المقالات
الشعر
أسماء الجنيد
إلي شاعر الشعب الشفيف محجوب شريف..
إلي شاعر الشعب الشفيف محجوب شريف..
09-09-2013 04:11 PM

نرفع الأكف لله تضرعا ان يشفي ويعافي الشاعر الإنسان محجوب شريف ويرده للوطن سالما من كل سقم إن شاء الله ..
شاعر الشعب الذي ينبض إحساسه دوما مع الغبش والكادحين ،، شايل الهم إتنين,, متعك الله بالصحة وموفور العافية
image
إلي شاعر الشعب الإنسان الشفيف محجوب شريف

الشعب حبيبك وإنت حبيبو
إنت الطب وياكا طبيبو
البشفي السقم الوكر وجعو
جوه ضلوعو وحت سبيبو
وإنت الفضل من الضو
الفج العتمة وضوا دريبو
وإنت الفضل من الغيم
الطقطق حرفك مطر أشوقنا
برد جوفنا وطفى لهيبو
مد شعاعك جوة مسامنا
نفض الغبن الطابق عيبو
مين الغيرك شايل الهم
ومين الغيرك واجعو الدم
وحاس بالضيم الفرا جناحو
حتحت خيرنا ونفض جيبو
ومين الغيرك عاصر الجمرة
وضي اشعارك زي القمرة
باقي دليل في الزمن الشاخ
بالع الحسرة وطابق شيبو
يا كا السمح الزين الفضل
وياكا الباهي وسطنا بتقدل
شامخة مبادئك ما بتتبدل
اصلو شعارك ما بتحول
من الأول خيرك فال
مع التربال عمة وشال
ترعة ومنجل
ومع الأطفال ديمة تذاكر
قلم ودفاتر
خرطة وبرجل
وطن محموم قسمواالعسكر
مسخ ريقو الطاعم سكر
زرع المرة وطبق الحنضل
مهيرة العز الخيرا ينز
بين كلماتك جرتق وصندل
وفي طيات الود البينكم
كوم حنية صافية ندية
وطلة عزة الديسها مهدل
تراث اجدادنا باقي تكية
في قعداتك وفي غنواتك
معتق منو صوتك رتل
يا محجوبنا وياهيبتنا
يا نيمتنا الشارا ضراها
لا بتتغابا ولا بتتململ
ندعو الباري يحفظك لينا
ياكا بحرنا البسقي عروقنا
وياكا النيل المنو بننهل
وفي حوباتنا سند ابواتنا
صوتك عالي
وديمة يجلجل
أسماء الجنيد

رد الله غربتك سالما معافى إن شاء الله

أسماء الجنيد
[email protected]


تعليقات 6 | إهداء 2 | زيارات 2606

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#762792 [bashair mustafa]
4.19/5 (6 صوت)

09-10-2013 04:48 AM
يا سلام يا سومه ..قصيده صادقه لمن هو اهل لها..تحياتي لك ولتنه وسكينه وساره..حسان ونحن من مكه متوجهين المدينه ..بشاير


#762729 [اوهاج]
4.12/5 (12 صوت)

09-09-2013 10:49 PM
لا لا مش ممكن ايه ده؟ ايه الروعة دى ياه عايز اقول كملتى القول لكن فى محجوب القول ما بكمل شكرا على كل حال وكتر خيرك والحمد لله البلد فيها نسوان تمام التمام وفيها رجال يا حسرة !!


#762726 [Adam Ibrahim]
4.19/5 (8 صوت)

09-09-2013 10:41 PM
التحية لكِ وله يا اهلنا وحبايبنا وشموسنا الضاوية..


#762648 [Fato]
4.12/5 (11 صوت)

09-09-2013 08:08 PM
شكرا أختى الشاعرة/ أسماء الجنيد فقد عبرت مابداخل كل مواطن تجاه شاعر الشعب العفيف الشريف/ محجوب شريف وندعو له جميعا بعاجل الشفاء وأن ينعم عليه ربى بموفور الصحة والعافية وأن يرده لوطنه الغالى ويحتفل معنا أنشاء الله بالثورة التى تدك حصون الكيزان وتزلزل أقدامهم ويرفرف علم الحرية فى كل سارية منزل ويرجع لنا سودان الألفة والمحنة ويرجع المكن يدور ويخضر الزرع وترجع المشاريع التى غيبت وينور وجه محمد أحمد من جديد ونغنى معاك شاعرنا للذهب الأبيض والذهب الأسود والذهب الأصفر ولخضرة وطن حدادى مدادى ولزول أكتساه الفرح فى كل ربوع وطنا(بأسمك كتبنا ورطنا)(أحبك مكانك صميم الفؤاد).


#762585 [المستغرب جداً جداً]
4.13/5 (7 صوت)

09-09-2013 06:12 PM
صدق من قال : و لا تبال بشعرٍ بعد شاعره*** قد أفسد القول حتى أُحْمِدَ الصممُ!!
ثاني نقول شنو ؟؟


#762545 [انصاري]
4.12/5 (13 صوت)

09-09-2013 05:35 PM
شكراً شكراً لك أيتها الكنداكة..السامقة..
أحرفك لوحة تشكيلية رائعة..في حضرة أستاذنا الشفيف محجوب شريف..الشاعر التربوي والمناضل الثوري
والصوفي المتأمل الغارق في عشق الأرض والإنسان المتعفف النبيل..
شكراً شكراً...لم تتركي لنا فرقة لنكتب من خلالها..


ردود على انصاري
[سيدينتود أرباب] 09-10-2013 01:16 PM
كلمات وأحاسيس معبرة من شاعرة الي شاعر قامه نرجو له الشفاء من المولي القدير وبصراحه يااستاذه اسماء ابدعتي وانت اصلاً مبدعه وانا ادمنت قراءة مقالاتك السياسيه الهادفه ومن كثرة اعجابي بك ولولا انك متزوجه لتقدمت لطلب يدك من اسرتك الكريمه ولكني آثرت أن اكون أخاً كريما لامرأة مثلك ,أفخر وإعتز من انهاإحدي عبقريات نساء بلادي الخالدات ... وشكراً


أسماء الجنيد
أسماء الجنيد

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة