المقالات
السياسة
نمت وحلمت بحدوث تبادل مواقع بالتراضى بين السودان واليابان
نمت وحلمت بحدوث تبادل مواقع بالتراضى بين السودان واليابان
08-24-2013 01:28 AM

اللهم أجعله خير
كنت نائم وحلمت حلم أشبه بحلم الجوعان عيش
الظاهر مقال سودان بلا أخوان معلق فى اللاشعور حقى
نمت وحلمت بحدوث تبادل مواقع بالتراضى بين السودان واليابان
البشير وجماعة الأخوان بالدكتور الخضر ومعتمد شرق النيل ، كلهم لحكم اليابان
ويوشهيكو نودا وجماعة الحزب الليبرالي الديمقراطي لحكم السودان


اللهم أجعله خير – خير إن شاء الله - قبل شويه كنت نايم وحلمت حلم جميل للسودان ولكل السودانيين شبيه بحلم الجوعان عيش ، فقبل ما أنوم بدقائق كنت بتابع برنامج على قناة الخرطوم الفضائية قدمه زميل الدراسة بعطبرة الثانوية الرياضى المطبوع كمال حامد عن تكريم رئيس الجمهورية عمر البشير لللاعب يوسف مرحوم ، لاعب منتخبنا القومى ونادى النيل الخرطوم فى ستينيات وسبعينيات القرن الماضى ، وحقيقة أنا آخر مرة شفته فيها يوسف مرحوم وهو يلعب كان فى النسخة السابعة لكاس أمم افريقيا على أستاد الخرطوم عام 1970م وقبل النوم كنت بطنطن الناس ديل ماعندهم شغله غير التكريم والحفلات والغناء والرقص ، طيب فى السودان الملايين من العمال والفلاحين والمعلمين والخياطين والحلاقين والمشاطات والنفاسات والطهارات والمراسلات والأطباء والمهندسين والجنود والشرطة والحدادين والأمهات الأرامل العاملات وستات الشاى وبياعين الصعوط وووو ...... أنجزوا أعمال طيبه هل ننادى على كل فرد ونكرمه – إحسان العمل واجب ولاشكر على واجب – من يحسن يشكر شفاهة فقط من رئيسه المباشر إما شفاهة أو مكتوب – اللاعب بتاع كرة القدم جرت العادة لمان ينتهى عمره الإفتراضى أو يتوقف بداعى الإصابة - ناديه يقيم له تكريم مش رئيس الجمهورية يكرمه – لغلغت مع نفسى كلام كثير ثم نمت غضبان - الموضوع تم تخزينه فى اللاشعور بتاعى in my subconscious عن التكريم للاعب كورة لعب كويس – يارب الإنقاذ خلال 24 سنة من حكمها كرمت قرابة كم مليون مواطن ولكنها لم تحاكم ولا مواطن واحد فى جريمة تعدى على مال عام – حاكمت ضباط 28 رمضان وأعدمتهم عشان محاولة إنقلابية – وأعفت عن صلاح قوش وود إبراهيم وزملائهم لأسباب لم تكشف عنها - نحن عارفين أن من يستحقون المحاكمات والسجون بل الإعدام بعشرات الألوف إن لم يتجاوز الرقم المليون ، لم يحاكم فرد ، بينما من كرموا فاقوا المليون ، حلمت حلم غريب لايحدث – اللهم أجعاه خير - لمان صحيت قررت أن يضاف هذا الحلم كبشارة للسودانين مواصلة لرسالة سلمان للخلاص من حكم الكيزان بسلام وهو مقالى السابق على صحيفة الراكوبة – مقالى هذا يتعلق بالحلم والحلم كان نتاج لحديث سبق النوم بدقائق كما أوضحت لكم عن التكريم وبصراحة كلما شاهدت تكريم لشخص سودانى يستفزنى هذا الأمر لأننا نكرم والبلد خاته الخلف وماشه لى وراء ، فالإنقاذ ترمى من وراء هذه التكريمات العديدة الغير مبرره لأمرين فى غاية الخطورة – الأمر الأول : أن من تكرمه حتى لو كان عدوا لها إما سيتحول لصديق أو سيتوقف عن معاداتها ، ودا تكتيك جديد للإنقاذ جاء بعد أن حدث الضعف وهوانها على الناس زمان ما كانت بتكترث لمان الكروش كانت شبعانة والجيوب مليانه ، ويمكن أن نأخذ ماقاله الكاتب العالمى الطيب صـالح فى الجماعة فى سـنوات عزها ( من أين أتى هؤلاء ؟ ) فمـرض وضعف وعاد للسودان بعد سنوات غربة طويلة لأنه كان يعرف أن مرضه هذا مرض موت ، فإستقلوا فرصة وجوده بالسودان فكرموه ليخجلوه والرجل فى حالة ضعف جسدى لايقوى إلا أن يقول ما قاله فى البشـــير ( رئيسنا عمر البشير يبدو لى من مشاهداتى فى التلفزيون وأنا قابلته فى السودان مره واحده يبدو عليه رئيس متواضع وماعنده النفخة بتاعت الحكام والعساكر وأظنه رئيس كويس للسودان فى هذه الفترة وهو يحاول أن يأسو الجراح وهذا حسن ) الطيب صالح هاجم الجماعة كلها وقال من أين أتى هؤلاء ؟ وحين كرمه البشير والكسرة كسارة الوجوه ودا مثل سودانى بيقال لمان زول يناديك ويكرمك ويكلك كسرة تقول ( الكسرة كسارة الوجوه ) يعنى بعدما أكل كسرتك لن يقوى لسانى على مهاجمتك – يا أمدحك أو اصمت - الرجل أثنى على البشير بس فى شخصه ولم يعمم المدح للجماعة التى زمها وهذا من الذكاء الذى عرف به الطيب صالح ، وكمان جاء بعبارة بليغه عن البشير (وهو يحاول أن يأسو الجراح ) يعنى البشير عمل جراح فى السودان وبيحاول يأسوها وكلمة يأسو تعنى العلاج والدواء وتعنى الإصلاح والطيب ربنا طوع ليهو اللغة تخرج من فمه كما تخرج النغمات والغناء من حنجرة ابو الأمين .
الإنقاذ تتقرب لمثل هؤلاء بالتكريم والأمر الثانى : وهو أخطر تريد الإنقاذ أن تبين لنا أن مجتمعها هو مجتمع المدينة الفاضلة وليس فيه من يستحق المحاكمة وكلهم ناس خيرين وعلى عثمان قالها كم مرة لا تتحدثوا عن فساد العنده دليل يتقدم به – كسرة عشان الأخ الفاتح جبرا : أخبار خط هثرو شنو ؟؟ وليه بتسأل من خط هثرو تانى ياجبرا ما خلاص الراجل جبناه فى قناة المؤتمر الوطنى ( قناه الشروق ) وقدمناه للمحاكمة واثبت براءته يعنى عشان جبرا عاوزنا نحاكمه مرتين وفى زول اسمه الشريف بيغلط ، بالله شوف جبرا دا .. آل هثرو آل إنت لو رجعناه عندك ليهو طيارات ولندن عاوزين منها شنو نحن البعثات لأوربا ووقفناها – العاوز إبتعاث عنده إيران وبس ..
الظاهر ناس اليابان سمعوا بمدح الطيب صالح لرئيسنا وحسدونا فيهو وقرر شعب اليابان أن يحدث تبادل مواقع
رئيس الوزراء الياباني الحالي هو يوشهيكو نودا إتصل بالرئيس عمر البشير وطلب منه أن يتبادلا مواقع العمل ، البشير يجيب الكاست بتاعه بتاع الكيزان كلهم ويجى يحكم اليابان ، وهو يوشهيكو نودا يجيب الكاست بتاع حكومته كلها من جماعة الحزب الليبرالي الديمقراطي اليابانى ويجوا يحكموا السودان ، على أن يتم التحرك فى ساعة صفر واحد حتى لايحدث فراغ دستورى فى البلدين ، يتجه يوشهيكو وجماعته للخرطوم ويتجه البشير وجماعته ناس نافع وشيخ على ودكتور الخضر ومعتمد شرق النيل والزبير بشير طه بتاع الجزيرة اللى ودا قرية ام القرى فى أمات طه كلهم يحلوا عنا ، حتى جماعة الترابى يمشوا معاهم عشان كمال عمر يلقى ليهو زول يناقره فى طوكيو وجماعة أخونا على الجاويش ويتسلموا تسيير الحكم فى اليابان ، و يوشهيكو يتسلم حكم السودان وأمرنا لله ، والله بيعه خاسره وحظكم ياناس اليابان جاءكم رئيس لقطه بشهادة الطيب صالح ..
عندى صديق إسمه هاشم عمر على كرار سودانى يقيم فى طرابلس ليبيا بكتب فى المقال وأتونس معاه على الأسكاي بي قال لى : ليه غشونا جماعتنا مسلمين مانرضى يحكمنا كفار ، قلت ليهو ماتنسى وكمان خبره فى التطفيش للصالح العام والله بعد سنه تلقى اليابانيين يفتشوا للشغل فى الخليج وجماعتهم لو ماكفوا الوظائف يتموها من جماعة مرسى اللكانوا فى رابعة والنهضة وبعد سنه أكان ماشفته اليابانيين فى جده بتفتشوا لى كفيل أكون ما سلمان ..
وصلت طائرة الرئيس البشير لطوكيو – المرة دى مافى زول إعترض طريقها ولاحديث عن الجنائية لأن الموضوع كان حلم - اللهم أجعله خير
أول أمر أصدره فخامة الرئيس البشير وهو فى مطار طوكيو : وجه جميع مصانع النسيج فى اليابان أن تشتغل بطاقة كاملة 3 ورديات عشان تعمل ليهو وشاحات لتكريم شعب اليابان كله ، الصنع ليهو سيارة ، الصنع ليهو سفينه ، ناس سونى ، ناس توشيبا ، ناس كاسيو ، ناس هوندا ، وعد لمان تفتر من المنجزات اليابانية، الجماعة إندمجوا فى التكريم والحفلات والغناء وطبعا الريس ساق معاه قيقم بالكورس حقه وتمر الأيام والشهور والتكريمات والتشريفات مستمرة وشعب اليابان تعلم يبشر بأصبعه السبابة وهى لله هى لله ، وفى نهاية السنه جاءت طلبات مشتروات من وكلاء تويوتا ونيسان وهوندا ووووو فى أمريكا واروبا واسيا وخاصة طلبات الصين من المنتجات اليابانية وعبد اللطيف جميل والعيسى والحمرانى وعبده هاشم فى السعودية لسيارت تويوتا ونيسان وهوندا ومن جميع أنحاء العالم عاوزين حصتهم من مشتروات الموديلات الجديدة – الجواب لا توجد لدينا سيارات ولا سيارة واحدة أنتجت - كنا فى العام الماضى مشغولين بالتكريم لشعب لم يكرم منذ الحرب العالمية الثانية - الشعب اليابانى قاعد يهلل ويكبر وبس وقيقم يسهلج عن أخوات مهيره وهم فرحين قالين نفسهم هم أخوان مهيره ... دخلوا فى النفق الذى خرجنا منه ..
نحن هنا فى السودان الجماعة كرفونا كرف لامن نفسنا إتقطع وجزاءات ودقة فى المواعيد – تجى للعمل يقولوا ليك فى ساعة رياضة – فى ناس فى حياتها مارفعت ايديها – صفى انتباه – خلصنا حصة الرياضة ودونا لحصة الإفطار دخلنا العمل واحد من زملانا رمى السفه فى زهرية بمكتبه عملوا ليهو جزاء وخصم راتب اسبوع فى سفه طيب لو كان سكر بسووا ليهو شنو – تضييق شديد خلونا نقول ضيعناك وضعنا معاك يابشير – واحد من جماعتنا فى السوق العربى إتلفت جاى جاى يمين شمال مالقى دورة مياه مشى على حيطه الجامع الكبير فكه زنقته قبض عليه وأحيل للمحكمة وحكم عليه بثلاثة شهور سجن ومائتي جنيه غرامه – جارنا إشترى كيس تسالى لب أكل ورمى التسالى فى الحافلة نزلوه منها وجلدوه 20 جلدة وغرامة ألف جنيه – إنتو قايلنه جنيه الكيزان – الجنيه بتاعنا فى السودان اليوم يساوى 6 دولار أمريكى - مدير بنك أمدرمان التجارى المالى إختلس مبلغ من المال لمان كشفوه إنتحر علق نفسه فى المكتب بكرفتته – ياجماعة نحن ناسنا البيسرقوا بقوا ينتحروا زمان تسرق هنا يحولك لحته تانية تريانه اكثر منها عشان تسرق تانى - ومدير بنك النيلين الإسلامى الوطنى لقيناهو شانق نفسه فى مكتبه وموضوعه لسع ما تم كشفه - وزير المالية قدم إستقالته بعد مساءلة حامية فى البرلمان – 3 وزراء لوزارات أمنية حساسة تم التحقيق معهم عشان جنبوا أموال – 10 مؤسسات عامة تعمل فى السوق وتهيمن على جميع مفاصل الإقتصاد السودانى تصدر وتورد وتبيع وتشترى برأسمال عبارة عن مال عام مجنب ولا أحد يجرؤ على محاسبتها – أغقلت وصودرت جميع ممتلكاتها الثابته والمنقولة وأرسل فريق من المراجع العام مستر توشيبا للتحقيق مع المسئولين فيها - مستر يوكهادى ميشو معتمد شرق النيل رمى نفسه وأنتحر فى مياه السيول لمان شاف 4 بيوت بشرق النيل تشققت جدران سورها وبيت وقعت حيطته قتلت كلب الجيران ، مايزيد عن 3450 مسئول كبير دخل السجن السبب شنو ياجماعة قالوا تعدى على المال العام - طيب مالو مانحن من ايام الكيزان والناس العيونهم كبار ومفتحه ورقبتهم تعمل ثلاثة ضلعات قاعدين نتعدى عليهو الجديد شنو وبعدين إنتو شوفتونا كيفن بعيوناتكم الزى عيونات الجروه المولوده دابه دى والله ياجماعة نحن عاوزين كيزاننا القدام نسرق ونغنى ونرقص ونختلس وبعد ده كله نكرم حسع عليك الله يوشهيكو نودا من يوم ماجاء شفته كرم ليهو زول حتى عمرة رمضان من المال العام وقفها وقال شنو قال السنة دى العاوز يحج يحج من ماله الخاص إذا إستطاع إليه سبيلا – كمان بقى يعرف القرأن - قروش شنو من الماهية وبعدين ماهية شنو نحن كنا معتمدين على الأموال المجنبة وأنت وقفتها والرشاوى والإكراميات ووضعت لكل مسئول جهاز تنصت صوت وصورة مزروع فى جسمه دا شبكة شنو ياجماعة اللشبكنا فيها - ياحليلك يابشيرنا ياحليلك يابشيرنا - ولا لدنيا قد خلقنا نحن للدين فداء ويوشهيكو نودا دا مو رفيقنا لا مال مجنب لا مال عام يدنا تصله وكيف نعيش بلا سرقه الرضاعه سهله صعب الفطامة تعال راجع يابشيرنا – وكما قال إخوتنا فى السعودية : كيف نعيش بلا كابريس
الأوضاع فى العام الثانى
اليابان طوكيو
البورصه فى اليابان بعد التداول واحد دولار أمريكى يعادل 7000 ين يابانى بحكم سودانى ماكان 90 بس
شيخ على عثمان من طوكيو – والله كان ماجينا الدولار كان حصل 10 ألف ين
جيدن جيتو ياشيخ على ( دى باليابانى )
السودان الخرطوم
البورصة فى السودان بعد التداول واحد جنيه سودانى بعد حكم يابانى 6 دولار وقبل سنة الدولار 7600 جنيه
مصانع النسيج فى الحصاحيصا تتحكم فى أسواق العالم للتترون السودانى ومصانع اليابان وكوريا الجنوبية تحقق خسائر كبيرة
سيارات مصانع ابى حمد ونيالا تحقق مبيعات عالمية تفوق الأمريكية والألمانية بكثير
منتجات مصانع أم ضريوه للساعات تنافس منتجات روليكس السويسرية
فى مجال صحن الفول وقفة الخضار
لمان البشير وجماعته كان فى السودان كانت قطعة الخبز وزن 60 جرام بـ 25,000 قرش قديم يعنى واحد زي أنا عاوز ليهو ثلاثة أربعة عيشات بـ 100,000 قرش
الراجل بقى يمرق للشغل يخلى لى مرته 5 جنيه ترجيهو طبيخ بامية مع الجزر بلحمة ضانى وصحن سلطة مكمل من طماطم وجزر وخص وجرجير وعجور وليمون مع صحن مكرونه باللحمة المفرومة وتحلية حسب طلبه دا كله بخمس جنيهات
ويوشهيكو نودا جاب معاهو عجانات وافران وزع لكل اسرة فرن وعجانه ووزع الدقيق فى التموين بقت العيشة الواحدة وزن 250 جرام تكلف الاسرة حوالى نص جنيه جديد يعنى 500 قرش قديم وصحن الفول المصلح ومعاه وصله لو ماشبعت بى 3 قروش جديدة يعنى 3000 قرش قديم
السودانين بدول المهجر كلها بما فيها الخليج وأمريكا قدموا إستقالاتهم وعادوا للسودان
اليابانيين إستقلوا فرصة خروج السودانيين وجوا مسكوا محلات الثياب فى غبيرا بالرياض وباب شريف بجده ومسكوا تانكرات موية الصحة بدول الخليج وكمان مسكو تربية مواشى مع بدو دول الخليج
سبحان مغير الأحوال من حال الى حال
أنا عملت مؤسسة وفى كفالتى اليوم أكثر من 100 عربى بصدر كافيار لأوروبا عملت مزارع كافيار فى الرباطاب
الرئيس السودانى الجديد ويوشهيكو نودا يصدر أوامره بقفل جميع آبار البترول وإلغاء وزارة النفط ووزارة المعادن ويقول السودانى سيعتمد على موارده من الزراعة والمنتجات الحيوانية والصناعة أما البترول والمعادن فى باطن الأرض سنحتفظ بها لأجيال الغد حين يصل سكان السودان 150 مليون نسمة بعد 70 سنة
سكان السودان الأن حوالى 30 مليون نسمه ومالديهم من موارد طبيعية على ظاهر الأرض تكفيهم ومافى باطن الأرض للأجيال القادمة
رنً جرس الموبايل وصحانى
خلاص قوموا منتظرين شنو حلم وأنتهى
لكن بوعدكم بكره بنوم وأحلم ليكم حلم ياصلح حالكم ياوداكم فى داهية
اصلى فى حالتكم المجهجة دى مابخليكم
أها العفو والعافية
مع السلامة
ابوكم سلمان الحلمان
[email protected]


تعليقات 7 | إهداء 0 | زيارات 1303

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#752097 [المهندس سلمان إسماعيل بخيت على]
0.00/5 (0 صوت)

08-25-2013 08:06 PM
قررت وبعد أن أستخرت الله ألا أكتب فى أى موضوع يتعلق بوضع السودان السياسى الإجتماعى والإقتصادى
تعودت أن أكتب مقالاتى فى قالب كوميدى وباللغة العامية عشان القارىء السودانى عليه ضغوط كثيرة ونفسيته لا تتقبل كلام ثقيل كفاية العجورة بسته جنيه وحبة الطماطم بخمسة جنيه يعنى لو عاوز صحن سلطة لازم يكون عنده 25 جنيه يعنى 25 ألف جنيه قديمه وزمان كنا نشترى سلطة البيت كله بقرشين تدى الخضرجى القرشين يشكل ليك سلطه طماطم وجرجير وبصل أخضر وليمون ولو عنده فجل يحط ليك فجله
الظاهر الغلاء أثر على الإنسان السودانى لأن كل من يعلق على مقالاتى يغرد خارج السرب
بمقال زى الحلم وتبادل القيادات السودانية واليابانية كنت برمى لأن ابين أن العيب ليس فى الشعوب ولكن العيب فى القيادات
لمان رئيسنا مشى اليابان تيرموموتير اليابان وبورصتها إنخفض
ولمان رئيس اليابان جاء وحكم السودان تيرموميتر وبورصة السودان إرتفعت
الشعوب هى هى لم تتغير
بس كانت تحتاج لدينمو يحركها نحو العمل والجماعة دى قاعدة تكرم فى شعب لم يعمل أى شىء سوى الغناء والرقص والطرب وجدودنا زمان - والشعب دا غالبيته خارج الشبكة
تخيلو كتبت المقال أعلاه ليأتى شخص يسمى نفسه( زمن المحن ) ليقول :
( للحقيقة بلوك الاسمنت غير صالح في للسكن الادمي في السودان خاصة للفقراء لانه والله حار حار حار في الصيف ولاتبرد مهما فعلت ,المروحة تذيد السخانة والمكيفات (غير متوفرة للفقراء)ولاتبرد لان درجات الحرارة التي تمتصها الاسمنت كبيرة جدا جدا(صاج كسرة ).عموما اتنمني ان تدرس الموضوع من جميع الجهات ودة اصلا ما موجودة في السودان من رائيسنا لي غفيرنا ماشين علي الله (الله يهون).
المحيرني يخوانا قول بنينا بالبلوك الاسمنت طيب نعمل اية لو جاء سيل ذي الحصل دة مابدخل في الغرف ,في الحال دة اقترح مع منع البناء بالجالوص عمل سد عالي لابواب الغرف لزوم الداخل والخارج من الغرفة يتلب تلبوك يعني ذي الحرمية في بيتو اهو منو رياضة ومنو تعلم مهنة السرقة اصلوا الحكومة بطريقتها ده عايزة تعلم الشعب كلو الحرمن السرقة (الله يهون )

ياجماعة علاقة تعليق اخونا زمن المحن دا شنو بموضوعى - وواحد تانى اسمه ادريس قال سلمان دا ليهو علاقة بالكيزان وبيحضر اجتماعاتهم - وواحد يسمى نفسه بالمكوجى يكتب عن ابليس وسفره لليابان
معقول ديل الشباب النحن بنعول عليهم لبناء سودان جديد - وجماعة أخرى حاقدة على كل ماهو ينتمى حتى ولو بنسبة قليلة للعرب ويحدثون نفسهم بدعم امريكى قادم لكنس كل الناس إلا هم -
أقول لكم كلمه - على السودان السلام - لا اللفى حكومة نافع ولا اللفى المعارضة نافع وشبابنا اللى عليه التكل والوكل يكتب بإسلون مسطح لا عمق فيه
اسعد أهل السودان الأن من يتوفى لرحمة مولاه وتنقطع علاقته بوطن ينتحر - ينتحر بحكامه وينتحر بمعارضته -
عندى لكم عدد من الأسئلة ، من يستطيع الإجابة عليها يصنف نفسه فى خانة من يحق له أن يدخل الراكوبة ويعلق على المقالات ، ومن يعجز عن حلها جميعا يقرأ المقال ويفوت مايعلق عشان مايزيدنا مرض أكتر من المرض المرضتنا اياه الحكومة
السؤال الأول : ماهى أنماط الذاكرة وماهو الفرق بين الإنسان والحيوان من الناحية السايكولوجية ؟
السؤال الثانى : طرق قياس عمر الأرض فيزيائيا وحيويا ؟
السؤال الثالث : علاقة مايكل أنجلو بتمثال لكرون الأغريقى ؟
السؤال الرابع : الخطوات اللازمة لعمل إعلان تجارى ناجح لأى منتج ؟
السؤال الخامس : هل الأكل بصفة منتظمة مع اسرتك ضرورى . علل ؟
السؤال السادس : مدى تأثر موسيقى الموسيقار البوهيمى جوفك بالموسيقى الأمريكية المحلية ؟
السؤال السابع : تحدث عن شعب المايا وحضارته ؟
السؤال الثامن : كيف ومتى تم إكتشاف الـ DNA
السؤال التاسع : الدولة العثمانية واسباب إنهيارها ؟ ومزايا السلطان سليمان ؟
السؤال العاشر : هل اسرع الحصان أم احلى العسل ؟
حيرتونا والله قلنا نحيركم شوية قبل مانغادر منبر الراكوبة


#751528 [المكوجي]
0.00/5 (0 صوت)

08-25-2013 01:34 AM
وأنا حلمت انو ابليس الكان طفش من عمايل الكيزان واخد لجوء في ما وراء البحار سِمِع بحلمك دا وفرح فرح شديد جداً وقال جاي يشتغل مع اليابانيين. اها رايك شنو؟؟


#751515 [yasir abdelwahab]
0.00/5 (0 صوت)

08-25-2013 01:01 AM
السيد سلمان..هذا اذا كان فعلا هو اسمك..
ذكرت ان للسيد المرحوم اسماعيل بخيت مدير البحرية ابن اسمه سلمان متزوج و كان يسكن الرياض..
اذا لم تكن متاكد من هذه المعلومه..اتيح لك الفرصه لنفيها علي وجه السرعه..او تاكيدها والخيار لك..والسلام..


ردود على yasir abdelwahab
United States [المهندس سلمان إسماعيل بخيت على] 08-25-2013 12:02 PM
ياسيد ياسر أنا قلت فى مطلع الثمانينات جاءت أسرة سودانية وبصحبتها عروس وطرقوا باب شقتى وقدموها لزوجتى بصفتها زوجة سلمان إسماعيل بخيت - أنا من قال لهم قد يكون المقصود سليمان إسماعيل بخيت وبالمناسبة سليمان إسماعيل بخيت دا كان عنده مشكلة مع حكومة نميرى وكل ما أقدم جوازى لتأشيرة الخروج يحجزوه لحد ما إضطريت أجيب شهادة من المحكمة بأنى لست سليمان وأن إسمى سلمان من منطقة الرباطاب مواليد قرية عتمور والمثل السودانى بيقول ( سميك يايعلمك الهبالة يا يعلمك الدغالة ) كلما نادوا على سميك تقول ايوه وتطلع هبيل - ولمان ينادوا عليك تسكت ودى هى الدغالة وقد يكون هنالك سليمان أو سلمان إسماعيل بخيت ثالث فى تلك الفترة بمدينة الرياض لا أعرفه - فلهما الإثنين تحياتى وتقديرى


#751449 [ادريس]
5.00/5 (1 صوت)

08-24-2013 10:19 PM
المهندس (ابونا سلمان الحلمان) له علاقة او ارتباط قديم بالكيزان وذكر انه كان بيحضـر اجتماعاتهم في التسعينات زمن المرحوم مجدوب الخليفة وهو لو ما كان عضو في التنظيم لما سـمحوا له بحضور هذه الاجتماعات المافيوية ولو كانوا شـبكوه في شغلة (معتمد مثلا) كانوا ارتاحوا منه.. لا تزعل خلينا نشاغلك شويه..


ردود على ادريس
[المهندس سلمان إسماعيل بخيت على] 08-25-2013 11:53 AM
أخى إدريس سلام من الله عليكم
البداية لم تكن تجمع كيزان
البداية كانت دعوة لكل إنسان سودانى للإنضمام لفكر جديد ولم يعلن عن تنظيم حركة أخوان والجماعة أصلا إنفصلت عن حركة الإخوان العالمية كما إنفصلت عن حركة الإخوان السودانية وأسست بعد الإنتفاضة الجبهة القومية الإسلامية وخاضوا بها الإنتخابات وأحرزوا 55 مقعد فى المرتبة الثالثة بعد الأمة والإتحادى الديمقراطى
كانوا يدعون كل الناس والجماعة دى بتدعو لحزب جامع لكل الكيانات السودانية
أنا ماكان عندى أى مانع أن كل أهل السودان يتوحدوا فى حزب واحد وحزب تفكيرى كنت بظن أن لو كل من ينتسب للأمة أو الإتحادى الديمقراطى زوب نفسه فى هذه الجماعة فسوف تتحول الجماعة داخل الحزب لأقلية لكن الجماعة كانت ذكية فجاءت بأقباط بقيادة فليثاوث فرج وجاءت بجنوب مسيحيين ووثنيين وأنا لمان شاهدت هذا المنظر علمت أن الجماعة تريد قطيع من البشر عشان تقوده لأنى لم اجد بين الحضور من خارج الجماعة مفكر أو سياسى - فخرجت - هل تعيب على معارضتى وخروجى - أم تريدنى أن ابقى مع هذا القطيع بعدين هم لم يسمحوا لى بحضور هذا الإجتماع - الإجتماع تنظمه حركات شباب الجريف غرب وسوبا وفى شاب مسئول بالجريف غرب اسمه ناصر ابوالقاسم جاء لمنزلى ليسلمنى دعوة للحضور حين لم يجدنى ترك رقم هاتفه إتصلت به فذكر لى مكان الإجتماع والغرض منه وللفضول قلت أمشى ومشيت ورجعت دون أن ابيع نفسى وأتحول لمغفل نافع ( م.ن. ) بعدين معتمد شنو البيشبكونى فيها وأنا رافض لفكرة تنظيم المؤتمر الوطنى ولو رجهت لمقالات التى نشرت فى تلك الفترة بالصحف السودانية لو طلبت مهنة حارس فى عمارة لن يعطونى أياها وبهذه المناسبة أن عشت فى السودان فيما بين 1988م وحتى 2003م فترة مؤقته بالسودان كان الغرض منها ان يتربى أبنائى فى السودان على الخلق السودانى والتعليم السودانى اللذين مازلت أراهن أنهما بخير ولم اقبل أن أربيهم وأعلمهم بدول الخليج - فجئت لوطنى - عشت به 15 سنة - صاحب كافتيريا البرستيدج بالسوق العربى - ثم صاحب دكان إسبيرات بالمنطقة الصناعية الجديدة - ثم صاحب مكتب أبوديس للخدمات ببرج البركة - والله العظيم والله العظيم - عرضت علي أكثر من فرصة عشان اصل مع الوصوليين فرفضت - وأنت عارف أنا كنت بكتب يوميا أنقد النظام وأنا فى الخرطوم - الفرص التى منحت لى عشان يلوثونى بتهمة تجعل قلمى لاينطق كلمة وفى ناس كتار شربوا مقلب وظيفة إنقاذية عشان تصمت


#751382 [yasir abdelwahab]
5.00/5 (1 صوت)

08-24-2013 08:18 PM
يا عم وانته الصحاك شنو..ما كان تخليك نائم....عسي عمر حسن ده يقول لليابانيين.. يا جماعه..كيف..وبعدين حيرقصو كيف..وبعدين لو حلف بالطلاق دي يفهموها كيف..انا خايف كمان يقومو يعالجوه ويركبوا ليهو بلعوم وحنجره جديده. ويرجعوا لينا...عاد اكان ده حصل ووووب علينا..بلع وكواريك..عليك الله نوم تاني..


#751316 [المهندس سلمان إسماعيل بخيت على]
0.00/5 (0 صوت)

08-24-2013 06:19 PM
يا أهل السودان عليكم الله تنتظروا فى برنامج حيبث قريبا على قناة النيل الأزرق إسمه الدولة تكرم ستعرفوا أن لى أل حق فيما كتبته - هل هنالك أى شىء يربط على عثمان بود الأمين عشان يكرمه - وأظنكم تذكرون علاقة ناس الإنقاذ بالبروفسير محمد أحمد فضل الجماعة دى مابتثبت على مبدأ واحد فى الحب أو الكراهية واليوم علماء الأزهر الشريف أصدروا فتوى بهذا الخصوص لمان لقوا قادتهم يحضون الموالين لهم للقتال والجهاد وواحدين منهم خرجوا من ميدان النهضة ورابعة العدوية متخفين فى زي نسائى والعياذة بالله على ذمة المصريين وشفتم صفوت حجازى حالق دقنه ومصبغ شعره ونفى حتى علاقة بالإخوان - أفتكر الرؤيا بقت واضحه وخلونا ننتظر نهايتها


#750808 [زمن المحن]
0.00/5 (0 صوت)

08-24-2013 02:41 AM
للحقيقة بلوك الاسمنت غير صالح في للسكن الادمي في السودان خاصة للفقراء لانه والله حار حار حار في الصيف ولاتبرد مهما فعلت ,المروحة تذيد السخانة والمكيفات (غير متوفرة للفقراء)ولاتبرد لان درجات الحرارة التي تمتصها الاسمنت كبيرة جدا جدا(صاج كسرة ).عموما اتنمني ان تدرس الموضوع من جميع الجهات ودة اصلا ما موجودة في السودان من رائيسنا لي غفيرنا ماشين علي الله (الله يهون).
المحيرني يخوانا قول بنينا بالبلوك الاسمنت طيب نعمل اية لو جاء سيل ذي الحصل دة مابدخل في الغرف ,في الحال دة اقترح مع منع البناء بالجالوص عمل سد عالي لابواب الغرف لزوم الداخل والخارج من الغرفة يتلب تلبوك يعني ذي الحرمية في بيتو اهو منو رياضة ومنو تعلم مهنة السرقة اصلوا الحكومة بطريقتها ده عايزة تعلم الشعب كلو الحرمن السرقة (الله يهون)


ردود على زمن المحن
[المهندس سلمان إسماعيل بخيت على] 08-24-2013 02:29 PM
كلامك دا يا من سمى نفسه بـ ( زمن المحن ) ذكرنى بمقطع من فيلم مصرى كوميدى ، جاء المحامى وهو مسطول ليدافع عن شخص متهم بإثارة كل شعب مصر عشان يعطوه توكيل ليبيع المال العام حسب نص مادة فى القانون تقول أن الشعب هو المالك الحقيقى للمال العام وأن الحكومة ماهى إلآ موظف عند الشعب ، المحامى كان تناول جرعة مخدر وهو خارج الجلسة دخل قاعة المحكمة ونام ولمان صحوه ليقدم مرافعته قال للقاضى المشكلة كلها فى فرز سيراميك موكلى كان مفتكره فرز أول وطلع فرز ثانى
حديثك عن بلوك الأسمنت يذكرنى بذلك المشهد - خير - أنت عامل حاجه وإلا أيه الحاصل وماعلاقة بلوك الأسمنت بقضيتنا
غسل وجهك بماء بارد وأعد قرأة المقال

United States [المهندس سلمان إسماعيل بخيت على] 08-24-2013 01:16 PM
إنتو عارفين السودانيين ديل كلهم أصبحوا خارج الشبكة هسع عليكم الله ماهى علاقة تعليق ( زمن المحن ) دا بحلمى الحلمته - الزول دا برضو كان حلمان بمشكلة أخرى ولمان كان بيكتب فى تعليقه لم يقرأ ما كتبته ، بلك شنو يازول المحن محنتنا


م. سلمان إسماعيل بخيت على
م. سلمان إسماعيل بخيت على

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة