المقالات
السياسة
عثيمين أتاريك إنت أعور
عثيمين أتاريك إنت أعور
11-17-2013 03:53 PM


هذا النظام سقط مش حيسقط لا سقط سقوط مدوى لأنه نظام مفلس ( بالفتحة ) ومفلس ( بالضمة ) بمعانيها الإثنين كاملتين
يحكى أن رجل كريم عين ( أعور ) من أهل السودان اسمه عثمان عمل فى قسم الدريسة لمايقارب الخمسين سنة والدريسة لمن لايعرفها قسم من أقسام هندسة وصيانة خطوط السكة الحديد لمان كان عندنا سكة حديد
عثمان اخذ مكافأة نهاية الخدمة كاملة حيث كانت تصرف فور إنهاء الخدمة دون مماطلة زى وقتنا دا يجرى بين المعاشات حتى يموت - وبدل مايمشى بيها البلد ويصلح حال أهله ويرميها فى غنيمات أو زراعة لماتبقى من العمر ، دخل بيها إحدى أنادي المدن السودانية والإنداية لمن لايعرفها مكان بلدى لبيع الهوى والخمور البلدية وكل مايشتهيه الشيطان
عثمان وضع كل حقوقه فى جيب الجكته بتاعت الدريسة لمان ست الإنداية تقول ياعثمان عاوزين نجيب دجاجة يقول لها ماتكلمينى أنا كلمى جاتكه
ست الإنداية بدل ماتشيل 5 قروش وهى ثمن الدجاجة ( الفرخة ) فى تلك الفترة تشيل طرادة والطرادة لمن لايعرفها 25 قرش يعنى ربع جنيه وياجماعة ربع الجنيه كان بيجيب فى السودان 5 دجاجات بلدى لحمها طاعم مش دجاج الوالى المسيخ دا والبيضة بمليمين
عثمان عاوزين نجيب لحمة وخضار و....... ماتكلمينى كلمى جاكته
واستمر الحال وصاحبنا عثمان لم يرى الشمس بس غرقان لشوشته فى الملذات
فى يوم من الأيام قالت ليهو عثمان عاوزين.... وقبل ماتتمها قال ليها ماتكلمينى أنا كلمى جاكته
ست الخمارة أدخلت يدها وجاها قماش جيب الجكت مقلوب فى يدها دليل على أن الجيب فاضى وقروش المكافأة ياعثمان خلصت
عاينت ليهووقالت ( عثيمين إنت أعور - وسحبت الجكته من المسمار المعلقه فيهو فى الحيطة ورمتها فى وجهه وطردته - ما خلاص الجكته مابتتكلم وما بتتعطى )
جماعتك شعروا بجكتت البشير بقت فاضية وبدوا يسربقوا واحد وراء واحد وناس سبدرات وبدرالدين سليمان اللى نسبة الذكاء عندهم أعلى إنسحبوا فى الجولة التى أعقبت خروج بترول الجنوب
جيب جكت الريس فاضى نحن خارج السلطة وخارج السودان شعرنا به وقلنا ليهو ( عثيمين أنت أعور )
فمابالك من بداخل النظام زى ناس كرار التهامى
وناس كرار التهامى ديل واشباهه رجال كل نظام مايورونا أنهم مدافعين عن حق المغتربين نحن لن نغفر لكم مشاركتكم فى حكم الأخوان وتثبيت أركان حكمهم برجال جهاز أمن النميرى وأنتم منه
عملتم سدنة مع نظام نميرى ولمان غار نميرى رجال ونساء وجهاز أمن النميرى هو من أبقى على نظام الأخوان لربع قرن ولو سقط البشير وجاء عسكرى تانى حتركبوا الموجه - أنتم رجال كل نظام
لمان الترابى جمع رجاله وقال لهم أريد مضاعفة الإسلاميين الى 10 أضعاف كما قال الطيب زين العابدين فى اخر لقاء له من الطاهر حسن التوم - الترابى كان يراهن على فلول المايوميين ودا غلطة كبيرة للصادق المهدى لأنه لمان شكل حكومته الإئتلافية بعد الإنتفاضة مع الإتحادى الديمقراطى والأخوان لم يلتفت لرجال مايو وأمن مايو فجاء الثعلب الذكى ( الترابى ) وأسس بهم دولته ومن بينهم كرار التهامى وبدر الدين سليمان وبدرية سليمان وسبدرات وشقيق عمر الحاج موسى نسيت اسمه وعشرات المئات
أقر الأمين العام لجهاز تنظيم شؤون العاملين بالخارج د. كرار التهامي بأن الضريبة التي تتجه وزارة المالية تضمينها في موازنة العام القادم وتطبيقها بأثر رجعي على المغتربين ستكون ضارة بالاقتصاد عبر تأثيرها على تحويلات المغتربين ، وقال إن عائد تحويلات المغتربين تبلغ (6) مليارات دولار بينما ستوفر الضريبة ما يقدر بحوالي (3) ملايين دولار سنويا
وكشف الأمين العام لجهاز المغتربين د. كرار التهامي خلال حديثه لبرنامج" مؤتمر إذاعي" الذي بثته الإذاعة القومية عن منع طلاب من أبناء المغتربين من دخول كلية الطب بجامعة الخرطوم بواسطة أساتذة بالجامعة بالرغم من استيفائهم لشروط القبول ، وأضاف" المسألة قانونية ويجب انتزاعها من براثن أي شخص"
كلام كرار التهامى لايعنى حبا وعطفا على المغتربين ولكنه تلميع وتنظيف لشخصه من الأوساخ التى علقت به جرا مشاركته نظام الإنقاذ ونحن بنقول لك وسخ الإنقاذ لاينظف إلا بقتل نفسك فالتاريخ لن يرحم أحد
تقيفوا مع نظام عسكرى فاسد مستبد ولمان يفلس ويسقط تهاجموه عشان نقول عليكم شجعان
لا يا عثيمين أنت أعور

[email protected]


تعليقات 2 | إهداء 0 | زيارات 1522

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#829422 [حليمه وجزمتا القديمه!!]
1.00/5 (1 صوت)

11-17-2013 10:08 PM
والله يا باشمهندس انت عايز علقه من المدام بشرط ان تكون أداة الدقه (المفراكه) وللذين ﻻ يعرفون (المفراكه) فهى اﻻداة التى تفرك بها (الخدره والويكه!!) انت بدل ما تناقش الطامه الجايه على إخوانك المغتربين تقعد تحكى لينا (حجاوى ام ضبيبينه!!) وللذين لم يسعدوا بسماع حجوة ام ضبيبينه ما عليه غير إعادة قراءة مقالةالباشمهندس من او وجديد!!.


#829232 [بعشوم]
1.00/5 (1 صوت)

11-17-2013 06:45 PM
التهامي عميان عديل !


المهندس سلمان إسماعيل بخيت على
مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة