المقالات
السياسة
القصة الكاملة لإستشهاد بطل
القصة الكاملة لإستشهاد بطل
10-04-2013 02:45 AM

القصــة الكامــــلة لإستشهاد بطــــل ..!!
أخــــــر يوم في حياة البطل الشهيد صلاح السنهوري..!!

إحتجاجات سلمية تجوب الشوارع تعلن عن موقفها فتحكي معاناة شعب..وألام أمة طال صبرها ..!!
الحشود تتكاثر والتظاهرات تزداد سخونة ..بصوت واحد يهتفون..صوت ثوري جهور..يتقدمهم صـــلاح وصحبه.. نحن مرقنا مرقنا ضـــد الناس السرقـــوا عرقنا....!!
image

عندما وصولهم لتقاطع شارع المعرض..تصدي لهم جنود الشرطة المدججين بالذحيرة والأسلحة..!!
بكل عنف وقسوة أطلقت عليهم قوات الشرطة نيران ذخيرتها الحية ..في كل صوب وحدب لاحقتهم رصاصات الجنود والقنابل المسيلة للدموع..
الشاب عبد الرحمن إسماعيل شاهد العيان علي إستشهاد د. صلاح السنهوري بدأ متألماً وهو يقص علينا ماحدث من خلال فيديو تم تصويره وبث عبر الإنترنت..قال بحسرة وبلهجة دراجية تحكي وجع أمة وفجيعة جيل : هجمت علينا قوات جهاز الأمن بـــ(تاتتشرات) وضربوا فينا ذخيرة حية طوالي بصورة كثيفة جداً..إتقدمت علينا أربعة عربات بتضرب في النار لحدي ماوصلت التقاطع..نحن كنا أخر قروب والشهيد كان في الجزء الشمالي الشرقي من الشارع واتقدمت علينا واحدة من الـ(تاتشرات) بتاعت الجهاز نحن طوالي أديناها ضهرنا ومشينا للحلة جوة تاني بيت..الشهيد دخل ووقع طوالي المرة صرخت صرخة فزع مؤلمة إتلفت عليهو لقيتو مضروب والدم بيطلع من صدره بكُتل كُتل كدة..نزيف شديد..شرطت القميص وحاولت أثبت النزيف..في اللحظة ديك طوالي رفع أصبعه في وشي وقال : أشهد أن لا إله إلا الله وأشهد أن محمداً رسول الله..وماقال تاني كلمة..!!
الناس كلها بدت تجي : لا اله الا الله..لا اله الا الله..نحاول نسعفه..عربية..عربية..عربية..الوقت داك هو إتشهد قبيل ..ماإستني زول يلقنو الشهادة وماإستني زول يقول ليهو أخر كلمات..!!
طلعنا قولنا نوديهو بواحدة من العربات الضربتو دي..نودي بواحدة من عرباتهم دي المستشفي...ونحن طالعين لاقتنا تلات عربات من الـ(التاتشرات) و الضرب لسة شغال..بيضربوا في الناس ذخيرة كثيفة شديد..شايلينو نحن عشرة من الشباب..شايلين الشهيد ماشين بيهو ولسة مأملين نسعفو..صرخنا فيهم ياأخوانا ضربتوهو..ياأخوانا كتلتوهو..ياأخوانا ضربتوهو..ياأخوانا كتلتوهو..لسة هم في وضع الـ (الستانمباي) عاوزين يضربونا دايرين يرجعونا لسة..قايليننا بنهزر.. قايليننا بنمثل، لما إتأكدوا إنو إنضرب فعلاً التلاتة عربات الإستقبلتنا في الشارع دي من قوات الجهاز قفلتنا من بوراء لحدي لما دخلتنا التقاطع..وقفلونا دفارين شرطة وبوكسيين بتاعين شغب والستة (تاتشرات) الكانت يتضرب (أولريدي) ديك لسة قافلة الشارع من الجهة الجنوبية بقينا قي نص التقاطع بتاع سوق أربعة محاوطين تماماً من الأمن والشرطة وإتنين بكاسي من الـــ(الرباطة) واقفين هناك..!!
..اللحظة الإتأكدوا تماماً إنو هو إنضرب وكنا بنبكي ودايرين نركع ليهم عديل في الواطة ونصرخ : ياأخوانا عليكم الله أرفعوه في واحدة من عرباتكم دي ياأخوانا الزول دة بيموت..مافي زول إشتغل بينا إتأكدوا إنه مضروب وبرصاص, كلهم فاتوا خلوا لينا الشارع في أقل من نص دقيقة العشرين عربية دي مشت خلت لينا الشارع..!! جاء واحد بتاع ركشة قال : ياأخوانا أرفعوه أنا بودي ليكم ..!! بتاع عربية وراه قال : لا أرفعوه لي أنا هنا بودي ليكم..رفعناه يدينا مليانة من دمو وقميصنا..قميصي وقميص المعاي مليانة بدمو..الواد الكان شايلو العربية الـــ(التاتشر) بتاعت الأمن طلعت في كراعو كسرتا ليهو..!!
اللحظة الإتأكد فيها إنو إنضرب كلهم مرقوا جبناء..كلهم مرقوا فاتو الشارع..سيد العربية الأكسنت رفعو في العربية وإتحركنا كلنا علي المستشفي ولسة مأملين ننقذوا..!! مأملين نلقي فيهو باقي روح ..!! وصلتنا في المستشفي طوالي حاولو يسعفوهو ..النبض بتاعو ماكان بيستجيب..يجي ويمشي يجي ويمشي .. النبض كان ضعيف ما بيستجيب..!!
الرصاصة ضربتو من الخلف هشمت القلب والرئة وطلعت من الأمام ..إصابتو كانت بليغة شديد شديد..دي كانت أخر لحظاتو..!!
ربنا يتقبلو كشهيد..إن شاء الله نحن علي خطاهو ياإما نصر مجيد ياإما نكون شهيد جديد إن شاء الله مافي رجـــــوع..!!
حقيقــــــــة :
إن الشهيد إنسان ينتصر علي العدو في زمن الهزيمة والعجز ينتصر عليه بموته ويفضح العدو حينما لايستطيع دحره وهزيمته..ََ!!

جمـــال جــادو
[email protected]


تعليقات 3 | إهداء 0 | زيارات 2466

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#790277 [مدحت عروة]
0.00/5 (0 صوت)

10-04-2013 10:11 PM
بالله عليكم الله الناس الضربوا رصاص فى مظاهرة الشهيد صلاح سنهورى ديل سودانيين اولاد بلد؟؟؟؟؟
وتجى الحكومة وتكذب وتقول عكس ذلك؟؟؟؟؟
الرسول الكريم(ص) قال المسلم او المؤمن ممكن يعمل اى مصصية لكنه لا يكذب !!!!!!!!!!!!!
هل ناس الانقاذ ديل مسلمين؟؟؟؟؟؟
وهل دم اهل السودان رخيص لهذه الدرجة؟؟؟؟
يبدوا ان التظاهر السلمى لا يجدى نغعا مع هؤلاء الاوغاد السفلة!!!!!!
يقتلون الناس هكذا بدم بارد لانهم تظاهروا وسلميا؟؟؟؟؟؟؟؟
الانقاذ لابد من التنازل سلميا وتقبل المساءلة والمحاسبة كالرجال واذا هم بريئين ما بتجيهم عوجة واذا مذنبين يتحملوا مصيرهم كالرجال والا الحرب الاهلية والتدخل الاجنبى وتمزق وتشظى الوطن !!!!!!!!!!!
قال انقاذ قال!!!! انقاذ من ماذا؟؟؟؟؟؟؟


#789872 [ود بحـــــــري الأصـــلي]
0.00/5 (0 صوت)

10-04-2013 02:12 PM
إحتجاجات سلمية تجوب الشوارع تعلن عن موقفها فتحكي معاناة شعب..وألام أمة طال صبرها ..!!
الحشود تتكاثر والتظاهرات تزداد سخونة ..بصوت واحد يهتفون..صوت ثوري جهور..يتقدمهم صـــلاح وصحبه.. نحن مرقنا مرقنا ضـــد الناس السرقـــوا عرقنا....!!
عندما وصولهم لتقاطع شارع المعرض..تصدي لهم جنود الشرطة المدججين بالذحيرة والأسلحة..!!
بكل عنف وقسوة أطلقت عليهم قوات الشرطة نيران ذخيرتها الحية ..في كل صوب وحدب لاحقتهم رصاصات الجنود والقنابل المسيلة للدموع..!!
طيب مادام هي سلمية لييييه البونبان والذخيرة والرصاص ..؟ وليه الموت وقتل الابرياء ؟ هل ترضونها لاولادكم وبناتكم ؟ اكيد لا . لكل ظالم نهاية أقذر من عمايلو .. وليكم يوووووووم يا(انقـــــاذيين) أل إنقاذ أل ..
شكرأ أستاذ جمال جادو وهذا توثيق رائع لأهم أحداث التاريخ السوداني .
??????????????????????????????????????????????????!!!!!!!!!!!!!!??????????????????


#789581 [عمدة]
5.00/5 (1 صوت)

10-04-2013 06:20 AM
نم هانئا فى رحاب رب كريم لا يظلم عنده أحد. وسيظل القتلة فى خوف وجزع الى ما شاء ربك. وحتما سيكون هنالك قصاص. التحية لك ولكل الشهداء وأنتم تفدون شعبكم بأرواحكم الغالية. ستظل ذكراكم باقية عبر الأجيال. وسيذهب القتلة وتجار الدين الى الجحيم.


جمال جادو
مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة