المقالات
السياسة
طارق الأمين يكتب بعد خبر غرق 14 سوداني في الطريق لأستراليا : وين نمشي
طارق الأمين يكتب بعد خبر غرق 14 سوداني في الطريق لأستراليا : وين نمشي
08-31-2013 09:47 AM

image

طارق الأمين

ياخالق اللجوء وين نمشي
طالبين الهدوء وين نمشي

يارب العباد وين نمشي
في هذي البلاد وين نمشي
ربينا الجداد اتوفي
لامونا العباد
بارينا البنوك قبضونا ... لي حين السداد
كملنا القعاد في الضللة
وخمينا الرماد
في حفله هجيج مع حوته
او عقد الجلاد وين نمشي

شقينا الدروب وفترنا
في بلد الحروب
انفصل الجنوب واتوسد
الفجر الكذوب وين نمشي
قاعدين في الهبوب يالله
وفاضيات الجيوب
اشتهت القلوب الشردة
وادمنا الهروب
ويت نمشي
الصبر العنيد والهمة
والحر الشديد
لاشفنا البلاد وعمارا
في الفجر الجديد
لا الساسة الكتار سوولنا
مستقبل سعيد
وين نمشي
سودانا القديم ياحليلو
والغنا والنشيد
لاشفنا القديم قدامنا
لا طلنا الجديد
وين نمشي

شدينا الرحال وين نمشي
لي بلد الريال
خريجين رعاة للماشية
تدبير وانتحال
شان نلقي الاهل بالسترة
والرزق الحلال
في زمن الريال يالله
اصبح كالمحال
وبين امشي وتعال ياربي
اعيانا النضال
كشتنا المدينة الفاضلة
وزلونا الرجال

شدينا الرحال وين نمشي
لي خلف البحار
دولار للعمار يالله
دولار للايجار
دولار للرغيف ينجينا
من موية الخريف
في سفن الهلاك
والموعد هناك
شن بحصل اخوي
نعوم متل القعوي
شان امي وابوي
شان اختي واخوي
كندا واستراليا
بنما واندونيسيا
مافرقت كتير
يلاك ياحبيب
نقول للدنيا خير

نغرق او نموت
او يضربنا بوت
نقفل باب عمرنا
وتنفتح البيوت

نسير والدنيا سايرة
شان امونه دايرة
وحاجه سكينه دايرة
وخالتو مدينة دايرة
وحاجه النعمة حايرة

نعبر ياصديق
نفرج كل ضيق
نطفطف للحريق
ونمشي علي الغريق
نحول للحبايب
والاهل القرايب
دولارات معزة
تعين وكت المصايب


[email protected]
نفتح باب املنا
نقش دمعة اهلنا
هروب في اي قارب
هروب بعد المغارب
كندا استراليا
بنما اندونيسيا
مافرقت معانا
نلتمس المودة
والرحمة وحنانا

يلاك ياصديقي
للزمن الحقيقي

غرقانين جوانا
والنار في حشانا

يلاك وابقي صابر
نتحدي المعابر
لي تلك المنابر
او قل للمقابر
مافرقت معانا

طارق الأمين
30 أغسطس 2013م




تعليقات 5 | إهداء 0 | زيارات 4025

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#757223 [لطفى كريا]
0.00/5 (0 صوت)

09-01-2013 10:09 PM
كلمات اصابت الوجع السوداني


#756180 [Mohamed]
5.00/5 (1 صوت)

08-31-2013 12:58 PM
رائع يا طارق كلمات تعكس واقعنا الاليم و تعبر عنه تعبيرا صادقا.
أقترح ان تقوم فرقة عقد الجلاد بتلحين و غناء هذى الكلمات التى تتناسب تماما مع استايلها


#756126 [كبسور]
5.00/5 (1 صوت)

08-31-2013 11:54 AM
قبعتى مرفوعه لك يا شاعر بلدأً هيلى انا ، وانت تستاهل تكون سيدها لانك بتحبها وبتحب اهلها
والله فكرتك او فكرة والدك بتاعة هديل المدارس دى براها وتنفيذها يجعلك اكثر سودانى قدم لى وطنه عمليا


#756096 [الصاحب]
5.00/5 (1 صوت)

08-31-2013 11:07 AM
ان تاتى اخيراخير من لا تاتى ابدا


#756053 [alwathiq]
5.00/5 (1 صوت)

08-31-2013 10:20 AM
يالله عليك


مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة