يلا تعالو
11-09-2013 02:04 PM


سيل الذكرى الهاتف وحالف....
دحرج كُتل الهم الجارف...
وساكن سكك..الوسن...
الواجف وصارف....
***
وهج الأمل..إتراجف..
خاطرو مكسر..
حاول يزحف الا اتعثر....
جوة الفجوة الوقفت..
بينه وبين العين..
المدت سيرا تجابد..
وتجذب خيط الغمدة..
الشارد غادي..
سرح في وادي..
ونحن... ف ... وادي..
***
حرف القسمة الفينا..مسطر..
حدد يوم العمر الأغبر....
مع انه كتابا..غير..معلوم..
لكنّ همجية القلم الشوم..
حاكمانا نموت ..
قبال اليوم..
بالظلم..الواقع..
والجهل الشايع....
وأصبح واقع....
والحيل واقع....
حملو .. مواجع..
والحس مكتوم....
***

هاج مكنون الزفرة وكتح..
لملم جيش..القلق الهايم..
في جدران الروح ومبطّح..
سحسح باقي الفرحة وروّح....
..في أقدام..الظلمة..
البلعت لمض..
النفق الغاير....
في أعماق..
مجهول الحاضر....
وعتمة باكر....
***
الخفاش الدخل أسراب..
من شُباكنا وتحت ..الباب..
.
زاد الطين زلليقة وبلة....
يحلنا منو الحلّ كتاف....
مكروبة الذلة ..
وخلّص بله..
***
المهوس الكايس الجنة..
جوه حريق البلد الجنه ..
من أهوالو ومن ثغرات....
فتحوها ..عيالو..
ظنّ صبرنا عليهو..محنّة ..
***
وصدقوا زمان....
حكمانا القالو..
مافي وطن بضيق..برجالو..
بس اخلاق الناس بتضيق....
من أوطانا ..وترخي لسانا..
لى زول هانا..وشده أضانا..
***
اتقسم خير الناس كيمان..
حقرتنا كتايب..بالأحزان..
أقزام تستعرض في الميدان....
وتذل عملاق..صنع الأزمان....
بالسوط يسترجلو في النسوان..
شباب مقهور ..حايم عطلان....
وصغير مرفود ..هايم حفيان..
وتاريحنا الكان .. وياما كان....
وقف محزون..يندب حيران....
يلعن في الكاهن .. والشيطان...
وفي اللابس الكاكي والقفطان....
وفي الراجي الغرباء..والغربان..
***
الشارع التاه خلف الجدران..
شايل رهق الذل الوان..
نزّل.. سرج الخيل عرقان..
تكل السيف خلف الأركان..
ونام بركان الجبل الخامد..
ليه راقد حاتل ..فتران..
لكنه أكيد..لاخاف لاهان..
من هرشات ورل الكيزان..
القال لا با س ..
لو تطلعو..أيضاً..
في الميدان.. بس شيلو..
حنوطكم .. والأكفان..
***
وقال المغرور الشمه..أباطو..
ياخايفين.. انبطحوا.. و طاطو..
لسه تشوفو ..وياما تجوعو..
بلدنا.. كبير قطّعنا ربوعو..
المامبسوط ..يلحس كوعو....
....شايفنا مُراح..هدد وصاح..
الراجل..اقوم....
يحلم في النوم..
يحرك ..تمثالو..
أو يتجاسر إبّدل حالو..
***
كبرّ في الناس الكارهة وصالو..
نبح منفوخ .. وهلل دجالو...
وقال .. هو .. الكضاب ..
بي سماحة الدين..تمّ هلالو....
عاد إتفشّر فوق للمعقول...
والكل صابرين بى سكات القول....
..ساخرين على طول..
وليه .. الخوف من زول ..جهلول..
هراط....مخبول....
سارح في خيالو....
مهما يكابر..يصول ويجول..
.. .. حتما مسحول..
بي خطاوي فعالو....
ولو كان جقلب..أوإتقلّب ..
عرضا أو وطول....
ومهما كضب..أ
باكر ..يستغرب ..
من صمت الكان..
ساكت مغلوب....
هادىء مهذب..
بكرة بيشرب...
أكبر.. مقلب..
.. آمالو..تخيب
يخجل من حالو....
ويبل ..سروالو..
وصادقين القالو..
في شين أقوالو..
جد بالمقلوب.. ..
زي.. المركوب..
لابساهو نعالو..
***
يلا تعالوا..
****
**

[email protected]


تعليقات 1 | إهداء 0 | زيارات 1260

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#822143 [ربش]
5.00/5 (1 صوت)

11-09-2013 08:01 PM
صح لسانك ..... يارائـــــــــــــــــــع .


محمد عبد الله برقاوي
محمد عبد الله برقاوي

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة