 01:11 PM
يا استاذة لقد اوجذت الموضوع باسلوب رائع وسلس ياريت اطاعن عليه عشان بعد ذلك يصحو ضميرهن ويطالبن بدروس دينية علية لكي يتواضعن


ردود على م
[الشرانى] 08-12-2013 11:05 PM
اوجذت؟؟؟؟؟؟؟؟؟؟؟؟؟؟؟؟؟؟؟؟؟؟؟يا عالم فى حد عارف معنى الكلمة دى؟؟؟؟؟؟؟؟؟؟؟؟


#741881 [نعمان عمر]
0.00/5 (0 صوت)

08-12-2013 11:42 AM
حلم الجيعان عيش يا استاذه شريفه دا شنو البتسوى فيهو دا؟؟ مالنا عليهن يحرقن...


#741850 [سيبويه العجمي]
0.00/5 (0 صوت)

08-12-2013 11:06 AM
يا اخت شريفة سلام
لا تزر وازرة وزر اخرى
لا لخلط الخاص بالعام
مهما وصلت هذه الحكومة لدرجة من الانحطاط والتردي فليس هذا بمبرر لان ننزل لنفس المستوى وإلا لما كان لنا فضل عليهم


ردود على سيبويه العجمي
European Union [ابوضرغام] 08-12-2013 06:00 PM
خلوها تتعلم وعندها مستقبل بدل الملوخية وملاح النعيمية


#741830 [الجقر]
0.00/5 (0 صوت)

08-12-2013 10:34 AM
ليك يومين جبنات وقهوات ونسوان وشمارات الحاصل ايه ؟؟؟


شريفة شرف الدين
شريفة شرف الدين

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة