المقالات
السياسة
ما جاب المطر بنزين
ما جاب المطر بنزين
12-06-2013 08:39 PM

ماجاب المطر بنزين ولا سوت خُطَب مولانا ( تاج الدين ) بلد طيبة وقوم آمنين
ولا ارتاحت جيوب الناس في الطابونة والكنتين
قعدتو تبولو في ريسينا كم حولاً فات في العد عدد عشرين
خليتو البلد فقران سواد الأمة بات محتاج وجُل الشعب صار مسكين .
ما شفنا يا ( مولانا ) يا ( بشبش ) أسم إسلامي إسلامين
ولا شفنا الصلاح أفعال ولا قامت شريعة ودين
. سويتو البنوك ( كعبة) و ( هرولتو ) بين ( كافوري ) و ( البدعة )
وبين ( السفة) ( واللبعة )
جيتو نحاف تقول أطياف
بقيتو كروش شحم وقروش وقاطرين من ورا الجعبة
وما فيكم أسم ( صالح ) ولا صالحين
يا مولانا يا ( بشبش ) وتاج الدين
انحنا ولاد بيوت الطين
ما دخلت بيوتنا ( البيتزا ) ولا عارفين شنو ( الهوت دوق )
ولا ( اتحنكشنا ) ( بالمصاصة ) انتوا المصيتوا دم الشعب ما خليتو قطرة دم
وانتو السُقتو بي حالو وطن للجوع ونار الهم
وانتو البعتو خير الأمة شرف الذمة لما خجل عديل من روحو حتي الذم
وانتو الجيتوا بس للم وكم في كم وقهر الأمة والتنكيل
................... يا ( بشبش ) هو ده التأصيل ؟
وجنس ( البيتزا ) مش ايطالي ما ( جعلي ) ولا شايقي ( والهوت دوق ) موش نصراني ؟
ولا كمان صبح سوداني
ساي بالغش والمصاصه يا حصحاصة ده الاعجاز وده الانجاز ؟! د
مما جيتو اتباع الشرف في السوق
عكّرتو البحر بالغم
وكتْلتو العباد بالهم
وسطرتو الظلم بالدم
رقّيتو الرمم لي فوق
زرزرتو الرقاب بالطوق
ولغيتو الخجل والذوق .
يا ( بشبش ) أمير الدين
نحن ولاد بيوت الطين
كنا عُزاز ومستورين وشبعانين
نعوس الكسرة فوق الصاج
وبينا العُشرة والنفاج
ونكرم ضيفنا والمحتاج
لا ( هوت دوق ) ولا ( بيتزا ) و ( مصاصة )
شبعنا عشقنا اللقمة ( بالتقلية ) والقراصة بالدمعة
وبالسمنة وسَلطةْ روب كمان خاصة
قَبُل ما تجونا ما كنا ناس فاجرين ولا كفار وعارفين الفروض والدين
انتو الجيتو كضابين وسفاحين وسراقين
نشّفتو البلد والريق. وتجار دين لا شوف سبحة لا أبريق
ما زدتو البلد انجاز ولا ميزة غير ( مصاصة ) أو ( بيتزا )
كُلْ شيتاً عكس روحو ونكر سيدها شَمِس بتجينا بوشيها بقت بتجينا بي ( ....... )
كل شيتاً صِبح بالعكس عقل الباقي صابو المس
لا خَدّر زرع أو قش ولا نجض الثمر للحش.
كل شيتاً صِبح بالعكس وطن كامل أذاهو القص حتي الضُل دخل القش
سماع ءاضني كورك كش
كل شيتاً صِبح بالغش العولاق صبح عملاق والرمة صَبح قِمة
ديك الوادي صار والي ..( الباطل ) صبح راجل كمان كاتل.
والمهبوش قدل منفوش. ده بس زمن الكضب مفروش
وبيع شرف البنات بقروش وصوت النخوة صار مقروش
يا مولانا يا ( بشبش ) أمير الدين ما جاب المطر بنزين
وما شفناك عدالة ودين
حريقنا وَقَد حسابنا ولَد مرقنا نأدب الباطلين
جوه السُلطة رقاصين وهراشين
وبره نِعام يوم الزَرّة ما فيكم ءاسم راجل وما بتموتو مستورين .


هاشم صديق


تعليقات 15 | إهداء 2 | زيارات 7748

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#852399 [بت بت جريس]
4.00/5 (2 صوت)

12-10-2013 02:57 AM
التحية لشخصكم لكريم،،
وهنيئا لكم على هذه الرائعة التى صدرت عن حس شعرى مرهف وتجربة و معاناة قاسية عكست مابدواخلك وماتحمله من هموم الوطن وجراحاته ونزفه الذى لاينقطع وماتحمله تلك الكلمات التى تصدر عن دفقات شعورية قوية متلاحقة تعكس معاناة حقيقية وتجربة شعورية صادقة .


#850449 [abu khaled]
0.00/5 (0 صوت)

12-08-2013 11:29 AM
عايزنها بصوتك وطريقة الالقاء المميز وصح لسانك ايه المناضل


#849501 [ابو محمد]
0.00/5 (0 صوت)

12-07-2013 01:40 PM
مع استمتاعي بمضمون النص لكن اجزم ان هذا ليس شعر هاشم صديق الذي ندمن ونحفظ كل ما يقول


#849421 [tom]
0.00/5 (0 صوت)

12-07-2013 12:49 PM
حياك الله يا هاشم ود الصديق
نحلم نشوف بلدا جديد وفيه كل شيء بدون تعقيد وبدون بشيش واب العفين وعصمان الذهب بلا رجعة وشيخوهم كبير يفكر وحصص في عيوناتو بحلم ... سراب
نعود ويعود بلدنا بلا خال وبلا كربال وشوف عيني في المنام الفرحه جايا وحات الله


#849289 [معز محمود]
0.00/5 (0 صوت)

12-07-2013 11:28 AM
حقيقة قريبة للمقال العادي ما بنيسبة عطر الطلح


#849262 [masood abdlwhab]
4.00/5 (1 صوت)

12-07-2013 11:15 AM
والله ماخليت حاجه كلو فيهم وازيد


#849161 [M.Tanno]
4.00/5 (1 صوت)

12-07-2013 10:03 AM
الجميل .. هاشم أبو قصي

حسابنا مع الناس ديل ولد ..


#849108 [سودانى]
4.00/5 (1 صوت)

12-07-2013 09:23 AM
حقيقة مش مستوى شعر هاشم صديق السلس النحنا بنعرفو*


#849037 [الممغوص]
3.00/5 (1 صوت)

12-07-2013 08:05 AM
رررررررررررررررررررررررررررررووووووووووووووووووعة


#848822 [ابونازك البطحاني المغترب جبر]
5.00/5 (1 صوت)

12-06-2013 10:47 PM
شاعرنا الكبير هاشم صديق ، الرجل القامة في الادب وفي حب الوطن .
اقوى بيت في قصيدتك ((انتو الجيتو كضابين وسفاحين وسراقين )) لخصت كل بلاوي الكيزان في هذا البيت القوي الرائع . لك التحية اينما كنت .


#848797 [ذوالفقار]
5.00/5 (2 صوت)

12-06-2013 10:13 PM
كُلْ شيتاً عكس روحو ونكر سيدها شَمِس بتجينا بوشيها بقت بتجينا بي ( ....... )
كل شيتاً صِبح بالعكس عقل الباقي صابو المس
لا خَدّر زرع أو قش ولا نجض الثمر للحش.
كل شيتاً صِبح بالعكس وطن كامل أذاهو القص حتي الضُل دخل القش
سماع ءاضني كورك كش














حقائق


#848770 [المريب]
1.00/5 (1 صوت)

12-06-2013 09:22 PM
ركيكه


ردود على المريب
[اوهاج] 12-07-2013 01:32 PM
اذا اتتك مذمتى من ناقص فهى شهادة لى كامل

United States [Abu Areej] 12-07-2013 10:09 AM
لم توقف يا المريب في تعليقك!! هكذا الشعر المعبر البسيط العميق .. انصحك بالقراءة مرة وثانية وثالثة..

United States [المرتاب في الكيزان انسان] 12-07-2013 08:06 AM
الركاكة يا مريب هي تن يحكم بشة المكوعج اخلاقيا ودينيا الشعب السوادني.. وقمة الركاكة ان يكون نافع المعفن هو الامر والناهي.. وقمة قمة الركاكة ان يكون وزير دفاعنا نايم واسرائيل بتضرب جو في الخرطوم ولما يصحي يطلع لينا بنظرية الدفاع بالنظر.. والركاكة الماك غابيها ان ينحصر تفكير علي عثمان محمد طه في الانتقام من الشعب السوداني كلما تذكر ان والده رحمه الله كان رجلا سوانيا اصيلا يعمل بعرق وشرف في مهنة حارس في حديقة الحيوانات ويطعم الاسود اللحم.. ولكن عليا ذو الوجه الاسود والنفس الاكثر سوادا يغلق حديقة الحيوانات لانها تذكره بمن كان وكيف صار.. وبعدين يا المريب الركاكة هي ان تكون جداد الكتروني لا بتبيض ولا بتكاكي

United States [سم زعاف] 12-07-2013 07:26 AM
ركيك انت. أتحداك أ تاتي ببيت واحد من مثلها يا حقير

United States [جبور] 12-07-2013 01:57 AM
دجاجه نتنه

United States [ابونازك البطحاني المغترب جبر] 12-06-2013 10:48 PM
ركيك انت يالمريب ، واضح جداد اكتروني مغترب .

United States [ناصح] 12-06-2013 10:21 PM
ترك فوقك بومة ياعديم الفهم ومتفلسف .
دايرو يكتب ليك معلقة ؟


#848766 [الفاروق]
4.00/5 (2 صوت)

12-06-2013 09:13 PM
شكرا للشاعر هاشم صديق يديك العافية ونستأذنه في في نشر القصيدة بالموقع الذي يتحدث بصوت الشعب ولا صوت يعلو علي صوت الشعب


#848761 [Girfina]
5.00/5 (1 صوت)

12-06-2013 09:06 PM
كُلْ شيتاً عكس روحو ونكر سيدها شَمِس بتجينا بوشيها بقت بتجينا بي ( ....... )


#848757 [shrifdahb]
4.75/5 (4 صوت)

12-06-2013 08:55 PM
تحية لشاعر ملحمة اكتبوبر الاستاذ الكبير هاشم صديق ، ليت الفنان الكبير ابوعركي البخيت يقوم بتلحين هذه القصيدة المعّبرة .


هاشم صديق
هاشم صديق

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة