ما بتتنحى
01-09-2011 04:24 PM

ما بتتنحى

رباح الصادق


ما بتتنحى

شعر رباح الصادق المهدي
لو يتنحى الضل عن سيده
أو قول الله يجافي مسيده
ما بتتنحى
--
يا الفي الدنيا دوام رافعنا
يا اليوم القايل شافعنا
يا الفي ضراعك شايل وطنا تحنو عليه
قايد نارو وضاوي شموعه
يوم اليبكي تكفكف ليه دموعه
طابب وجعه وجافي القوت شان همك جوعه
رامم صدعه
ويوم شتوه تراعي رجوعه
شفتك يوم ضلعك في ضلوعه
يوم وصيتو
وقتلو الفجر الغايب أرجى طلوعه
أنا حمدتك يا محبوبي
في عينيّ بشوفك تغسل هذا الدرن القيّل
وهيّت وبيّت
هدي الضلمة الطالت مدت شدت
هذا الجلد الكدّب نيّل
سوف يفرهد، يصبح متل بشرة العيّل
يومن أشوفو بعيني قريّب
أحس برشاشو كأنه مسيّل
هذا كلاما طوّل
ليس امبارح لا عامن أوّل
قالوا قليبك ما بتأول
طالت بيك السكة
حبك في إيديك يتشكّى
بتروا طروفه
وهجموا عليه عشان يندك!
وبرضك ما كضبت قليبك، ما بتتحوّل
كنت الماسكو بإيدو تسلّم
يوم الصبت مهجك كنت عليه تتألم
يا الجافيت النوم في شفقة على البتظلم
يا العاديت الراحة الرقدة
يا الكسرت سنينك حطبا
شان الشعلة تظل متقدة
ضقت وضايق..كم سلبوك
كم سجنوك
وفي بيت الأشباح أسروك
كم عدموك القرش الجاري
كم شتموك
كم ظلموك.. كم فكولك كلبا جايع
طاوي وضايع
واقف فيه بعشوما ضاري
كم جهلوك..
وكل العالم عنك داري
إنت منارة..
وإنت بشارة
وإنت عمارة
ووالله خسارة الدر في ايد كمكالي
---
شن الشايفو دحين.. كالمنا؟
شفتو مقيّد برسف نحو الهاوية؟
وإنت مبلّم
والأحباب حولك تتقلّم؟
شفت صقور الموت الحامت فوقه؟
شفت الوبا قد فجّر كل عروقه؟
شفت النايحة الكربت وسطها تبكي شروقه؟
شفت الناس اللطمت خدها..
شفت الجوع الكاتل دهمه
وشفت حريقه الهايل شب؟
شفت الكبة؟
شفت اسلامنا انرب؟
ناس القيقر مسكوا القبة
مسرحوا لينا الكسرة وشرطوا الجبة
تفلو صعوطم فيها وخربت خربة؟
أصلها طينةً ويوت انهدت
يوت انسدّت.. وعادت
انت وانحنا الروح الشادت
باكر روحا ترد تتطايب
تحرق عرق الطِبّة
باكر قرب ما دام فينا محبة
نجلي الدين الابيض توبو
نقول لاب لهب البشّر فينا انتبّ.. وتبا تبا
ونخزي العدموا الحبة..
---
شن الشايفو دحين يا الطيب ضوقو؟
شفت طبيبه العاجز يلفى حروقه
شفت الروح الفاضت..ودّع..
ودّع.. يا حليله.. يا حليلا بروقه
قول بي الله الجابك لينا تسد الفرقة
قول بي الله الخلقك صادق يوم الخلقة
قول بالله..
كيف تغادر وطنا ساكن فيك؟
يا الحادقه وهو حادقك
كيف مسيرا دون سراجك؟
هدي وحوش الحلة النهشت لحمنا فغرت فاها
باكر تقضي علينا.. تبرطع تفرح من الجاها
والملايين الإنت رجاها
وفي إيديك تستنى نجاها
ومن سيرتك بتسوي حجاها..
مسكت فيك وقالت لو السما تترنح
عنك ما بتتزحزح
--
إنت خبيرنا
وما بنتضهّب بي قدامك
ماذا تقصد بيه كلامك؟
هل تتنحى؟
هل ستزيدا علينا الوحة؟
ما بتتنحى
لو يتنحى الضل عن سيده
أو قول الله يجافي مسيده
أو البقرة تتلب بي قد إبرة
أو تنزح تسافر غادي سلاسل مرة
أو أم موسى تجافي وليدا
أو النخلة تحتّو جريدا
أو الريم تهجر لي جيدا
ما بتتنحى ..


تعليقات 14 | إهداء 0 | زيارات 3241

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#75756 [بانقا جاهوري]
0.00/5 (0 صوت)

01-11-2011 12:37 PM
لو يتنحى الضل عن سيده
أو قول الله يجافي مسيده
ما بتتنحى\"
الخطاب دة للصادق؟؟؟؟؟


#75308 [الغاضبة]
0.00/5 (0 صوت)

01-10-2011 07:10 PM
انت جاي من وين من اسمك سيف الحق بتكون كوز مليون الملية، ومنو الجاب لينا الكيزان غير الصادق عشان كدا بدافع عنو، يا رب يتنحى ويتنحى ويتنحى، تنحيهو وعدم تنحيهو كلو واحد......


#75060 [سيف الحق]
0.00/5 (0 صوت)

01-10-2011 12:48 PM

يا أب أحمد .. دق المحلب .. للكيزان
واقعد نتف شعرات راسك يا *****
نفاق أمثالك .. والغضبانة ..
سبب البلوة على السودان
كان داير تعرف مين الضيع للأوطان
ومين القسم أرضنا يا عميان .. كيمان كيمان
نحيل موضوعك .. سريعا عاجل .. لي (قرفان)


#74915 [السوداني]
0.00/5 (0 صوت)

01-10-2011 09:39 AM
يا با شمهندس رباح مفروض الإمام فعلاً يتنحي مش عشان زي ما بتقول الغضبانة ولكن عشان هو كتير شديد علي السودانيين ... أنا ما حزب أمة ولا أنصاري ولكن زول بقرأ وبفهم والحمد لله، الزول ده كتير علينا نحن السودانيين، شبهنا يا هو البشير وبالكتير الترابي... هسا ما سكتنا علي زيادات البنزين والسكر ... الصادق ده الرجل الوحيد الكان بطلع المنبر زمن التسعينات ينتقد النظام وينزل علي المعتقل طوالي وكت ما كان في غاضب ولا غاضبة وكت كان النفس معدود ... وقف راجل براه لا خاف لا لبد ولا استخدم الساتر ... ما بنستاهلك .... كتير علينا ... شفت تمزيق السودان من التسعينات وحذرتنا وحذرتهم لكن ما سمعنا كلامك ... جزاك عند ربنا ونحن الجاحدين ديل ما بننصفك .... وعشان ما حمدنا النعمة زمان وكت الناس لما طلعت عشان زيادة السكر ما واجهتهم بالرصاص ولا كستر يدين أولاد وبنات زعيم المعارضة شيخ علي لكن بكل إحترام للشعب ولكلمته لغيت زيادة الاسعار... كنا مكرمين ... وما حمدنا الله عشان كده الجحود بتاعنا طير النعمة....


#74859 [الغاضبة]
0.00/5 (0 صوت)

01-10-2011 08:29 AM
واسمح لي أن أردد معاك يا أبو أحمد

لازم يتنحى ومن زمان
لانه سبب جية الكيزان
ولانه سبب ضيعة الأوطان
يا بت سيدى فات زمن المهدية
وزمن الحكم البدوه هدية
ضيعتونا زمان قبل نميرى والإشتراكية
قول ليه إتنحى
عشان أولادنا أرجوك تتنحى
عشان خاطرنا وخاطر الأمة
أرجوك تتنحى
عشان الظلم الفينا جاء منك
ومعليش عازرينك
ما عارف الدابى الترابى أظنك
وما عارف نسيبك نصيبك وياهو جنك
الشعب عايز يعيش أرحمنا منك :D


#74858 [الغاضبة]
0.00/5 (0 صوت)

01-10-2011 08:28 AM
يا الله عليك أيتها الشاعرة، لماذا لا يتنحى ماذا فعل بهذه الأمة التي وثقت فيه ومنحته الفرصة مرتين، في ستين الف داهية هو وكل القيادات الهزيلة التي سلمت أمر هذه الأمة إلى عصابة الانقاذ، يتنحى ويتنحى ولا فرق بينه وبين البشير والترابي

والملايين الإنت رجاها
وفي إيديك تستنى نجاها
ومن سيرتك بتسوي حجاها..
مسكت فيك وقالت لو السما تترنح
عنك ما بتتزحزح

هههااا هذا كان زمان يا اخت رباح أما اليوم لا اعتقد أن الممدوح في هذه القصيدة العصماء ينتظر منه شيئا، هل نثق فيهو مرة أخرى ليلقينا في النار مرة آخرى


#74838 [وحيد]
0.00/5 (0 صوت)

01-10-2011 07:44 AM
الله اكبر و لله الحمد
نصر الله الامام ابو السودان
و نقول للحاقدين المفسدين في الارض و الذين يريدون ان يحطموا و يشوهوا رموز السودان و رجاله المخلصين حتي يحوم في ارض السودان الرخم و البوم و الغربان و الحدي ... نقول لهم كما نتوقع ان يقول لهم الامام : هدانا الله و اياكم .. و نقول لهم كما يقول الامام من وحي التنزيل \" تعالوا الي كلمة سواء\" ... لو كان لهم عقول يدركون بها او ابصار يرون بها!


#74771 [هيثم]
0.00/5 (0 صوت)

01-10-2011 12:57 AM
انا ما حزب امه ولا كنت منظم في يوم من الايام ... لكن والله احب الصادق حب شديد واتمنى من كل قلبي ان لا يتنحى . هو فعلا صادق وامين ووطني غيور الله يطول عمرو ويمد في اياموا


#74747 [mutasim]
0.00/5 (0 صوت)

01-09-2011 11:23 PM
ازرع متر فى ارض ا لمهدى نديك متر فى الجنه. يا سبحان الله. ده السبب الاساسى للتنحى. لانو الكضبه دى تانى ما ماشه.خلاص زمانا فات و غنايا مات.


#74707 [عدلان يوسف ]
0.00/5 (0 صوت)

01-09-2011 09:38 PM
القصيدة مؤثرة أختي رباح ..ووتضاف إلى رصيدك النضالي الثر ... وأنا أعرف موهبتك الأدبية الكبيرة كما أعرف وطنيتك ، وتصديك للسلطة عندما التزم الرجال بيوتهم ...ولكن لدي سؤال صريح : من المسؤول عن تأخير الهبة الشعبية أكثر من عشرين عاما .. النظام الفاشي للإنقاذ ... أم المناورات الطويلة والمعقدة للسيد الصادق مع النظام .. لم يحرك جماهيره للشارع .. ولم يناد يوما يالخروج المباشر للشارع .. والأسوأ أن النظام عندما يكون في أضعف أوقاته يمد له السيد الصادق حبل النجاة بمبادرات نداء الوطن وغيرها .. الحقيقة لا تتجزأ ..


ردود على عدلان يوسف
Sudan [سووودانى] 01-10-2011 03:52 PM
السيد الصادق رجل محترم ووطنى ما فى شك.لكنه متردد كثيرا و مثالى فى تفكيره
هؤلاء الكيزان ما بينفع معاهم الا اللؤم .
الصادق المهدى.... .هذه هى الايام المثالية لدك عروش المتاجرين باسم الدين.


#74645 [dr al-kourdofani]
0.00/5 (0 صوت)

01-09-2011 07:39 PM
He should go and rest, dear Rabah, your father is addicted to failure, he never started a project and finished it, being study, political alliance or an agreement. This does not mean he is not a good man, but he is not a good politician. Why? because to be a good politician you have to read and implement what Michavelli wrote in his book \"the Prince\"; which I believe your uncle-in-law has done, he might use his resources. So it is clear and bluntly that your dear Man can not be a thinker and at the same time a ruler. These two cannot go together, so let him thinks he is a thinker . Ultimately he is human and intending to pass you the heritage that he inherited and you all think that you are born to rule.


#74610 [عبدالعليم عبدالرحمن]
0.00/5 (0 صوت)

01-09-2011 05:36 PM
رحم الله الموصي والموصى به


#74580 [ود تورشين ]
0.00/5 (0 صوت)

01-09-2011 04:43 PM
نعم الوالد .. ونعم الذرية .. ولن نصادق إلا الصادق .. فقد جربنا الكذبة عشرون عاماً أو يزيد
فالرائد لا يكذب أهله .. وهكذا أبوك يا رباح ...


#74576 [أبو احمد ]
0.00/5 (0 صوت)

01-09-2011 04:39 PM
لازم يتنحى ومن زمان
لانه سبب جية الكيزان
ولانه سبب ضيعة الأوطان
يا بت سيدى فات زمن المهدية
وزمن الحكم البدوه هدية
ضيعتونا زمان قبل نميرى والإشتراكية
قول ليه إتنحى
عشان أولادنا أرجوك تتنحى
عشان خاطرنا وخاطر الأمة
أرجوك تتنحى
عشان الظلم الفينا جاء منك
ومعليش عازرينك
ما عارف الدابى الترابى أظنك
وما عارف نسيبك نصيبك وياهو جنك
الشعب عايز يعيش أرحمنا منك


ردود على أبو احمد
Saudi Arabia [علم الدين] 05-28-2011 12:07 AM
ياسلام على الكلام على الكلام
الحلو وتسلم الاصابع

Saudi Arabia [السر عمر حامد] 01-09-2011 11:41 PM
رغم احساسك ومقدرين لكم ولاكن كان السودان فى ايدكم ايه جنينا ومن الذى جاب البشير غير هلم جره عزرا ثم عزرا لكم


رباح الصادق
رباح الصادق

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة