المقالات
السياسة
ديل ما مجرمين ...
ديل ما مجرمين ...
10-01-2013 05:50 AM


ديل شباب عاشقين للتراب ما مخربين ..
ديل نوارة البلد ما هم مجرمين
ديل الحاسين بالألم الدفين ...
ديل كيف يكونوا هم حرامية وسارقين ؟ ..
ديل عاوزين حرية وعدالة ..ونور بيسطع ينوِّر للغارمين .. ..
ديل نسيمنا البِهب وكتين شمس الهجير تلفح للكادحين..
ديل البِقشُّوا عرقنا لمَّن يسيل من كيد الظالمين ..
ديل البدونا احساس با لأمل لمَّن يحتار دليلنا وما نعرف شمالنا من اليمين ..
ليه تقول ديل مجرمين ؟...
ديل جيل شرف ومحبة وكمان عاشقين..
ديل بيحلموا إنه نكون زي باقي الأمم وما نفضل متخلفين..
ديل بْتحدوا الظروف ويحاولوا يشتلوا زهرة حب عبقها يفوح للعالمين ...
ديل عز وديل شرف .. وديل هم العارفين ...
وبرضو تقول مجرمين ؟؟؟
ولَّا كمان مخربين ؟؟؟
يا ناس خافوا ربكم الرافعين شعار اسلامه .... وانتو المجرمين.
لأنه رفْع الشعار لمَّن يخالف الواقع .. يبقى هو الاجرام يا مجرمين..
لأنهم هم ما مجرمين ....
ديل شباب زي الورد والياسمين ...
ديل فخرنا وعز أجدادنا الأولين ..
ديل وقودنا .وقلبنا البنبض بالعز والحنين ..وبرضه تقول مجرمين ؟؟؟
يمكن يكون زبانية نظامك عاشقين للدم البجري من الوتين ...
ويتلذذوا كمان لمَّن يزلٌّوا أولاد البلد الأصيلين ؟؟
لأنهم فاقدين للأدب الرصين ...
ديل تربية جوع ورافعين كمان شعار الدين ...
دينَّا السمح ماهو سلعة عشان تتباع في سوق النخاسة لأنه جايبه أشرف المرسلين ...
الدين براء من هؤلاء لأنه الدين شرف وعز .. وكمان يقين .
ديل ما عندهم غير النهب وحب النفس وحرمان الآخرين..
شبابنا نحن ما مجرمين ..ديل زي الورد والياسمين .
ديل طاهرين ومخلصين ..وعاشقين ترابهم الدنسوه تجار الدين ..
عشان هم الحرامية والمجرمين..
هم الفسدوا وسرقوا عرق الكادحين ..
هم النشَّفوا الزراعة...وحرقوا السواقي والميادين ..
باعوا الأراضي .. ونهبوا البنزين والجازولين ..
شيَّدوا العمارات وهبروا الدهب الجابوه الغلابة والكادحين ..
ويجوا يقولوا علمناكم أكل البتزا والآيسكريم؟ ..
ويمكن كمان يقولوا لقيناكم عرايا وبتاكلوا من الشجر زي انسان الغابة القديم..
لكن هم واهمين ... لأنهم هم المجرمين ..ولأنهم هم الظالمين.. والحرامية والسارقين... وأولادنا ما مجرمين ..
ديل عاوزين حرية وعدالة .. ولقمة شريفة .. وشربة مويه نظيفة تبل جوف الغلابة الكادحين ..
ديل الوهبوا الأرواح رخيصة عشان بلدنا تكون عزيزة ..لكن ما مجرمين ... ديل شرف وعز وتاريخ قديم ...و أصلا ................. ما ممكن يكونوا هم مجرمين ...

سبتمبر 2013


[email protected]


تعليقات 1 | إهداء 0 | زيارات 634

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#785819 [مدحت عروة]
0.00/5 (0 صوت)

10-01-2013 10:53 AM
وسكتوا عن احتلال حلايب والفشقة!!!!
ديل عار على الوطن!!!!!


د. مجدي علي
مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة