شر البلية ما يضحك
01-11-2011 01:15 AM

شر البلية ما يضحك

عبد اللطيف البوني
[email protected]

(1 )
احد اعمامنا جاء ذات يوم راكبا حماره وهو (طاشم) ويومها كانت الاندايات تدفع ضريبة سنوية راتبة للسلطات المحلية اي انها مرخصة فمر على الجماعة وهم يتجمعون لصلاة المغرب فسال عن الحاصل فقيل له انها صلاة المغرب فنهر حماره للاسراع وهو يقول (الليلة حرم من المغرب) ولعل هذا الذي حدث في الجنوب اذ عندما قرعت الكنائس اجراسها لصلاة يوم الاحد لم يابه الناس لها لانهم كانوا يحتشدون للادلاء باصواتهم في عملية الاستفتاء فكان لسان حالهم (اليوم حرم منها) اوربما احد القساوسة من جماعة فقه الضرورة (مثل الزول بتاعنا) افتى لهم بتقديم التصويت على الصلاة وفي ذات المناسبة مناسبة الاستفتاء جاء في الاخبار ان السلطات في بعض مدن الجنوب اغلقت الخمارات ومنعت بيع الخمر حتى لا يطشم الناس ويهملون الاستفتاء ف(اليوم امر وغدا خمر) كل هذا يوضح ان الاستفتاء وجد الاهتمام اللائق به عند اخوتنا الجنوبيين فتركوا لها الصلاة وتركوا له الخمر انه فعلا يوم تاريخي لانه لم يشهد لادوشمان ولا طشمان
(2 )
السيد اتيم قرنق نائب رئيس المجلس الوطني والذي كان يصنف من حمائم الحركة يبدو انه في غياب الصقور المعروفين والمنشغلين بالاستفتاء تحول هذة الايام الي صقر فترك اللغة الرزينة الي اللغة العنيفة ولكنه ظل محتفظا بنبرته الهادئة في كل الاحوال وفي مقابلة له مع الشروق مساء الاحد عندما قالت له المزيعة ان الخرطوم ابدت حسن النية في ترحيبها بسير عمليات الاقتراع بسلام مما يمهد لتفاهم افضل بعد الاستفتاء قال لها ان جماعة المؤتمر مثل (القمرتية ) اي الذين يلعبون الميسر فالواحد منهم عندما ينهزم ويفقد ماله يصر على استعادته بالقوة (اي يخرخر) مشيرا بذلك الي قضية ابيي
(3 )
احد العرسان كان مضطربا ضيق النفس يوم زواجه فسئل عن اسباب هذا الاضطراب فقال (هذة اول مرة اتزوج فيها) فالناس دوما اعداء ماجهلوا ولعل هذا يفسر لنا الاضطراب في مشاعر كل الشماليين فالذي يتعرض له السودان شئ جديد وغير مجرب واول مرة يحدث له فالسودان شهد الانقلابات والانتخابات والمظاهرات والحروبات ولكنه لم يشهد انفصالا فان كان الجنوبيين استقبلوا هذا القادم الجديد بالافراح والليالي الملاح يكون من الطبيعي ان يقابله الشماليون بالحزن والحداد والتوشح بالسواد والوجوم والدهشة لانه يفتح بابا للمجهول في كل الاتجاهات فالوحدة رغم الحروبات والاضرابات الا انها تدخل في باب (الجن التعرفه احسن من الجن ما بتعرفه)
( 4 )
من اكليشهات الوحدة خريطة المليون ميل وان السودان اكبر الاقطار الافريقية والعربية مساحة ومنقو لاعاش من يفصلنا بعد استقلال الجنوب سيكون السودان الثاني من حيث المساحة في افريقيا بعد الجزائر والثالث على المستوى العربي بعد الجزائر والسعودية (برضو في المربع الذهبي) ولكن في قصيدة منقو كان (اللاعاش) المشار اليه هو المستعمر ولكن السؤال من هو هذا (اللاعاش ) الان ؟


تعليقات 25 | إهداء 0 | زيارات 4713

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#76770 [مامون]
1.00/5 (1 صوت)

01-13-2011 01:59 AM
عجبا لسودان يطبل ابنائه لمثل كاتب هذا المقال العنصري الرخيص وهذا ما اضاع السودان لانكم لاتنظروا الى الاخر كبشر وانما تنظروا الى الزرع والضرع والمساحة كأنكم سماسرة او تجار -----ولا يستغرب الناظر اليكم ان فرختم ابناء حزب البوني ومن لف لفه لكي يسمسروا وطن المليون ميل الذي تعجبكم مساحته ولا يعجبكم سكانه اولي البشرة او الدين او العرق الذي لا يشبهكم ويبيعوا كل شئ في سبيل البقاء الرخيص في السلطة وجاء البوني بهذا المقال لكي يرفه عنا-----على نظام حلمنتيش يعني-------وهو برنامج كان يقدمه التلفزيون السوداني من كوادر جبهجية والواضح ان الغرض منه امتصاص غضب الشارع------فأضحك يا شعب اولاد البحر على هؤلاء الجنوبيين ولكن لاتقولوا بقم في من تسبب في هذه الكارثة وامرحي يا ايام المرح.


#76669 [مهيرة بت عبود]
1.00/5 (1 صوت)

01-12-2011 08:16 PM
الجنوبيين طلعو من حضن الحكومات السودانية الشمالية المستبدة العنصرية لحضن امريكا و اسرائيل.. ياتو احن عليكم يا جنوبيين حضن الام ولا حضن مرة الاب؟ طبعا حيقولا كلا و الف كلا طبعا حضن امريكا.. لكن امريكا اهم و اكبر دولة استعمارية في التاريخ ..
ما ننسى زمان لما كانت بتعبي السفن ب الاف الافارقة و تشغلهم رقيق في اراضيه بدون مقابل و ب معاملة سيئة و كانو بعاملو الكلاب احسن منهم..
امريكا ما غيرت نظرتها للافارقة.. مجرد شعوب زرقاء دنيئة خلقت لخدمتهم و الثروات الفي افريقيا شايفين انها كتيرة على الافارقة و امريكا اولى بها عشان هم بيض و شعرهم اصفر و عيونهم لبنيات ..
حا يجي يوم من الايام الجنوبيين يقولو يحليل الحكومات السودانية الشمالية المستبدة بعد ما تمارس معاهم امريكا شغل الرقيق المارستو مع اجدادنا الافارقة قبل ميات السنين.. وزي العراققيين اللي كانو شايفين صدام طاغية و مستبد, بعد جاتم ماما امريكا بقو يقولو يااااااااااااا حليل صدام


#76578 [ابو سامي]
1.00/5 (1 صوت)

01-12-2011 05:16 PM
من يوم قام الوزير النحرير وزير تربية الانقاذ الاول وبليل فقرأ المقررات المدرسية مع العلم أنه ليس خبيرا في مجال المناهج وفي الصباح أعلن الغاء جميع المناهج بالمراحل الدراسية المختلفة ووضع مناهجا مسخا من المناهج حيث كان التلاميذ بدلا من ترديد نشيد العلم في طابور الصباح ونشيد نحن روحان حللنا بدنا * منقو قل لا عاش من يفصلنا وهم خارجين للافطار من ذلك اليوم بدأ فعلا فصل الجنوب عن الشمال خاصة عندما تحركت المتحركات نحو الجنوب تحرق القرى الامنة وتزرع الموت في أرجاءها وتنشر الرعب والفزع في القلوب عموما نقول لا عاش من كان سببا في انفصال


#76238 [ام ابراهيم]
1.00/5 (1 صوت)

01-12-2011 09:10 AM
بعد التحية والاحترام للبروف---والله نحن كمان بلغة باقان اموم --باي باي --- ونامل ان يتوحد اهل السياسة في الشمال ونطمئن نحن كربات بيوت على مستقبل ابنائنا


#76168 [لععغغخهعغخها]
1.00/5 (1 صوت)

01-12-2011 07:02 AM
ياGAMAR حارب خمسين سنة بلا كلل او ملل بعداك بنديك حق تقرير المصير....ولاده الدول ما بالجعجعة فى النت


#76142 [حلفاوي]
1.00/5 (1 صوت)

01-12-2011 02:34 AM
احد العرسان كان مضطربا ضيق النفس يوم زواجه فسئل عن اسباب هذا الاضطراب فقال (هذة اول مرة اتزوج فيها) فالناس دوما اعداء ماجهلوا ولعل هذا يفسر لنا الاضطراب في مشاعر كل الشماليين فالذي يتعرض له السودان شئ جديد وغير مجرب واول مرة يحدث له فالسودان شهد الانقلابات والانتخابات والمظاهرات والحروبات ولكنه لم يشهد انفصالا فان كان الجنوبيين استقبلوا هذا القادم الجديد بالافراح والليالي الملاح يكون من الطبيعي ان يقابله الشماليون بالحزن والحداد والتوشح بالسواد والوجوم والدهشة لانه يفتح بابا للمجهول في كل الاتجاهات فالوحدة رغم الحروبات والاضرابات الا انها تدخل في باب (الجن التعرفه احسن من الجن ما بتعرفه)




يعني لازم نجرب الحاجه عشان تبقى عااادي زي كوز العلقم ... طيب يابو الفهايم بي فاخورتك المنديه دي رايك شنو نعمل ابادة حزب كامل اسموا كواويز مشتقات الجبهه من اتفه شافع لى اتفه **** ... وعااادي زي الماحصل شي وادينا بنجرب ...
يا خوي انت اتخرجت من ياتو روضه ... وكيف رضو يخلوك تفوتم ... راجع المشكله دي وريحنا من هداوة اعصابك وسطحية افكارك ... ابقى طيب


#76124 [M.E.Osman]
1.00/5 (1 صوت)

01-12-2011 12:42 AM
اللا عاش هو حزب المؤتمر والوطنى ....


#75981 [Gamar]
1.00/5 (1 صوت)

01-11-2011 06:04 PM
اولا دعوني اعلق علي التعليقات دي
انا دارفوري والبطبع اشجع المنتخب الجنوبيي.
دائما ما اقول ان الشماليين ما بفهموا الا الساعة 12
انظر ليهم كيفن بهضربوا
انتو شفتوا حاجة
انتظروا حتي تشوفوا كيف نفرح بانفصالنا منكم
نفضل ان نكون جزء من الجنوب وتحت حكمهم افضل لينا من حكم دجال الدين
عرفنا دينكم شنوا واخلاقكم وبعدين ارصدتكم ببنوك برة
برضو دين
باي باي انحن الدولة رقم 194 عالميا
و 55 افريقيا
كل منا سيرتدي لباس بالرقم 194 و 55
باي باي شمال
انا ا لادارفوري


#75969 [ام محمد]
1.00/5 (1 صوت)

01-11-2011 05:49 PM
نبرة مقالك اليوم تدل على انك خلاص بديت تتيقن وتصبر وتستغفر...وتفوق من الصدمة...لكن فى مقالاتك الفاتت البشتنة كانت واضحة عليك ..الله يصبرك يابروف ويصبرنا وانا لله وان اليه راجعون...والحى ابقى من الميت...والله يجبر كسرنا وما يفجعنا فى عزيز لنا...والناس بعد ده ترفع الفراش وتلتفت لحال شمالها....وحكومة السجم دى الجفلن التخليهن والتقرع الواقفات على قول الفاتح جبرا...الحكومة بتبشرنا من حسى انو السودان ح ينقسم لخمس دول لانو امريكا عايزة كدة ...امريكا واللاهم العايزين كده ....البسوها بيدهم والبجيهم من الله يقولو ليك لا دى من امريكا...والمعارضة نايمة فى العسل ومنتظرة الشعب ينتفض زى كل مرة ويقدم ليها كراسى الحكم على طبق من دهب...فوقو يااحزاب ويا معارضة الكيزان حولو الشعب لطيور داجنة على قول بت ابو زيد...


#75913 [قرفان من الكيزان]
1.00/5 (1 صوت)

01-11-2011 04:15 PM
الدعوان
===============


1/ ابو رماز


2/ العطبراوى



أولا الموقع للنقاش وليس للاساءة وقلة الادب ___ تخاطبون بروفيسور ____ يجب

الاحترام والتقدير والمناقشة بمستوى لائق _______


ثانيا العيب ليس فى د. البونى أوأى كاتب يكتب فى هذا الموقع __ العيب فى فهمكم


وشلاقتكم وتلقفكم لاى موضوع وكأنكم مفوضون للدفاع عن حكومة السجم والرماد

نخن دائما فى الموقع ونتابع بدقة ___ الاسمين النكرة معروفين لدينا ولدى أى

قارىء ومتابع لهذا الموقع __ تأدبوا واحترموا انفسكم وأقرأوا الموضوع اكثر من

مرة لتفهموا المحتوى والمقصود ___ لهذه الاسباب تم اختراع (درس العصر) للذين

من امثالكم ______ وكفى _____ اعتذارنا للبروف ___ امسحها فى وجهنا_____


ردود على قرفان من الكيزان
United Arab Emirates [أبورماز] 01-12-2011 08:29 AM
الله يسامحك يا قرفان الكيزان ..و لا أخفيك سرا إن قلت لك لقد ضربت إساتك لى فى عصب إدراكى .. لكن الحلم عند الغضب فضيله .. وحتى أعطيك فرصه للمراجعه أوضح :

1/ أننى لم أتناول موضوع المقال من أساسه .. إنما تناولت حديث بروفيسور البونى لقناة الشروق مساء يوم الأثنين الموافق 10/1/2011 الساعه 6 م بتوقيت قرينتش وانتهزت ذكره لهذه القناة فى مقاله وطرحت رأيى فيما قاله تلك الليله .

2/ أننى فى حياتى أكره ثلاث الساسه والسياسه والسوسه ..وكل القريبين منى يعرفون هذه الحقيقه .. وحتى ولوجى لهذا الموقع ما كان إلا بعد أن إجتثثت من وطنى وعملى وحرمت من أبنائى وأسرتى ثم لما شعرت أن وطن أبنائى سوف يضيع ولجت هذا الموقع لأضعف الإيمان فى إزالة المنكر ...

3/ أستاذى عبداللطيف لم أتطاول عليه ولم أسئ له إنما كنت محسنا جدا وأنا أختار إسلوب دعابته فى وداعى له

4/ نصيحة لك لوجه الله تعالى .. حاول أن تكون دائما مظلوما لا ظالما .. مساءا لا مسيئا محبوبا لا مكروها واضحا لا غامضا .. وأخيرا .. لاتنه عن خلق وتأتى بمثله ....


#75842 [وليد دارفور]
1.00/5 (1 صوت)

01-11-2011 02:04 PM
اللاعاش يا دكتور

هو كلنا عدا الذين يعيشون رغم الغلاء و الذين يلعنون الناس في صحفهم دون رقيب والذين يفتحون حساباتهم في بنك بعييييييييييد.


#75829 [سودانية]
1.00/5 (1 صوت)

01-11-2011 01:54 PM
لا افهم سبب الشعور بالراحة لانفصال الجنوب وكأن الامر هو التخلص من منقو واخوانه بأي شكل ونسيان ان ما سيذهب به الجنوبيون حال الانفصال هي ارض السودان التي لكل مواطن جنوبي او شمال الحق الكامل فيها وليس من حق اي حكومة كانت ان تتنازل عن اي شبر من ارض الوطن تحت مسميات اختارتها واعتقدت انها حل لمشكلة واذا كان الشعب واعيا كما تقول لفكر الف مرة في مساءلة الحكومة عن فرزها لارض الجنوب واعطاءها للجنوبيين نعم هم مواطنين لهم الحق في الجنوب وايضا في الشمال كما ان للشماليين وكل سوداني الحق في كل ارض السودان وهذا ما يكفله الدستور وحزن كل سوداني الان نابع من فقد الارض وبتر الوطن ونبذ ابناءه بعيدا


#75817 [ابو دعاء]
1.00/5 (1 صوت)

01-11-2011 01:45 PM
يا اخوان السلام عليكم .الشغلانه ماكبير كيمان الجنوب انفصل حلايب انفصلت دارفور والشرق و...و في الطريق (الجفلن خلهن اقرع الواردات) نحن المساحه الكبيره دي بدون تنميه وتعمير وتعايش سلمي وقبول بعض مافي داعي ليها الافضل نقسمه والحشاش يملي شبكته والمواطنين يشوفو الدوله الاكثر استقرار وامن ورفاهيه يطلبو العيش فيها من دون مشاكل ولانفتش للاسباب _المؤتمر الوطني -الاحزاب


#75806 [wagdy]
1.00/5 (1 صوت)

01-11-2011 01:33 PM
كيف و وين ح تكون اول مباراة فى كرة القدم بين منتخبى جنوب الوادى و جنوب جنوب الوادى


#75796 [ام الحسن ]
1.00/5 (1 صوت)

01-11-2011 01:20 PM
لو فكر الشماليون بقليل من العقل المنفتح لوجدوا انفسهم يفكرون ويحسون بفرحة الجنوبي بالإنفصال فهو ليس ضد الشمالى الفرد ولكن الإنفصال لسوء القياديين في الحكومات السابقة والحالية لتوفير الحكم العادل بين الناس ولقد وجد الجنوبيين الحل في الإنفصال فلنفرح لهم لانهم إنتصروا لنفسهم وبقى علينا نحن الشمالين ان نقوم بدورنا والتخلص من الحكم الظالم وما سيجرنا له من هوس دينى وظلم دون إستحياء مما فعلوه حتى الأن


#75785 [الحقيقه]
1.00/5 (1 صوت)

01-11-2011 01:04 PM
عنصرية الشماليين واصرارهم عليها لدرجة الغباء سبب تفتيت السودان الي اربع دول دولة دارفور ودولة البجا وجبال النوبه وهذا واقع نسبة للعنصريه المتبعه في حكم السودان منذ الاستقلال 8 علي الشماليين لوم انفسهم و العمل علي تعديل الصوره والاعتراف بالاخطاء التي ارتكبت في حق الشعب السوداني في الغرب والشرق والجنوب وهذا يتطلب الشجاعه للحفاظ علي وحدة السودان والا سيكون الشماليين اول الخاسرين واكثر المتضررين من تفتيت السودان


#75753 [أبورماز]
1.00/5 (1 صوت)

01-11-2011 12:35 PM
بروف البونى :
على قول قناة الشروق .. شهدتك البارحه وقد رميت الشعب السودانى كله منذ عهد ترهاقا وإلى عهد (العباسيين) بجريرة تقرير المصير ووالله ورغم سمة الصلاة التى تزين وجهك!! إلا أننى فوجئت أن يصدر هذا الحديث ممن هو فى قامتك عندى ـ فأنا أشاهد وأقرأ لك ـ أولا : هناك فرق بين القول والفعل ثانيا هناك فى عالم السياسه ما تسمونه أنتم بالمناوره .. فترهاقا وما بعده ربما كانوا يناورون أو يقولون ولا يفعلون لكن ( أهلنا العباسيين ) أقاموا المنابر والإنتباهات ودبجوا الإتفاقيات وأشهدوا عليها الخواجات بل إنهم قرروا إنفصال الجنوب قبل الجنوبيين أنفسهم ..
لذا كانت دهشتى وأنت تقرر أن حق تقرير المصير تركة منذ سبعة آلاف سنه !!!! أوهكذا دواخلك بروف البونى؟؟ .. أنت لا تخسر شيئا لكنى أنا خسرت كبيرا لى فألف تحية لك وألف أمنية جميله لما قدمته لى وكتبته لى فى أيام خلت .. وأخيرا وداعا قلم وطلة البروفيسور عبداللطيف البونى وإنى والله لحزين ..


#75722 [العطبراوي]
1.00/5 (1 صوت)

01-11-2011 12:00 PM
الأخ . د. البوني.
أريد أن أشير إلى نقطة واحدة فقط فقه الضرورة ( الزول بتاعنا)، عندما احتدم أمر الإنفصال الذي هو محرم ( باتفاق القرضاوي والأزهرين) ما زلتم تقتاتون في سير العلماء والتجني عليهم ، ولما هذه الاستزدواجيه والاستهتار بفقه الضرورة، لماذا هذا ؟ من أجل أن نبتسم على خفة دمك، ألم تسمع حديث ( الويل لمضحك القوم) وهذا هو المقصود بالاستهتار على قيم الدين، وتبخيص علمائه ومصطلحاته، أتقوا الله أفصلوا ما شئتم من السودان ، وأتركوا ما شئتم ، ولكن لا تنقصنا لنا أصولنا ديننا ، ولا تستهتروا بعلمائنا.


#75698 [دفع الله إشيقر]
1.00/5 (1 صوت)

01-11-2011 11:29 AM
اللاعاش يا دكتور في هذه الحالة جميع الأحزاب والحكومات التي تعاقبت على حكم السودان منذ خروج الإنجليز.


#75682 [ابوعصماء]
1.00/5 (1 صوت)

01-11-2011 11:06 AM
د. البونى انشاء الله الجنوبيون ربنا يسهل عليهم و لينا يمهل ... ولكن المرجوا من هذه السلطة وقوى المعارضة ان تترك الخصام و تجلس على مائدة المفاوضات لحل مشاكل الشعب السودانى الفضل و اهما قضية دارفور و مشاكل مزارعى الجزيرة و الملاك وكان المشكلة الاقتصادية واهم حاجة الصينية مش صينية القندول و لا صوانى القزاز المقززة ولكن صينية البيت و التى هى الاساس و الاهم الاكبر لكل سودانى وكذلك بقية المطلوبات و من صحة و تعليم وكفاية سحقا لمحمد احمد المطحون اصلا من زمان وياريت تلقى هذه الامنيات من يرعاها وكان الله فى عون محمد احمد وربنا يحفظ السودان الفضل آميييييييييييين يارب ودمتم ;) ;) ;) ;)


#75629 [عبدالمنعم ]
1.00/5 (1 صوت)

01-11-2011 09:59 AM
يا دكتور سلام وتحية

فضلا راجع بريدك الالكتروني

مع الاحترام


#75621 [معاويه]
1.00/5 (1 صوت)

01-11-2011 09:51 AM
منقو عاش من يفصلنا ..........باي باي جوزيف وملوال
بيني وبينكم لقينا من الجنوب شنو غير الحرب والدمار ؟؟
قشه ماتعتر ليكم وكدي النشوف الوعود الامريكيه لاعمار الجنوب....


#75539 [خالد فارس]
1.00/5 (1 صوت)

01-11-2011 08:12 AM
الاخ الدكتور البوني انت عارف انا ح اعمل كتاب لاوصاف اخوانا الجنوبيين لوصفهم اهل الشمال باقان اموم قال نحن نفصل جلالبنا يوم الوقفة واتيم يصفنا بالقمرتية والذين يخرخرون اي يتبرزون في مكان لعبهم ويحولونة الي مكان غير لائق للعب وتفوح منه رئحة العفن :o


#75533 [محمد احمد]
1.00/5 (1 صوت)

01-11-2011 07:38 AM
سؤالك معروفة أجابته يا دكتور من هو هذا اللاعاش الآن؟ فمنذ توقيع الاتفاقية خال البشير المعتوه لم يعطي الفرصة للشماليين وللجنوبيين للتفكير في الوحدة ولاحقا لم يعطي أي فرصة لابن أخته والعناصر التي أتقنت المكر داخل المؤتمر الوطني للمرواغة والكذب وإستغفال الناس ليبعدوا عن أنفسهم تهمة الفشل في كل شيئ وخاصة فصل الجنوب وفقدان حلايب وبعض المناطق الحدودية مع اريتريا بل وعندما إزداد جنون وهوس هذا الخال لتقسيم البلاد شجع الأمر أمريكا والمجتمع الدولي لإرسال أكثر من تهديد ووعيد للبشير ومن في صفه من الماكرين داخل المؤتمر الوطني بأن (لمو جدادكم) فخاف الرقاص أبو جاعورة ومن معه وجاءت الزيارة التاريخية له للجنوب تكريسا لحالة الرعب التي يعيشها فكان الخطاب العاطفي الرومانسي وكان الإنبطاااااااااح وما أجمله وأروعه من إنبطاااااااااااااح .. وطبعا نقول للبشير وداعا لخطابات تحت جزمتي ومركوبي وعلى بالطلاق والدبابين والكلام الما بتقدر عليهو ده خليك في الرقيص والإنبطاح ودع الشعب السوداني ينسى ما قلته في البيان الانقلابي بأن إتفاقية الحكم الذاتي بين المرغني وقرنق اتفاقية خيانة كبرى وأن النظام الحاكم آنذاك فشل في الحفاظ على السودان ووحدة أراضيه ... يا البشير الرقاص أبو جاعورة أرقص شاء الله لك أن ترقص وجعّر واستعرض الهبالة والقوة أمام البسطاء وإنبطح للأمريكان بعد أن تنزل من منصات الإحتفال كما جرت العادة ونسأل المولى عز وجل أن ينعم على هذا الشعب بمزيد من إنبطاحاتك ولكن دون التفريط في الوطن الغالي ووحدة أراضيه التي نراها تتقلص يوما بعد يوم بقول سيدنا إمام المرسلين (ص) (اللهم من ولي أمر من امور امتي فشق عليهم اللهم فاشقق عليه)


#75517 [Machut]
1.00/5 (1 صوت)

01-11-2011 06:45 AM
اللاعاش هذة المرة يا استاذ البونى هم ........ تجار الدين والعروبة


عبد اللطيف البوني
عبد اللطيف البوني

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة