المقالات
السياسة
بتعرف تعوم؟
بتعرف تعوم؟
09-02-2013 07:16 AM



من منطلق الرأي والرأي الآخر انا قررت أن أدافع عن حكومتنا الرشيدة واتمسك وأتشبت بأنها ما مقصرة تب من مسؤلياتها وواجباتها نحو مواطنيها الغرقانين المغلوب على أمرهم..المغلوب على أمرهم لدرجة قف تأمل! وأحب أذكر بأن الغلط (كالعادة) من المواطن.

يعني ياخواننا هسي ما عيب عليكم مطرة واحدة تعمل فيكم كدة؟ هسي مثلا ألمانيا واسبانيا والدول المتحضرة ديل ما بتجيهم مطرة؟ هل زولا سمع بالناس غرقت أو تشردت أو انهدت بيوتها في الدول دي؟ هل كان من الداعي أن تخلعو المسؤوليين وناس الحكومة وتعملو ليهم غلبة وبلبلة وتقوموهم من النوم؟ مش هم برضو ناس وعندهم مشاعر وأحاسيس؟ من المحتمل انه ما كان عندهم علم أصلا يوجود أمطار وفيضانات في السودان. ما مستبعد ان يكون المسئول فيهم قام من النوم الصباح ونزل يشرب كباية شاي في الدور التالت من عمارته وفتح التلفزيون يشوف أخبار سوريا ومصر ووجد فجأة في الشريط الإخباري "سيول وفيضانات في السودان" فصر وشه وقال (يا الله ياخ.. هسي دا وكتو؟).

بعدين أنا أستغرب كيف انو أغلب المواطنين تسول لهم نفسهم ببناء والسكن في بيوت غير مطابقة للمواصفات والمقاييس العالمية. صحيح انو الناس بقت تشتري الطماطم بالحبة والعيش بالفردة وكلو واحد همو في عيالو وبتاع، لكن كمان ما تبني بيتك من جالوص وطين! وين الاسمنت والخرصانة المسلحة وسيراميك راس الخيمة، يعني أقل زول فينا راتبو 1800 دولار، الزول مفروض يوفر منها شوية عشان تبنو فيلا 3 طوابق بأحدث المواصفات وتكون فيها 17 بلاعة وتصريف من خشم البيت ما يكب إلا في البحر الأحمر. هسي أحرجتونا مع معتمد الخرطوم دا. احتمال برضو هو ما كان عارف انو في بيوت في السودان مبنية من طين وجالوص. أضفتو ليهو عنصر المفاجأة في حياتو، باللاي كمن رأى عجبا، الناس بيوتها اتهدت؟ عشان تاني ما يبنو بيوتهم بالطين.. قرب يقول يستاهلو!

هو صحيح انه إن غضينا النظر عن الضرايب والزكاة والخدمات والجبايات، وإن مسكنا الة حاسبة و دخلنا فيها قروش الدمغات "فقط لا غير" هنكتشف انو مش مفروض يكون في تصريف بس، مفروض المطرة دي ما تهبش الأرض أصلا، تتصرف قبل ما الموية تدق الواطة. وكان في زول عمتو اتبلت مفروض يرفع شكوى والمسؤول يتحاسب. وصحيح انو عشرات القرى اتهدت و حتى العاصمة غرقت والناس ماتت واتشردت وياكافي البلا جيتك يا عبد المعين تعين لقيتك كيسك فاضي. لكن بعد دا كلو مفروض ندي المسئولين العذر:
1- في جزو من الحكومة لسة ما عارف أو عارف لكن في حالة نكران. زي الناس القالو لا ما دايرين مساعدات، ما وصلنا مرحلة الكارثة، كان ما جابت دم ما فاول.

2- العارف ما فاضي، كان سألتو ممكن يحرجك ويقول ليك ياخي احنا هسي نحل مشكلة دارفور ولا نحفر مجاري ونقعد نرسل أكل للناس وبتاع! بحيث انة مشكلة دارفور عندو دي تكون انو يصلح عربية مرتو ويشتري كونداش جديد للبرندة لأنو بقا ما ببرد شديد.
3- الفاضي ما فارق معاهو، بيتو سمح وتصريفو زابط و انت جاي تشتكي وتقول ليهو بيتك اتهد؟ بانيهو من طين مالك؟ ما عامل حساب المطرة؟ بتعرف تعوم؟ وكت أصلك ما بتعرف تعوم... (بتشتكي) مالك؟!


[email protected]


تعليقات 2 | إهداء 0 | زيارات 1271

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#757680 [Abushazaliya]
0.00/5 (0 صوت)

09-02-2013 03:06 PM
العنوان جميل وما كر جدا
اصلوا قالو في حمار و غراب راكبين طائر الغراب طوالي بضرب الجرس والمضيفة تجي تقول ليهو مالك بقول لييه بضرب ساكت الحمار برضو ضرب الجرس قالو ليه مالك قال ساكت الطيار قال افتحوا ليهم الباب الورا خليهم يقعو الفراب قال للحمار بتعرف تعوم قال لا قال ليهة طيب مالك تبني بيتك من الجالوص .
طيب الاخ كاتب المقال ارجوك بين لنا منو الحمار ومنو الحكومة ومنو الغراب زمنو المطر ؟
انا افتكر الاجاب هو ذي الي سأل مااجرى الحصان ام احلى البيبسي طبعا الاجابة قالوا مدني اقرب


ردود على Abushazaliya
United States [Yasir elkhider] 09-02-2013 08:57 PM
ههه، واعي يابن خالتي


#757466 [ابو ابراهيم]
0.00/5 (0 صوت)

09-02-2013 10:47 AM
من قبيل قت لك لاتعوم الهوا يقع والموج يقوم


ردود على ابو ابراهيم
United States [abujedo] 09-12-2013 07:32 PM
فعلاً المقال ساخر علي طريقة الفاتح جبرة.... لكن والله المحيرني اصرارنا علي انه كل يوم نأذن في مالطة يا اخوانا لا حياة لمن ننادي. المسؤلين ديل موجودين في كوكب اخر وعلي الشعب السوداني الفضل ان يهيئ نفسه لما هو أتي.


ياسر عبدالرحمن حاج الخضر
مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة