تفتيش موبايلات
09-18-2013 05:55 PM

اليوم عزيزي القارئ ننتقل من التحدث عن حالات (الإستغراش القولي) وهو ما يصدر من تصريحات وأقوال تصيب المواطن باللإستغراش إلى نوع آخر من حالات الإستغراش وهو (الإستغراش الفعلي) وهو ما يحدث من أفعال تثير فينا تلك الحالة إياها من الإستغراش .
لقد تابعت وتابع معي الكثير من القراء قصة ذلك الطالب الجامعي الذي كان يقوم بحضور محاكمة الفتاة التي تم إتهامها بدخول مكاتب حكومية بملابس (قدرت الشرطة) أنها لا تليق وبناءاً على ذلك فتح بلاغ جنائي في مواجهتها وتحويلها للمحكمة التي أعتقد أنها لم تصدر حكمها حتى الآن .
نعود إلى قصة ولدنا (الطالب) الذي كان حضوراً لإحدي جلسات تلك المحاكمة وضبطته شرطة المحكمة وهو يقوم بتصوير الجلسة من خلال هاتفه الجوال وحيث أن المحاكم مكاناً يشترط فيه الانضباط والاحترام، ويتعين على مرتاديها الالتزام بقواعد السلوك والآداب داخل نطاقها ولما كان العرف السائد بالمحاكم يمنع التصوير أو أجهزة التسجيل داخل قاعة المحكمة (ما لم يأذن بذلك من الجهات المختصة) فقد تمت إدانته على فعله هذا ! (ولحدت كده كويسين) !
لم تكتف الشرطة بذلك بل قامت بتفتيش هاتفه على الرغم من أن كافة القوانين (الأرضية) تنص على عدم جواز التفتيش إلا للبحث عن الأشياء الخاصة بالجريمة الجاري جمع المعلومات عنها في حال التحقق منها !! (يعني مفروض ناس الشرطة يتأكدوا بس من وجود المقاطع التي صورها الطالب داخل المحكمة) لكن (الحصل) إنو (فلفلو الهاتف) وقالوا أنهم وجدوا صور (خليعة) به وتم بناء على ذلك إدانته وتنفيذ عقوبة (الجلد) عليه على الرغم من أن تفتيش هاتف المتهم الشخصي في غير الحالات (المصرح بها) يعتبر انتهاكاً صريحاً لخصوصية الشخص واطلاعاً على أسراره (و ده شرعاً لا يجوز خليك من القانون) !
العبدلله ليس قانونياً ومعرفته بالقانون أقل كثيرا عن معرفته باللغة الطاجكستانية ولكنه يعتقد أن كل ما يخالف المنطق والعقل يخالف القانون بالضرورة ، وقد كانت الضرورة التي دعت لكتابة هذا المقال هي (حكاية) إنتشار حالات تفتيش (هواتف) المواطنين عن طريق الشرطة عندما تقوم الشرطة بتوقيفهم على ذمة بعض القضايا .. وطواااالي (جيب موبايلك يا زول) .. ويشيلو الموبايل وهاك (يا فرجة وفلفة ويا بحث) مع إنو من الممكن إنو تكون عندك صور أو مقاطع عائلية خاصة جداً ولا تود لأحد الإطلاع عليها والغريب في الأمر أنه في حالة أي مواد يشتبه بأنها غير لائقة تتم إضافتها إلى ملف القضية (الأساسية) ويكون عندك بلاغين بدل بلاغ واحد !!
للكاتب المصري عمر عفيفي (وهو عقيد سابق بالشرطة المصرية) كتاب بعنوان (عشان ما تنضربش على قفاك ) وقد قام بكتابته من أجل توعية المواطنين بحدود تعاملات رجال الشرطة مع المواطنين إذ أن الكثير من (رجال الشرطة) في عالمنا (الثالث) هذا يبدو أنهم (شغالين جربندية) ساكت دون إتباع قانون أو (يحزنون) وقد ساعدهم في ذلك (الأمية القانونية) لدي المواطن وإعتقاده (الما في محلو) بأن كل ما يفعله رجل الشرطة هو سليم ميه في المية !
نحن (المواطنون) في حاجة ماسة لمعرفة كيفية التعامل مع الشرطة حينما تستوقفك .. ومعرفة الحقوق الخاصة بنا لأن ذلك فضلاً عن أنه يحمي المواطن من أي نوع من أنواع الإنتهاكات (والسلبطة) فإنه كذلك يقي المواطنين من عصابات الإبتزاز والنهب التي إنتشرت مؤخراً والتي تحمل (بطاقات) بعض القوات النظامية) وفي بعض الأحيان (زيها الرسمي) !
يا ريت أخواننا (القانونيين) وأخواننا في الشرطة يتبرعوا لينا (بعمود) يشرحوا لينا فيهو متى يجوز تفتيش (هاتف) مواطن موقوف على ذمة جرم معين والإطلاع على محتوياته ومتى (لا يجوز) عشان القصة ما تكون هايصة ساااكت وأي شرطي (يقبض ليهو على مواطن) في تهمة (ما) طوااالي (يشيل موبايلو يفتشو) !
كسرة :
- دائماً ما ينشط القانون لدينا في مسائل الزي الفاضح والصور الخليعة و(الحاجات الميتة) .. الكسرات دي ما شايفنها !!

- كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو)+و+و؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو)+و+و؟


تعليقات 20 | إهداء 0 | زيارات 6687

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#769991 [صديق]
2.50/5 (3 صوت)

09-19-2013 03:46 PM
سلام استاذ جبرا ، من ناحية قانونية لا يكون التفتيش الا بقرار صادر من وكيل النيابة بعد بلاغ رسمي ، والتفتيش الخاص له اشتراطات قانونية نظمها القانون ، في حالة الطالب اعلاه لو كان الموبايل محل الجريمة ومرتبط بها (مثل التقاط صورة بواسطته) وصدر امر تفتيش لذلك الموبايل هنا يجوز للشخص الذي ينفذ امر التفتيش ان يتحفظ علي اي مادة تشكل جريمة في نظر القانون يجدها في ذاكرة الموبايل ، حتي لو كانت تلك المادة لا علاقة لها بالبلاغ محل التفتيش واضرب لك مثالاً لو صدر امر تفتيش لمكان بخصوص جريمة حيازة مخدرات ، ووجد رجال الشرطة اثناء تفتيشهم للمكان شخصاً مقيداً بطريقة غير قانونية ، فأنهم في هذه الحالة يثبتون هذه الواقعة في محضر التفتيش ويحاكم عليها المتهم دون الحوجة لفتح بلاغ جديد بالوقائع المكتشفة. طبعاً هذا لا يعني اتفاقي مع سلوكيات رجال الشرطة في تفتيش اجهزة المواطنين دون سند قانوني ، ولا يعني كذلك اتفاقي في تجريم بعض الأفعال المجرمة بواسطة القانون الجنائي السوداني وقانون النظام العازم سيئ السمعة.


#769979 [مندهشة]
0.00/5 (0 صوت)

09-19-2013 03:30 PM
استاذ الفاتح اضيف لك صورة اخري من صور الاتهام غبر المباشر للمواطن قدمت قبل يومين من خارج السودان عندما حملت حقائبي ونا خارجة من الصالة استوقفتني فتاة لتسالني عن البوردين كارت او ما يدل عل ان هذة الحقائب لي بربك ماذا يعني ذلك وهلت سمعت في اي من مطارت العلم بهذا ؟


ردود على مندهشة
[fattah] 09-19-2013 04:23 PM
انتى ياايتها المندهشه هل الحكايه تعليق وتريقه ذى مابيقولو حبايبنا المصريين ولاايه اولا البوردنكارت BOARDING CARD هذا ليس للعفش بل هو كارت دخول الطائره اما حكاية العفش والموظفه فهو اجراء موجود فى الكثير من دول العالم بحيث يتم مطابقة الارقام الموجوده على التزكره مع ارقام البطاقات الموجوده على العفش واسمها ياشاطره BAGGAGE SABLE ....تحياتى


#769966 [ود الجد]
0.00/5 (0 صوت)

09-19-2013 03:14 PM
ما شايفنها ان عجبك وعجب الشعب السوداني كلو اها حتعملو شنـــــــــــــــــــــــــــــــو


#769861 [Abdo]
5.00/5 (1 صوت)

09-19-2013 01:35 PM
انواع الإستغراش :
1- نوع يخليك تقرب تبكي يعني دموعك ترقرق
2- نوع يصيبك بالدوار لمن بطنك تطم
3- نوع يخليك تقرب تعضي أقرب شئ جنبك
4- نوع يفور دمك و ده خطير ممكن يؤدي للوفاة
5- آخر نوع و ده متفشي جداً و هو الذي يصيبك بالتبلد بالتالي ما تعرف شنو تسوي يعني تحتار و بس ، و دة تفشيه يسبب إنتشار أسباب الإستغراش كما حادث الآن


#769852 [معجب بساخر سبيل]
0.00/5 (0 صوت)

09-19-2013 01:30 PM
من اين اتي هولاء افراد الشرطه لتصفهم ب>لك الوصف ... هل اتو من كوكب اخر .. ما ياهو نفس الشعب السوداني ...


#769848 [الكتاحة]
4.00/5 (1 صوت)

09-19-2013 01:27 PM
أستاذ/ جبرة أظنك جنيت يازول أنت راح منك الدرب قانون والله فهم ياأخي ديل حبسوا محامي عديييييييييل كدة بدون توجيه تهمة تقول لي زول ساي يعرف حقوقة, والأدهى أنهم حاكموا الفاعل بأنزار بس داير خلق الله تدردر مع الشرطة وتخش حراسات ويدوبك ينصفوهم بأنزار ,شكلك بقيت طابور وكايس تورطنا.نحنا حلنا في نظام جديد لنج (تشريعي ,قضائي, تنفيذي).


#769810 [ابوالهول]
5.00/5 (1 صوت)

09-19-2013 12:45 PM
نداء للمعارضة********* نداء للمعارضة ********* نداء للمعارضة ***********نداء للمعارضة****
الشعب يريد قناة فضائية...... الشعب يريد قناة فضائية........ الشعب يريد قناة فضائية......
الشعب يريد قناة فضائية...... الشعب يريد قناة فضائية........ الشعب يريد قناة
الشعب يريد قناة فضائية...... الشعب يريد قناة فضائية........ الشعب يريد
الشعب يريد قناة فضائية...... الشعب يريد قناة فضائية........ الشعب
الشعب يريد قناة فضائية...... الشعب يريد قناة فضائية........
الشعب يريد قناة فضائية...... الشعب يريد قناة فضائية
الشعب يريد قناة فضائية...... الشعب يريد قناة
الشعب يريد قناة فضائية...... الشعب يريد.
الشعب يريد قناة فضائية...... الشعب
الشعب يريد قناة فضائية......
الشعب يريد قناة فضائية
الشعب يريد قناة .
الشعب يريد
الشعب .
الش
ال


#769777 [معجب بساخر سبيل]
0.00/5 (0 صوت)

09-19-2013 12:15 PM
انت يا جبره الماده التي تم تصويرها داخل المحكمه تم حفظها في الموبايل والصور الاخري محفوظه في وادي ام سدر .
يعني انت عاوز البوليس لمن يستعرض كل الصور وتجي صوره ( خليعه) اي زول وفهمه يقول دي ما عندها علاقة بالموضوع خلونا في المحكمة.
طيب ما ده الحصل اخونا الطالب وقع في شر اعماله .. هو اخير البولي اها لو ابوه قال ليهو يا ولد جيب الموبايل برضو تقول لي انتهاك خصوصية .
يا الشعب السوداني ... عليكم الله خليكم في جوهر الموضوع وليس المواضيع الانصرافيه .
صحي البيلد المحن بيلولي صغارهم


#769645 [نادر]
0.00/5 (0 صوت)

09-19-2013 10:17 AM
نميرى قبل مايتكلم تلقى الأمر نفذ ..... حليل الرقدو


#769620 [ابو خالد الدمام]
0.00/5 (0 صوت)

09-19-2013 09:55 AM
طيب يا جبرة انت ما سمعت بقرار والي شمال كرفان بفرض رسوم على حطب الدخان تاني نسوانكن حيدخنن بي شنو؟؟؟ احرقو شوالات هههههههههههههه


#769458 [ودالباشا]
5.00/5 (1 صوت)

09-19-2013 12:42 AM
افراد الشرطة يا ود جبرا من حثالة المجتمع ومعظمهم لم يكملوا مرحلة الاساس ومنهم المجرمين انتسبوا بالشرطه لحماية انفسهم فقط بخبرنى لاحد الاصدقاء كان فى اجازة بالسودان وفى احد الايام وهو راجع من جهاز المغتربين نزل فى السوق المركزى لشراء حضار واثناء وهو وافق فى محطة الحافلات ذاهابا للمنزل وكانت توجد زحمة لاحظ اثنان يفتعلون الركوب اثناء المدافرة يسرقون الركاب وعلى بعد خطوات يقف رجل شرطة يدعى وكأنه ينظر الركوب اقرب منه صحابنا واخبره بما ارى وكان رد كالصاعقه عليه حيث قال له يازول ماعندك شغله بيهم شيل اخضارك وشوف ليك حافله والتوكلواتضح الشرطى ذااااتو معاهم وهذا تخيلوا وما اكثر امثال هذه القصص الؤسفه


#769420 [الشرانى]
3.00/5 (2 صوت)

09-18-2013 11:17 PM
انا فى رايي الشخصى الزول يستاهل الضرب وهو ما عنده شغل؟ وليه يصور اصلا؟ واذا كان عنده صور خليعو فهو اصلا مش محترم


ردود على الشرانى
United States [د. عبدالرحيم عثمان] 09-19-2013 04:42 PM
يا الشراني يااااخ وسع مخك شوية .. هسه أفرض ما وجدوا صور خليعة لكن وجدو صور عائلية بتخص الزول المسكوهو ده ؟ ياااخ القصة قصة إنتهاك للخصوصية .. إن شاء الله يكون الكلام وقع ليك .. غايتو الاستاذ ده نعبان معاكم جنس تعب ربنا يعينه ويعطيه ثواب


#769366 [الزول الكان سمح]
0.00/5 (0 صوت)

09-18-2013 09:57 PM
الكسرات دى كوووولهم شايفنها..وماشين يزيدوا فيها عينى عينك وما قادرين نعمل حاجة..نحنا إنتهينتا يا أستاذ


#769352 [عادل السناري]
0.00/5 (0 صوت)

09-18-2013 09:32 PM
تخيل التوجيهات دي صدرت من الرئيس السابق المرحوم / جعفر نميري كان ممكن تنتظر 6 شهور و مافي زول يجيب خبرها مغ انو عمك الاستاذ/ الفاتح جبرا بيذكرهم بيها علي الاقل في الاسبوع 3 مرات ؟
سيد ( بشة ) وسخان و ***** عشان كدا ما يقدر يقول( بغم ) الجماعة بيطلعوا ليهو ملفاتو الوسخانة .


#769342 [ahmmed]
5.00/5 (2 صوت)

09-18-2013 09:12 PM
يعني اول مرة تعرف انو البوليس شغال جربنديه وحقاره للمساكين،مرة جوطة في موقف بين سواقين وناس جبايه وله استهبال كده،ساقوهم النقطة العسكري لبع واحد الزول مسكين اكلها وسكت،جا اكررها مع عمك تاني،عمك راكز ،طب غبض ايد العسكري،قال ليهو شوف علي الطلاق ما تعتذر علي مدت ايدك دي تاني ما ترجع ليك،او تضربوني رصاص،وانا هسع عندكم هنا طبقو قانونكم ذي ما دايرين بس الاهانة وقلة الادب ما بتنفع ،وات حسابي معاك بعرفو،العسكري رقد خل،ويمين بالله جا الضابط وحنسو عمك شان افك ايدالعسكري الداير اكفت بيها عمك،وهاك يا جرسه واعتذار،،عالم كضابة تخاف ما تختشيش


#769314 [Adam Ibrahim]
0.00/5 (0 صوت)

09-18-2013 08:10 PM
حتى (الحاجات الميتة) دى برضو القانون بينشط فيها ضد الما عندو ضهر بس.. والله الكسرة(القديمة) دى واواتها بقت 22 وقربنا للشمعة الثانية.. بعد دا الا نحولها للمداولة بالجمعية العامة للامم المتحدة امكن يرسلوا المحقق كونان عشان يحل اللغز بتاعها ويورينا الاخبار شنوووووووو وكده..


#769308 [سودانى اطلاقا ما منفرج الأسارير]
0.00/5 (0 صوت)

09-18-2013 07:57 PM
يا سودانى يا اصيل .. تكونش ألأرنب اللى ذكرتها سيادتكم هى اللى كان ماش يصطادها ألأمام الحبيب (زمان قبل ما يبقى "رمز")و لكنو اضطاد بدالها "الفيل" .. وصارت قصه يرويها الجيل بعد الجيل انه "قد اكل ألأرنب عقل الفيل" طبعن ما آفة ألأخبار الا روتمها!!


#769285 [اسير الشوق]
0.00/5 (0 صوت)

09-18-2013 07:32 PM
شايفنها يا جبره وفايته عينون بس عاملين اضان الحامل طرشه


#769268 [دا كلام ما صاااااح]
5.00/5 (1 صوت)

09-18-2013 07:07 PM
مشكلتنا ثقافية .. اى واحد فى اى منصب بيتصرف بفوقية ابتدااااء من موظف الأستقبال

الشرطى اول من يكسر القانون باعتبار انه شرطى وبيعتبر نفسه فوق القانون وليس كبقية البشر
وهو ماعارف ان مهمته الأساسية تطبيق وتنفيذ الفانون

المشكلة الأساسية هى السلوك الوظيفى بيتم اكتسابه بالأحتكاك والممارسة اليومية
وليس هناك قانون مكتوب (اللوائح والقوانين لا توضح كيفية التعامل مع الزملاء والمرؤوسين والعملاء)
عشان كدا الناس بتنسى انهم موظفين وبيشخصنوا المواضيع
لأنو عندنا ثقافة الخلط بين السلوك الوظيفى والسلوك الأجتماعى
الواحد يقابلك فى مكان العمل كانه فى بيته
وفى البيت والشارع واحدين ما يقدروا يتخلصوا من
الشخصية او الدور الوظيفى (خاصة اذا كان بيعمل فى موقع فيهو سلطة وهيبة ونفوذ)

عندنا خليط لاهو دولة حديثة ماشة بالقوانين
ولاهى قبيلة او عشيرة ماشة بالأعراف


#769246 [سوداني اصيل]
4.88/5 (7 صوت)

09-18-2013 06:40 PM
كسراتك دي بتودي التوج.هو الرئيس ماقادر يعمل حاجة في البلد دي.البلد دي شكلها حاكمها ارنب


الفاتح جبرا
 الفاتح جبرا

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة