المقالات
السياسة
تجربتي مع النظام العام
تجربتي مع النظام العام
08-15-2013 08:21 PM

السلام عليكم
انا عندي اكتر من تجربه مع النظام اعام مع اني والحمدلله زوله بنت ناس وبخاف ربنا وماشه في حالي حتى كل تجاربي معاهم ماحصل كان عندهم على حق تجربتي الاولى معاهم كنت راكبه مواصلات الصحافه ماشين على العربي انا وبنت عمتي ركبوا ورانا اتنين من ركبوا وهم بشاغلوا وبحاولوا يفتحوا مواضيع ونحن ما ادينيهم فرصه لحدي مانزلنا بقى واحد فيهم وهو قصير كدا وضعيف بجي يحاول يحتك بينا بي اي طريقه مره يمشي قدامي ويقيف فجاءه ومره يجي بي ورى بنت عمتي ويحاول يخليها تلمس جزء حساس من جسموا اثناء ماهي ماشه يعني بخت نفسوا في مسار حركة يدها الكلام دا كلوا في المسافه مابين مواصلات الصحافه وسوق الدهب انا بديت اخاف منهم بحكم سني انا كنت في اولى جامعه الوقت داك وبنت عمتي اصغر مني بي سنه قلت لي بنت عمتي احسن ندخل سوق الدهب نزوق منهم ونطلع بالجهه التانيه نحن كنا ماشين مواصلات امدرمان كانت جمب القبه الخضراء في الوقت داك سبحان الله الولد دا كان زي الشيطان مهما زقنا وجرينا كنا بنلقاوا قدامنا في الاخر قلت لي بنت عمتي يلا نمشي المواصلات سرعه سرعه وفعلا بدينا نمشي سريع على المواصلات بنت عمتي قالت لي هو كيف بقدر يلحقنا سرعه كدا مع انو جزمتوا مقطوعه يلا هو سمع كلمة جزمتوا مقطوعه وهاج وانفصم انا جزمتي مقطوعه يا يا يا يا نبز مابقدر اقولوا انا اليله حا ادبكم وقال لينا انا من شرطة النظام العام وحا اوديكم القسم انا قلت ليو نحن ماعملنا حاجه عشان تودينا القسم ونحن مابخاف من القسم في عسكري واقف نادا العسكري وقال ليو سوق لي البنات ديل القسم يخوانا انا مابقدر اقول ليكم شعوري وانا بسمع كلمة القسم لكن ربنا اداني قوة من عندوا واحساسي انو الزول ده بحاول يبتز فينا ولو حس بي خوفنا من القسم حايعمل فينا الدايروا والكان بحاول يعملوا غصب قبل شويه حيخلينا نعملوا وهو خاتي رجلوا على رقابنا انا بي طبعي بكره لوي اليد من انا طفله كرامتي عندي فوق اي حاجه دا شئ ربنا خلقوا فيني ويمكن دفعت تمنوا كتير لكن في الموقف دا الصفه دي كانت منقذي الوحيد من الما انسان دا .. العسكري كان وشوا جامد وساقوا بعيد شويه واتكلم معاو ماعارفه قال ليوا شنو بعد شويه جانا العسكري وساقونا لي تكاسي وربكبونا ناس السوق العربي ديل وقفوا اتفرجوا فينا ونبزونا نبز انا ماعافيه ليهم فردا فرد اشوف فيهم يوم بتزكر في راجل اهبل كدا واقف بنبز فينا لحدي ماعمتوا وقعت وكان بقول لينا عشان تاني تعملوا كدا مع انو نحن لابسين لبس بنات السودان العادي الاسكيرتي الطويل والبلوزه المحترمه والطرحه اقسم بالله لبسنا لا كان ضيق ولا شاذ عشان هم ينبزونا ويسئوا لينا من غير وجه حق مافيهم راجل وقف قال اشوف البنات ديل مشكلتهم شنو مافيهم واحد اتخيل انوا نحن اخواتوا اوبناتوا مافيهم واحد كان عندوا استعداد يقيف في وش العسكري والتاني العامل فيها ابو الرجال وبنهر فينا وبكورك بي اعلى صوت كلهم خافوا وقالوا مالنا ومال المشاكل نقيف في صف القوي احسن... المهم ركبنا في تكسي العسكري قدام والاتنين القصير وصحبوا بي ورى ولمن هو راكب بي ورى لسه بحاول يخوفنا قال لي صحبوا نفتح ليهم بلاغ رقم كدا وبلاغ رقم كدا انا مامتزكره الارقام الهو قالا لاني مابفهم فيها وقال ليو نوديهم السلاح الطبي دال كلوا وانا ساكته وبنت عمتي بتبكي بكاء شديد لانها هي مسكينه يمكن انا شيطانه شويه وبعرف اتكلم وشخصيتي قويه والحمدلله لكن هي لا بعد شويه لقيت التكسي بقيف جمب بسط امن شامل نزلنا منوا وهو مشى عمل التحيه لي عساكر واقفين ونحن جينا وقفنا قلنا السلام عليكم في واحد عسكري كبير شويه في السن عاين لينا من فوق لي تحت قيم اشكالنا ولبسنا حتن بعداك رد لينا السلام دخلنا جوه بسط الامن الشامل والقصير دا بقى يحكي في اساطير عن مشاغلتنا ليو من شارع محمد نجيب وعن جرينا وراو في سوق الدهب وحاولنا نمسك الشنطه بتاعتوا انا من الخلعه اجمدتا ونططه عيوني وبنت عمتي بقت تقول ياكزاب ياكزاب العسكري الكبير نهرها وسكته قال ليها لمن يجي دوركم اتكلمي المهم العسكري اتلفت علي وقال لي احكي الحصل شنو قمت حكيت ليو الحاصل بالظبط وقلت ليو ياجنابوا انا لو بنت ماكويسه مابركب مواصلات واتبهدل كنت وقفت اجعص عربيه ووصلتا المكان الانا عايزاو من غير ما اركب وانزل ولو عايزه اشاغل الرجال مابشاغل واحد شكلوا خمسه جنيه ماعندوا حا اشاغل لي زول احسن من كدا واتخايل لي انت شايف شكلي ما بحتاج اشاغل اصلا القصير هاج وماج وقال هو حايحلف المصحف طلع مصحف من الشنطه قام صحبوا الكان معاو اتراجع لي ورى وقال ليو احلف براك انا بقيت مصره انو الولد التاني هو يحلف لانو حسيت بيو بخاف ربنا شويه قام العسكري الكبير قال لينا الا تمشوا معاو النظام العام عشان يتادب وقال ليو البنات ديل لو مشوا معاك قدام حيبهدلوك واسي لو هم عايزين يمشوا معاك النظام العام انا اسي بضرب لي عربية الدوريه تجي توديكم..(هنا انا ياداب عرفته هو ماودانا النظام العالم ليه لانوا عارف مافي شئ بدينا لكن كان وسيلة ضغط علينا عشان نرضخ) انا ابيت لانوا دخول الاقسام وخصوصا قسم النظام العام حاجه مرفوضه في المجتمع وحتكون فضيحه لي وبس والناس ماحاتقتنع اني مظلومه وماعملت حاجه غير اني رفضته السفاهه والحقاره الكان بعمل فيها الزول دا يمكن حاتجوا تقولوا لي انتي مشكلتك كانت مع عسكري ومشكله شخصيه معاو ما مع ناس النظام العام انا بقول ليكم لولا قانون النظام العام دا ماكان لقى فرصه فيني وفي بنات كتاااار والله في قصص توجع القلب عن بنات العساكر استغلوهم اسؤا استغلال على حس النظام العام عشان الخوف المتوارث من كلمة مشت القسم اخواتنا واخواتكم بجاملوا كتير على حساب شرفهم وعزتهم وكرامتهم عشان الاخ او الاب او الزوج مايعرف انها مشت القسم بتتنازل كتير نصيحه مني لي كل راجل واخ واب قول لي بنتك لو اتعرضتي لي اي حاجه واضطرتي تمشي القسم امشي وانا بجيك واقيف معاك ماتخليها تخاف منك وتقبل اي حاجه على نفسها في سبيل انك ماتعرف انها مشت القسم وهي مظلومه يخوانا الاقسام دي جزء من مؤسسات الدوله ليه الناس عاملنها اماكن تجيب العار بالمناسبه انا للان ماحكيت لي زول غير زوجي عن الحصل لي دا لانوا بخجل اقول لي اهلي اني اتقبضته ودخلت بسط الامن الشامل ولو كانت بنت شخصيته اضعف مني كانت حتنفذ للحقير كل طلباتوا وانا متاكده في الاف البنات اتعرضوا للمواقف دي والله اعلم اتصرفوا كيف.


سودانيه حره


تعليقات 5 | إهداء 0 | زيارات 2013

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#745056 [ابوزول]
0.00/5 (0 صوت)

08-15-2013 11:14 PM
نصيحتيللكل من يتعرضن لمثل هذا الموقف بسرعة الاتصال بذويهن للحضور لهن بالقسم حتي لا ييفلت مثل ههولاء المتفلتين من االعقاب


#745004 [انصاري]
5.00/5 (1 صوت)

08-15-2013 09:53 PM
التحية لك، وأنت تدافعين عن حقك الإنساني، بكل إباء و شموخ، رافضة الإبتزاز، والإستغلال الدنيء، وبأمانة شرطة النظام العام، أغلب منتسبوها أو معظمهم ضباطاً، وأفراد، فاقد تربوي،وساقط ثقافي، وناقصي قيم، و وعدمي أخلاق، وفقيري تدين، وعديمي رجولة، ويكثروا عند الطمع ويقلوا عند الفزع - ومسلحين بحصانات لم تمنح حتى للأنبياء والرسل من قبل، وبقانون مجرم ظالم مُجرم يعجز الشطان نفسه من صياغته - ومحاكم خاصة بهم تحمل نفس الإسم سييء الصيت وقبيح السمعة، تذبح فيها العدالة ضحى، بواسطة قضاة النار! الجالسين في محاكمها_ لا إستثني أحدا


#745000 [واحد]
0.00/5 (0 صوت)

08-15-2013 09:44 PM
والله إنتى حُرة بجد,وكلامك دُرر وياريت كُل الناس ماتخاف وتمنع أى كان من التعدى على حقوقها.ومن الأهل والأقارب مساندتها حتى لاتحصل كارثة.


#744978 [ممكون وصابر]
0.00/5 (0 صوت)

08-15-2013 09:08 PM
اذا كان وزير الداخلية اريتري كوز التعيين بالولاء حتى ولو كان اجنبي فما ذا ننتظر من العساكر


#744966 [حسان]
0.00/5 (0 صوت)

08-15-2013 08:41 PM
حقا حرة بنت احرار و ثقي معاناتك لن تروح هدرا عند المليك المقتدر


سودانيه حره
مساحة اعلانية




الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة