المقالات
السياسة
بت البحر الاسباني
بت البحر الاسباني
12-06-2013 11:09 PM

بت البحر الاسباني
(1)
في طرفك يظهر
نبض البحر الآسر
ظاهر تاج كسرى
وجلال الإيوان
ظاهرة الخلجان
ملونة كل الصحرا
أعلام بلون الساحل
وبوارج وتيجان
وملاعب جان
ودنانيرن زي ما قال المتنبي
فرّت من كل بنان
وصبت من عسل العنب
السابل من شدرو المليان
شدرو الرويان
من طعم القدرة الرباني
الإتجلي في خلقك
زولن طيب وحاني
وإحساس لشاعر
وذوق لفنان
(2)
أكتب عنك طعم التاريخ ورماحو
الصبّ على العالم
آمالو وأفراحو
وسيوفو ورماحو
أكتب إنو البحر العربي حليفك
وإنو الأنجم على شطآنو
تحن لى طيفك
وإنك تاخدي لآليهو
وتهديها على كيفك
مرات تعدلي
مرات تبخلي
أو تكرمي لي ضيفك
(3)
يا بت البحر الأسباني
إتجلي على كيفك
يا معلومة
يا منغومة
يا ملغومة
يا خازنة أسرار التاريخ
في طرفك يا منظومة
صبي على صحرانا شهدك واستنينا
نقرن تاريخنا عبر خليج حسنك
ونجومو بالله أرجينا
نستنا إشارة مرحبا
نبحر في موج البحر الطامح
على صهوة فرس الحب الجامح
أو نهطل يوم على دارك في غيمة
أمطري وين مادرتي
يجيني خراجك يا ديمة
أرددو في شكل قصايد
وأغنيهو ترنيمة
وأسوي حجابن
يحجب عني ظلم الناس
وليالي لئيمة
ويلون شكل حياتي
ويضيفلها قيمة
(4)
يا بت البحر الأسباني إتولي عناني
إنت عزفت اللحن الإنساني
ومدحت الإنسان الأفريقي
وربطت كيانك بكياني
ورطنت رطانة أهلك
وعرفت أشواقي وحناني
يا عينة من خلق الرحمن الفنان
يا أطيب زول شفتو في
الغربة يبدد أحزاني
ويكشف بي نورو ظلمة وجداني
وأحجيهو بي عازة
الكانت في ذات يوم
تقدل بين بنوت أفريقيا
وتغني عربي ورطاني
يا أجمل زولن في الغربة
رطنت معاهو رطانة أهلو
وغنيتلو طنابيري
وألحاني
ووصفتلو طول النخل الشايل
في سوداني
وريح زهر المنقة
ولون الفجر الأم درماني
إحتشدت أعماقك بالخير
وعرفت هيامي وجنوني
وجناني
إتذكر يومداكا مدحت أفريقيا
أصل الإنسان
كلنا نحن أهل قلتي
أفريقيا نبضي ووجداني
أم العالم أفريقيا
حب وحنان
وكان طرفك يلمع
بي صدقن إنساني
ويرش حولك حسناً يشهد
إنك من جنس اللؤلؤ والمرجان
ويسبح بي قدرة من صنعك
لي خلقو نموذج سرياني
(5)
يا بنية الأسبان
حركتي فينا حنين
وحركت فينا حنان
يا البسمتك شطآن
يا الحاجبيك حيشان
كيفن يكون الزول
مخلوق ضحوك نعسان
في عالمن عابس
مشدود من الأركان
غيرك ومين زيك
يا الوردة في إنسان
أصلو العرب كانو
في الأندلس عاشقين
لا كانو يوم فاتحين
ولا كانو يوم غايرين
ولا كانو يوم غازين
كايسين قرب منك
ومن وجنتيك خايفين
يا أجمل الحلوين
يا ريتني يوم أعرف
لغة البحار في الحين
وأعوم في ذاك المضيق
طالب العديل والزين
أعوم في ذاك البحر
وألقى الجنات عايمين
شان يصلو لي برك
ويكونوا مسرورين
ويغنوا ليك بيتين
ويشيلوا شبالك
يا أجمل الحلوين
**********



د. عبدالرحيم عبدالحليم محمد
[email protected]


تعليقات 0 | إهداء 0 | زيارات 520

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




د. عبدالرحيم عبدالحليم محمد
مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة