صور من الدنيا 2
11-16-2013 01:30 AM

صور من الدنيا 2

صلاح المبارك من اولاد حي العرضة ، تزوج السيدة انا ليزا الامين وهي دبلوماسية دنمالركية . ولهم فندق الآن في الخرطوم يجمل اسم انا ليزا . وكانت اول محطاتهم في النرويج . وبينما هو جالس في شقتي، قال معلقا علي سيدة في فلم , المرة دي ياخ ساكنة في عمارتنا في اوسلو . مرة ضربت جرس الباب وصحتني من النوم في الضهر . وسألتني اذا كان الكهربة قاطعة عندنا ، ولا بس في شقتها ؟ انا ذهجان قلتا ليها ما عارف وقفلت الباب ,,
عندما قلت له دي ليف اولمان الممثلة العالمية النرويجية وساكنة في هولي وود . قال بدون اهتمام . وانا اعرف كيف ؟
بعض الاخوه من الوزن الثقيل ومن اشتهروا بحب المطايب . ذهبوا لزيارة صلاح في النرويج. وانقلبت السيارة في طريق العودة . وتناثر مسحوق ابيض وملأ الارض . واتاهم البوليس من عده جهات وبأسلحة مصوبة وطالبوهم بالانبطاح . وعندما تأكد للبوليس ان كل الكمية الضخمة التي غطت الشارع والصخور لم تكن سوي بدرة سكر ضحكوا . تفسير الاخ السر الخانجي رحمة الله عليه باسلوبه المرح ,, فري قود فور بانكيك آند سودانيز دوناتز، دوناتز ,, وبعدها قدم لهم البوليس كل المساعدة وكان لطيفا معهم . فمن يهتمون بالزلابية والقراصة وفرق سعر السكر . لايمكن ان يكونوا مهرب مخدرات بكميات كبيرة .
في بداية السبعينات اعطت البلدية في كوبنهاجن شققا للسودانيين بالقرب من اكبر ميدان وفي وسط المدينة وكانت رخيصة جدا . وعرف العرب شارع نانسيز بشارع مصر والسودان . لان المصريين لحقوا بالسودانيين . وهذه الشقق تعتبر خارج استطاعة الدنماركي العادي الآن . ولكن السودانيون فرطوا فيها اواعطوها لسودانيين للسكن . ولم يدفع الايجار البسيط ونزعت الشقق
في احدي تلك الشقق سكن مجموعة من السودانيين لان صاحبها ارتحل الي شقة حديثة . احد الذين سكنوا في تلك الشقة كان ود عجيب . ود عجيب كان بحارا طوف العالم . واتت به احدي السفن . كان قويا وتبدو عليه طيبة اهل القري . كلن يأتي الي مكان تجمع السودانيين والاجانب بار كازانوفا وفي وسط البلد وليس بعيدا من شارع مصر والسودان .ولم يكن يطلب غير سجارة لانه يكون ضارب حلة تمام واذ سمح الحال يرحب بقزازة بيرة .بالرغم من فلسه كان يتحدث عن الشوربة والحلة . عندما اختفي ود عجيب كان المطبخ وخارج الشقة الارضية ملئء بريش صغار البط وارجل البط التي لاتزال تحمل الاسورة المعدنية التي توضع علي ارجل الطيور . ويتعب رجال الحياة البرية في القبض علي الطيور ووضع تلك الاسورة . شارع مصر والسودان كان علي خطوات من البحيرة .
بار ومقهي كازانوفا كان يمتلئ بالاخوة من شمال افريقية ويلبون الظهر في ارضية المرحاض الوحيد ، لايمكن الدخول عندما يكون اللعب حاميا . ولقد طلبوا مني في احد المرات ات اذهب الي الزنقة . وتلك اول مرة اسمع بكلكة القذافي الشهيرة . زنقة زنقة . وكان هؤلاء الاخوة يروجمن الحشيش ويبيعون المسروقات . وقام البوليس بقفل المحل ، الا ان العم بن بسجاره المميز ذهب الي الملكة الدنماركية مارقريت وذكرها بانه صديق والدها ، وانه كان يضعها علي ركبتيه . وطلبت الملكة من رئيس الشرطة ان يتساهل مع بن لانه لن يعش طويلا . وفتح المحل ولكن بانضبات شديد وتسلم ادارته اخ سوداني كان الدنماركيون يحبونه والاجانب من امريكان وجمايكيين وخلافهم يحترمونه ويهابونه .. الدنماركيون والهولنديون مثل السودانيين قديما ، يعرفون بعضهم . والوزير يصادق العامل والملكة والامير يتجولون في الشوارع .
في تلك الايام ذهبت مع حسين ود الحاوي لملهي دي باريس الفاخر ووجدت احد الاخوة السودانيين يعمل كمسئول عن النظام . وكنت اعرف انه كبير الجسم والحلقوم وقلبو كبير وما بتاع شدايد . وافرد لنا طاولة واوصي الطباخ وصنع لنااطباقا شهية علي حسلب المحل . وعندما نبهته لخطورة الوظيفة كان رده ,,الدنماركيين ديل انا بمشيهم بالهرشة . تحصل مشكلة كبيرة برمي ليهم برنيطتهم دي وبمشي بيتنا ، انا اصلو بقبض باليوم .
بعد زمن توقف السوداني عن العمل . وعندما سألته عن السبب، كان السبب احد الاخوة من شمال افريقيا قصير القامة . قال لة ، ياسوداني تبعد تربح ، ولا الموس .


في ام 1992 ظهر أحمد الفكي في منزلي بقامته النحيلة ولم نكن قد تعارفنا من قبل. وكان يكتب كشيوعي في صحيفة الميدان ويشارك الحاج وراق في إصدار صفحة كاملة، كانت تربطه معرفة بشقيقي الشنقيطي رحمة الله عليه وبقية العقد الفريد من الزملاء . لذا صار السكن مع بعض سالكآ. إنضم إلينا مجموعة من المناضلين الآخرين بعد مدة.
في أحد الأمسيات أتي أحمد مبتسمآ ، بل منتشيآ بالرغم من أنه كان محبطآ في الصباح ، وربما بسبب البعد عن الأولاد والزوجة والتي هي صيدلية وشيوعية . أحمد قال ضاحكآ والله البلد دي أحسن بلد، أنا من صغير أي زول حاقر بي، في المدرسة ، في الحلة ، أول مرة في حياتي زول يخاف مني! السويديين في الليل يخلوا لي الشارع؟ .

في الستينات سمعنا عن مجموعة السودانين الكبيرة التي سبقتنا إلي ألمانيا وأحد هؤلاء السودانين كان ضعيف البنية ولكن قلبه حار. تعرض للضرب عدة مرات بواسطة الألمان . وصار يجد الإستفزاز والإستخفاف. والكثير من الألمان يميلون للعنف خاصة بعد الشراب وبعضهم كان لا يزال يعيش إحباط هزيمة الحرب.

صديقنا السوداني بعد أن وجد الإحتقار والإستفزاز والضرب خاصة أمام صديقته حل الإشكال بطريقة عملية، فقد إبتاع "سكينين" بنفس الشكل والحجم. وعند أول إستفزاز قام بكل بساطة بإخراج السكينين وطلب من الخواجة من الخواجة أن يوقف الكلام ويحسم الأمر بمعركة رجولية. إنصرف الخواجة مذعورآ وسط ضحك الجميع . وإرتاح صاحبنا وعرف بالرجل الذي علي إستعداد للقتل أو الموت.

الألبان عادة يستقوون علي الآخرين ويعتمدون مثل الإخوة الصوماليين علي كثرتهم العددية وعصبيتهم ووقوفهم كمجموعة متحدة ضد الآخرين. إثنين من الشباب السودانيين طالبي اللجوء في التسعينات تعرضوا لمعاملة سيئة وإحتقارآ وتغولآ علي حقوقهم في أحد معسكرات اللاجئين من الألبان. تفتقت أخيلة أحدهم عن حيلة جميلة إذ قام بشراء كمية كبيرة من الكبدة وهي عادة رخيصة جدآ في أوروبا علي عكس السودان وبعض الدول. وطلب الشاب من صديقه أن يقوم بنفس حركاته ، وضعوا الكبدة علي طاولة وقلب عيونه وأصدر زمجرة وكأنه مصاب بنوبة سعر وهجم علي الكبدة قضمآ ونهشآ والدماء تسيل من فمه وعيونه تذيد إتساعآ وحركة ، وبدأ زميله ينازعه في الكبدة ويصدر زمجرة أعلي وعندما خلصت الكبدة حاول أن ينازع صديقه علي ما بين أسنانه. تدافع الألبان نحو الباب وسقط بعضهم وصرخت سيدة ألبانية وخطفت طفلها وهربت. وإستلقي السودانيين وكأنهم فهود ترتاح بعد حفلة صيد. وإلي أن تركوا المعسكر لم يقترب الألبان منهم.
التحية
ع . س . شوقي بدري
[email protected]@hotmail.com


تعليقات 12 | إهداء 0 | زيارات 3980

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#829376 [عبدالمنعم]
0.00/5 (0 صوت)

11-17-2013 09:18 PM
طبعا ناس اوسلو اذا بتعرف منهم كثير مثل عمر اودين الله يشفيه ومختار التيجاني واستكوهولم مثل بادومه لا ادري لماذا تغير الزمن من تلك الايام الحلوه للتعاسه خاصة لما نتذكر اهلنا وسط الكيزان الله لا يرحمهم ويجيليهم عن السودان لكن نرجع ونقول الحمد لله نحن راضين بقضائه


#829368 [عبدالمنعم]
0.00/5 (0 صوت)

11-17-2013 09:13 PM
الله يجازيك بالخير ويرحم السر الخانجي وكل الاموات من ذلك الزمن الجميل طبعا صلاح مبارك ممكن نذكره بغناه الجميل والفولفو الامازون وكذلك الماظ واخوه عبدالرحمن واخوك خليل واولاد مالك الي اخرهم من الشباب الجميل والايام التي نآمل ان ترجع ومن هنا احي وداعه وحسن الكبتن واحمد قسم الله وعبد الله والبقيه ان كانوا من الاحياء ويرحم الاموات .


#828424 [ودالباشا]
0.00/5 (0 صوت)

11-17-2013 12:31 AM
دائما يا ود البدرى نذوب فى مقالاتك ونعيش ماضى تليد وايامكم الجميلة سوى فو امدر او اروبا بالله ماتنقطع وطنش نا ابو سارة ديل برة الشبكة اخير اقول ليك رسالاتك شوية خلاص انا الراجيك تكتب لينا كم دفتر وكم كراس وكل الود


#828415 [ساب البلد]
0.00/5 (0 صوت)

11-17-2013 12:18 AM
لك التحية عمنا شوقي .. والله مقالك يفرق علينا شوية ويطلعنا من جو الكا~بة العايشين فيهو ..
متعك الله بالصحة و العافية انت و العائلة الكريمة ..


#828414 [لوممبا]
0.00/5 (0 صوت)

11-17-2013 12:17 AM
سلمت وسلمت ذاكرتك يا فاكهة المواقع الأسفيرية


#828241 [خالد]
5.00/5 (1 صوت)

11-16-2013 07:00 PM
لك كل الود والاحترام والتقدير يا عم شوقي وبوسة قوية علي صلعتك البهية .


#828012 [ود حي الضباط]
0.00/5 (0 صوت)

11-16-2013 02:44 PM
شكرا لك عم شوقي بدري ع هذا المقال الجميل ونرجو منك المتابعه ع هذا المنوال... اعادك الله الي السودان حتى يتثنى لنا لقاؤك والحديث معك.
لك منا كل الاحترام والتقدير


#827838 [Ahmed Osman]
0.00/5 (0 صوت)

11-16-2013 11:27 AM
تسلم يالاستاذ شوقي بدري ع المجهود الجميل.


#827837 [Ahmed Osman]
0.00/5 (0 صوت)

11-16-2013 11:25 AM
تسلم يالاستاذ شوقي بدري ع المجهود الجميل.


#827802 [أبوسارة]
0.00/5 (0 صوت)

11-16-2013 10:47 AM
كلام الطير في الباقير.


ردود على أبوسارة
United States [المتفائلة جدا] 11-17-2013 04:33 PM
الطيرة دى مالها كل مرة تجى راكة لينا فى مواضيع الأستاذ شوقى الرائعة دى ؟؟يمكن طردوها برة قفص الإنقاذ المشلع ده..؟؟

[أبوسارة] 11-17-2013 01:14 PM
كلام الطير في الباقير هو الكلام الذي لا فائدة منه.

United States [اسامة الكردي] 11-17-2013 11:12 AM
اها يا الزبون ابو سارة انشاء تكون فهمت موضوع الباقير

[ود النوبة] 11-16-2013 07:45 PM
الظاهر عليك انك كوز وسخ مدسوس الله يشفيك يامريض

United States [ود النوبة] 11-16-2013 05:24 PM
كل يوم تنتقد الاستاذ دون مبرر يبدو انك كوز مدسوس , واشك في انك رجل و لا بتشبه الرجال قال ابو سارة قال يكون زوجة ما عندك يا......!!!!!!!!

European Union [shawgi badri] 11-16-2013 02:50 PM
الزبون ابو سارة لك الود يا اخي . يمكن تكون ما عارف موضوع الباقير . مع الدرت بكتر الزرزور وبكون بالملايين . الزرزور ما بشرب من البحر خوفا من الموج يشيلو فبشرب من البقر وهي الحفر التي يتراجع عنها النيل . وتتجمع الزرازير وتشقشق وهي بالآف . وطبعا كلامها ما مفهوم للناس . وكوع مستمخس


#827746 [موردابى]
0.00/5 (0 صوت)

11-16-2013 09:15 AM
يا عم شوقى ما سمعت فريق الموردة هبط يا حليلنا


ردود على موردابى
United States [الكاهــــــــــــــــــــــــــــــــــــــــــــن] 11-17-2013 02:29 AM
إغرق البعرف إعوم وإرسب الحاضن الكتاب
وإنجح الطـــول السنين عداها نـــــوم
تحيه للاستاذ شوقى وتحيه للموردابى وهارلك يامورده

European Union [shawgi badri] 11-16-2013 08:48 PM
عزيزي الموردابي لك التحية . كيف لم اسمع وهل تمر كارثة مثل هذه بدون ان تكلب شعرة جلدنا . . الخبر اكبر من خبر الموت . ولكن قالو العترة بتصلح المشي . هل لاحظت انو الجبهجية ما عندهم سيطرة علي بعض الاحياء في امدرمان منهم الموردة وما جاورها . لهذا حوربت الموردة . ولكن ستعود الموردة اجمل واحسن عندما الانقاذ تقطع وشيها


#827708 [عنيد]
0.00/5 (0 صوت)

11-16-2013 03:47 AM
لك التحيه العزيز شوقى وكل الود والاحترامخخ اليوم اضحكتنى من الاعماق بعد كل الاحباط الحاصل


شوقي بدري
شوقي بدري

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة