المقالات
مكتبة كتاب المقالات والأعمدة
الفاتح يوسف جبرا
آهـ يا مراااارتي
آهـ يا مراااارتي
09-14-2013 11:24 AM


ما زلنا في جمعية (مستغرشون) نعاني إستغراشاً يومياً بسبب ما يتداعى إلينا من تصريحات المسؤولين .. وخلافاً لأي خبر أو تصريح (مستغرش) كنا قد أوردناه سابقاً فإن جمعية مستغرشون تنصح القارئ الكريم قبل أن يقوم بقراءة الخبر (الجاي ده) بعمل كافة التحوطات الصحية خاصة ناس القلب والضغط والسكري وإلا فإن الجمعية غير مسؤولة عن أي مضاعفات أو أي حالات وفاة تحدث لأن كل التصريحات الفاتت دي كوم والتصريح ده (كوم تاني براااهو) !
الخبر ورد قبل عدة أيام على هذه الصحيفة (الخرطوم) بعنوان: البرلمان: نسبة الفساد بالبلاد لا تذكر مقارنة ببلدان اخري ويقول الخبر (اكد رئيس اللجنة الاقتصادية و المالية بالبرلمان د. عمر محمد الامين ان نسبة الفساد بالسودان لا تتجاوز ال 1% ، و قال ان تلك النسبة مقارنة بالفساد الموجود في الدول الاخري لا تعني شيئا) !
تنبيه : بعد قراءتك للخبر إن أحسست بأي أعراض رغم تناولك الدواء فواحدة من إتنين (يا الدواء ضارب ومغشوش أو أن الخبر من فصيلة الأخبار الإستغراشية البتلحق أمات طه)
معظمنا أيها السيدات والسادة يعلم بأن النسبة المئوية هي طريقة للتعبير عن عدد على شكل كسر من 100 (مقامه يساوي 100) ويرمز للنسبة المئوية عادة بعلامة النسبة المئوية “%” .
نعم (البيه) الدكتور وفي ظل هذا الفساد (غير الخجول) الضارب بأطنابه والذي سارت بذكره (الكسرات) والركبان يقرر أن النسبة (لا تتجاوز) الواحد في المية !! (ياااخ قول ليك كلام تاني) فما ضعضع الحالة المالية للدولة وجعلها تقف هذا الموقف (المنهار) إلا إستباحة المال العام بهذه الصورة المأساوية والتراخي المفرط في محاسبة الفاسدين (بدليل آلولو الفي تحت المقال دي) !
كان من الممكن أن يكون تصريح الأخ الدكتور (مبلوعاً) ومهضوماً وحقيقياً لو أنه صرح بان نسبة قضايا الفساد التي تمت محاكمتها لا تتجاوز الواحد % (ودي ذاااتا كتيره) ، ولكن الأخ الدكتور (للأسف) يقصد بهذه النسبة حالات الإعتداء على المال العام (عشان الفساد خشم بيوت) وعلى الرغم من عدم معرفتنا بالطريقة التي تم له بها إستخلاص هذه النسبة دعونا نقول أنها تمت بحساب (الأموال المعتدى عليها) مقسومة على ميزانية الدولة (5.7 ) مليار دولار (مضروباً في 100) ، فهل يعلم الدكتور بان قيمة كفالة المتهمين (كفالة بس) في فساد شركة الٌأقطان (وحدها) يساوى 89 مليار جنيه سوداني ؟ طيب شوف لينا يا دكتور الـ 89 مليار دي بتعمل كم في المية؟ (دي كفالة بس .. خليك من حجم الفساد الفعلي) !
وطالما القصة جابت ليها (نسب مئوية) هل يعلم الدكتور بأن حجم الاعتداء علي المال العام بولاية سنار بلغ 318 مليون جنيه و314 جنيها، من جملة ميزانية الولاية للعام 2013م والتي لاتقل عن 600 مليون جنيه (يعني بنسبة فساد بلغت 52.3 % ) فهل يعقل أن يكون حجم الفساد المالي في ولاية واحدة 52.3% بينما الفساد في كل ولايات السودان لا يتجاوز الـ 1% ؟؟ (بالعقل كده لو فضل لينا فيها عقل) !
هذان مثالان فقط لمئات الأمثلة التي تم فيها إستباحة المال العام بشكل صارخ (وعيني عينك) لا نريد أن نوردها هنا لأنو (الناس ملت الكلام ده ) وملت (الكسرات ذااااتا) لأنو الفساد (أبو 1%) ده أصبح على قفا من يشيل وما عاوز ليهو دليل حتى أنه من فرط إنتشاره طال مؤسسات لها قدسيتها كالأوقاف والزكاة والحج والعمرة لكن يبقى التساؤل مشرعاً هل السيد رئيس اللجنة الاقتصادية و المالية بالبرلمان د. عمر محمد الامين هو (جاد) في ما يقول وللا يكون (بهظر سااي)؟
العبدلله عن ذات نفسو يعتبر (الأخ الدكتور) للأسف الأسيف (جادي في كلامو) بدليل إنو كمان (قاعد يقارن) بقوله بأن تلك النسبة لا تعني شيئاً مقارنة بالفساد الموجود في الدول الأخرى وأجده صادقاً في مقارنته هذه لو أنه قد قصد بالـ (دول الأخرى) تلك الدول التي تأتي بعدنا متذيلة تقرير منظمات الشفافية العالمية.
عزيزي القارئ :
لا زال بعض الإخوة المسؤولين في البرلمان يصدقون ويتحرون الصدق حتي يكتبوا عند الله صادقين .. فها هو السيد رئيس اللجنة الاقتصادية و المالية بالبرلمان د. عمر محمد الامين يقول لكم بان نسبة الفساد بالسودان لا تتجاوز ال 1% .. يعني بالعربي كده بيقول ليكم أيها الشعب السوداني الفضل (الفساد في حكم اللا موجود) .. أها (في زول عندو كلام) !!

كسرة :
آه يا مراااارتي !! .. هاتو الحبوب يا أولاد ……

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو)+و+و؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو)+و+و؟


تعليقات 35 | إهداء 0 | زيارات 8278

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#766590 [د عمر]
0.00/5 (0 صوت)

09-15-2013 03:38 PM
استاذ جبرا ... انا تعليقي ما على المقال انا تعليقي على الكسرة الثابتة بتاعت خط هيثرو..
لانو بي صراحة انا صبرت كتير على الموضوع دا و لانو انا الوحيد العارف مين باع الخط و كيف باعه و لمن باعه و متى باعه و اين باعه و باع معاهو في نفس اللحظة شنو.... بس بي صراحة ما عارف اتباع بي كم لاني منتظر المحكمة تطلب شهود و انا جاهز لحلف اليمين و قول الحقيقة مع العلم انني لا صلة لي بهذا الامر من قريب ولا من بعيد يعني ذي ست الشاي في دلالة العربات عارفها الباع و الاشترى و العربيه الاتباعت بس ما عندها شغلة بالموضوع كله ...
أصدقك استاذ جبره ان القدر و لا شيئ غيره ساقني الا هناك حيث وقعت الجريمة و كنت شاهد عيان و رب الكون اعمى بصيرتهم مني و الا كنت الان مع امات طه
اذا كنت عايز اي معلومة و سبق صحفي انا جاهز و بصلك في مكتبك
و عليك الله ما تسأل عن خط هيثرو دا تاني لانه ما في حد غيري حا يديك عنه معلومة.. دا ذي قتيل الابيض

سلام ... شاهد جابو الدرب و شاف كلو حاجة


#766558 [Adam Ibrahim]
0.00/5 (0 صوت)

09-15-2013 02:59 PM
النسبة المئوية دى بالجديد يا جبرا.. زى ما حذفوا الاصفار الثلاثة من الجنيه الجديد وكده


#766489 [abu khaled]
0.00/5 (0 صوت)

09-15-2013 01:43 PM
استاذي جبرة
هذا الدكتور الذي اسمه الامين فهوغير أمين وكما هو معلوم انها منظومة من اللصوص تساند بعضها ولو تذكر انه سيء الذكر الشريف بدر كان في الحوار في الشروق يكاد ان يعترف بقصد او دون قصد ولكن تشعر انه غير خائف لانه عارف لا حد يحاسبه والكل بينهب واكيد ماسك عليهم ذلةوكما قال الدكتور علي الحاج الذي نهب طريق الانقاذ الغربي اتحدى من يحاسبني وسوف اكشف المستور واذا اختلف اللصوص بان المسروق وقالوا للحرامي احلف قال جاك الفرج وهؤلاء بدون ذمة ولاضمير وزمان قالوا البروح في القيزان يظهر في الميزان عند عزيز مقتدر ويا عم جبرة لم كسرتك دي عليك والشكية لغير الله مذلة


#766477 [المتفائلة جدا]
0.00/5 (0 صوت)

09-15-2013 01:30 PM
سلامة مرارتك أيها الأستاذ الذى يعرف جيدا أين يضع يده على البوجع الناس وبفقع مرارتهم ..
ياسيدى ديل من كثر مابكذبوا بقوا موهومين إنهم صادقين.. وهم عارفين إنهم أكبر الكذابين
فسادهم عم القرى والحضر ما داير ليه ترقيم ولا تدوين
ديل عندهم برود مش يفقع المرارة ؟؟ يجيب سكتة ويقطع الشرايين
وأجيك من الآخر ديل فقدوا الإحساس وللجلود متمسحين(من تمساح)
ومن ريحة فسادهم مزنخين وريحته تجيب التائهين ..
لهفوا البترول و قوت الشعب وللكروش ممدين
وفى الكذب مافى زول بلحقهم ديل أكبر الدجالين
والأفاكين ..تجار الدين ..الموهومين..
الله يطيرهم طيرة إخوانهم فى شمال الوادى إخوان الشياطين
ويريحنا منهم ويريح اهلنا الطيبين.والله طايرين
قول آمين ..


#766448 [صاعقة النجم]
0.00/5 (0 صوت)

09-15-2013 12:47 PM
بدا الصداع قبل ما اكمل القراءة


#766296 [ممكون وصابر]
0.00/5 (0 صوت)

09-15-2013 10:24 AM
الاستاذ جبرة امكن بقصد العكس نسبة المميزانية الخالية من الفساد لا تتجاوز 1% الراجل فهمتوه غلط وامكن ما كان بيحضر تقرير المراجع العام السنوي او امكن بكون المسكين نايم كغالبية النوام افصد النواب وتقرير المراجع العام بيكشف الاعتداء على المال العام بالمستندات أما التجنيب وما ادراك ما التجنيب ما في مراجع بشوفوا بيصرفوا على كيفهم فيه وميزانيات الامن والدفاع كذلك لايتسطيع مراجع ان يراجعها دة غير نثريات الوزراء والولاة والمعتمدين كله على كاهل الشعب السوداني الفضل


#766207 [abdelrahim]
0.00/5 (0 صوت)

09-15-2013 08:45 AM
شكرا الفاتح النسبة المئوية ليست كسر كما ورد فى مقالك بل هى نسبة من المئة و الكسر كسر زى الربع والتلت الله يجبر كسرك يظهر انك ما كنت قعد تحضر حصة الحساب فى المدرسة
و بعدين يا اخى النسبه دى صحيحة ميه فى الميه بعد تفعيل فقه السترة يعنى النسبة كانت 51%
و بعد تفعيل فقه السترة تصبح 1% هو حساب ولا كوار


#766203 [ود البلل]
5.00/5 (1 صوت)

09-15-2013 08:35 AM
أها يا ود جبرة مسكتك، أتاريك جلدك تخين.
بالله إنت لي هسع مرارتك سليمة وخايف عليها؟


#766152 [ودلباشا]
5.00/5 (1 صوت)

09-15-2013 06:47 AM
يا ابوراس كفر الاستاذ جبرا اكبر من ان يرد على تفاهاتك ويكفى رد القراء ومعلقين الراكوبة واسلوبك يوضح نوع معدنك وكل اناء بمافيه ينضح وزى ما قاليك المعلق الشف شيل نصيبك وشوف ليك مكان تانى ولان الراكوباب اقل واحد فيهم يورد كبيرك البحر


ردود على ودلباشا
United States [ابوراس كفر] 09-15-2013 03:57 PM
اولا يادعول اسمك ولا لقبك بس يدل الهبل والعبط
شنو الاسطوانة المشروخة كل من قال كلمة بتخالف الشىء السائد يبقى معدنو فاسد؟
انت كدى يالدعول الماشى وسط القطيع ماتقول رايك بصراحة ووضوح
جبرا ده متين بقى استاذ ولا دى حركات عوام القوم اى واحد عندو لقبو ؟
لو السودان ده كلو مع العجوز المفلس السمج المتصابى البنفخ فى قرب مقدودة" وانت واحد من القرب " انا همانى فى شنو؟
اما كلامك التانى شوف ليك محل تانى لمن اجيك فى بيتك ولا بيت ابوك قول الداير تقولو ياوهم
ده منتدى عام ليقول كل واحد رايو
تجى انت يافاقد ياتربوى تنصب نفسك متحدث باسم"الراكوباب= دى علقنة جديدة كمان"
من كلامك الفوق ده يتضح انك بيور برودكشن لتربية ناس البشير
ولو عدتا راجيك ياضحل


#766111 [من الاخر]
5.00/5 (5 صوت)

09-15-2013 12:43 AM
يا جماعة هدو اللعب شوية

الراجل ده ما غلتان

و ود جبرا برضو ما غلتان قولو لي كيف......

خلوهو يجي يعرف كلمة فساد
وجبرا كمان يجي يعرفا......

ح تلقو الفرق اوسع من خيالكم وخيال جبرا معاكم.....

الناس دي خلقا غير وفهم غير وتعريفات غير..

دي غنائم وبتتوزع بي شرع الله...

اها شن قولكم؟؟؟؟؟؟


#766104 [لتسألن]
0.00/5 (0 صوت)

09-15-2013 12:25 AM
قال الترابي يوما:بلغ فساد اللإسلاميين نسبة تسع في المائة.
قالوا: الله أكبر علي الشيخ جن و أثبح يفشي الاسرار؛ أبعدوه.


#766085 [إبن السودان البار ***]
5.00/5 (1 صوت)

09-14-2013 11:23 PM
الأستاذ جبرة إنت حاقر بي ريسنا وحكومته عشان ما بيطلع علي الصحافة وكتاباتك ؟؟؟أعمل حسابك الريس داأطرش لو قام عليك يوم بلحقك أمات طه ؟؟؟ ( والله أن ماعارف قصة أمات طه دي شنو )لقد كتبت بأن دكتورنا المحترم(دعوني أعيش) قد قصد بالـ (دول الأخرى) تلك الدول التي تأتي بعدنا متزيلة تقرير منظمات الشفافية العالمية. وهل تعتقد أنه في دول بعدنا ؟؟؟ حرام عليك ياراجل ؟؟؟


ردود على إبن السودان البار ***
United States [فارس الصياد] 09-15-2013 10:11 AM
عشان الفايدة تعم قصة امات طه يقال في سبعة بنات اخوات وما متزوجات اتزوجت واحدة وحبلت بجنين وزوجها اتوفى والبنات انتظرن لغاية ما المولود اطل وسمنو طه ورحلن لمنطقة تانية بعيدة وكل واحدة ما عايزة تقول انا ما اتزوجت عشان ناس المنطقة ما يقولوا بايرة فلجأت كل واحدة بتبني الولد طه وعملت فيها امه وطه كبر وما عارف امو من خالاتو ويتغالطوا فيهو كل واحدة تقول يا ولد انا امك وديل خالاتك وعندما ضاق بو الحال شرد من البلد وكل واحدة فتشتوا في اتجاه لا غاية ما ماتت بالعطش وطه المسكين حتى الآن لم يعرف من هي والدته في ضحايا العطش والناس لعدم الاحراج اطلقوا عليهن كلهن امات طه ..
تخيل طه بس عندو سبعة امات واطفال الماقوما السبعمائة ما عندهم ام واحدة !! يخلق من الشبه اربعين


#766051 [عابر سبيل]
5.00/5 (2 صوت)

09-14-2013 09:46 PM
هل خط هيثرو داخل في 1% ولا محسوب علي انو صفر


#766039 [ياسر عبد الوهاب]
0.00/5 (0 صوت)

09-14-2013 09:18 PM
18/9/13 الساعة السادسه صباحا بداية الاضراب السياسي والعصيان المدني


#766025 [ود ابو زهانة]
0.00/5 (0 صوت)

09-14-2013 08:53 PM
دي ما عايزة ليها حبة ضغط أو سكرى دى عايزة حبة سيانيد (سم) عديل عشان تنتهى مننا ونرتاح من دنيا النفاق


#766012 [التويجري]
0.00/5 (0 صوت)

09-14-2013 08:13 PM
كلامو صاح يا استاذ نسبة الفساد لاتتعدي1% من الفضل لانو لو اتعدت 1% بكون الفساد100%ودي الحاجة المادايرين بلدنا تصل ليها.الله اكبر خلينا ليكم واحد في المائة عشان يكون في أمل بس انتو متشائمين ساي!!!!ياعم خلينا فساد الاموال فساد الاخلاق بقي كم في المائة نحن ماعندنا مرارة عشان تنفقع ذاتو الله يجازي الكان السبب


#765956 [Fato]
0.00/5 (0 صوت)

09-14-2013 06:23 PM
بلعت حباية الضغط حتى لا أقع أطب ساكت السكتة الأبدية أو شلل (اللهم شلهم,اللهم جرجرهم, اللهم خللهم,اللهم بشتنهم,اللهم طلع.....)وكما قال عادل أمام .عزيزى جبرة هؤلاء القوم يكذبوا ويتحروا الكذب حتى يكتبوا عند الله كذابين والمشكلة أنهم عارفين نفسهم كذابين وما بيستحوا من كذبهم بل عاوزين الناس تصدق كذبهم.بالله أخوى جبرة ندعوا عليهم بأى دعاء حتى يصيبهم فكل مادعونا عليهم زاد تجبرهم,رحماك ربى بل ربما الشسعب ده له ذنوب كثيرة فدعاءنا غير مستجاب ولكن سنظل ندعوا وندعوا ولن ننيأس من رحمة الله ومن أجابته(لا أله ألا أنت سبحانك أنى كنت من الظالمين).


#765929 [ياسر عبد الوهاب]
5.00/5 (1 صوت)

09-14-2013 05:44 PM
يا استاذ... ربنا يديك العافية بس ما تخاف علينا انحنا حكاية المراره والقلب وكبده وطوحال..ومخ.. وكل تلك الاعضاء التي تتاثر بعمائل اهل الانقاذ..انقرضت عندنا من زمان..القلب مات والطوحال انفجر والكبده انشوت والمخ طار...وهلم جرا..الهي يالصادق يجرك الكلب.. بعدين يا استاذ الفساد خشم بيوت.. وكبيرنا --قلو درس في ماليزيا..وكان عندو حساب صغنوني لمن كان طالب..حربي...قالو جاهو جواب من البنك فجعتن..الحساب...عمل ليهو...عشرين صفر باليمين..قالو انهو خر لله ساجدا وقال هذا من فضل ربي...قالو السفير الماليزي قال ليهو ..سعادتك.ده ما فساد..قالو رد عليهو بالتنغليزي..no mister alfasad is mouth of houses....

الترجمه لغير الناطقين بها..الفساد خشم بيوت..

واعتبر السفير ان الكبير باع عدة بيوت وارسل قيمتها الي ماليزيا..ورفع تقريرا بذلك..


#765897 [راصد متابع]
0.00/5 (0 صوت)

09-14-2013 04:14 PM
هذا القول يناقض ما كنا نسمعه قبل الانقاذ ان البيسرق مليم والبيسرق مليون جنيه واحد عند الحكومة وعلي اية حال هذا القول غير مستغرب من عضو برلمان (الب لمان وليس العضو المعني فقط) جاء عبر تزوير انتخابات لسلطة انقلابية مخادعة ..


#765880 [ودالماحى]
0.00/5 (0 صوت)

09-14-2013 03:26 PM
الاخ الفاتح التحيه والود السيد الدكتور بتاع شنو ماعارف في البرلمان شغال شنو بالبلدى اما انه عائش خارج السودان زي مساعد رئس الجمهوريه ولد ناس السيد الميرغنى او زول مسطح ساكت وهو ماعارف الحاصل شنو او ربما يكون لديه نسبه مما لهف - المهم نسبة الفساد في السودان حسب احصائيات جمعية ياتاس الحقونى الجماعه وصلوا السودان امات طه فان نسبة الفساد قد عجز عنها اكبر كمبيوتر في العالم - وهو بالمناسبه موجود في البنتاقون- وقال ياناس هوى شوفو غيرى ده فسادكم ده انا مابقدر عليه- ياعمى انسى شوف زولك ده ساكن وين اكيد في واحده من الفلل والعمارات التى قامت كالنبت الشيطانى - لك الله ياوطنا صار نهبا لكل شواذ الافاق


#765875 [جمال مصطفى]
5.00/5 (1 صوت)

09-14-2013 03:20 PM
آخر تقرير ل لجنة الشفافية الدولية السودان إحتل المركز 176 خلفه افغانستان والصومال وكوريا الشمالية وبما ان هذه المنظمة او اللجنة كافرة عشان كدا مسؤولينا ما محترفين بيها ، ما المسؤولين بتاعينا كل شي عندهم لله ولا لدنيا قد عملوا . يتملطش السودان يحتل اخر المقاعد فى كل المجالات سياسية رياضية ....اقتصادية .... الخ .
انا مستغرش مثلك ايها الكاتب لان من يمسكون بزمام الامر فى السودان هم ارازله .


#765858 [Ali]
5.00/5 (1 صوت)

09-14-2013 02:49 PM
يمكن قاصد نسبة الفساد في المجلس الوطني منقوصا من نسبة الفساد العام يعني بالعربي كده نسبة فساد البرلمان بتساوي 1% من نسبة الفساد العام. والزول طبعا ما كضب . شفتو ليكم مسؤول في بلدنا دي بكضب ھهههههههههه
آلحقووووووني بحبوب المرااااااااره


#765857 [أبو زول]
0.00/5 (0 صوت)

09-14-2013 02:49 PM
حسبنا الله ونعم الوكيل
حسبنا الله ونعم الوكيل
حسبنا الله ونعم الوكيل


#765849 [tarek]
0.00/5 (0 صوت)

09-14-2013 02:39 PM
عزيزي القارئ :
لا زال بعض الإخوة المسؤولين في البرلمان يصدقون ويتحرون الصدق حتي يكتبوا عند الله صادقين .. هههههههههه حلوه ..حلوه. الاشاره وصلت .


#765848 [hajabbakar]
0.00/5 (0 صوت)

09-14-2013 02:32 PM
يا اخى الكريم انت مفرط فى التشاؤم المدكور اعلاه يقول ان نسبة الفساد0.1% فقط وليس 1% كما دكرت ولدا لزم التنويه


#765826 [ود دردق]
5.00/5 (1 صوت)

09-14-2013 02:05 PM
أنا استغرش ولكن وبعد الاستعانة بفهامة جبرة وصلت الي ان المؤتمرجية يعشقون حذف الاصفار في الاشياء المالية .. الا اذا كانت هذه الواحد % يكون لبعها المسئول البتكلم دا وحده ..اقرار ذمة وكدة...أفففففف


#765795 [صبري فخري]
0.00/5 (0 صوت)

09-14-2013 01:12 PM
الوزير يقصد أن حجم المفسدين 1/ من الشعب السوداني وليس من المءوتمر الوطني حيث النسبة فيها تتجاوز ال 100/ لانوا الواحد فيهم بشيل لنفسوا ولغيروا. عملا بالإيثار. 0123652351


#765792 [tota]
0.00/5 (0 صوت)

09-14-2013 01:03 PM
يا سيدي العزيز الناس عايشين في وهم كبير في حساب نسبة الفساد، الفساد لا يقاس بالماديات انم يقاس بالإخلاقيات قياساً علي اقتباس من حديث الرسول صلي الله عليه و سلم **** إذا ضيعت الأمانة فأنتظر الساعة **** بهذا الفهم قس الفساد بالمسئولين شوف يوجد كم مسئول و شوف عدد المفسدين فيهم و طلع النسبة .... أشارطك انك لا تحتاج إلي آلة حاسبة لأنها سوف تطلع بكل بساطة 100%
كسرة...
البيسرق 1 مليم (أم قد) و 1 مليون دولار واحد !!!! كله عند الله حرامي


#765782 [hascomdani1]
0.00/5 (0 صوت)

09-14-2013 12:47 PM
ياعم جبرة الحمد لله عندك مرارة انت من الناس الشويه الفضلو عندهم مرارة بعدين النائم بتاع البرطمان ده اكون سها عن صفر ولا خت الفاصله العشرية غلط هم اصلو فاضيين من الوقوف في شارع النيل والا الجهاد با لنكاح سبحان الله انحنا عنسنا مالاقيين نسوي واحده اعرسو بي شنو انحتا لاقيين ناكل .


#765773 [عمار سليمان]
3.00/5 (1 صوت)

09-14-2013 12:37 PM
في تقرير الشفافية الدولية الاخير جاء ترتيب السودان في المركز رقم (173) كرابع دولة عالمياً في الفساد بعد افغانستان وكوريا الشمالية والصومال التي تذيلت القائمة .

وشمل مؤشر الفساد لهذا العام 176 دولة عبر العالم.
وسبق ان إحتل السودان المركز (176) من (183) في تقرير منظمة الشفافية الدولية للعام الماضي 2011.
ولكم ان تقارنو هذه النتائج بحديث السيد / رئيس اللجنة الاقتصادية والمالية بالبرلمان لتعرفوا حجم المأساة التي نعيشها .


#765772 [المريب]
0.00/5 (0 صوت)

09-14-2013 12:36 PM
والله ما خلو لينا طريقة والا استفزونا واستهتروبينا


#765767 [ود الخالة]
0.00/5 (0 صوت)

09-14-2013 12:33 PM
والله يا جبرة نحن المغتربين بقينا نخجل من نفتح القنوات السودانية خليك من السياسة امس فى برنامج عالم الرياضة عشان يعرضو لقطة الحكم مشكك فيها المزيع قايم وقاعد وضيف البرنامج يكورك وقربو يمشو يجيبو اللعب من البيت . دة كلو عشان الاعادة زمن البرنامج كلو راح فى كدة


#765747 [الصادق محمد علي]
0.00/5 (0 صوت)

09-14-2013 12:06 PM
ي اخ جبرا الله المستعان
من هسه جاتني الجلطة
بديت اشعر بالغصة ف حلقي
الله ينتقم من الحرامية
الله ينتقم منهم
اااااااااااااااه
ي السودان اااااه


#765739 [ابو محمد]
5.00/5 (1 صوت)

09-14-2013 11:59 AM
الشء المؤسف أن الاخ الفاتح جبر لايعلم أن رئيس اللجنه الاقيصاديه هو من كبار الفاسيدين وهو من اسسس للفساد فى مشروع الجزيره كما أنه لايحمل أى شهادة دكتوراه وهل يعلم الاخ الفاتح جبر أن العائد للسيد رئيس اللجنه عندما كان بمشروع الجزيره أى حجه أو عمره تعود عليه بمبلغ تفوق 150 مليون فى ذلك الزمن من هدايا من شلة الحراميه بالمشروع وقام باعمال فاسده بالمشروع لايصدقها عقل وهى موثقه وموجوده


#765730 [دا كلام ما صاااااح]
5.00/5 (5 صوت)

09-14-2013 11:51 AM
يا استاذ جبرا
دايما تفهموا ناس الحكومة غلط
الراجل يقصد انو المال الفضل للشعب الفضل هو 1%
خليك حريف واقرأ ما وراء الخبر


الفاتح جبرا
الفاتح جبرا

مساحة اعلانية




الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة