سلام مرّبع .. لبركان الغضب ..
09-26-2013 04:43 AM



***
بنت أم روبة ناحت وصوتها يندي كابة..
تستنهض سواعداً إنكسر نشابه..
قالت يا النمور راقدين رقاد التابه
وفئران الجحور خلت حصادنا خرابه
قرضوا العيش خلاص عدمو الورتابة
لا قطناً يتر ..لا صمغا تسيلبو هشابة
نهبوا مسورنا عيك ما تركوا لينا سرابه
يوم بقت الأمور في إيد لصوص وعصابة
لا شارعاً يثور..لا ضابطاً يسوق دبابه
كان راجين قبور الماضي يحيا عقابا
داب سرب القبور زاد في سمانا سحابه
يا أهل الهمم ..مالها البلد منسية..
سبتوها ليه عند الجماعة سبية..
شقو صديرها شق مصو اللبينة النية..
وين ضا ع المراح وقرعتنا ديك متكية..
بلدنا القبيل اللينا ...بالعز طابت...
طردت كم شباب.. في الغربة كبرت شابت..
لا خلوها تكسب .. من شقاها وجابت..
لا قدرت تعود لى المن جناها انصابت..
البلد إنسرق بالدين وبالفساد عابت..
قام قدل القرد يوم الأسود غابت..
إنجلدو البنات وكت القيم خابت..
إنقاذ السجم .. شوف لينا شن جابت...
مجلس النواب ..بومة وسكونا خراب..
لاعدلوا العوج .. لا زالو عنه تراب..
كبوات الفساد ديل زادو فوقا نصاب..
حانين الروؤس ومن قال بغم كضاب...
سيف العزة نام جوه الجفير ومصدي..
بعد..ما صال زمان مصقول جسارة ينّدى..
قال وينو الضراع الكان بهز بى حدي..
زى ضل الصقر يلفح عدوه معدي..
هملت بلدنا خلاص.. حكموها بالقبلية..
إنقسم التراب .. والأمة جد ملهية
يا بت الأسود النترو. في المهدية..
حكموك بالزناد ..كيزان سواد النية..
دقوك بالنفاق وسموها إسلامية ..
تتراجل ..علينا وساكاك حريم لاهاى..
راح ليك الدرب..في الجو وجابك جاى..
جيت لاوي الضنب يامأجر البوباى..
سودت الجبين ..الكان زمان ضواى..
المرق القديم ..ما بيمسك عروش البيت..
الهيم كان قرح .. يلزم نزيده فليت..
الحطب العفن ما بتبقى ريحتو كليت..
يالورقك حرق ..مو كان مشيت أو جيت..
الليلة الكديس..عرف الدرب والطاقة..
حليل المشلعيب والإيد قبيل لحاقة..
فلقتنا المهانة ..فوق راسنا سوت عاقة..
في بلاد الرجال وغربة شتات فرتاقة..
ما ذلوها شان تسكت جزيرة العزة..
حرم بالملود نجز كروشم جزة..
مين قال الجبل من الجراد بنهزة..
حت قالو الزبير الوالي فنجط وفزه..
لهيبك يا البتول ولع و إشتعل ..
وداك الغبار من غضبة الشارع عكل..
يا نفاق الدقون الفينا ميّل ..وإنتكل ..
إنكشف الكضب .. الليلة شوف ليك حل..
جرح السنين..لابدا بالكي تبرأ..
ويا شعبي الأمين أطلق حريق العبرة..
لى متين السكوت ..إنت الملكت الخبرة..
خلى الذل يفوت خلف الدخان والغبرة..
العود كان مسوس مصيره واقع واقع..
والدفرة البترمي الليلة صبحت واقع ..
الفيل ما بيهاجم لو طعنه ما صار واجع..
والسيل البشيل حتماً تسبقه صواقع....
ديل ما هن صقور وكترة البتابت عيب..
هم ضبان كنيف قدوا البطون والجيب ..
خلو الرجال تتذلل للكسرة تسعى تجيب..
وغزلان الخدور تمرق تداني العيب..
صبرك بزيد على البحكموك بالشدة..
من سفاح عنيد ..حاكى ديك العدة..
للمطلوب طريد وفات الملوك في المدة..
بس وكتين تهيج ..بتهد حصونهم هدة..
زى سيل الضراع الماص عكارته ..وعدى..
الضل الكبير الفاض أمان وسكينه..
ا خلوه انقسم..وفرّق أكول وسكينه..
أجنحة الغراب ..من ختفت السكينه..
هيجت الفتن .. البات صعيب تسكينه.
قطعتو السلك..قايلين الحكاية بتهدأ..
خايفين من يزيد حريق مقر أمبدة..
أخوان البنات السدو الشوارع سدة..
خاتيين النكوص ..وما بعرفو درب الصدة..
الضرس القبيل ..عاض الضراع .. وتناهو ..
ما قايلين ملخلخ والسوسة جت هالكاهو..
الفيل الصبور الليلة فكه جناهو ..
قال حالف يجيب ..تار عضتو الماذياهو
أهلنا القبيل صامو الستوت ورجب..
ما سرقوا البلد وفي دينا سوا عجب
مخافة الإله.. غمرت قلوبهم تب..
ما بخافو السخام ..مهما تعالى حجب..
..
عزيمة الشباب ..كسرت عيون القادة..
اللابدين هناك..الساسة والعاملين سادة..
ما يجونا باكر ويقولو نحن أسيادا..
من غفلة زمان ..خلينا ديك العادة..
التهب الكضب زى دودة الزايدة..
وجراحنا القدير أب همتن رايدة
قال شيلو الألم الما بجيب فايدة..
والعرجاء بتلم تجي للمراح عايدة..
الرماد..كان بقت الرجالة خشم بيوت..
يتخذل الشباب...والثورة تاني تمت..
ينبسط الظلم ويحلف يقول مابفوت..
يخمج في دمانا ..لامن تفور شاربوت ..
***

[email protected]


تعليقات 2 | إهداء 1 | زيارات 1695

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#778637 [اسامه التكينه]
0.00/5 (0 صوت)

09-26-2013 05:36 PM
لك التحية والاحترام استاذنا برقاوي
والله كلام يحرك الحجر
افتقدنا امثالكم في الميدان بشدة
المحترفين اصبحوا زي سكين الراجل بتاع الرباطة
لك الله يا بلدي


#777536 [نافع الما نافع]
0.00/5 (0 صوت)

09-26-2013 08:49 AM
ياناس الولايات اطلعوا
خففوا الضغط عل الخرطوم خلو الحكومة تشتت افكارها وقواتها
لازم تعاون من كل الشرفاء في الولايات
لازم الناس تتطلع الشارع كل يوم كل حارة كل حلة
دماء الشهداء ما تضيعوها
اهالي الشهداء ما حا يرتاحوا الابعد ما تاخدوا ليهم بتار ابنائهم


محمد عبد الله برقاوي
محمد عبد الله برقاوي

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة