نفير الأمل
08-17-2013 04:17 PM



ما أن هطلت تلك الأمطار يومي 1-2 أغسطس الجاري حتي دارت بين بعض الشباب رسالة على هواتفهم النقالة مفادها (يا جماعة عاوزين نعمل نفير) .. وسرعان ما تم تحديد المكان والزمان للإجتماع .. وبدأ الكل في إستقطاب معارفه وأصدقائه .. وتكونت بسرعة لجان لتوزيع الأدوار .. لجنة تلقى الدعم .. لجنة تسجيل المتطوعين .. لجنة حصر الأضرار .. لجنة تلقى البلاغات .. لجنة الزيارات الميدانية .. إلخ !!
هكذا بدأت حملة أو مبادرة نفير من أجل مساعدة الأسر التي تأثرت بالأمطار والسيول الأخيرة … اليوم قمت بتسجيل زيارة لهؤلاء الشباب في مقرهم المؤقت بشارع 37 العمارات (غرب مستشفى الأطباء) .. أصابتني الدهشة وأنا اري المكان كخلية نخل .. هتفت في داخلي (ما شاء الله .. ما شاء الله) .. شباب من الجنسين يعملون في همة ونشاط .. أوراق على الحوائط كتب عليها (جدول أعمال اليوم) .. غرفة البلاغات تستجيب لنداء المواطنين 24 ساعة في اليوم .. غرفة المعلومات تنتشر على طاولاتها أجهزة اللاب توب ويجلس عليها شباب يقومون بتسجيل البيانات المختلفة لعدد 5473 متطوعاً .. العمر .. المهنة.. السكن .. هل لديك عربة .. هل سبقت لك خبرة في العمل الطوعي .. وكل البيانات التي من شأنها تسهيل المهمة وتنفيذ المطلوب بالصورة المطلوبة ..
كل المنظمات الطوعية الصغيرة إنصهرت وأتت للإنضمام لنفير .. صدقات .. شارع الحوادث .. جنيه الجمعة .. إلخ .. كل الشباب توحدوا من أجل هدف واحد هو مساعدة أهلهم المنكوبين .
إستطاع هؤلاء الشباب الوصول إلى آلاف المتضررين في مختلف المناطق في شرق النيل، كرري، أم بدة و محليات الخرطوم بحري حيث وصلت إغاثاتهم إلى مرابيع الشريف، سوبا شرق، أم عشوش في شرق النيل، الفتح (1-2-3-4) في كرري، دار السلام ، العامرية أم بدة بالإضافة للدروشاب في الخرطوم بحري قدموا لهم المراتب، والبطاطين والملابس، ومياه الشرب، والخيام، والناموسيات المشبعة، والجركانات، وأدوات الطبخ، وبطاريات الإضاءة و لمبات الشحن والإغذية من المعلبات، و اللبن المجفف، ولبن الأطفال المدعم و الأطعمة المعدة مسبقاً.، وقد قام هؤلاء الشباب بترحيل بعض الأسر من المناطق المنخفضة إلى مناطق أكثر إرتفاعاً حماية لهم من أمطار قادمة .
شباب نفير .. بينهم المهندسون بمختلف تخصصاتهم وبينهم مختبف الكوادر الطبية من أطباء وصيادلة وممرضون وبينهم تقنيي معلومات ومحاسبون وكثير من تخصصات أخري .
لقد أحسست بفخر وزهو شديدين وانا وسط هؤلاء الشاب الذين يجسدون في بسالة ونكران ذات شديدين كيف يكون (حب الوطن) وكيف يمكن لشباب هذه البلاد العظيمة أن يتصدوا (ساعة الحارة) ويقفوا صفاً واحداً من أجل إجلاء الهم والغم والحزن والمصائب عن هذا الوطن العملاق .
شكراً لكم شباب (نفير) فقد أعطيتمونا أملاً جديداً في سودان واعد بكل ما هو جميل .. جعلكم الله ذخراً لوطنكم (الما بستاهل الحاصل ليهو ده) !

كسرة :
صرح السيد والي الخرطوم بأن الكارثة هي ان يموت نصف السكان و ما دون ذلك فهو أزمة …. يعني زيها وزي أزمة المواصلات ؟
كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو)+و؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو)+و؟


تعليقات 16 | إهداء 0 | زيارات 6187

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#746837 [Arondad]
0.00/5 (0 صوت)

08-18-2013 06:32 PM
الاخ قمر النور بعزم فيني عشان اطلع الشارع بس الشارع دا ما تستعجل عليهو بنطلع ونن قريب بس انت ابقي راجل واركز .
وبعدين انت زعلان كدي مالك راس الصوت لحقك الظاهر انت منتفع .يا اخي لو قلنا صلحتو البلد وعماتو كباري وشوارع ظلط دا بديكم الحق انكم تكضبو وتسرقوا الاغاثه الجات اول امبارح دي البقت في السوق دي الوداها السوق منو تقدر توريني.المطار دا الماسكو منو ناس قرفنا ولا ناس المعارضه عشان يجي الوالي يقول الاغاثه لقيناها في السوق ديل ما ناسك ولا جو من المريخ .
الاسلام برئ منكم ومن فعايلكم .
اختشوا وخافوا الله في الناس الغلبانه دي.
وكان بدافع ساكت الله بسألك لانك بدافع للباطل وكان عليك تمصر الحق ولو بي كلمه ولا اسكت.
وكان معاهم برر لي الاغاثه دي طلعت من المطار دا كيف ولقت طرىقها للسوق.


#746832 [gomma gamma]
0.00/5 (0 صوت)

08-18-2013 06:26 PM
يا سيد جبر الم تطلع علي عناوين جريدة لصوصيات الواسعة البلع(علي وزن التوزيع) وكان العنوان الرئيسي علي لسان الناطق التمساحي الكبير لقد جرفت السيول و الامطار خط هيثرو بين روما و الخرطوم مع كل طائرات المرحومة الخطوط الجوية السودانية وبعد هذة النهاية الجميلة سوف يتم توقيف كل التعليقات في هذة الموضوع و سوف نمد سيد جبر بتفاصيل كاملة بعد رفع فراش ليالي الماتم


#746823 [ابو الغيث]
0.00/5 (0 صوت)

08-18-2013 06:08 PM
الله يعطيك ويعطيهم العافية لماذا لانفكر نحن في الخارج في كيفية دعم هؤلاء الشباب بمبادرة تتبناها الراكوبة ولا......


#746689 [مرتضي]
0.00/5 (0 صوت)

08-18-2013 03:12 PM
بسم الله الرحمن الرحيم


أنيق انت في طرح جزيت الخير كله...........


#746512 [Arondad]
0.00/5 (0 صوت)

08-18-2013 11:24 AM
شعب السودان شعب جبان وما يستاهل عمل خير واحد وناس نفير ديل ما عندهم شغله يقضوها.
ويستاهل يحكموا هذا البشير وعصابته وانشاءالله بعد سنتين يبقي عشره دول.وتبقي حكاوي من التاريخ انه كان في بلد اسمه السودان مساحته مليون ميل مربع.
صدعتوا راسنا شعب معلم وشعب عمل انتفاضتين وما عارف شنو.انشاءالله امير المؤمنين عمر البشير يمسيكم بي علقه ويصبحكم بي جلده شعب وهم وكسول وجبان وغبي واجبن من وطئ الثري.
ويقول ليك ما دايرنها تبقي زي سوريا .ليه انتوا احسن من السوريين في شنو والعجيبه البقول ليك البديل منو .يبدل اعمالك عالم وهم.
والله انا دمي محروق وقرفان من الشعب لحمة الراس اكتر من الحكومه الله اكبر عليك يا شعب السودان.


ردود على Arondad
United States [محمد الحسن] 08-19-2013 07:01 AM
بدل التنظير والنقة انت ما تطلع فى الاول ؟؟ وبس تلقى فالح فى سف التمباك ومالى خشمك اوساخ

United States [الغضنفر] 08-18-2013 04:13 PM
و الله العظيم أنا حاسي بوجعك و غلبك دا يا أستاذ أرونداد بالإنجليزي .
لكن أن نترك أهلنا في مثل هذه الكارثة لمصيرهم مع النظام الجيفة دا كراهيةً فيهو ليس أمراً صائباً بأي حال.

ما حدث جراء الأمطار و السيول لأهالينا الغلابة شئ فوق الوصف ... و لك أن تتخيل ما سيحدث لهم و قد اجتاحت السيول منازلهم و ممتلكاتهم ... فقط تخيل !!!

شكراً لسعة صدرك

United States [gamarelnour] 08-18-2013 03:38 PM
انت عايز الرجال يطلعو مظاهرات حتى بعد داك تطلع ..لمن انت راجل وروحك محرقاك قدر دا قاعد فى البيت مالك !!


#746491 [ود البشير]
0.00/5 (0 صوت)

08-18-2013 10:51 AM
ياخي اكثر حاجة بتستفز الواحد هو تصريح حثالة البشر بانه نفير هم ياهم شباب الوطني واكتر حاجه سخيفة انه ناس الحكومة عايزين الناس تنفر من نفير يقوموا يشوهوا صورة الشباب الزينين ديل ياخي طيب انتو لو عارفين ومتأكدين من كره الناس ليكم قاعدين فوق صدورنا ليييييه


#746349 [تختخ]
4.75/5 (4 صوت)

08-18-2013 01:05 AM
شكرا ليك علي الزيارة ولو كانت في غير هذه الظروف(كنا فرشنا السكة ورود)


#746341 [صرخة شعب]
3.00/5 (1 صوت)

08-18-2013 12:36 AM
الاستاذ جبرا انت عارف انو الحكومه دى جنها وجن منظمات المجتمع المدنى وبالمناسبه يوجد هذه الايام كتاب فى بعض مكتبات الخرطوم واتمنى من الشباب قراته اسم الكتاب (منظمات المجتمع وابعادها الفكريه )


#746303 [عمار]
0.00/5 (0 صوت)

08-17-2013 10:47 PM
تعريف جديد للكارثه والازمه...من اصحاب انزال قيم الدين علي الواقع....ومن اهل المشروع الحضارى الاسلامي....
دقي يا مزيكا


#746280 [abu modi]
0.00/5 (0 صوت)

08-17-2013 09:53 PM
يا ود جبرا والله احترنا صحي ناس نفير طلعوا مؤتمر وثني ما شيوعية حمر


ردود على abu modi
[abuawaab] 08-19-2013 10:50 AM
نحن نشيد بهم حتي ولو اتو من اليهود لانهم يقدمو عمل انساني لاناس محتاجين .

United States [ابو الغيث] 08-18-2013 06:17 PM
(ناس نفير طلعوا مؤتمر وثني) ,(ما شيوعية حمر ) ,هذه لغة جهل والعياذ بالله منها انك تفرق أو انك من الجماعة وهذا اسلوب امن الجبهة لتكريه الناس في فصائل الشعب المختلفة...سالتك بالله ما المقصود من شيوعية حمر !!!!!!!!!!! ارحمنا يارب من هذه البلاوي ودا نتيجة تذويب المرحلة المتوسطة اعانك الله وامثالك


#746231 [بت حبوبتها]
0.00/5 (0 صوت)

08-17-2013 08:30 PM
أقول للوالي ما ضروري يموت نصف السكان, فإذا مات شخص واحد برضو, عندنا كاااااااارثة !

لأنه لو مات واحد من أسرتك يا والي الهم والغم, حتقفلوا الشوارع المؤدية للعزاء وتعطلوا حركة التنمية المعطلة خلقة, والرئيس يجي للفاتحة بالهيلوكوبتر - تحسبآ للمطر - ودي تكلفنا بالدولار, والوزراء ونوام البرلمان يتكسروا 3 يوم في العزاء ويعطلوا مصالح البلد المعطلة خلقة, دة غير تخصيصكم ل 50 كتيبة جيش, أمن وشرطة لتحمي الصيوان الفخمان من شذاذ الآفاق أمثالنا..أها, شنو ليك, دي كارثة للبلد واللا ما كارثة؟ الله يعلم إنت براك كدة " كارثة" !


#746192 [مواطن غلبان]
0.00/5 (0 صوت)

08-17-2013 06:41 PM
هذا هو السودانى الاصلي والاصيل وليس كجماعة الحكومة او المتمردين اوالمعارضة الهزيلة او حملة جنسيات دول اخرى..........


ردود على مواطن غلبان
United States [ابو الغيث] 08-18-2013 06:19 PM
هذا كلام امن مساواة الجميع بجماعة الحكومة حتي لانعرف الجاني,انطم يا كارثة


#746180 [jangy]
5.00/5 (4 صوت)

08-17-2013 06:11 PM
اخر الا الخبار يا ود جبرة الجماعة قالو ديل اولادنا يعنى اولاد المؤتمر الوطنى عشان الناس توقف منهم الدعم وهم عارفين كراهية الناس للمؤتمر الوطنى شفت كيف الابالسة بيفكرو


#746163 [Ali saleh]
5.00/5 (2 صوت)

08-17-2013 05:50 PM
هذا هو السودان يا جبرة السودان الأصلي خلف الضلوع وما زال هناك أمل طالما هناك شباب مثل شباب نفير. ومثل هؤلاء هو من يعول علية بعد إنقشاع الظلام وذهاب الطغمة الكاتمة على صدورنا.


#746140 [دقنة]
5.00/5 (3 صوت)

08-17-2013 05:04 PM
ما قلت ليك يا أستاذ جبرة قبل كده إنو كل ما نفقد الأمل نرجع نلقاهو يفرهد في دواخلنا من جديد ،،، نحنا يانا نحنا في النهاية،،، تحية إجلال وتقدير لكل سوداني حر ما بدل معدنو ولا إتنكر لأصلو،، وتحية خاصة لنفير العزة والأمل والكرامة،،، بيكم إزداد فخرنا وعزمنا ،،، وليكم تهون القواسي بإذن الله

أزيدك من الشعر بيت ،، أهلنا في الجنوب الحبيب برضو ما مقصرين وتحويلاتم ما وقفت من يوم ما بدت الأزمة ومن يوم مقال أختنا الغالية إستيلا

ده ما ياهو السودان وديل ما ياهم ناسنا وأهلنا البتفداهم الرقاب


#746123 [سودانيىىىىىىىى]
4.88/5 (5 صوت)

08-17-2013 04:30 PM
سبحان الله الكارثة هي ان يموت نصف السكان وما دون ذلك فهو ازمة ,اقدر اقول وانا مستوثق تماما هؤلاء سفهاء ,وحثالة بشر


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة