الذكرى نصف السنوية
09-04-2013 05:36 PM



تحل اليوم الذكرى نصف السنوية لتوجيهات السيد الرئيس بخصوص (ملف هيثرو) فقبل حوالى ستة أشهر وتحديداً في اليوم السادس من مارس من العام الجاري وجه السيد الرئيس بمحاسبة الجهات المتسببة في فقدان السودان لخط هيثرو الجوي واعادته او اعادة قيمته واتخاذ الاجراءات اللازمة لحفظ حقوق الخطوط الجوية السودانية ، واكد حينها السيد وزير النقل والطرق والجسور احمد بابكر نهار فى تصريحات صحفية عقب لقائه الرئيس ان لجنة التحقيق في فقدان خط هيثرو توصلت إلى نتائج دامغة في القضية تدين مجلس الادارة السابق .
من الواضح أن هنالك شيئاً ما (قوي وشديد) يعيق وضع الملف أمام العدالة فإذا ما ربطنا بين توصل السيد وزير النقل إلى نتائجه الدامغة وبين توجيهات الرئيس بمحاسبة (الوالغين) في القضية فلا يمكن بأية حال من الأحوال أن تأخذ المسألة (ستة شهور) وما معروف تاني (تاخد ليها كم) ؟
العبدلله عمل ليهو فنجان قهوة وقعد في ضل الصباح وبدأ ينجر في مخو ويسأل في نفسو (الملف ده ما عايز يتحرك ليه) .. (الرئيس ووجه بالمحاسبة أها تاني شنو؟) … حتي قبضت عليه (المدام) بالثابته حين فوجئ بها وهي تصرخ قائلة :
- والله والله أنا عارفاك من زمان ح توصل للحتة دي .. وووب عليا كمان بقيت تكلم نفسك؟
المدام لا تعلم أن مرحلة (كليم النفس دي) مرحلة فتناها زمااانك وقبلها مرحلة (فقع المرارة) وأن المرحلة الحالية هي مرحلة الشلل القولوني الإرتعاشي والذي يعتبر (ملف هيثرو) إحدي مسبباته !
- إنتا الحاجه الما عارفا ما تسأل منها إحتمال تلاقي ليكا زول عارف يقول ليك !
- فكرة والله كدى النطلع على شلة (الضمنة) دي إحتمال ربنا يضع سرو في اضعف خلقو ويكون فيهم واحد عارف التأخير ده سببو شنو !
وعلى طول لبست (سفنجتي) ودرعتا جلابيتي وعلى (شلة الضمنة) حيث وجدتهم يجلسون كعادتهم تحت شجرة (النيم) امام منزل عم حسنين النجار .. وما أن جلست على أحد (البنابر) حتى توجهت بالسؤال للاسطى حسنين :
- يا أسطي حسنين تفتكر ملف خط هيثرو ده المعطلو شنووخاليهو ما يتحرك؟
- يا استاذ ما تستعجلو ساكت مش ممكن يكون فيهو (غراء) كتير ماسكو ما يتحرك؟ أو تكون (الضلف) بتاعتو (كابسة) وعايزه ليها جرة جرتين (بالفاره) ؟
وهنا تدخل المعلم نصر الميكانيكي وهو يشير نحوي بيديه الخشنتين :
- يا استاذ الملف ده عاوزنو يتحرك كيف إذا البلالي بتاعتو (عاضة) والإستارتر بتاعو حارق فحمات ومفوت (جلب) الملف ده يا استاذ عاوز ليهو تحقيقات أقصد إسبيرات (أصلية) إسبيرات السوق الشايفنها دي كووولها ما نافعة ولو منتظرنها تعمل حاجة واطاتكم أصبحت !

وهنا ضرب فوزى الجزار بقطعة الضمنة على التربيزه ضربة قوية وهو يقول لهم :
- أها قفلتها ليكم يلا عدو العندكم .. ثم يلتفت نحوي قائلاً :
- يا جماعة الخير الملف ده موضوعو منتهي شوفو ليكم حاجة تانية .. عارفين ليه؟
- (بصوت واحد) : ليه؟
- عشان ده ضبح (إسلامي) !!
- (في خيبة أمل) : هسه يا جماعة أنا جاييكم توروني سر الملف (الغاطس ده) تقعدو تعملوها ليا (ضلف كابسة) و (بلالي عاضة) وضبح إسلامي وما عارف شنو؟؟
- (جميعهم بصوت واحد) : يأ أستاذ ده العندنا أنحنا ناس (معاشات وضمنة) إنتا قايلنا (أمن إقتصادي) !!

كسرة :
من المؤسف (حقاً) أننا في حاجة إلى (توجيهات) رئاسية للإسراع في تنفيذ (التوجيهات) الرئاسية .. وللا الفهم شنو؟

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو)+و+و؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو)+و+و؟


تعليقات 18 | إهداء 0 | زيارات 4837

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#760346 [الماعاجبو العجب ولا....]
0.00/5 (0 صوت)

09-05-2013 11:48 PM
أن المؤسف (حقاً) أننا في حاجة إلى (توجيهات) رئاسية للإسراع في تنفيذ (التوجيهات) الرئاسية .و إلى (توجيهات) رئاسية للإسراع في تنفيذ (التوجيهات) الرئاسية .ومزيد من التوجهات الرأسية لتنفيس التعليمات ،والتعليمات التى تنفس براها بدون موجهات الجهجهات ألتى تروس فى الأسراع والمسارعة بتنزيف الموجهات........... وهكذا دواليك


#759882 [دار الوثائق]
5.00/5 (2 صوت)

09-05-2013 12:02 PM
يا جبرة خط هيثرو ده سرو باتع وحراميهو مانع وحارسو نافع والادانة ساطعة والسمعة واقعة الله يكون فى عونك وعون البلد .


#759850 [التويجري]
5.00/5 (3 صوت)

09-05-2013 11:37 AM
الموضوع ده داير ليهو وشية وارضية علي قول (النقلتي)
والله انا كل مرة بقراء ليك وبلقي تفكير جديد وكلام قدر وعي وفهم أي زول.ياجبرة انت مسكون ولا شنو؟ماشاء الله عيني باردة بس انت مفروض ادوك جايزة نوبل للتخفيف عن الغلابة وفضح الجلابه


#759849 [تجاني مصطفي]
5.00/5 (2 صوت)

09-05-2013 11:36 AM
مادام الكيزان ديل علي سدة الحكم سيحتفل أحفاد احفاد احفادك بعد كم مليون سنة ضوئية بعدم البت في هذا الملف ونصف سنة حلوة ياجميل ياجبرة واقترح في نصف السنة الجاية نعمل تورتة وكمان نعزم فيها بدر الله في سماهو وبللللا خليها ترب


#759814 [ودالعوض]
5.00/5 (1 صوت)

09-05-2013 11:11 AM
يا جبرة يا أخوي انت خط هيثرو دا قريبك؟ من حلتك؟( بكسر الحاء و تشديد اللا م) و د داخليتك؟ ود سفرتك؟ مالك فاقع مرارتنا و مرارة المرة معاك؟ أمي الله يرحمها زمان لما تشوف ليها زول يتكلم في موضوع ما بخصه ، تقول ( قالوا في حلة أي قرية إسمها عدم الشغلة )


#759740 [سوداني وبس]
5.00/5 (2 صوت)

09-05-2013 10:26 AM
في نصف الذكرى السنوية لا لالاه
توجيهات رييسنا منسية لا لا للاه
بتعدي مواسم وتروح والسرقة
بتصبح ابدييا ابدييا اه لالا اه لالااه


#759504 [yasir abdelwahab]
4.00/5 (3 صوت)

09-05-2013 12:30 AM
الليلة قررت اصارحك يا عم جبرة..وعاوز رد...

لو ص. عووضه قال كديس يقولو ليهو انت قاصد الرئيس... اسبوعين وقف...
لو ك. زهير قال شنو يقولو ليهو انت قاصد منو..اسبوع....لو فيصل ضحك...الا يفتش نسيب الريس يسلفو حق الفطور..
لو ناس الجريده قالو المطرة..انضبت يسحبوها من الاسواق قبل التوزيع..
لو في جريدة الميدان واحد كتب بسم الله يقفلوها سنه..علينا نحنا..
حتي زول اليوم التالي المتوالي...ادوهو زرة..لمن بصم بالعشره..
حبيب طه الدلاهه..عبد الستار ميرغتي..لي يوم الليله تيارو 700 فولت..
..اقول لي عند الخلخال الرأسي راس السوط وصلو......
......................................
.............................
اشمعني انته..
يا إمتة... اقراها إمتن.. ما معبرنك يا إمتن الموضوع فيهو انة..اقراها إنتن.


#759502 [زول سودانى]
5.00/5 (1 صوت)

09-05-2013 12:28 AM
اين انت من مرحلة لحس الكوع ؟؟


#759398 [سكسك]
5.00/5 (1 صوت)

09-04-2013 09:14 PM
كلام المعلم نصر المكنيكي ده بحزافيره صاح والتورية وصلت لكن المقصود بالتورية ده انسي موضوعه لانهفي البيت زوجة الهالك فاتحه له وجاعلاه درجة سلم للغف البلد اما عن الخط ودبدر عمل لهم محاية قالو ليك ام ضو بان كلها قعدة فيه واصبح منتهي لكن كنت اتمني مجهود ام ضوبان تثبت السيل وترجع الخط


#759397 [Adam Ibrahim]
5.00/5 (1 صوت)

09-04-2013 09:12 PM
الشئ البنعرفو (قوي وشديد) البيمنع ويعيق سير العدالة هو نفسه التوجيهات الرئاسية!!.. فالتوجيهات اياها لا تكون نافذة الّا فى حالة العفو عن قوش ورفاقه او المغتصبين اللواطيين البيدوفيليين من منسوبى تنظيم الخنازير..

حبيبنا جبرا انت وانا وكل سودانى عارفين انو حاميها حراميها.. و(امنا) الحكومة ماشة بفقه السترة والعقاب الروحى لمنتسبيها!!.. حلوة العقاب الروحى دى..


#759385 [Fato]
5.00/5 (1 صوت)

09-04-2013 08:59 PM
يا/ جبرة طالما النجار والميكانيكى والجزار أدلوا بدلوهم والخط أنخطف وانا عارف الخطفوا والخطفوا ده أسمه الدودو وكمان مرات بقولوا عليه التمساح.والدودو وفى بعض الأحيان التمساح هو بشبش بنفسه واكيد زى مافقع مرارتك فاقع مرارات كل الشعب وتخيل ياجبرة بشبش يقرأ فى كسراتك دى ومتكى على المخده كده وجنبه روح قلبه وداد وفنجان القهوة مدور وهاك ياضحك على الراجل الما بكل ولا بمل بكسراته دى ووداد تقول ليه يابشبوشتى الفاتح جبرة ده روحو ما أنسلت وراء الخط ده وعليك الله يا بشبوشتى الخط ده كوفى ولافارسى ولا شنو هو ماتريحه يخص عليك,ضحكتينى ياودودة وعايزه تشرقينى ولا شنو وسيبك منه ده راجل مخرف فالقنا بشوية ووووات كتيرة أنشاء الله يوصلها بورتسودان.يرن التلفون وعلى الخط اللمبى ويقول بعد تعتعة ييييييا ريس الراجل بتاااااع الخط ده نشوف ليه ططططيارة تلودى ولا ططططيارة أبو بنات أمورتك وددا وقبل مايكمل أنتهره بشبش وتسمع حاضر ياااااريس.


#759369 [عادل السناري]
5.00/5 (1 صوت)

09-04-2013 08:30 PM
احد اركان الانقاذ الكبار قال عندما جاء اليه اهل (الجودية ) يرجوه ليتوسط لهم لفك اسر نقيب الشرطة الذي تحول في (غمضة ) عين من شاكي الي متهم خطير ---- قال لهم : ( انحنا عارفيين البلد مليانة فساد و الفساد بقى معشعش في كل مؤسسات و مفاصل الدولة اذا حاربناه سوف ينهار النظام و تنهار الدولة ) عشان كدا يا عم جبرا ( راكوبة ) الحكومة شعبا مسوسة و منخورة من جوة لو حاولت تطلع السوسة المدسوسة بترمي عليهم الراكوبة كلها.
قال المفكر حاج وراق رئيس تحرير صحيفة ( حريات ) و الحائز علي جائزة القلم الذهبية : ( الفساد في الانقاذ فساد مؤسسي كونه مربوط باقلية استولت علي السلطة بانقلاب عسكري وحكمت لفترة طويلة في غياب الديمقراطية و المحاسبة و الحريات و غياب سلطة القانون ---


#759367 [abu khaled]
5.00/5 (1 صوت)

09-04-2013 08:28 PM
اذا كان رب البيت على الدف ضارب فشيمة اهل البيت الرقص 000000000000000000000وكفى


#759325 [mohammad saad]
5.00/5 (1 صوت)

09-04-2013 07:06 PM
تحياتي استاذ جبرة
ذكرتني بقصة واحد من الجماعة والدته توفيت منذ سنوات رحمها الله وجميع موتى المسلمين. حصل انه واحدة من اهله مريضة وعليها مراجعة الطبيب المعالج مع احضار نتائج الفحوصات المختبرية التي طلبها منهم. في يوم المواعيد كلم ابنها ان يحضر فحوصات والدته المريضة ويتقابلوا عند عيادة الطبيب ولما جاهم الدور دخلوا عند الطبيب ليتفاجا الجميع انه الود لم يحضر نتائج الفحوصات بحجة النسيان. صاح الخال متالماً ويصرخ بهستيريا على ابن اخته كيف تنساها وكيف وكيف انا والله امي دي مش ماتت من زمان؟ عندي باكر امل ترجع واجيبها للطبيب عشان كدة محتفظ بي نتائج فحوصاتها لليوم ولي باكر كمان. تاني برضو هيثرووووووووووووووو!!!!!!!!


#759304 [الصاحب]
5.00/5 (1 صوت)

09-04-2013 06:31 PM
يا عمك باب رزق وافتح ليك اكتب واقبض .اها كان الخط ده رجع. يعنى مثلا مثلا .حتكتب شنو؟


#759290 [8855]
5.00/5 (1 صوت)

09-04-2013 06:14 PM
شكرا للرائع دوما الاستاذ الفاتح جبرا, ولكنك انا خايفك تحتفل بالذكري الخمسين بعد المئه دون ان يتحرك الملف فهؤلاء القوم لا يهمهم الفساد والا المفسدين لانهم جزء منهم واصبح الفساد يجري في عروقهم مجري الدم . فكيف يستقيم الظل والعود اعوج ؟؟؟؟


#759285 [AbuIslam]
5.00/5 (1 صوت)

09-04-2013 06:05 PM
كمان توجيهات الرئيس منو الرئيس الوجهة بالتحقيق اغتصاب الخط مشو هو نفس الرئيس الفك مغتصب بنت الدويم


#759284 [AbuIslam]
5.00/5 (1 صوت)

09-04-2013 06:03 PM
والله يا اخ الفاتح تقعد تنبح بي خط هبثرو دا طوالى الله يستر عليك ما تقوم وتضيع انت علينا انت اسال الله ان يعجل بضياع من اضاع خط هثرو والذي عينه المساندة اطنو الدعوة احسن من وووووووووووك خط هثرو اخبارة شنو ياخ ضاع في غبابة الجب بنتاعت الانقاذ انقذ ينقض فهو منقض انقضاضاً


الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة