ولد البلد
12-11-2013 07:17 AM

ولد البلد

آآآه يا بلد .. ومرق الولد
زفرات أحر من اللهب
آآآخخ يا بلد ... وصرخ الولد
أصلو اللهيب ولد الغضب
وآآآه يا بلد.... وسكت الولد
أصلو الولد عقلو التهب
وما فاكر الدنيا بتطير
وما راضي بالحال الخرب
واصلو الولد ولد البلد
رطاني زي شيخ العرب
وبهوي الشمال زي الجنوب
وزي الشرق وزي الغرب
اصلو البلد بلد الولد
واصلو الولد حابيها تب
أصلو الولد ولد البلد
وهبوه ل... زمناً صعب
زمن الأباطيل والعجب
زمن المتاهات والتعب
واصلو الولد عاشق التراب
الكان زمان فيهو اللعب
وعاشق تراب كل البلد
حتي التراب الفي الترب
يا ناس حرام .. صاح الولد
أصلو الحرام ولد الكضب
بالفارغة مليانة الرؤوس
ومقدودةزي أرهف قرب
وآآه يا بلد.. قالت كمان بت البلد
يا بلدي اصبر .. ليكا رب
ما البت كمان بت البلد
وزفوها ل....زمن الضهب
وآآه يا بلد ..... آآه يا بلد
يا بلدي اصبر واحتسب
يا الله يا كاشف الحجب
أهدينا مخرج للمطب*
آآه يا بلد ... قال الولد
يا نيلنا ما راسنا انشطب
و احترنا في امر العوام
واحترنا في امر النخب
وسألنا ل.... كل الحروف
في دفتر احوال الحقب

وآآه يا بلد.. قالوا السبب
حربوية سموها الحزب
سكينة في قلب البلد
مصنوعة من جهل الكتب
اصلو الحزب... ود الحزب
حربوية تقطع للدرب
كل ثانية لونا بينقلب
وفي رمشه اسمها بتقلب
مرات تقول اسما الحمار
اصلو الحمار برضي الضرب
مرات تقول اسما النعام
اصلو النعام بخشي الحرب
مرات تقول اسما الكلب
وتبري البجوعا بالغصب
ما العلة في جسد الحزب
والعلة في الراس والضنب

وآآآخ يا بلد.. قال الولد
احترنا في أمر القبب
يا االله يا احدٌ ...احد
نجينا من زيف الخطب
ومن كل حمال للحطب
ومن كل زول للدين يسب
ومن شيخ يحلل للنهب
ومن شيخ يكنز للدهب
ومن كل شواطين الحسب
ومن كل عفاريت النسب

وآآآخ يا بلد .. قال الولد
احترنا في امر الرتب*
يا ربي وقف للدموم
السا يلة ل .. فوق الركب
يا ربي ضمد للجراح
يا ربي فرج للكربَ
وآآآه يا بلد... آآه يا بلد
قول للعباد فجرك وجب


..

ضياء الدين مدثر رجب


تعليقات 0 | إهداء 0 | زيارات 1169

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




ضياء الدين مدثر رجب
مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة