مستجدي النعمة !!!
09-22-2013 03:28 PM


اهلنا الكبار البسطاء معروفين بالجود والكرم من يومهم ، ورغم قلة تعليمهم ،لكن فهمهم وحكمتهم توزن بلد بحاله! ومن حكم اهلنا المقولة المعروفة ( مستجد النعمة ضايق )
مستجد النعمة دائما ما يكون في حالة شرفة للأكل ، ومخلوع من اي نعمة وعينه مستحيل تقنع ولا تشبع ،وحا يفضل في حاله إلى ما شاء الله مهما شاف من نعيم الدنيا الزائل !!!
تنطبق تماما تلك المقولة على حكام الغفلة اصحاب الأفق الضيق والفهم القصير ! فعلا مستجدين نعم ومخلوعين من يومهم، وتفكيرهم فقط ينحصر في ملء الكروش اجاركم الله!
سياستهم منحصرة في زاوية الأكل والشراب وطلق الكلام على عواهنه! لا أدب لا ذوق ولا حكمة ولا دراية! اما الدبلوماسية بعيدين منها بعد السماء للأرض!
جل تفكيرهم منحصر حسب سياستهم السرقوا بها الحكم ، مفتكرين الشعب زيهم همو بطنو وعينو طائرة
مفتكرين الشعب شحات زي ما وصفه ممثلهم مصطفى إسماعيل! صدقوا اهلنا لما قالوا في المثل
( الفيك بدربوا ) الشحدة هم البدوها وللأسف بإسم البلد الكان يسمى في يوم ما سلة الغذاء العالمي! البلد المعروف اهله بالكرم والشهامة، وطول عمرهم محافظين على الأخلاق والمثل العالية.
حينما يصرح رئيس دولة ويتهم شعبه بالجوع و الجهل لعدم معرفته لنوع من الأكلات الخلعتو هو ورفاقته ! يبقى ده الجهل المؤسس وده يؤكد إنه العالم دي جات مخلوعة ومهلوعة لكثير من توافه الدنيا الزائلة!!
( الهوت دوق ) اكل المتقشفين في بلاد الغرب لو خلعكم إنتو ! ما بخلع اولاد الكادحين العينهم ملانة وملانين يقين ، وبالقليلة راضين ومقتنعين!!
اما إنتو لو بنوا ليكم مصانع من البيتزا والهوت دوق برضو حاتفضلوا ناشفين ومخلوعين وعينكم حتى التراب ما بملاها!!!
الإنجازات الإنت متفوجج بيها ياسيادة الرئيس من اكلات هايفة لا تسمن ولا تغني من جوع لو مصدق إنت الجبتها في زمنك للسودان تبقى غلطان ! لأنه البلد لما كان بي خيره إنتو مجهولين الهوية ولا معروفين حتى لي روحكم إنتو مين ولا دايرين إيه؟ !صدق الراحل المقيم الأديب الأريب الطيب صالح حين قال من أين اتوا هؤلاء ؟؟؟؟
جيتو نشفتوا البلد من خيراتها النزلتوا عليها زي الغضب من السماء! قضيتوا على الأخضر واليابس
نوع اكلاتكم الهايفة الفرحانين بيها وبتعيروا بيها الشعب البسيط ! لا هي بتشفى مريض ولا بتسد رمق اطفال المهمشين في الفيافي البعيدة !!
بعد ربع قرن من الزمان وبدون خجلة رافعين شعاراتكم المخجلة امام العالم ، بدل تتكلموا عن طفرات التعليم والعلاج في البلد والتقدم الحضاري تجوا مهروليين إنت و اتباعك تعيروا المواطنين بي ( بيتزا وهوت دوق ) ؟؟؟؟ تعير شعبك بالأكل ؟ وإنت الجوعت البلد ونشفت إقتصادها ؟؟
خلاااااص ده إنجازكم الحضاري ؟ ما قلتوا إسلاميين وما بتقتدوا بالغرب! الأكلات المفرحاكم دي اكلات خواجات وما بتشبه ناس هي لله لا للسطلة ولا للجاه !!
لعلمكم ولي زمانكم اعرفوا إنه اكلاتنا السودانية البسيطة اغنى غذائيا بكثير من اكلاتكم الطايرين بيها السماء !
(عيشنا الفتريتة وملاح النعيمية والتقلية وقراريص حبوباتنا ) ربت اجيال واجيال ورجال يسدوا عين الشمس
جيتوا إنتوا والحمد لله اكلاتكم دي ما اكلوها اولاد الناس الكادحين ،،، اكلتوها براكم وإتخلعتوا بيها, كان لي الهوت دوق ، باقيلي بلعتوه مسايف عشان كدي برق عويناتكم و دفاعكم بقى بالنظر!!
والبيتزا الهشة اكلتوها واكلوها شفعكم وطلعتوا جيل ( ميكي المسحسح وممسح مبرووك عليكم ياهم اولادكم وياكم ابواتهم !! ومبروك عليكم نتاجكم الغير مشرف !! بعد 24 سنة طلع حصادكم ونتاجكم الفكري والسياسي منحصر في ملء البطون من بيتزا وهوت دوق نتاج مثبت وموثق بتصريح من رئيس دولة و وزيره ! وما خفي اعظم !!!!!!
اما ابناء الكادحين يحمدوا سيدهم من يومهم عينهم ملانة وشابين رجال مقتدين بجيل الجدود والحبوبات ناس حرم اتفضل وبالقليلة يكرموك ويضبحوا ليك بهيمة عشاء اولادهم ، متوكلين على الرازق الواحد الأحد ،، و مقتنعين إنه ده الواجب كرم الضيف وفي عز العتامير والصيف، نارهم للقريب والغريب مرفوع شعارها حبابك البيت بيتك وبالقليلة مستورة ،، ده ياهو طبعنا السوداني الكرموا معروف للبعيد والداني.....

متاوقة
عليكم الله منو الشذاذ آفاق ؟ حكمتو بااااالغة أي إساءة طلعت من اي كوز للشعب البسيط وكادح ،، مفصلة عليهم هم بالكربون جلابية و عمة وشال!! حسبي الله ونعم الوكيل ،،، يمهل ولا يهمل
أسماء الجنيد


[email protected]


تعليقات 15 | إهداء 2 | زيارات 4800

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#773514 [ناجي]
4.15/5 (9 صوت)

09-23-2013 06:11 PM
مقالك ده زكرني نكته

يقال ان هناك كوز حرامي كبير وما عنده اي نشاط اقتصادي غير هي لله هي لله والله اكبر خلف البشير والسرقة والسمسرة ومتزوج من كوزة متخلفة مثله ولديهم ابن وحيد طبعاً طبيعي انتاج كيزاني يكون متخلف

فكروا يامنوا مستقبل الابن وسافروا مع الولد لاروبا لشراء مصنع لصناعة اللحوم واستقر الامر بالوالدين على شراء مصنع ضخم لصناعة السجق (الهوت دوق) واصبح الاب يشرح للابن كيف يعمل المصنع ، وقال له شايف ياولدي ده مصنع ما عايز اي تعب او فهم تدخل الخروف من هنا وتخرج ليك بهناك سجق فنظر الابن لابيه وقال له انا عايز ادخل الهوت دق من هنا ويطلع لي خروف من هناك ،،، نظر الاب للابن مغتاظاً وقال له والله يا ولدي في الدنيا دي كان في مصنع واحد بالمواصفات دي عملناه انا وامك واثبت فشله لانه بنتج خرفان متخلفة مثلك

وتم استيراد مصنع (الهوت دوغ) الذي يفتخر به البشير واصبح من اعظم انجازات الانقاذ ،،، على الشعب السوداني أن يحمد ربه بانه لم يتم استيراد مصنع بمواصفات الابن والا كان معظم اهل السودان من الخرفان الكيزانية المتخلفة


#773170 [ahmed khaleel]
4.17/5 (10 صوت)

09-23-2013 12:24 PM
احسنت يا اسماء لقد اجدتى
وصف هؤلائى الاقزام


#773034 [تاي الله]
4.10/5 (6 صوت)

09-23-2013 09:57 AM
احييك والله ماقلت الا الصاح تسلمي يابت الجنيد


#772878 [الضهبان]
4.18/5 (12 صوت)

09-23-2013 03:02 AM
مسعولين من الخير .. الهوت دوق الاتسمينا بيه ده يطلع خضار و لا فاكهة ولا باسطة و لا لحم كلب حلال ؟؟؟؟؟


#772767 [mustafa]
4.14/5 (9 صوت)

09-22-2013 10:03 PM
والله شفيتى غليلى يابنتى الله يديك العافية


#772761 [محمد معروف]
4.11/5 (12 صوت)

09-22-2013 09:51 PM
بنيه الوعى البتزوى :

حينما تكون بنية وعيك بيتزوية تكون البتيزا اكثر الهموم التى تؤرق كيانك وتهيج معدتك
فتسعى للحصول عليها بمختلف الطرق وتعتلى السياسة وتطلق العنان لكل ما تجود به قرائحك ،، فالطريق الى البتزا ليس بالامر السهل خاصة حينما تكون فى دولة لم يحظى شعبها بالسماع بالبيتزا .

اصحاب بنيه الوعى البتزوى ،، ميالون دائما للفت الانتباهه وتعابيرهم دائما تستدعى التوقف ،،، فهم موغلون فى العبط مُصرون على ان تكون كلماتهم وتصريحاتهم معبرة عما يختلج فى نفوسهم وتتحسسه امعائهم المشتاقة لما تتهافت اليه منذ سنوات ما قبل الابراج العالية والنساء المتضاعفات عددا.


#772749 [عوض الجيد حامد]
4.18/5 (10 صوت)

09-22-2013 09:41 PM
الغريبه ومن جهل الجماعه الزباله ديل انه الهونت دونق ده من اوسخ انواع الاطعمه وبالذات المعمول في المصانع ومكوناته من بقايا البهائم من شلاليف ورئه وخصاوي مفرومه زي حقت المخصي رئيسنا الكل تلاته يوم جاي يفك لينا اوساخه وقذارته ... الرئيس ده ياعالم زول جلف خلاص وبياكل بطريقه مقرفه خلاص لاتمت لادب الطعام بصله ... معقوله ياجماعه كفايه قلة حياء .

ويا زباله طال ما نحن ساكتين لينا 25 سنه وما قلنا حاجه ماتخلونا في حالنا وامشوا انتو واولادكم اكلوا العاوزنه ان شاء الله تتسمموا.


#772723 [سودانى اطلاقا ما منفرج الأسارير]
4.16/5 (7 صوت)

09-22-2013 08:50 PM
يا بت الجنيد انت "مستغرشه" ليه!! الأندهاشه ب "الهوت دوقز" والزلعه بالبيتزا سلوك طبيعى لمن وافق و قبل لنفسو يسافر بالدس جوّا طياره مستأجره كابتنها اجنبى منعوه من الكشف عن حقيقة انو شايل معاه (زى البضاعه المهرّبه) رئيس دوله هارب من العداله قلبو مقطوع خايف من القبض عليه ... الا بعدما رجعوه بدربو ودخل ألأجواء السودانيه .. هل تفتكرى سواق الطياره الباكستانى دا ما "طرشت اضانو" قصة كبة الزوغه من ابوجا؟ الرؤساء اللى حضروا مرتمر ابوجا والقوا خطاباتم وورجعوا ديارهم مكرمين معززين وغاب " " عن الجلسات وما القى خطاب السودان قالوا شنو عن "اسد افريقيا" الكب الزوغه.. ويكونو (وعلى وجه الخصوص خادم الحرمين الشريفين) قالو شنو لما سمعو انو "الزول ذات نفسو" راكبلو طياره "مأجّرا" وماشى يهنى رئيس دوله تانيه و بلدو غرقانه امطار وسيول !!! و"تيّب" لمن رجع ليه ما مشى يتفقّد المنكوبين فى الطياره ال "اولريدى مأجّرا" والوفات دولاراتا مدفوعه؟؟؟ وبرا خجله او وعى وعينو للبيوت عايمه وما فى اى شبر ناشف قال لسواق المروحيه انزل !!!


#772702 [الحارث]
4.11/5 (9 صوت)

09-22-2013 08:24 PM
الما شفتو فى بيت ابوك بيخلعك


#772700 [بابكر]
4.15/5 (11 صوت)

09-22-2013 08:22 PM
التحية لك وانت مفعمه بالاحساس بالوطن بالجياع والفقراء والمشردين


#772687 [Fato]
4.12/5 (8 صوت)

09-22-2013 08:10 PM
ياهو ده السودان العماده أولاد تهز وترز جيل أبناء المزارعين والعمال والشايلين الطوارى وراكزين للمحن وعينهم مليانة مورثين العفة والطهارة والشهامة مثل(شباب نفير)لا أكلوا بيتزا ولا دوغ هوت.وبناتهم بنات وارثة من الأمات والحبوبات الأدب والعفة والأخلاق ولا يقبلن الأهانة والتحقير (جيل بنت الجنيد وحليمة عبدالرحمن ولبنى وشمائل النور والكثيرات من بنات الرجال).أحييك أختى المناضلة أسماء الجنيد فليتهم يقرأوا كلامك هذا ليعرفوا أن السودان لا زال فيه موروثنا الجميل رغم محاولتهم التدجين.


#772649 [هوت دوق- نأكل مما نزرع]
4.16/5 (10 صوت)

09-22-2013 07:15 PM
كنا نتمني أن يسكتنا الرئيس الأعرج نحن معشر المعارضين بأن يقول علي سبيل المثال : كان ناتج الزراعة قبل الإنقاذ كذا واليوم صار كذا أي أفضل من الحكومات التي سبقتهم... لكن لا يستطيع أن يقول ذلك لأن نظامه ذو قوة تدميرية لكل شيء, دمر الزراعة والصناعة والتجارة والعلاقات الخارجية .... الخ.

لذلك شعار ( نأكل مما نزرع ) لا وجود له حلت مكانه الهوت دوق. فالرئيس يخجل أن يدعو السودانيين لأن يأكلوا مما يزرعون.


#772581 [فني لاسلكي بدرجة صحفي وخال رئاسي كمان]
4.14/5 (10 صوت)

09-22-2013 05:20 PM
نأكل مما نزرع..كلوا هنيا مريا انتاجنا من مزارع الهوت دوق وحواشات البيتزا بمشروع الجزيرة واراضي الزراعة الآلية بالدمازين الآمنة المستقرة


#772545 [ود الحفيان]
4.13/5 (10 صوت)

09-22-2013 04:30 PM
بت الكلس ؟،،،،عفيت منك


#772510 [abusami]
4.15/5 (8 صوت)

09-22-2013 04:10 PM
أصيلةوبت قبايل علمتي الرجرجة والمشحتفين ديل الأدب بارك الله فيكي كفيتي ووفيتي


أسماء الجنيد
أسماء الجنيد

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة