المقالات
السياسة
البت الرمت الطرحه
البت الرمت الطرحه
08-30-2013 07:13 PM


الحل فى الثوره .. الحل فى الثوره
الولد الحر والبنت الحره
يطلعو بره
الشعب الجائع للحريه
وفى جوفو الحسره
وقابض لسه فى يدو الجمره
فى ناس حره وما لاقيه الكسره
فى ناس حره وغداها المويه الحاره
وحبة بصله
وبتحلى بتمره
وبرضو فى ناس بتفاوض!
آه يا حزبا نصو نظام
ونصو معارض
وسيدى وسيدك
واقفين عارض
تسلم ايادى الساده
شغل (معارض)
سيدى وسيدك
ادو تحيه ورفعوا تمام
وكلام فى كلام
وكل حاجه
تمام .. وميه الميه
ما هميه ..
انفصال، اغتصاب
ارهاب .. اباده جماعيه
وايه يعنى حلائب لما تزول
من الخارطه السودانيه
وطوفان وسيول
ولقيط مجهول
يا شعب أكتوبر والسادس من ابريل
يا أحفاد الشعب الثائر جيل ورا جيل
انسوا الوهم الحلم، (الحمل) الكاذب
الأسمو بديل
راجنوا
من زول شبعان، تريان، نديان
ومن يومو عميل
يا ثوار (كاودا) يا (فجر جديد)
يا شمسا شرقت فى يوم عيد
غير الشارع والف شهيد
مافى سبيل
واصلوا نضالكم مسلح ومدنى
امكن يرجع لينا شليل
ايد فوق ايد
مع شعبا جائع للحريه
تجار الدين داسو على بالجزمه
وخلوهو ذليل
ناس بتموت بالسيل والمطره
وناس تغرق فى بحر الهجره
وناس حار بيها دليل
وين سودان عشناهو جميل
نادوس خطفوه .. نادوس باعوه
نادوس سرقوه بليل
تجار الدين وكلاب الحاكم
والمأجورين
يا ناس (كاودا) و(فجر جديد)
بالأعلام لازم تهتموا
والكلمه سلاح
تزلزل عرش الطاغية
وما ينوم مرتاح
تعرى الفاسد ليل وصباح
نظام خيبان نظام عريان
من (.....)
تحتو ومربى اللحيه
نظام مشغول بى بنية رمت الطرحه
وسبت تجار الدين
بصقت فى وجه السرقوا الفرحه
اميره الحره
فى وش أخوها النائم
كشحت مويه
عشان ما يصحى
يمرق الشارع وأهتف
يسقط يسقط تجار الدين
يسقط يسقط تجار الدين
الضبحو الوطن الغالى بالسكين
الجوعو زارع
أقداموا مغروسات جوه الطين
الما ضاق راحه سنين وسنين
الأثقلو كاهلو بالهم والدين
العلو قصورهم من عرق المحتاجين
البارزه بطونهم من قوت المحرومين
الحل فى الثوره .. الحل فى الثوره
..............................
تاج السر حسين – كمبالا
28 أغسطس 2013



*عمر البشير يتجاوز القضاء ويصدر عفواً عن مغتصب الطالبة الجامعية (ر.ح) الطالبة بجامعة بخت الرضا بعد ان قام بتخديرها، وجاء قرار العفو الرئاسي بموجب القرار الجمهورى رقم 206 لسنة 2013 اصدر رئيس الجمهورية عفوا رئاسيا علي المدان نور الهادى عباس نور الهادي والذي أدانته محكمة أول درجة تحت المادة 149 / من القانون الجنائى..
وكانت محكمة اول درجة أدانت الجانى تحت المادة 149/ من القانون الجنائى جريمة الاغتصاب ووقعت عليه عقوبة السجن لمدة عشرة سنوات، وقد تم تأييد الحُكم في كافة مراحل التقاضي حتي المحكمة الدستورية.





تعليقات 5 | إهداء 0 | زيارات 2606

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#756281 [ياسر محمد طيب الاسماء عثمان]
5.00/5 (1 صوت)

08-31-2013 03:08 PM
انت لي وين ماشي يافاقد سبيلك
جـوَّة غابـة ذاتـك الضاميـهـا ليـلـك
راجـى نـور الفجـر يشـرق ياحليلـك
انــت باديـلـك طـريـق مابنتهيـلـك

ضـارب الوديـان تفـتـش والـبـرارى
فى ضـلام الـروح تهبـِّش ماكـا دارى
..................................
ولامتيـن تقعـد تصـارع مستحيـلـك ؟

انت حلمك تمسـك الضـو بيـن ايدينـك
الشعاع مابتمسك رغم انو فيك ومالى عينك
السـراب سـرَّاب يسـرِّب فـى سنينـك
وانت ماك عـارف شمالـك مـن يمينـك


-(انـو مكتوبلـك مصيـر ذى الغـفـارى )

البيت بين القوسين مقطوع من الجزء الثاني من القصيدة لانه لا يناسب الكاتب ومعتقدة .


#756093 [ود الحاجة]
0.00/5 (0 صوت)

08-31-2013 11:04 AM
الحل في الثورة و لكن لا تاتي الثورات من فراغ و اذا كانت النخبة ضائعة فسيكون الشباب اكثر ضياعا

ـــــــ
هذا رد على استفسارك

نسبة للاساءة والبذائة وليس لدينا زمن لاضاعته يا ود الحاجة


ردود على ود الحاجة
United States [ود الحاجة] 08-31-2013 02:30 PM
عن اي استفسار تتحدث؟

ـــــــ
قفل التعليقات في مواضيع محددة


#756083 [الواثق]
0.00/5 (0 صوت)

08-31-2013 10:53 AM
أيوااااا دي قصيدة حلوة والله ونهنئك على اتجاهك الادبي المحمود


#755969 [AZEEZ]
3.00/5 (2 صوت)

08-31-2013 06:29 AM
للبنت السمحة
ملانة شموخ
لابسة الوطن الغالي وشاح
شايلا في القلب
نضار وصدق
متغتية بالاخلاق طرحة
ومتدثرة بعشق الناس السمحين
سترة وتوب
ما زاغت جلبت عار
ما ربت لحما من مال السحت
ماخانت بيت الطين
مشت في صف الكضابين
برت الاشرار
البت الصاحية حالمة بشمس الخير
وطنا اخدر متعافي
شامخ ذي النخل
وطيب ذي النيل
البت الشادة الحيل
وراكبه الخيل
وماشه عديل
تصارع شامخة ضلام الليل
وكضب الكاهن والضليل
البت الحالمة يعود العز لي عزه
تشيل النم
وتغني معاه خليل
عزة في هواك مابتبدل
وللبخوض صفاك
نحن الحنضل
اياني بت جناك
انا في حماك
مابعشق سواك
الروح فداك
يابت يا شموخ سلام
الدين اخلاق
قلبا ابيض
اخلاص
مو طرحة وهندام


#755920 [ابونازك البطحاني المغترب جبر]
3.00/5 (2 صوت)

08-31-2013 02:01 AM
بصراحة قصيدة حلوة ولا بأس بها ، والمشكلة اننامضطرين نعلق على قصيدتك لأنو مابنقدر نعلق على مقالك .


تاج السر حسين
تاج السر حسين

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة