حمدان بعد التعديل
09-21-2013 12:12 PM


تم نشر هذا المقال في : 2 أغسطس 2009م
المطلوب : تعديل الأسعار التي جاءت في الإمتحان (حينها) بما يتناسب والأسعار (الآن) ثم تعديلها مرة أخرى لتتناسب والأسعار (بعد رفع الدعم) ثم الإجابه على الأسئلة علماً بأن مرتب حمدان لم تطرأ عليه أي زيادات منذ ذلك التاريخ

المادة : إمتحان حساب

أجب مستعيناً بالله تعالى على جميع الأسئلة التالية مع تبيين خطوات الحل بوضوح
السؤال الأول :
حمدان يعمل موظفاً يإحدى المصالح الحكومية مرتبه يبلغ 500 ألف جنيه (بالقديم) وهو يعول أسرة مكونة من أربعة ابناء بالإضافة إلى أمهم ويسكن فى بيت إيجار فى منزل صغير بحى شعبى بأطراف المدينة بأجرة شهرية تبلغ 250 ألف جنيه (بالقديم) أحسب كم يتبقى من مرتب حمدان الشهرى بعد خصم قيمة الإيجار
السؤال الثاني:
إذا كان حمدان يركب يوميا مواصلتين كيما يذهب لمكان عملة وكانت هاتان المواصلتان قيمة تذكرة الأولى 350 جنيه (بالقديم) والثانية 500 جنيه (بالقديم) قم بحساب مجموع المبلغ الذى يدفعه حمدان للمواصلات شهريا ذهاباً وعودة ؟! مع مراعاة تقريب الناتج لأقرب عدد صحيح جبراً للخواطر.
السؤال الثالث :
كم يتبقى من راتب حمدان بعد خصم إيجار المنزل وتكلفة المواصلات الشهرية؟!
السؤال الرابع :
إذا علمت أن منزل حمدان لا يحتوى على (أى جهاز كهربائى) وعلى الرغم من ذلك فإن قيمة ما يدفعه شهريا للجمرة الخبيثه (الكهرباء) هو 95 ألف جنيه (بالقديم) كما أن قيمة فاتورة المياة الشهريه هى 13 ألف جنيه (بالقديم) وأن قيمة رسوم (النفايات) الشهريه هى 7 ألف جنيه (بالقديم) فكم يتبقى من راتب (حمدان) بعد خصم قيمة الكهرباء والمياة والنفايات؟!
السؤال الخامس :
يذهب أبناء حمدان الأربعه إلى مدارسهم (كدارى) غير ان كل فرد منهم يأخذ مصروفاً مقدارة 500 جنيه (بالقديم) يكفى لشراء عدد واحد (سندوتش) فول (غير مصلح) : أحسب قيمة ما يدفعه حمدان شهرياً مصروفاً لأبنائه مع الإنتباه لعدم حساب الجمع والعطلات الرسمية ثم أخصم المبلغ مما تبقى له من مرتبه .
ملحوظة :
تم إعفاء أبناء (حمدان) من (الرسوم الدراسية الإجبارية) بعد ما قام بإستخراج (شهادة فقر ومسغبة) من اللجنة الشعبية
السؤال السادس :
لحسن حظ حمدان فجميع أفراد أسرته (نباتيون) لا ياكلون اللحوم بانواعها ولا (الأجبان) ولا يشربون (الألبان) ويحبون الفول (بالزيت) فقط (حباً جما) لدرجه أنهم يتناولونه فى الثلاث وجبات فى شكل سندوتش (عيشه واحده) فى كل وجبه فإذا كانت تكلفة السندوتش الواحد 450 جنية (بالقديم) أحسب قيمة سندوتشات (الوجبات) الشهرية ثم أخصم المبلغ مما تبقى له من مرتبه (إن كان هنالك بقيه)
تنبيه :
حتى لا تخطئ فتفقد درجات السؤال قم بخصم وجبات فطور (الأولاد) – ما عدا الجمع والعطلات الرسمية – مع إضافة مبلغ (ألف جنيه يوميا) بالقديم هى قيمة فطور حمدان بالمصلحة !
السؤال السابع :
لا يقوم أفراد أسرة حمدان (بكى ملابسهم) بل يكتفون بغسلها فقط ويستخدمون (صابون الغسيل) لغسيل الملابس و(الإستحمام معاً) بواقع (لوح صابون) لكل فرد أسبوعياً فإذا كان كل 5 ألواح صابون 2250 جنيه بالقديم أحسب إجمالى قيمة (الصابون) المستهلك شهرياً ثم أخصم المبلغ مما تبقى من مرتب حمدان (إن كانت هنالك بقية)
السؤال الثامن :
لا يتناول افراد اسرة حمدان (الشاى) بل يكتف كل فرد منهم بعدد 2 ملعقة سكر صغيرة فقط فى اليوم (مذابه فى الماء) فإذا كانت معلقة السكر الصغيرة الواحدة تحتوى على 5 جرامات من السكر أحسب كم جراماً من السكر تستهلكة أسرة حمدان شهرياً ثم أخصم القيمة الإجمالية مما تبقى من مرتب حمدان (إن كانت هنالك بقية) علماً بان سعر رطل السكر هو 1000 جنيه بالقديم وأن الرطل يساوى 454.5 جرام
السؤال التاسع:
إذا كان منزل حمدان يتكون من غرفتين ومطبخ ودورة مياه فكم شخصاً ينام في كل غرفة علماً بأنه لا يمكن لأحد أن ينام في فى الحوش نسبه لجحافل جيوش البعوض وعدم وجود ميزانية للعلاج ؟!
السؤال العاشر:
هل تستطيع أن تحسب المتبقي من راتب حمدان للشهر بعد القادم بعد سداد الديون المستحقة لهذا الشهر والشهر الذى يليه إذا أمد الله فى عمره ولم يمت بفقر الدم أو بتصريحات المسؤولين علماً بأن هذا الإختبار قد خلا من أشياء أساسية كثيرة كالعلاج والدواء و(الكساء) و(المواجبات) و(الحياة نفسها)

سؤال اختياري (خمس درجات إضافية) :

أ‌- هل لديك أى إقتراح يقلل من منصرفات حمدان بحذف بعض البنود (البذخية)
ب‌- هل من نصيحة توجهها لحمدان ؟؟!!
كسرة :
كان على الحكومة قبل (رفع الدعم) أن تدلل على محاربتها للفساد وتدي (الكسرات التحت دي) نظرة حتى يطمئن (المواطن) على حرص الحكومة على إسترداد المال العام !! .. لكن يبدو أن (المكتوله ما بتسمع الصائحة) !!

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو)+و+و؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو)+و+و؟


تعليقات 34 | إهداء 0 | زيارات 7106

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#772365 [ياسر عبد الوهاب]
0.00/5 (0 صوت)

09-22-2013 01:44 PM
دحين يا جبرا الشارع الساكن فيهو حمدان ده..ما فيهو شوية كلاب وكدايس بتتحاوم باليل...وتيب؟؟؟


#772317 [abu al juck]
0.00/5 (0 صوت)

09-22-2013 12:58 PM
أنا شخصيا بنصح الشعب السوداني يفعل الآتي :
- كل ما عنده سيارة ان يتضامن مع جيرانه بأستعمال هذه السيارة جميعا وللاحتياجات الضرورية فقط يعني كلهم يصرفوا 50 جنيه بنزين في الشهر بدلا من 5000 ج في الشهر وبعدين المصفي بقيف ونخلص من الدعم وبعدين نشوف.
- كل المواطنين يأكلوا الذرة والدخن ونترك القمح.
- تقليل الزيارات أو المشي كداري وف يه رياضة للشباب والكبار جميعا.
- تقليل الشراء من البقالات الفارهة والأعتماد الكلي على دكان الحي.
- بعدين الحكومة وناس الهوت دوك والبيتزا بخرجوا من البلد عددددددديل.


#772138 [Wad Alti]
0.00/5 (0 صوت)

09-22-2013 10:32 AM
كررررررررررر على حمدان من 2009 بياكل في النييييييم ...
ياااربي بعد مااستكتروا عليهو البيتزا والهوووت دوق بياكل شنو تاااني ...
حسبنا الله ونعم الوكيل


#772038 [ود اب زهانة]
0.00/5 (0 صوت)

09-22-2013 08:42 AM
انصح حمدان ان يرجع لى زمان شوية قبل التسعينات
هناك المعيشة رخيصة ويقدر يوفر له قرشين تلاتة


#772001 [ود النوبة]
0.00/5 (0 صوت)

09-22-2013 07:26 AM
وصيتي للأخ حمدان أن يرتقي إلى أعلى كبري ويهوي بنفسه داخل مياه النهر. لكن!!!
بشرط ان يكون ذلك في شهر أغسطس نسبة لإرتفاع منسوب البحر {فصل الدميرة}،،،


#771926 [محمد الدول]
0.00/5 (0 صوت)

09-22-2013 12:46 AM
اصبت الفرض استاذ جبرا اذا الحكومة سعت لاسترداد المال المنهوب كنا راينا فيها الجدية وباركنا لها الدعم وغيرها ولكن المسألة بقت ساقية جحا الماطن الغلبان يدفع زى اخوك حمدان وناس ضابين الالمواطن بالصرمة اللهم لا شماتة


#771875 [الشرانى]
5.00/5 (2 صوت)

09-21-2013 11:07 PM
والله سهلة جدا ,, حمدان بوفر زى 6 مليون جنيه بالقديم وقل لى ليه؟؟ لان البلد كلها بقوا حرامية.. بتاع البطيخ بياكل بتاع الازيار وبتاع الازيار بنصب على بتاع المواشى وهو بدوره بشيطن على بتاع الفول والخ الخ الخ لحد ما الاخ يجى لاكبر راس


#771855 [قنقر]
5.00/5 (1 صوت)

09-21-2013 10:26 PM
نصيحتى لحمدان أن يبطل اكل الفول و يتجة لاكل البيتزا و الهوت دوغ علشان يقدر يوفر شوية .
اللهم خذ البشير و عصابتة اخذ عزيز مقتدر.


#771797 [هيكل]
5.00/5 (1 صوت)

09-21-2013 09:03 PM
حمدان حي ياستاذ جبرا دي براها وعجزه


#771771 [Fato]
0.00/5 (0 صوت)

09-21-2013 08:25 PM
أنا أحلل (من حلال)أن يقوم أخونا/ حمدان وفكيك لشارع الستين فيجد فلتين مقرونات بممر طائر ويتوكل على الحى الدائم ويقول فى سره(ياغرق ياجيت حازمها)ويدلف على الفلتين وما يتوقف ألا عند الخزن الكبيرة وتكون معه (عدة الشغل)ويكون الوقت قبل ساعات السحر ويكسر الخزنة التى تقابله بحرفية عالية ويملأ مايكفيه ويكفى الالاف الحمدانات مثله فيجد العملة الساهلة والصعبة رزم رزم ولا يولى على شىء طالما هذا الحق حقنا فنحن عافيين ليه ومسامحنه وأحسن ما يكتنزها(الجاز) لبقية العصابة ويرجع يبسط عياله وزوجته وعيال وزوجات الكثير الكثير من الحمدانات.


#771703 [دا كلام ما صاااااح]
5.00/5 (1 صوت)

09-21-2013 06:13 PM
اخر عهدى بى حمدان سنة 2009 انه قام بالليل اتوضأ وصلى
وقعد يدعو لغاية الصباح انه ربنا يخلصنا من الكان السبب
غايتو اذا ربنا ما استجاب ليهو لغاية الآن معناها يراجع نفسه
يا الفول يا الزيت يكون جايبه بالحرام ..


#771659 [ابو نصر الشمالي]
0.00/5 (0 صوت)

09-21-2013 05:14 PM
نصيحتي لاحونا حمدان ب حزام ناسف ويشوف بتاع الهوت دوق وين وله الشكر من الشعب السوداني


#771647 [ابو العينيين]
5.00/5 (1 صوت)

09-21-2013 05:05 PM
شنو يا استاذ جبرا مشيت تفتش للقديم ماجابوها ليك مدردقه ماسمعته بالهوت دوق ده والبيتزا والله بيني وبينك بتجيب الهواء


#771632 [sanmka]
4.13/5 (4 صوت)

09-21-2013 04:43 PM
والذي خلق السماء بغير عمد ورغم علمي بإفتراضية كل ذلك إلا أن أدمعي سالت أكثر من مرة قبل أن أكمل القراءة


#771596 [بت ام الحسن]
4.25/5 (4 صوت)

09-21-2013 04:00 PM
حسى عايزنا نصدقك انت ونكضب بشبش ذات نفسيه!!!!!!!!!!!!!

بشبش قال حمدان قبل رفع الدعم بياكل هوت دوق

وانت بتقول حمدان بياكل فول بالزيت

اناغايتو باكل مارتديلا ورومى مدخن بجبنة الماعز وبعد رفع الدعم ح اكل نيم

امى --ام الحسن--- بتسلم عليك وعازماك انت والعيال على صحن نيم مصلح


#771572 [abuawaab]
1.00/5 (1 صوت)

09-21-2013 03:24 PM
نصحيتي لاخونا حمدان يقوم بليل والناس نيام يصلي ركعتين ويدعوا الله ان يغيرالله لنا الحال الي الافضل وان لا يسلط علينا من لا يخافه ولا يرحمنا ،وباذن الله تعالي ربنا ينصره .


#771567 [عبدالماجد قنديل]
5.00/5 (1 صوت)

09-21-2013 03:18 PM
عزيزي الفاتح ... والله دي حسابات مراجع عام ( تغلبو) أن شعر رأسي زاد شيبا وصلعا ( علي العليهو)
دا أمتحان قاسي جدا ، ودي معادلات تفاضل ومعادلات فيزياء وكيمياء وأحياء ... دا أمتحان لن يجيب عليه أحـــد ( يعني لم ينجح أحــد ) .. لكن هناك حلول جــذرية منها ( أولا على طريق الأمام)
يقوم حمدان بتحريض كل الغبش لملء الساحات والميادين بالغبش والأعتصام بها حتى يزول الذين كانوا سببا في شقائه وتعاسته وبي كده ، يقوم الغبش بتحــديد نفر طاهر شريف ليتولوا مسؤوليتهم ويكون هناك مجلس ( أغبش ) ليقوم بدور الرقابـــة على الغبش المتوليين المسؤولية ، مراقبة لصيقة ( مان تو مان )
( مراقبة شواطين للساحر البرازيلي بليه ) وأول ما علامات الترطيب تظهر على واحـد من المسؤولين تتدخل رقابة الغبش وتعبد المرطب من الغبش ومصادرة ما أمتلكه بغير وجــه حق .. وبي كده تختفي للأبد كسرات أستاذنا الفاتح جبرا ...
ثانيا وهــو طريق سهل على ( حمدان ) أن يطلق لحيته ويلبس حلباب ناصع ( حتى لو قام بأستلافه من غسال والله مكوجي بالأيجار ومعاهو الشال اياه ويكون مطبلا ومن الهييفة ( هي لله هي لله ) وبلاشك سوف تحل أموره على المستوي الشخصي ,,,
ثالثا ، أن لا يفكر حمـــدان ولو بالخطأ في ( الأنتحار ) لانه ذلك جريمة يعاقب عليها ( بالطبع ليس القانون لأنه لو كان هناك قانون يعاقب لما فقع مرارتنا اخونا الفاتح جبرا بي كسراته العجيبة )
ولكن هــذا جرم يحاسب عليه رب العباد ، حيث لايجوز قتل النفس التي حرم الله الأ بالحق ...
مجرد رأي والله المستعان


ردود على عبدالماجد قنديل
United States [كركاب مطر بلا سحاب] 09-22-2013 05:14 PM
ثانيا وهــو طريق سهل على ( حمدان ) أن يطلق لحيته ويلبس حلباب ناصع ( حتى لو قام بأستلافه من غسال والله مكوجي بالأيجار ومعاهو الشال اياه ويكون مطبلا ومن الهييفة ( هي لله هي لله ) وبلاشك سوف تحل أموره على المستوي الشخصي ,,,
أنا فى رأى دى فكرة مابتنجح وأشرح ليك ليه
اليهود الأصل موزعين حسب درجاتهم:
***- يهود أشكناز وديل يهود أوربا الغربية وتحديدا ألمانيا وديل طبعا أولاد المصاريين البيض...
2-
***- ويهود سفارد.. وديل يهود أوربا الشرقية...
3-
***- يهود مرزاحيون.. وديل العرب الشرقيين وطبعن ديل درجة تالتة ولا رابعة...
4-
***- ويجى بعدهم الفلاشا
وكذلك يا جماعة ناس بنى قريظة حقننا
عندهم برضو نفس التصنيفات...
**************************
(أ)-
***- ناس تقال.. زى الأشكناز وديل طبعن ناس وش الغراب وأبو العفين ..وهكذا..

(ب)-
***- وناس اللمبى و الطفل المعجزة أبوجضيمات ديل سفارد.. ساكت ..

(ج)-
***- وهكذا التصنيف ماشى بالتدرج لغاية ما يصل لناس دقن دعونى أعيش.. وديل طبعا فلاشا ساكت
ديل طبعا ناس الجلابية البتقول عليها دى ودقن دعونى أعيش يعنى زولنا حمدان ده ما بدوهوا فرصة حتى لو بيموت عديل ما عنده حل غير يمشى للأستاذ جبرا يظبط ليه حساباته دى..
الحل التانى أن يوزع منشورات يتستنفر بها النايمين ديل عشان يطيروا الجماعة ديل زى طيرة ناس مرسى


#771563 [غايتو]
0.00/5 (0 صوت)

09-21-2013 03:10 PM
يستحسن اجابة من السيد الرئيس ووزير المالية / وغالبا الاجابة أسرة حمدان من ال500ألف أسرة المدعومة وليخصم الدعم ويجيبنا السيد الرئيس ووزير ماليته حفظهما الله .
غايتو الله كريم


#771544 [الحردان]
0.00/5 (0 صوت)

09-21-2013 02:43 PM
ب - نعم هناك نصيحة بسيطة وسريعة لحمدان ... بدل التلتلة دي يشوف ليهو اقرب صينية من بيتو ويرابط فيها ... من ستة لستة بجيب الفرق


#771529 [زول نصيحه ساااااااااكت]
0.00/5 (0 صوت)

09-21-2013 02:25 PM
الحل الوحيد لعمنا حمدان وابنائة ان يموتو موت الضان ويعلنو علي اسباب موتهم الكتمان


#771519 [ابو الهول]
1.00/5 (1 صوت)

09-21-2013 02:17 PM
عزيزي الفاتح بن جبرا
قمت بادخال هذه الاسئلة في جهاز الحاسوب ووجهت بعض الاسئلة اعلاه للعم قوقل .....حتى الآن لم يأتي رد ...ولكن هنالك صوت نحيب مكتوم ...
مش عارف ليه ....؟؟؟
تفتكر مالو ؟؟؟


ردود على ابو الهول
United States [شوق] 09-22-2013 10:48 AM
هههههههههههههههه


#771517 [سامي البارودي]
0.00/5 (0 صوت)

09-21-2013 02:15 PM
إذا نديت اهل القبور لردو عليك يا استاذ الفاتح ولكن في ظل حكم هؤلاء إذا إستمررت تلك الواوااات إلي أت تتواءواااااااا لن تجد من ينتبه إليها او من يسأل عنها لان بالمختصر حاميها حراااميها بمثل مايحدث في قضية الاقطان نجد التماسيح غد نفدت منها وتعلقت الاسماك الصغيرة بالشباك وكذلك قضية الاوقاف
وأما قصة رفع الدعم فحتما سوف تعود السرقات والنهب المسلاح إلي داخل العاصمة لان حينها إذا اردت ان تعيش فعليك ان تفعل كل شيء من اجل سد فجوت الجوع


#771511 [ward]
5.00/5 (1 صوت)

09-21-2013 02:11 PM
يااستاذ انت سمعت بالبيتزا والهوت دوغ متين قبل الانقاذ والا بعد الانقاذ
وبعدين حساباتك دى وين حق البتزا والدوغ هوت


#771509 [ود الفاضل]
3.00/5 (2 صوت)

09-21-2013 02:10 PM
هذا المقال يعتبر تلخيص شامل لكل معاناة البلد المنكوب بنظامها ووزير ماليتها راعي البقر . هذا المقال مفروض يطبع على ورق مقاس اي ثري وببونط مقاس 72 ويعلق فى كل موافق المواصلات وابواب المصالح الحكومية والشوارع الرئسية فى جميع انحاء السودان ويكتب فى اعلاه هكذا يعيش المواطن السوداني خارج نطاق الحزب الحاكم . فكل مواطن ليس له علاقة بالجماعة هكذا حاله تماما سواء كان موظفا او تاجرا فالكل يستوي فى هذا البؤس والعناء ومن يقل غير ذلك فهو من القطيع الحاكم ...


#771461 [الماعاجبو العجب ولا....]
0.00/5 (0 صوت)

09-21-2013 01:25 PM
هو دة حمدان ...داك القالو ليهو (قوم جيب شــــــــاى!!)


#771457 [ابوايمن الحلاوى]
0.00/5 (0 صوت)

09-21-2013 01:23 PM
ومازلت تبحر فى عالم الحقائق المثبته بالقرائن والادله الدامغه!! لكن ياود جبره نعمل شنو ؟؟ كلامك فى محله وكلو عين العقل والصواب.. منك نعرف الكثير عن الحقائق ؛ وحتى الرئيس بشه يتلذذ بما تكتب وطبعا يوم اكون عمود ود جبره مافى بالضبط زى عمود الحلاقه بدون موس !! وعليه احسن حاجه تعملها وانت واثق بالعشره فى ما تكتب وتقول ان تجهر بالقول امام الملآ وتجيب مكرفون البشتغل بالبطاريه وتركب بوكس كشف وتقرأ ما كتبت !! وحاجه ثانيه طالما كلامك رزين ومدعوم بالادله ليه ما تعمل ندوات زى مسرح على الهواء وقطع شك ح تلقى الملايين يهتفوا جبره جبره وبالعكس وبعدين يتم تشكيل حكومه جديده برئاسة القائد الاممى صاحب الكسرات وخط جبره القصر قول امين!!!


#771446 [ابوزول]
0.00/5 (0 صوت)

09-21-2013 01:08 PM
دي والله أنشتاين ما يحلها ......بس أنا سمعت انو في واحد عبقرية خالص وفلتت زمانه ......اسمه علي محمود أظنه في السودان .....كدي حاولوا يمكن يحلها ليك


#771445 [عود العشر]
0.00/5 (0 صوت)

09-21-2013 01:08 PM
يا جبرة دى ذى ساقية حجا ومسمار جحا, يحلى الشربكة, يا ترى كم واحد من الشعب السودانى ذى البطل حمدان, على ما اظن اكثر من 50%, الشااااار ع الشااااارع بس


#771422 [hascomdani1]
5.00/5 (5 صوت)

09-21-2013 12:40 PM
انت تعرف انا جد حاسد حمدان ده هو في نعمه كبيره جدا لانو عندو وظيفة ومرتب وكمان بشغل راسو في حسابات ودخل ومنصرفات وديون دي حياة في ناس كتار عندهم مؤاهلات ما بحلموبيها , النصيحه البقدمها لي حمدان انو تحمد ربك في كل مقام وعندي ليهو سؤعال: هل اكلت بيتزا قبل او بعد الانقاض (الانقاذ)وفي اي عهد وزير ماليه؟


#771419 [نادر]
0.00/5 (0 صوت)

09-21-2013 12:39 PM
اولاد حمدان مع احترامى الشديد بجيبوا مصروفهم بطريقتهم .... نزلته اجازه وشفته بعينى.


#771415 [mohammad saad]
0.00/5 (0 صوت)

09-21-2013 12:38 PM
التحية للاستاذ جبرة
بما انك لم تشر من بعيد او قريب لبند خاص بالحلاقة وكدة فان الاخ حمدان مرشح لان يكون من اصحاب اللحى وهذا بالحري يقربه قليلا من الحسبة يعني ي امل لو علاقتو كويسة مع لجان الجماعة في الحر والمسجد وبوفر شوية من الجلابية وحريف في المراوغة في امل ان يقبلوه وكدة يكون اتفتح ليهو باب ركز (ما جبنا سيرة حرااااااااااام والا حلال) في الحالة دي نسميهو حرامي بحصانةوالا كمان يشوف الخيار الثاني ويبقى حرامي بدون حصانة ويشيل شيلتو!!!!!!!!!


#771407 [محمود ودالشرق]
0.00/5 (0 صوت)

09-21-2013 12:31 PM
والله يااستاذجبره ده حال اهلنا فى السودان .ولكن انا اقول هذا الشعب المعلم سينهض من هذه الكبوة ويرمى بالشرزمه الحاكمه فى مزبله التاريخ وانا ثقتى كبيره فى اهلى الغبش


#771404 [hajabbakar]
5.00/5 (1 صوت)

09-21-2013 12:29 PM
حمدان الدى كان يحمل قدح المونة صار الان يركب الطائرة الميمونة
حمدان الدى يسكن الحارات تحول بقضل ربه الى الشاهقات المجاورات
وبدل الفول والطعمية تحول الى الهوت دوق والبيتزاوعالم الرفاهية
وخليك انت فى كسراتك واستفراشاتك وياحمدان قوم جيب شاى


#771401 [ياسر عبد الوهاب]
5.00/5 (1 صوت)

09-21-2013 12:28 PM
احسن حل لحالة حمدان انو يستعين بالله ويركب هو واسرته سودان ايرويز وينزل في مطار هيثرو - لندن- وهناك يطلب لجؤ له ولاسرته..........



طبعا ده بعد ما الريس يامر بالتحقيق ويحاكموا الجماعة السرقوا الخط وباعوه ويسجنوعم او يعدموهم او يقطعوا ارجلهم واياديهم من خلاف واهم حاجه يرجعوا منهم كل الفلوس السحبوها..وكدي مشكلة حمدان تكون اتحلت..واعتقد دي اسرع طريقة...بس انت واصل يا جبرة حمدان املو فيك كبير..


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة