المقالات
السياسة
الوطن قسمة ونصيب
الوطن قسمة ونصيب
10-23-2013 04:33 PM


أوعى تزعل يالحبيب
أصلو الوطن قسمة ونصيب
الليلة دارك ويا حبابك
وبكرة جوة الدار غريب
ما قرارك ... ولا إختيارك
لما تبقى الوحدة عيب
شيل ترابك جوة قلبك
بكرة يدخلوا في القليب
حتة حتة يقسّموهُ
في حشاك وبرضهُ سيب
شيلُهُ تاني جوة عينك
تلقى عينك فيك تغيب
و أوعى تزعل يالحبيب
أصلهُ الوطن قسمة ونصيب

***

والدرب الشال جدودك
كان بودي ... و ما بجيب
ولما تبقى العِزّة مافي
و الوطن محروق لهيب
و الخلاف في نفط مرة
و مرة في مرعى و حليب
والحرب في خوة مرة
و مرة في جاراً قريب
و البساوم في ترابهُ
و مافي خشمهُ إلا جِيْب
و الببيعك لعدوك
إنت و الطين للغريب
والوطن تايه مقسّم
يشكي لي الله المجيب
أوعى تزعل يالحبيب
أصلهُ الوطن قسمة ونصيب


***

خَلِّي تارك ضّيْ قَرَارَك
وفي عُرُوقكْ هو القَرِيْب
كُلْ حِبِيْبَة مِـنْ تُرَابـَك
تـَبـْقَى للأَرْوَاح طَبـِيْب
نَفْدِيكَ بِالرُوح الشِقَت
في غِيْر تُرَابَك مَا بْتَطِيْـب
عِشْنَاكَ في زَمَن الرَخَا
حَتْعِيْشْنَا في الزَمَن العَصِيْب

***
يا مسقي بي حب الوطن
ومروي من نيلهُ الحبيب
أصلهُ حبك ما سكن
ولا سكن فيهُ اللهيب
لو تلقى في عينيه كفن
يلقاك جوة العين مجيب
تفديهُ في جواك قسم
العِزّة باقية و ما بتغيب


عمر إسماعيل شمس الدين
@omarshms


تعليقات 1 | إهداء 0 | زيارات 944

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#809903 [بدون اسمم]
0.00/5 (0 صوت)

10-26-2013 02:45 AM
ادروب قال على ايام نميري العون الزاتي عرفناهو عون الشريف ده شنو ؟؟؟؟ العرس قسمه ونصيب عرفناهو الوطن قسمه ونصيب ده شنو؟؟؟؟


عمر إسماعيل شمس الدين
مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة