قال الرووووب
10-30-2013 07:22 PM

(تسريبات عن إتجاه الحكومة لزيادة أسعار الكهرباء) .. هذا الخبر جاء بالأمس بصحيفة الخرطوم (دي ذاااتا) وفي متن الخبر نقرأ بأن هنالك تسريبات تفيد عن إتجاه الحكومة (لرفع الدعم) عن الكهرباء إبتداء من موازنة العام المقبل 2014م وقد نسبت الصحيفة إلى الدكتور عباس على السيد قوله في مؤتمر صحفي نهاية الأسبوع الماضي إتجاه الحكومة لزيادة أسعار الكهرباء !
يعني الواحد لسه ما فاق من الحاصل ده والزيادات التي شملت كل السلع يقوموا كمان يزيدو ليهو الكهرباء ، العبدلله لا زال يتذكر (والقراء كمان) تلك التظاهرة الكبري و(الحناجر والحلاقيم الفخيمة) التي كانت تهتف عند إفتتاح سد مروي .. (السد السد .. الرد الرد) بإعتبار أن سد مروي يعتبر إنجازاً يعتبر رداً (بيان بالعمل) على كافة القوى الصهيونية والإمبريالية العالمية وكمان (الطابور الخامس) !
وعندها تباري المسؤولون على أرفع المستويات معددين فوائد هذا الإنجاز وإنعكاساته على حياة المواطن البسيط الذي سوف تتاح له الكهرباء وتحل له كافة مشكلات الإمداد الوفير الذي سوف يكفيه ويزيد بل أن بعضهم ذهب إلى أن ما يزيد عن (حاجة المواطن) سوف يتم تصديره لدول الجوار !
ولم يجن المواطن من (السد السد الرد الرد) شيئاً ولم تتأثر اسعار الكهرباء التي أصبحت فاتورتها تمثل عبئاً ثقيلاً للمواطن ، وهنا أخبره (المسؤولون) بأن الحل يكمن في تعلية خزان الرصيرص إذ أن ذلك من شأنه أن يساهم بصورة كبيره في زيادة إنتاج الكهرباء بالبلاد مما يجعل (أسعارها) معقوله !
وتم الإنتهاء من تعلية خزان الرصيرص وهتفت الحناجر والحلاقيم الفخيمة .. ونثر المسؤولون الوعود بعد أن رفعوا العصي عاليا وهم يهتزون مع (أنا ليهم بقول كلام .. دخلوها وصقيرا حام) .. ثم إنفض الجمع تاركاً المواطن يحلم بكهرباء يتناسب سعرها مع دخله (المهدود) !
وها هو المواطن اليوم يفيق من ذلك الحلم الوردي الجميل ليواجه الواقع (القبيح) الذي يفيد بأن كل ما قاله المسؤولون من وعود هو كلام والسلام وإن المثل البيقول (الراجل بيمسكوهو من لسانو) قد تغير في هذا العهد الوضيئ والمسؤول أصبح ما معروف يمسكوهو من وين !!
رفع أسعار الكهرباء يا سادة يا أفاضل يا كرام سوف يفاقم من الوضع الإقتصادي (الأصلن مافي) لكل الشرائح محدودة الدخل والتي أصبحت حياتها بعد القرارات الأخيرة جحيم (عديل كده) .. كما أن رفع أسعار الكهرباء سوف يكون بمثابة الضربة القاضية للصناعة المحلية التي تترنح منذ سنوات بسبب ما تعانيه من (عوائق) والتي سوف تلجأ لتحميل هذه الزيادة للمستهلك (المواطن) الما عارف يلاقيها من وين وللا من وين؟
العبدلله قد فاض به الإستغراش من (فعايل) هذه الحكومة (الغريبة والعجيبه) .. تقوم الحكومة بتشييد سد وتعلية آخر فيرتفع سعر الكهرباء .. تقوم الحكومة بإفتتاح مصانع السكر التي تقول بأنها الأكبر في أفريقيا والشرق الأوسط فيرتفع سعر السكر .. تقوم الحكومة بإكتشاف عدد من آبار البترول فترتفع أسعار مشتقاته .. تقوم الحكومة بتصدير مئات الأطنان من الذهب فيرتفع سعر الدولار (بالله مش حاجه تخلي الزول يستغرش فعلاً) ؟ …. يا جماعة الخير الرحمة حلوه .. المواطن والله قال الرووووب !!
كسرة :
المجد والخلود للشهداء الأبرار

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو)+و+و+و؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو)+و+و+و؟


تعليقات 38 | إهداء 0 | زيارات 10274

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#815214 [وجع راقد]
4.07/5 (5 صوت)

11-01-2013 10:53 AM
دا ما سد الخشوم ... الكبرت الجضوم
والمواطن حقو مهضوم... لكن القصة ما بتدوم


#815029 [الفاتح]
4.07/5 (5 صوت)

11-01-2013 02:01 AM
تقوم الحكومه بتشيد سد فترتفع العمارت للعاملين على السد
تقوم الحكومه بإفتتاح مصانع السكر فتمتليء جيوب محتكري السكر
تقوم الحكومه بإكتشاف البترول فتزداد أرصدت عوض الجاز وجماعته
تقومالحكومه بتصدير أطنان الذهب ويتسآل الشعب أين ذهب
لكم الله يا شعبنا الكريم الطيب


#814914 [الفاتح مقبول]
4.07/5 (5 صوت)

10-31-2013 10:06 PM
هناك لجنة تعمل فى اقرار هذه الزيادة
وقد ذكر مصدر موثوق ان تقدير انتاج
وادخال الكهرباء تكلف جالون ونصف بنزين
فى اليوم ..بعنى (30) جنيه يومياو(900)
جنيه شهريا ..


#814908 [julgam]
4.04/5 (7 صوت)

10-31-2013 09:52 PM
الله يخت محنك ياود جبرا.....الجماعه ديل يمسكوهم من وين؟ ديل يمسكوهم بعود بس ..يالله يا جماعه حضروا العيدان ...أقصد أعواد المشانق...


#814715 [عطبراوي آخر]
3.35/5 (6 صوت)

10-31-2013 05:32 PM
يا أستاذ الفاتح ، الله يديك الصحـة والعافية ، ياخي ديل مايهمهم الوطن ولا المواطن ديل همهم للأول والأخير ، عماراتهم وأستثماراتهم وفارهاتهم من السيارات وزوجاتهم من الحور العين الحسان ( حور الدنيا)
ديل ما تتعب روحك ساكت ماعاهم ديل بس نسأل الله أن ( يغطس حجرهــم اليوم قبل باكر ) قادر يا كريم وأخخخخخخخخخخخخخخخخخخخخخخخخخخخخخخخخخخخخخخ وآه يا وطـــــــــــــــــــــن


#814691 [أسدالنيل الصافي]
4.13/5 (6 صوت)

10-31-2013 05:02 PM
انت اساسا ما عارف السودان انتج شنو
وبتهيأليك المشاريع دي كلها فاشلة...
لو سمحت يا استاذ الفاتح.. عايزين ارقام..
* كم كيلو دهب انتجنا.. كلفتنا كم.. بعناها كم.. ربحنا كم؟؟؟؟

* كم برميل نفط انتجنا.. كلفتنا كم.. بعناها كم.. ربحنا كم؟؟؟

* كم طن سكر انتجنا.. كلفتنا كم.. بعناها كم.. ربحنا كم؟؟؟؟

* كم كيلو واط كهرباء انتجنا.. كلفتنا كم.. بعناها كم.. ربحنا كم؟؟؟

اتحداك تعرف عن عائدات الجمارك وعائدات الضرائب.. والمحليات.. ورسوم العبور... وعائدات الغرامات..

مش قلتليك انت بتكتب من غير حقايق..
يا استاذ احنا دولة فقيرة... ما عندنا سمك ولا لبن ولا موية ولا. ... يعني عايز الدولة تشحد..


طيب هي الدولة ح تشحد من منه.. دي ما عندها اصحاب ولا قرائب...

واولادها سابوها.. شي جنوب.. وشي ابيي.. حتى غازي سابها...

مش مسكينة.. لا يا استاذ حرام عليك... لازم تغير شوية مستوى تفكيرك.. ما مهم فوق تحت لكن غير الموجة... او اقول ليك خليك ساكت.. ماهي الحكومة كلها ساكتة.. خايفة تتكلم يقوموا يفصلوها. ..


#814523 [radona]
3.69/5 (5 صوت)

10-31-2013 02:02 PM
ده كلام معارضة ساكت
الحكومة لن تزيد اسعار الكهرباء ولا الدقيق ولا الماء ولا الهواء ولا حتى الصلصة
كفاية زيادة اسعار الوقود التي تاخذها بيد وتوزعها على فقراء السودان باليد الاخرى
ومثل هذه التصريحات من المعارضة بغرض اثارة البلبلة وتهيئ الشارع والمواطنين للتظاهر والحرق والسلب والنهب والاتلاف ولا اظن ان الحكومة من الغباء لتقدم على مثل هذه الخطوة والجرح لم يندمل بعد ومازال احتقان الزيادات السابقة نار تحت رماد وقد ندمت المعارضة والجبهة الثورية ومتمتردي دارفور لتفويتهم فرصة خروج الشعب ثائرا ضد الحكومة في سبتمبر ومع انها كانت سانحة على طبق من ذهب اهدتها الحكومة لمعارضيها لاسقاطها ولكن نبل المقاصد لتحسين الاقتصاد وتحقيق الرفاهية والرخاء للمواطنين اسقط نوايا المعارضة
ولكنهم ما يزالون ان تهديهم الحكومة فرصة اخرى لاسقاطها اطمئنوا لا زيادة في اسعار كهرباء ولا ماء ولا دقيق ولا صلصة ولا جرجير البته
العبوا غيرها


ردود على radona
United States [quickly] 10-31-2013 04:41 PM
وانت القاعد تتطمن في الناس كدا تطلع ميين انشالله ,,,,,,,,,وزير التموين؟؟!!!


#814412 [أنور النور عبدالرحمن]
3.82/5 (5 صوت)

10-31-2013 12:12 PM
كلمة الروووووووب بسيطة اي واحد مش قادر يفتح صدره للرصاص الغادر ومستعد الخروج للشارع وأن يموت شهيد يقول وااااااااااااااااااااااااااااااي وصدقني لو الناس سكتت بعد ده كلووووووووو حتقول واااااااااااااااااي وتموت .... المقاومة والشارع والاستشهاد أفضل.


#814375 [الكاهلية]
3.94/5 (5 صوت)

10-31-2013 11:43 AM
المواطن ده طالما ساكت ان شاء الله يركبوه حمار
شعب لا يستحق الاحترام
مذا ينتظر
خرج الطلاب والشباب وهم صامتين صمت القبور
ابدلهم الله الثبور


#814344 [ابومحمد]
2.25/5 (5 صوت)

10-31-2013 11:15 AM
عايرا وادوها سوط ,,,


#814313 [towawa]
3.94/5 (5 صوت)

10-31-2013 10:53 AM
الاستاذ جبرا سلامات
طبعا اكيد الشماااااار بتاع الريس عمر بنقو واعجابة الشديد بعمود الصحفية
فاطمة شااااااش بكون عندك فيهو راي. المهم سمعت ان عبد الرحيم ابوريالة قال للريس ياخى نمشي لفاطمة شااااااش ونخلي جبرا وكسراتو امكن الكلام دة يجيب لينا الهوا ىارىس .قام الحاج عمر الكضاب قال ليهو انا بموت واندفن في عمود شاااااااش وبحب كلام شاش وبحب اشرب شاااااش ومكجن جبرا وعمود جبرا وحالف طلاق لازم ابلعو ليهو ناشف
وكلمة اخيرة انا ماعاوز وداد تعرف الموضوع دة خالص


#814309 [AHMED]
2.35/5 (6 صوت)

10-31-2013 10:50 AM
هنالك تكنولوجيا جديدة لتوليد الكهرباء مصدرها (العيون)
تستخدم العين اليمين (قطب موجب) والشمال( قطب سالب)
لمزيد من المعلومات يمكنكم الدخول على موقع الانقاذ دوت كوم( inkaz.com)


#814301 [بدرالنهار]
3.94/5 (5 صوت)

10-31-2013 10:44 AM
عارف ياود جبرا ديل يمسكوهم من وين ويقطعوها ليهم من الراس اللي بخليهم يفكروا في مثني وثلاث ورباع عشان كل واحدة من ديل بمخصصتها من مسكن ومشرب ومركوب مش مركوب علي وش نافع ولكن مركوب العربات الفخيمة عشان دي لو أتوفرت ممكن حاجات كتيرة ماتحتاج للزيادات علي المواطن لكن نقول شنو للمتأسلمين اللي مابيفكروا إلا برؤؤس !!!!!! ومش بعقولهم .


#814286 [كوكو]
3.94/5 (5 صوت)

10-31-2013 10:35 AM
والله يا استاذ جبره...صدق الشاعر والمغني فعلاً من 1989 وصقيرا حايم... كتلو الناس جنوباً وغرباً وشرقاً وشمالاًوحامت الصقور تاكل اشلاء الموتى والان الدور على من تبقي من الشعب... من لم يمت بالرصاص مات بغيره ومن لم تحم على حثته صقور الجو حامت عليها صقور البشر...اما فيما يتعلق بالمسئول يمسكوهو من وين ففيي الشريعة الحاجة البمنسوكوهو منها حدها الاقصي اربعة ...اه كمان كان بقي المسئول ما عاصر على الشريعة كتير بكون زي المسئول ذو الدفع الرباعي صاحب القضية الشهير في الشهر الفضيل.


#814267 [ود الجد]
3.82/5 (5 صوت)

10-31-2013 10:21 AM
نريد ان نقرا للخبراء عن هذا السد العجيب مروي حيث تنقصنا الكثير من المعلومات عنه وعن سبب فشله وكذلك عن الاسباب الفنية وراء فشل تعلية خزان الروصيرص


#814227 [حمدالنيل احمد]
4.07/5 (5 صوت)

10-31-2013 09:45 AM
هي لله هي لله لت لاللسلطة ولا للجاه...في سبيل الله قمنا نبتغي رفع اللواء لا لدنيا فد عملنا نحن للدين فداء وقاصدين الشهادة للزواج باالحور العبن انت وزيك ياجبرة حاسدين بس ..والحقيقة انهم كاتلين الجدادة وخامين بيضها


#814224 [سوداني]
4.07/5 (9 صوت)

10-31-2013 09:41 AM
أخبار نأكل مما نزرع شنوووووووووووووووووووووووووووووووووووووووووووووو
أخبار النفرة الزراعية شنووووووووووووووووووووووووووووووووووووووووووووووو
أخبار فصل الجنوب لاتؤثر على الاقتصاد شنوووووووووووووووووووووووووووووووووو
الحكومة ستمشي متيييييييييييييييييييييييييييييييييييييييييييييييييييييييييييييين
عايز أقراء خبر يفرح الشعب متييييييييييييييييييييييييييييييييييييييييييييييييييييييين


#814209 [زهجان جدا]
4.13/5 (6 صوت)

10-31-2013 09:28 AM
انت يا استاذ جبرا .. كدي اكتب للمواطن الفضل دا يعمل بي فكرة أهلنا في الجنوب القديم لما يزهجو من سلطانهم .. يقومو يهجو من القرية في ليل بهيم و يخلو برااااااهو الله وبقراتو.

كدي يا جماعة الخير القاعدين جوة ديل فكرو خلو السودان دا لي بشبش وبقراتو.. أو كمان انتظرو زمان يبيعو ليكم الأكسجين... أو أطلعو الشارع كلكم .. أو اسكتو ..


#814180 [ابو العباس]
4.07/5 (5 صوت)

10-31-2013 08:56 AM
على فكره نحن بنسأل عن خط هيثرو ماذا حدث بشأنه لأنى مواطن سودانى وخط هيثرو مملوك للشعب السودانى ولا يجوز التصرف فيه الا بالرجوع الى الشعب لكن ماحدث كان فوق الوصف فمن تصرف هذا التصرف من حق الشعب السودانى ان يقول كلمته فيه لانه حسب علمى بأن خط هيثرو منحه خاصه للشعب السودانى والحكومه السودانيه فى العصر الذهبى من ملكة بريطانيا منحه خاصة تقديرا للسودان دون دول العالم اجمع فى الوقت الذى تسعى دول كبرى للفوز بمثل هذا الخط ولم تنجح ويأتى بسلامته بعد ان ضحك عليه عارف ومجموعته بشراء الخطوط السودانيه لكن الحيله والاستغفال انطلى على الوزير الهمام وكان الغرض الاساسى هو خط هيثرو وقد كان بعد ان اشترت مجموعة عارف الخطوط السودانيه تصرفت فى خط هيثرو وبعد كم شهر نطت من البيعه !!!!!ماذا نسمى هذا ومثل هذا الوزير ماذا يستحق من الشعب السودانى واين الحكومه؟؟؟؟؟وماذا فعلت فيمن فرط فى الامانه ؟؟؟؟؟


#814169 [OSAMA DAI ELNAIEM]
3.75/5 (5 صوت)

10-31-2013 08:24 AM
جزاك الله خيرا استاذي الجليل ويزيد ( استغراشي) عندما استمع للرئيس وهو يصف كردفان بانها صرة السودان وهو لايزال يحتفظ في ذاكرته بخارطة السودان والمليون ميل مربع وحدودنا من حلفا الي نمولي ونسي ان الابيض وكردفان صارت الجنوب الجديد---- تحدث واليه الهمام احمد هارون عن تنمية شمال كردفان وضرورة استقطاع معاش المواطنين وحتي اطفال المدارس لزوم ضريبة التنمية بينما الفعل يقول بان الضرائب ستسيبق التنمية وتظل باقية دون تنمية وتحصل ايراداتها باورنيك خارج اورنيك مال رقم 15-- الذي عانيت انت شخصيا الويل والثبور في الدفاع عنه وستذهب تلك الايرادات الي بطن الغول كما ذهبت استقطاعات طريق الانقاذ الغربي ويزيد استغراشي انها ايادي تدعي الوضوء--- ربما توضات بماء غير طاهر او طهور!


#814094 [اكرم محمد زكى]
3.35/5 (9 صوت)

10-31-2013 01:13 AM
نسال الله كمان يا استاذ جبرا ان تكون نفس المعادلة مع الثوار - يعنى الحكومة تقمعهم وتقتلهم وتسجنهم لكن حشودهم تزداد وزخمهم يكبر الله فى


#814087 [محمدالطيب]
3.88/5 (6 صوت)

10-31-2013 12:53 AM
يادكتور
سلامات
عليك الله فتش لينا عن خبرا يفتونا فى الهجرة للدول القريبة (تشاد
إفريقيا الوسطى إثيوبيا أرتريا ج السودان ... مصر عليك )
وذلك إعمالآ لقوله سبحانه وتعالى : (ألم تكن أرضى واسعة فتهاجروا فيها)
ولأننا حقيقة أصبحنا مستضعفين فى الأرض السودانية !!!


#814077 [ياسر عبد الوهاب]
2.63/5 (7 صوت)

10-31-2013 12:28 AM
غباشه غباشه...يا خال..الروووووووووووب غالي..
هذا البشير هل حدث أن كذب؟؟؟؟هل وعد واخلف؟؟؟هل عاهد وخان؟؟؟هل حلف واحنث؟؟
إذا كانت احدي الإجابات .. لا..

الحل في قيام سد كجبار!!!


#814052 [silk]
4.19/5 (7 صوت)

10-30-2013 11:34 PM
أضحكتنا بذكر البلاوى..وتستاهل تسكن منطقة الوزارات على كورنيش النيل ..عوضاعن جبرة..وتعرف تتغرشن.. بس أوعى تركب البابور..مرةأخرى نشكرك لجبر خاطر ناس جبورة جابر..أهلك (الهلكو منذ مايو المنصرم ).. وليرحمنا الله ويزيل الكرب والبلوى منا ..ويغسل أدراننا ..بكل الانتفاضات..والثورات..ونأمل الوقاية من أدران السياسة. ..أبدا ما هنت يا سوداننا يوما علينا..ندافع عنه بالوعى المتاح لأجيال الإنتفاضة المتصلة..اللهم خلصنا من هذه الأدران .. متأسلمين وطائفين ..نحن رفاق الشهداء..الصابرون نحن ..المبشرون نحن....وثورة حتى الكنس والنصر...


#814036 [أوكيناوا]
3.94/5 (7 صوت)

10-30-2013 11:12 PM
أركزوا ساكت ياجبرا .. و نائب الرئيس الحاج آدم يبشرنا بمحلية أبوحمد قبل أيام أن ليست لديهم كهرباء للمكيفات و الترطيبة !!! اذ هي للزراااااعة و الانتااااااج فقط .. فابشروا برفع التعرفة..

السد ... السد ... تنقد ما تنسد ...

و للعجب العجاب فحكومة اليابان تحض شعبها علي الاكثار من استخدام الكهرباء تحاشيآ للمصادر البديلة للطاقة و عدم تلوث البيئة ..


#814035 [هشام سليمان]
3.88/5 (6 صوت)

10-30-2013 11:12 PM
الاستاذ الفاتح ملف هيثرو لا عند النائب العام ولا حاجة الرجل نفسه اظنه يسال اين ملف هيثرو?، ملف هيثرو عند اصحاب المصلحة الحقيقين هل تعتقد وانت رجل ذكى هل كان يستطيع الشريف بدر لهط كل هذه الملايين من الدولارات وحده ? وهل كان الشريف بدر يستطيع ان يتخذ قرار بييع خط هيثرو وحده دون مشاورات وضوء اخضر وضمانات كافية له? . الاستاذ الفاتح ملف هيثرو هذا ذهب الى لارجعة واكاد اجزم بان لن يسمع به احد ثانية مادامت الانقاذ فى السلطة


#814028 [جنترة]
3.88/5 (9 صوت)

10-30-2013 10:57 PM
ليكم حق فطموكم بي عذبني و زيد عذابك .. و هزاع و اخوانه عليهم الرحمة يصحوكم ..عاملين نايمين

معقول ده هو ورثة شعب اكتوبر و أبريل ؟ ؟ أشك في ذلك.. باين الجينات الوراثية تغيرت بمفعول الهوت دوغ و الكنتاكي ..


#814008 [حامد عابدين]
4.02/5 (8 صوت)

10-30-2013 10:10 PM
يا استاذ جبرا ، انت تنفخ في قربة مقدودة ومقالك هذا لايحرك فيهم ساكنا ، ولو انهم فعلا عندهم دم أو ضمير ، كان يمكن ان يحركه ووووووواووووووووواتك التي قاربت ال24 شهرا اي سنتين ، ولم يرد عليك احد سوى الرئيس الذي وجه بالتحقيق بعد 17 شهرا من الواوات المتلاحقة وهاهي واوات توجيهه تجري خلف الواوات الاولي ( وربما تلحقها كمان ، شفت كيف)
هؤلاء قد مات فيهم الضمير وماتت فيهم اي صفة انسانية ، واصبحوا عبارة عن صناديق من الحديد تحفظ بداخلها اموالا واثقالا من اللؤم واللصوصية
لا أمل يرتجى في هؤلاء واستمرارهم اكبر كارثة تحل على البشرية ان لم يقتلعوا الان مهما كلف من تضحيات
المجد والخلود للشهداء والتحية للمناضلين الاوفياء والخزي والعار لهؤلاء الجبناء


#813996 [sanmka]
3.75/5 (6 صوت)

10-30-2013 09:49 PM
يعني يا أستاذ الفاتح إنتا ما عارف قروش الكهربا بتمشي وين؟؟؟؟؟، ولا ما عارف رسوم المياه تم تحصيلها مع فاتورة الكهرباء ليه؟؟؟؟


#813991 [Fato]
3.88/5 (7 صوت)

10-30-2013 09:33 PM
المواطن يستاهل يفعلوا فيه كل شىء طالما أصبح فأر تجارب يفعل به لصوص الحكم كل شىء وهو متبلم وصامت وكل يوم يزيدوا ليه وهو خانع ماقادر يخرج الشارع ود يعتبر موت بطىء للمطحونين فأحسن يطلعوا الشارع ويسقطوا هؤلاء الحرامية.الملاحظة ياجبرة الحكومة دى تزيد للمواطن كل شىء والشىء الوحيد اللى نقصته هو عمر المواطن.


#813982 [صلاح كوكو]
4.10/5 (7 صوت)

10-30-2013 09:19 PM
استاذنا الكريم جـــــبــره تحية المشكلة ان الكهرباء الان جمرة خبيثة وبعد الزيادة

الممكن تكون حتي لو 1% حاتكون كارثه 0 السيد رئيسكم ونوابه ومساعدينه ( اولاد العز)

ومجلس الوزراء ناس فلان وعلان ونوابهم والوكلاء وولاة الاقاليم والمعتمدين والمجالس

التشريعية ومجالس الهمباته هــــل بــيــدفــعــوا ويســددوا فــواتــيــر الكهــرباء

ويدفــعوا قيمــة البنزين وبيمشــــوا المخابز والجزارات وسوق الخضار وعليهم فواتير

العلاج والترحيل ولا بس بيشيلوا هبر هبر ساكت 0 الله يرحــم الشعب السوداني الباقي


#813979 [tarig]
4.13/5 (7 صوت)

10-30-2013 09:15 PM
التبرير جاهز انه دعم الكهرياء دا بستفيدوا منه الاغنياء لان معظم الشعب السودانى دا بركب الدواب اقصد بولع بى حبوبة ونسينى والرتينة بقت والحاجات دى ومامحتاج للكهرباء عشان كدا الحكومة عاوزة توزع الدعم دا بى طريقة عادلة فماتزعلوا يعنى يا الغنيانين


#813973 [اب جنبة]
4.00/5 (6 صوت)

10-30-2013 09:07 PM
ما ابوك لكن بربيك
لو قتوا الروووووب برضو ما بنفككم
قولوا التوبة يا حبوبة
و الله يا قريبي انا الرووووب دي قتها قبل خمسة سنوات و حسي و الله ما عارف اقول شنو
انشاء الله بعد دا نخش الجنة


#813962 [الزول الكان سمح]
4.19/5 (8 صوت)

10-30-2013 08:51 PM
يا أستاذ مساء الخير

والله أنا شايف كسرة رئيس الجمهورية دى تشوف ليك كسرة غيرها..مثلاً ( كَسرة يا هيثم...كَسرة تنقا

لأنو وإن كل الظن إثمُ الظاهر الريس لقى الجماعة نزلوا ليهو فى رصيده من عائدات بيع الخط فعمل ميت..

أرجع بيك تانى....تقوم الحكومة بتصدير وبيع الماشية بمليارات الريالات وعائدات الصادر ما معروفة بتمشى وين.. فترتفع أسعار الأضحية والناس بدل تاكل لحم تمشى الزرايب تتفرج وترجع..


ردود على الزول الكان سمح
United States [الساطور] 10-31-2013 05:15 AM
اكون عندنا حاج ساطوووووووووووور كبير واسرائيل مستبيحه اجوائنا اكون عندنا رقاص محترررررررررررف والنظام العام يمنع الرقيص اكون عندنا اكتر من 200 من الشهدااااااااء وشنو بالله حد اكمل دى غلبتنى

United States [دا كلام ما صاااااح] 10-30-2013 10:47 PM
وتقوم النهضة الزراعية ونستورد النبق الفارسى والتفاح
وتتضاعف مصانع الأسمنت ويزيد سعره
ويزيد عدد الخبراء فى الحكومة وتزيد فشلا وتخبطا
تتضاعف اعداد العمالة الأجنبية مع تضاعف اعداد شبابنا العطالى
تقوم ست الكسرة وبائعة الشاى بدفع الضرائب ويعفى بعض المسؤولين اصحاب العقود المليارية
تتضاعف نسبة الفساد مع ان الدولة دينية
تتدنى الأخلاق فى دولة المشروع الحضارى


#813955 [hajabbakar]
4.19/5 (7 صوت)

10-30-2013 08:42 PM
عليكم بالخبير الوطنى والدى يؤكد بان دخل المواطن وصل الى 1800دولار
وابجاعورة يصدق هبنقة ويبدو ان خط الكهرباء الناقل من اثيوبيايهرب الكهرباء الى دول الجوار
وسينبرى لك خبير اقتصادى ويقول لكم ان الدولة تدعم الكهرباء بمليارى دولار. واننا ارخص كهرباء فى العالم. وان الدعم يدهب للاغنياء والمهربين الى دول الجوار
وان المكتب القيادى الانقيادى للمؤتمر البطنى وافق بالاجماع الهتافى (وليس السكوتى) لرفع الدعم عن الكهرباء ورئيس البرلمان المتمنى للشهادة ONLINE لبيب بالاشارة يفهم .يفهما طايرة والا طار كما طار الاصلاحيون


#813948 [abu khaled]
3.52/5 (9 صوت)

10-30-2013 08:35 PM
ياعم جبرا الكهرباء دي قاصدين منها علاج الشعب السوداني بالصدمات الكهربائية بعد اصبح كافة الشعب مجنتر والمعروف بأن كهرباء السدود والانهار أرخص انواع الكهرباء في العالم والاتى رفع الدعم عن الكهرباء والهواء


#813917 [quickly]
3.94/5 (8 صوت)

10-30-2013 07:47 PM
هم حيزيدوا وحيزيدوا ......وحيزيدوا زي ماعايزين
تعرف يا استاذ المشكله ويين ؟؟ المشكلة في الناس الساكتة ومامعروف الى متى؟؟!!!!!!!!!
زي ماقال البرطوش الكبير البشير في آخر خطاب قبل رفع الدعم انهم عارفيين حيعملوا شوية شغب ويحرقوا شوية لساتك ويجدعوا شوية حجر وتنتهي القصة !!!!!!
يعني هم واثقيين انو الحبة مابتجيهم ويزيدوا كما يحلوا لهم
نحن نلوم نفسنا بـــــــــس بعد دا


ردود على quickly
United States [مون امي] 10-31-2013 12:57 AM
والله ديل وقفوا المظاهرات بالسحر والسحره قالوا عندهم شيخ كبييييييييير ربنا ياخدوا ان شاءالله ويريحنا منه


#813916 [Elobaidi]
4.13/5 (9 صوت)

10-30-2013 07:40 PM
ya sayed Jabra, there is a famous idiom which really applies to what you said above
(and sorry my Arabic keyboard is not functioning):
alshat la yodeeruha salkhuha baad zabheha


الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة