المقالات
السياسة
رسالة الي حكومة المشير عمر
رسالة الي حكومة المشير عمر
10-03-2013 06:22 AM


وكتين ياحكومة فرطي في المحتجين !! عليك النبي أحرسي لينا المعتقلين ما يجو "القلتي" قناصة ومجهولين يصطادوهن داخل معتقلاتك
والله مقدرين ظروفك وعارفنك "عضيرة"
ويافصيح إن إبتليت بالبلاء ما تصيح
أها قبال دا وقفنا معاك
ريحناك من التعليم
ورقدناك قفا لا صحة لا علاج
المعيشة ترا الله متكفل بيـها
عدمتينا السارحة والمتراوحة
لا خليتي زراعة ولا رحمتي صناعة
وبدل تراجعي رقبتك وتشوفي أوجه صرفك
قبلتي علينا ونحن عدمانين أبو النوم
ماكان تشوفي الدستوريين بتاعنك ديل ؟؟
دحين ديل الاوبك بتقدر عليهن ؟؟
ومع دا دايرة ليك بندول للإقتصاد المعلول ؟؟
وعليك النبي من النظريات الاقتصادية دي كلها ..
ما لقيتي ليك نظرية غير رفع الدعم عن المحروقات ؟؟
ما لقيتي غير تحرقي دم الناس الغلابا الشايلين "شيلتك" ؟؟
ياخي كان مفروض تكوني عارفة بأنـون ما راح يسكتوا
وحا يحتجوا بعد ما لحقوا الحد
وفاتو ود اللحد لي غادي
الصور مالية الدنيا والدم مغطي الروؤس والصدور
وليدات وبنيات مرمين في الأرصفة يفطروا قلب العاصي
وبدل تعترفي بضربـهن وبالرصاص الحي كمان
قلتي ضربوهن "قناصة ومجهولين"
يخسي عليك تكضبي وكمان بتصدقي كضبك ؟؟
طيب مالك ما حرستيهن وحميتي إحتجاجاتن ؟؟
لي شنو خليتهن ساي ؟؟
مش هن رعاياك يسمحوا ولا يكعبوا ؟؟
وإن كِعِبوا كيف إنو بنضربو رصاص حي؟؟
طيب ما دام عندك من الادوات ما يدعوك لمعرفة القناصة المجهولين
كان تكلميهن يضربو في الهوا وعلى أسوأ الفروض في الكرعين
رصاص حي وكمان في الراس والصدور ؟؟
ودي ما مسئوليتك ومسئولية رئيسك الينطط زي قرض الطلح دا
ياخي المابتدوريهو ما تخافي الله فيهو
طبعاً ما عندك موية ترشيهن بيـها
كيف قناصة ومجهولين يعملوا العمل دا كلو وإنتي قاعدة ؟؟
ما تتحركي عشان تحرقي الدقون دي
ما خايفة يصيبك الكرسترول يغتس حجرك؟؟
عموماً البركة في رقبتنا وربنا يتغمدهن ويتولاهن ويصبر اهلهن
والحساب لي يومو بعد اللوم الكبرتي كومو
كدي خلينا في المعتقلين في حراساتك وزنازينك
إن شاء الله بياكلو هوت دوقز وبيرقر وبيتزا ؟؟
باقي الرئيس قال رقدن هبطرش ؟؟
وإن شاء الله بتسقوهن فانتا وسيفن أب ؟؟
معقول موية زرقا مع البتزا والبيرقر والهوت دوقز ؟؟
كان تكشفوا عن ظروفن في المعتقلات
وهل مأمننـهن كويس ؟؟
ولا خاتنهن في الحراسات برا حراسة ؟؟
أها ما دام فرطي في الماتو في الاحتجاجات
فأبقي عشرة على المعتقلين في الحراسات
ما يقوم "القناصة المجهولين ديل" يغدروا بيهن كمان
ويقومو يجو يلغوهن "لغة الكلاب"
كسرة :
لغة الكلاب دي ذكرتني قصة عماً لينا
اليوم داك مرتو "مشقتو" باللخوخة "كريم عجين"
ودخلت في الراكوبة مولعة حفرتا "توِح"
الزمن داك "شوك" سااااااي مافي طوب
الراجل راقد في الهبريب "هبوبك يارب العالمين"
ضربو الهوا
وغلبو النوى
وساقو الهوى
"والكريم نِشِف"
ناداها كم مرة وكانت بتقول ليهو جاية
هي ما جاية
قلت ليك جاية
إنت مستعجل مالك ؟؟
هنا زهج
عاين في جسمو الممشوق بالعجين والزيت قال ليها:
"يا ختي خائف يجي كلب يلغني "


تعليقات 1 | إهداء 0 | زيارات 756

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#788622 [الزول السمح]
0.00/5 (0 صوت)

10-03-2013 11:30 AM
وتفتكر الكلب ما جانا شدة ما جا بقي يضرع وسط البيت. ومش كده وبس انقلب مرفعين المرفعين بعد ياكل ويشبع يقبل علي باقي المراح شقيق بطون وكسر رقاب. وده الحاصل من حكومتنا المستذئبة شبعوا وقبلوا علي الشعب المسكين البدور علي سترة الحالز بس ياها ضربني بكي سبقني اشتكي
طيب الحل شنو؟ سمعتوا بقصة عود العشر! كان وقفت انكسر وان قعدت انحشر:الله يصلح الحال. ولنا لقاء انشاءالله


المحبوب احمد الجراد
مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة