المقالات
السياسة
فاجعة وطن ( مرثية الرمز الخالد حميد حسن سالم)
فاجعة وطن ( مرثية الرمز الخالد حميد حسن سالم)
09-17-2013 07:25 PM



(بكائيتي)
علاءالدين خضر
أدركني ياحادي القصيد مأموره زاملتي بالسفر ،
حاقب معاناة الحروف في موكب الحزن العبر
انا فوقي ضراية خريف تقل عليها الريح عصر
كشحت علي الدنيا الزهول دمع الحزانا الإنهمر
إنتشا ود عين السحاب إتلافا بتاب المطر
ألحقني ياصبري الجميل الداخرو للزمن الكدر
أمهلني بالحاصل علي مزهول ومدهوش بالخبر
إندلا من ريقي السكات والحزن في الجوف إعتصر ،،،
قوميلي أعزيك يا بلد إنسندي كان حيلك فتر
حميد وطنا بلا وطن فات سابنا في لمحة بصر
لا حوله من هول المصاب هزانا حكمك ياقدر
حميد معافاة النفوس لا آفه لا غل لا ضرر
حي يا كبيرنا و ضلنا يا الجيتنا عابر وماإنتظر
عقرت بطون القافيه بيك كيف تاني زيك من بشر
ألقيت عصاة شعرك حلم كت ليهو أقوي عضم ضهر
سجدت جموع اشعارنا والشعر إنسحر
صدقت نبؤتك يا صليح أديت رسالتك و إصطبر
ناصر الغلابه المتعبين ضد المظالم والتتر
بلقاك وكت تصحي الشعوب بقة غضب عزم إنتصر
فيك دار نعزي مع منو؟ ارجع تعال قص البلد باكيها انت نفر نفر
وين ماشي خليت الديار مفجوعه قلبها انفطر
وحيطآ موهدبه بالخريف هوابه من جية المطر
وا شري ياهادي البيوت في بالا جيتك من سفر
تسمع ضجيج اطفال هناك فرحة بشاره و حس خبر
احضانا تفتحا ضفتين ترجاكا زي نسمة سحر
إن جيتا ليك ان جيت نهار ان جيت دغش للباب دفر
من غير تقول الزول منو لا حارس ابوابا الغفر
القمري فوق نخل الشمال حزنان يقوقي وكر وكر
كل الزرازير والطيور ساعة المغيب تبكي وتوجوج في الشدر
حم حم تعال صد يا حمام درب السلام مافيهو شر
يا دي الدموع البي وراك سيلآ في واديك إنحدر
السره بت عوض الكريم من طولا وقعت بالخبر
إتلمو فوق حوشا الحريم طقا الزغاريد و إنتشر
خدرت اضان السامعين اهتز في الجلد الشعر
جاتا الرضيي بت ود مرين و بكت فطين دمعآ أمر
نوره التكيل فوقا التراب الليلي حلمها انتحر امونه في الركن البعيد مطويه حسها إتعبر
عيوشه مدهوشه و تلوص ما مل ساساقا وفتر
مكلومه ست الدار تنوح وا غلبها اضناها السهر
مهجومه بت حمدين تئن بين ست نور وصليحه والدماع طفر
صرخت نصيره الفي الجبل الدنيا صنت في خدر
و جرت نفيسه علي البيوت هيلا آعريس ضو القمر
لفحت حريره وحق،،ضريره ،،قرمصيص ،سير ياشهيد ضر يا ضرر
صنت رواكيب الحلب ،، ياحمتو وين عبدالرحيم تحت القطر
يا السره قومي إستغفري دي الدنيا حالا مع البشر
ما كنتي ياك ست الحريم و كان قلبك اقوي من الحجر
ومافجعك فقد الجنا الويحيد وكت دمو إنهدر
يومين ومانطقت حرف يومين وما إتبلاله ريق يبقالا شر
يا ضو طريق البي وراك كنت ما شيهو وصبر
دربك محصن باليقين يا الفد صراط والدنيا حر
انا داير اغيبب داير افيق
ودران وتايه في الطريق كايس وراك قبضة أتر
أبكي و إحت شدر الظنون لالوب سبح و ارجاك مطر
تنزل علي الارض الخلاص والنيل يشب بعد إنحسر
كل الشوارع تغتسل والغيم يهل وطنو الدشر
يا صاحنا زي شمس الحياه الدغريه ماخابا البصر
من ضيها إنحنت الجباه الرافعي رايات الكجر
انا داير اصيح بالدروب زي آهه في حلق الوتر
ترجف تلين كل القلوب الشايلي غنواتك سمر
مشجون محاصرني الهروب والصوت غريق في الجوف نهر
يا وش زمان عابس كفيف المهدي وينو المنتظر
بيوضه إتحتت سموم ضهر العتامير إتكسر
بكت الرمال ترع السراب شيب من الشافو الشدر
إتبركت ريح الخلاص جم دمك البقا وهدر
وقلدت حديث صوت الانين الفيك بينك والحجر
فرت بساطا عليك غطا في الساعه ديك انت إحتضر
باسم مودع دنيتك ما بنجي من الموت حزر
نتقت طرف جلبابك الزي نيتك شان بيهو يرتد البصر
ترجع بصيرة الماوعي تغشا البويتات والحضر
تصحي المداين الحالمه ديك ياطرفها الدغري وأغر
شيخ الضريح اهل المزارات والقبب اهل الله صر
حميد وريث الاولياء حميد أمانة الصالحين روحاني قلبو علي البشر
آه يا هرم نوري العظيم شيدتو خاطرك دون كبر
شامخ علي النيل والنخيل ماإنهد صرحك لا إندثر
واقف نصب لي كل زمانآ جايي والتاريخ زكر
زي مملكة نبته وبعانخي المن ترابا صنيع اثر
زكراك مخلده بالسنين نبكيكا لا أبد الدهر
يانوري يا ام ترهاقه هووووي يانوري ياام حميد قدر ،،،،،،


[email protected]


تعليقات 0 | إهداء 0 | زيارات 1928

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




محمد الصحابي يحي محمد
مساحة اعلانية




الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة