الحالة وقفت , دوت
12-22-2010 08:39 AM

الحالة وقفت , دوت


عبد اللطيف البوني
[email protected]


(1 )
في دكان ود احمير

صديقنا احمد وداحيمر الذي كان دكانه ومازال منتدانا المفضل الذي دفنا فيه صبانا وشبابنا لعبنا فيه صفرجت والسيجة والكوتشينة بكافة انواعها والضمنة والشطرنج وتجادلنا فيه هلالا ومريخا وانقسمنا فيه سياسيا وسمعنا فيه الكاشف وايراهيم عوض وزيدان وابو عركي تابعنا وداحيمر منذ ان كان ترزيا في غرفة متواضعة الي ان صار تاجرا له من الضلفات عدد لايستهان به عشنا معه ايام الترطيبة وايام الفلس عاشرناه صبيا وهو الان مثلنا جدا له احفاد . ود احمير محب للسياسة ومتابع جيد لها ومنفعلا باحداثها قبل ايام ونحن عائدين من الصلاة توقفنا عند دكان ود احمير كالعادة فقال له احمد المصطفى صاحب الاستفهامات انه بلغ سن التقاعد وعليه ان يترك الدكان لابنه محمد خريج ادارة الاعمال على ان يعطيه الفرصة كاملة ابتداء من تجديد خريطة الدكان القائم واعادة بنائة فوافق ود احمير ولكنه قال انه لن يهدم الدكان مالم تنتهي عملية استفتاء تقرير المصير في يناير القادم ويشوف البلد دي ماشة على وين . تدخلت قائلا ان البلاد شهدت احداث سياسية كثيرة ولكنها لم تؤثر على الحياة في اللعوتة تاثيرا مباشرا فالامور ماشة فرد ود احمير بالقول بس لكن المرة دي مختلفة فالسودان المرة دي اما مشى عديل ولا راح فيها عشان كدا لازم ننتظر 9يناير عشان نشوف مستقبل الدكان
( 2)
وخليك سوداني
وقفت امام الكاونتر الذي تعودت فيه تجديد خدمة الانترنيت من سوداني وكنت بصدد اغتناء شريحة سوداني ون فقالت لي الموظفة لدينا عرض جديد وهو دفع اشتراك ثلاثة اشهر مع موديم مجاني فقلت خير وبركة فدفعت المبلغ ولكن اتضح لي انه نفس الموديم الذي املكه (فقطعت الشغلانة في مصاريني) ولكن ليس هذا المقلب انما المقلب ان الخدمة سوف تنتهي في فبراير فقلت للموظفة كنت اود ان تنتهي الخدمة في يناير وقريبا من التاسع منه لانه ما معروف بعد الاستفتاء تكون في خدمة انترنيت ولا ما تكون فجزعت الموظفة وقالت لي ان كانت هذة توقعاتكم كصحفيين معناها نحن ما جابين خبر فندمت انني زرعت في نفسها الخوف دون ان اشعر فحاولت طمانتها قائلا انا زعلان عشان اتمقلبت في الشريحة لاني كنت قاصد سوداني ون لكن ان شاء الله ياتي يوم 9يناير ويمضي والحال يكون ماشي في امان الله شعرت انها لم تطمئن وكانت اميل الي ان امرسوف يحدث في ذلك التاريخ او بعده مباشرة
(3 )
قمح نهي
قابلت صديقي وقريبي ود عبد الكريم فسالته عن اخبار الحواشة وحصاد الزرة والفول وسالته ان كان قد زرع القمح فاجابني بالقول (السنة دي قمح نهي) يقصد انه لن يزرع القمح هذا العام وكلمة نهي تعني لا واظنها كلمة هندية ولامش كدا يالرشيد علي عمر؟ فسالته عن السبب فقال لي البلد مامعروفة ماشة على وين خلينا ننتهي من حكاية الاستفتاء وبعداك النشوف اخرتا فما معقول نخسر تحضير وتقاوي في الفاضي . فسالته فيما الخوف بعد ان تزرع فقال لي الخوف يمكن الموية تنقطع والزراعة تموت من العطش لانه قد يحدث شئ للخزان فقلت له كم حرب قامت في البلاد والخزان لم يتاثر فقال لي لكن المرة دي الامور مختلفة وغايتو ربنا يستر
( 4 )
اذن ياجماعة الخير الحال في البلاد قد توقفت تماما في انتظار التاسع من يناير. ويجب ان لاننسى ان هناك فترة انتقالية سوف تنتهي في يوليو حتى بعدها تنتهي الشغلانة نهائيا فهذا يعني ان ليل الانتظار سوف يطول وربك يستر


تعليقات 7 | إهداء 0 | زيارات 3600

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#64838 [omer]
0.00/5 (0 صوت)

12-25-2010 05:38 AM
يا دكتور انا عندي مشكلة خطيبتي جنوبيه قولت ليها نخلي الزواج بعد الانفصال مصره اصرار شديد الزواج يكون يوم 1يناير حاولت اشرح ليها نشوف اخرتها شنو فداير اعرف هل زوجتي دايره اقامه في دوله الشمال او ناس الحركه ممكن يدوني اقامه في الجنوب بصراحه انا بفضل دوله الجنوب ما داير اعيش في مكان فيه زول ذي الطيب مصطفي


#63812 [بنانكو]
0.00/5 (0 صوت)

12-23-2010 06:45 AM
وكأننا في انتظار غودو...اصبح ليلنا كليل العاشقين .....طويل ......أليس في الافق بارقة امل؟وارجع واقول بكرة يمكن يكون مافي سوداني ون ...لكن المؤكد في سوداني تو ...ويمكن سوداني ثري وسوداني فور ......سودانيات الى انفنتي.. وحينها لا ينفع ون ولا تو ولا غيره لأن متواليتنا حتكون هندسية ومكربة تكريب جد واساسها اكبر من واحد ..كدة اتخيل معاي مآلاتنا وجنبك سودانيات (شرائح ) من شريحة سوداني وليست الشركة بل الدويلة ومشاكل حدود وجنسية وانت من شرقستان اي سوداني ون وما تستحق جنسية غربستان (سوداني تو ) وهلم جر جرة وجر جر جر ,,, ,(وقرقر كتير ) ما له اول ولا اخر
اخيرا وبمناسة الاكس ماس ورأس السنة وعيد استقلال سوداني ون نقدم ليك الدعوة لتمضية هذه المناسبات السعيدة بربوع حياة ريجنسي سوداني خمستاشر والموقع بعد سوداني 114 شمال غرب جنوب النيل الاحمر. مع ملاحظة شرايح سوداني الجديدة (ما تفهموني غلط يا سوداني الشركة ) حتنبثق منها شرايح جديدة وكأنها انبثاق الثورات (حلوة تنبثق دي ) ما هو بلدنا كلو انبثاق في انبثاق في انبعاج تكعيب


#63779 [ابو الفاضل]
0.00/5 (0 صوت)

12-23-2010 12:36 AM
شلعوها الكيزان بس ماحيقعدوا فىتلها حايهربوا فى سوال يادكتور البونى الجماعه ديل لما وافقوا على تقرير المصير مفروض بكون عندهم خطط جاهزة ومدروسه ارجو انك تستضيفهم وتشوف لينا اخرته شنو مع الجماعه ديل لسه الانفصال ماوقع والبشاير بانت السعار ولعت;(


#63663 [فقران وطغيان]
0.00/5 (0 صوت)

12-22-2010 08:30 PM
أنا ذاتى يا ود اللعوتة أجلت العرس لبعد التاسع من ينابر لأنو العروس ممكن تختار الإنفصال الطوعى


#63554 [ابو محمد]
0.00/5 (0 صوت)

12-22-2010 04:32 PM
لي صديق هن بلد الأغتراب ويملك اربعة الاف دولار ويريد ارسالهم لاخيه لمشروع حلم

الرقشة فسألتو رسلت قروشك قالي لا مالك اخوك منتظرك بعد 9 يناير لانو مامعروف يحصل شنو ممكن ما يصلن ليه في البلد


#63515 [المصباحي]
0.00/5 (0 صوت)

12-22-2010 03:50 PM
للاسف انتشرت روح الاستسلام والهزيمة لدى جموع السودانيين والكل يتفرج وكأن الامر لا يعنيه .. هذا ما نجح فيه المؤتمر نشرة الفرقة بين الناس وجعل كل يكدح وينشغل في امر ديناه وقفة الملاح .. ود احيمر وغيره كثيرون ينتظرون ما تؤول اليه الاحداث الا ان تصبح جلية ثم التعامل مع تبعاتها .. لم يفكر هؤلاء ومعظم اهل البلد انهم يمكن ان يكونوا جزء من الامر او ان يفعلوا اشياء قد تغيير مجريات الامر وان يكون عنصراُ مهماً لصناعة الغد المشرق الذي نتمناه ولا نعمل من اجله الا الفرجه .. ما لم ينهض امثال ود احيمر ود عبد الكريم سناتي بعد قرن او قرنين وسنكرر نفس المشهد في منطقة اخرى .. والله يستر ..


#63377 [سودانية]
0.00/5 (0 صوت)

12-22-2010 12:38 PM
غريب فعلا انتظار ما هو معروف سلفا من انفصال الجنوب الذي حتما تليه دارفور ثم الشرق ولن يتبقي في ذمة شمال السودان غير الوسط والذي يعتبر منطقة ممتازة لتطبيق المشوع الحضاري بحزافيره ولكن الشيء الذي يدعو حقيقة لوقف الحال هو استسلام المواطن السوداني وانتظاره لحدوث ما هو معروف سلفا وعدم غيرته علي فقد اوصال الوطن باظهار الاعتراض علي ما يحدث واثبات وجوده وانه مازال حيا يرزق وليس في غرفة الانعاش كما هو واضح الان


عبد اللطيف البوني
عبد اللطيف البوني

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة