12-21-2013 04:36 PM


في بعض الأحايين تشد العبدلله بعض التصريحات أو الأحداث أو الأخبار فيختزنها أو يحتفظ بقصاصاتها عازماً الكتابة عنها .. لكن زحمة الحياة والمشغوليات تنسيه ذلك .. أحد الاشياء التي أراد العبدلله أن يكتب عنها هو إعلان في ربع صفحة قام صاحبه بصياغته حتى يبدو وكانه تحقيقاً صحفياً وذلك من أجل الترويج لخدماته .
صاحب الإعلان يدعى (أبو مين كده) وهو لا يكتفي بإسمه فقط بل يلحق به جنسيته ليصبح الإسم كاملاً (أبو مين كده الفلسطيني) هذا مع صورته و(لحيته) وبقية أدوات الشغل .
في الإعلان المذكور الذي تم نشره في إحدي الصحف السياسية وتمت صياغته على شكل أسئلة كانت إجابات أخونا (أبو مين كده الفلسطيني) تؤكد على مقدرته على علاج المس الشيطاني وإستخراج (الجن) من المصابين وكذلك مقدرته على علاج كافة الأمراض المستعصية كالسرطان مصحوباً بأرقام هواتفه!
عندما قام العبدلله بقراءة ذلك الإعلان وقرر أن أكتب عنه مقالا سأل نفسه سؤالاً ساذجاً : يعني الراجل ده جاي من فلسطين وقاطع ليهو كم بلد كده عشان يطلع للسودانيين جنهم ويعالجهم من السرطان ؟ ليه بالذات (صاحبنا) أبو مين كده ده (إستهدفنا) من كل بلاد العالم وجانا يقدم لينا خدماتو دي؟ (فلسطين ذاااتا) ما فيها (جن) وشيطان ولا ما فيها (سرطان)؟
كان ذلك هو السؤال الذي لفت إنتباه العبدلله فقرر أن يكتب عن الموضوع لاحقاً لولا أن (الموضوع) ضاع مع زحمة الحياة و(الزهايمر) ولكن صباح اليوم تذكرت الموضوع عندما كنت أقرأ في أحدى الصحف فوجدت إعلاناً تحذيرياً للشيخ (أبومين كده) الفلسطيني يحتل مكانا وحيزاً كبيرأ ويحمل عنوان (تحذير وتنبيه) .. فصحت كما يقول أخوتنا المصريين قائلاً في إستغراش (بطلو ده وأسمعو ده) .. ببساطه يا سادة يا كرام الشيخ أبومين كده (بيحذركم) بعدم تقليد منتجه الذي يعالج (السرطان) و(ينبه) في إعلانه بانه الوحيد صاحب ومخترع هذا (العقار) الذي يوزع فقط عبر (دار كذا للعلاج بالقرآن الكريم) ولم ينس (صاحبنا) أن يقوم بوضع صورته وأرقام هواتفه النقااااالة (لإصطياد الزبائن) .
بالطبع إن طرح دواء جديد في السوق للاستخدام البشري ليست بالعملية السهلة , فهي تتطلب الكثير الكثير من الدراسات والتجارب والبحوث وهنا نأتي للإجابة على ذلك السؤال الذي بدر إلى ذهن العبدلله أول مرة أعلاه وهو : يعني الراجل ده جاي من فلسطين وقاطع ليهو كم بلد كده عشان يطلع للسودانيين جنهم ويعالجهم من السرطان ؟ فلسطين ما فيها سرطان ولا ما فيها شيطان؟
والإجابه يا ساده يا أفاضل هي لأنو نحنا بلد (سايبه سااااكت) .. أي زول ممكن يدخل البلد دي ويعمل العاوزو ومافيش حد ح يتعرض ليهو .. لا وكمان يفتح دار (عديل كده) للعلاج بالقرآن .. ويعلن في الصحف الرسمية عن خدماتو ومنتجاتو (الصيدلانية) .. لا وأيه : يحذر (المواطنين) – واخدين بالكم – ؟ بعدم تقليد منتجاته (ما فضل ليهو إلا يقول ح يلجأ للقانون) وبيني وبينكم ممكن تحصل ما القصة فوضى سااااكت وهايصة !!
يا أخي (أبومين كده) الفلسطيني أرحل .. فالفينا مكفينا .. وإن كانت لك المقدرة على أخذ الجن بالنواصي فعد إلى ديارك وأستخدمهم لسحق العدو المختال حتي تتخلص بلادك من الإحتلال .. وأفتح لك داراً هنالك للعلاج بالقرآن والعلاج بالليزر والعلاج بالأعشاب والعلاج بالامواج والعلاج بالزجاج .. وصنع ما شئت من العقاقير والدهانات لشفاء الأورام والأحلام والسرطان والبمبان والسلم والثعبان وإن كنت يا شيخنا قد جئتنا (كفقير) لتجود علينا بمعرفتك للقرآن والأسرار فاعلم أن لدينا (شيوخ) كبار.. أبوحراز و أبو عصاية وأبو قناية وأبو جلابية ,ولو عاوز (أنطون) فلدينا الفكي (تلفزيون) وهذا يمكنة ان يجعلك تشاهد وأنت في (تونس) ما يحدث لإخوانك في (خان يونس) بث مباشر على الهواء علي طشت من الماء .
ثم يا أخى لماذا لم تذهب بعقارك هذا إلى أوروبا وتسجله عند أحدي شركات الدواء العالمية وقد أهلك السرطان معظم من في البرية؟ ألا تريد ملايين الدولارات ؟ أم إنك متخصص في (الجنيهات)؟ إن كنت كذلك فإني أقول لك هيهااااات فنحن شعب اصبحنا على (الحديدة) وكل ما نجنيه أصبح لا يأكلنا (مديده) .
أرحل يا عزيزي فنحنا ما ناقصين .. لا فقرا ولا عشابين .. لا لاعبين ولا مدربين .. لا عازفين لا فنانين .. لا حرامية لا نشالين .. لا أذكياء لا محتالين .. بلادنا يا شيخنا فيها في كل شئ فائض عمالة .. فلا داعي للرذالة .. أما لماذا (تركوك هكذا) تسرح وتمرح (وكمان تحذر) دون سؤال فلأن المسؤولين عن أمننا الاجتماعي (في الراحة) وبلادنا أضحت مستباحة !

كسرة :
مرحباً (أبو مين كده الفلسطيني) إن جئتنا خبيراً في النفط أو الزراعة أو الصناعة ولكن خبيراً في شئون الجن والسرطان والأورام فالقصة فيها كلام !

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو)+و؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو)+و؟


تعليقات 31 | إهداء 0 | زيارات 9456

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#864845 [أبو عبد الله]
0.00/5 (0 صوت)

12-23-2013 10:50 AM
أولا ياجبرة رسينا على بر، هو المثل بيقول: "يعيش المساكين في المجانين" ولا "يعيش المجانين في المساكين"
ثانيا: عندما تعجز الأساليب العلميةوالتكنولوجيا عن معالجة الناس صحيا وأجتماعيا، وماديا، يلجأالإنسان للأمور الخرافية، هذه فطرة إذا عجز العلم لجأالإنسان للخرافة، والآن البلد أصبحت بيئة صالحة وجاذبة لقبول كل أنواع الخرافات المصنعة محلياإقليميا وعالميا، فقر مدقع وتردي أمني وصحي وإجتماعي وإقتصادي وأخلاقي و... و... وووووووو...... (أكثر من واوات خط هيثرو)يقابله عجز تام من كل الجهات المعنية حتى الرقابية منها، فلا غرو أن تبرز مثل هذه الإشياء سواء من عمك "أبو....." أو من غيره، سواء من داخل البلاد أومن خارجها، وسيد الرايحة فتح خشم البقرة، وصاحب الحاجة أرعن، "والحاجة أم الخرافة". الراجل جاء ووجد "شعب طيب (بلغة أهلنا المصريين)، تايه، ضائع ، تتقاذفه رياح الفقر والمرض والجهل والضياع (بسبب المنخفض الاقتصادي)، فالآن عندنا البيئة صالحة لكل أنواع الخرافات والدجل التي تجعل الإنسان يلجأ إلى ويقبل كل ما يقال طالما أنه يعطيه بصيص أمل في شفاء أو رفع معاناة أوتنفيس كربة أو هم، المهم أن يقال له إن هذا العلاج يزيل ما بك، أيا كان.
كسرة : الآن في جهة أجنبية تعكف على إطلاق منتج جديد إسمه "عروق" صنع خصيصا للسودانيين، وستكون صيغة الإعلان عنه" (عروق يا أهل السودان، عروق يا ناس، ضد المرض والفقر والأخطاء الطبية ومفاجات الخريف وغلاء الرغيف وبرد الشتاء وحر الصيف، وحوادث العربات وبيع وتدمير المشروعات واللعب والمساومة بالمقدرات، وعروق لنجاح الزراعة رغم فساد الإسمدة والتقاوي والمبيدات، عروق عن المحبة وعن الطلاق والإملاق والنفاق وعروق ما تموت إلا أجلك تم) علما بأن المنتج غير مسجل وغير مجرب، يعني زيو وزي الغيرو.


#864789 [أبو عبد الله]
5.00/5 (1 صوت)

12-23-2013 10:07 AM
أولا ياجبرة رسينا على بر، هو المثل بيقول: "يعيش المساكين في المجانين" ولا "يعيش المجانين في المساكين"
ثانيا: عندما تعجز الأساليب العلميةوالتكنولوجيا عن معالجة الناس صحيا وأجتماعيا، وماديا، يلجأالإنسان للأمور الخرافية، هذه فطرة إذا عجز العلم لجأالإنسان للخرافة، والآن البلد أصبحت بيئة صالحة وجاذبة لقبول كل أنواع الخرافات المصنعة محلياإقليميا وعالميا، فقر مدقع وتردي أمني وصحي وإجتماعي وإقتصادي وأخلاقي و... و... وووووووو...... (أكثر من واوات خط هيثرو)يقابله عجز تام من كل الجهات المعنية حتى الرقابية منها، فلا غرو أن تبرز مثل هذه الإشياء سواء من عمك "أبو....." أو من غيره، سواء من داخل البلاد أومن خارجها، وسيد الرايحة فتح خشم البقرة، وصاحب الحاجة أرعن، "والحاجة أم الخرافة". الراجل جاء ووجد "شعب طيب (بلغة أهلنا المصريين)، تايه، ضائع ، تتقاذفه رياح الفقر والمرض والجهل والضياع (بسبب المنخفض الاقتصادي)، فالآن عندنا البيئة صالحة لكل أنواع الخرافات والدجل التي تجعل الإنسان يلجأ إلى ويقبل كل ما يقال طالما أنه يعطيه بصيص أمل في شفاء أو رفع معاناة أوتنفيس كربة أو هم، المهم أن يقال له إن هذا العلاج يزيل ما بك، أيا كان.
كسرة : الآن في جهة أجنبية تعكف على إطلاق منتج جديد إسمه "عروق" صنع خصيصا للسودانيين، وستكون صيغة الإعلان عنه" (عروق يا أهل السودان، عروق يا ناس، ضد المرض والفقر والأخطاء الطبية ومفاجات الخريف وغلاء الرغيف وبرد الشتاء وحر الصيف، وحوادث العربات وبيع وتدمير المشروعات واللعب والمساومة بالمقدرات، وعروق لنجاح الزراعة رغم فساد الإسمدة والتقاوي والمبيدات، عروق عن المحبة وعن الطلاق والإملاق والنفاق وعروق ما تموت إلا أجلك تم) علما بأن المنتج غير مسجل وغير مجرب، يعني زيو وزي الغيرو.


#864519 [سلام من الرجين مليون!!]
0.00/5 (0 صوت)

12-23-2013 01:51 AM
لوعالج لينا جن الانقاذ دي منعمل ليهو تمثال ومندفق ليهو الريال وممكن نعرس ليهو ام العيال!!!(دي طبعا عشان الجن العندنا يطلع)


#863953 []د . الشريف]
0.00/5 (0 صوت)

12-22-2013 01:49 PM
نحن فعلا شعب طيب وسازج كمان .. انتو عارفين المستثمر السورى الدخل برسمال عبارة عن صاج و جركانة زيت .. وفتح محل فلافل .. ومن ديك وعيييك .. الآن يملك عمارة فى الخرطوووم واخرى فى بحرى و بيت فى مونتريال كمان .. و ده كلوو من الطع 100 !!!!


#863810 [ممكون وصابر]
0.00/5 (0 صوت)

12-22-2013 11:30 AM
الناس بقوا ماعندهم حق الكشف والعلاج ولا حتى حق الاكل عشان كدا كتروا الشعابين والعطارين والدجالين


#863635 [kamuzu]
0.00/5 (0 صوت)

12-22-2013 09:09 AM
في احد ايام الجمع بمدينة وادمدني وبعد انتهاء الصلاة وقف احد الاخوان لتقديم احد الدعاة الباكستانيين؟؟؟؟ لالقاء وعظ دبني علينا نحن النتشدقين باللغة اللغة العربية .. وطبعا جلس الجميع للاستماع ( ما الواعظ باكستاني ) .. وقد جاء الوعظ ركيكا وضعيفا في محتواه .. وعندما خرجت من المسجد اذا بعربة (فان ) وبداخلها مجموعة من اصحاب اللحي الباكستانيين الوعاظ
دي تقول فيها شنو اخونا جبرة ؟؟؟؟


#863627 [دعصام الدين بشير]
0.00/5 (0 صوت)

12-22-2013 09:04 AM
ان شاء الله انا ناوي اقلب الحكومة البقت زي جنازة البحر وابشر حا اعينك وزير اعلام ومالية ودفاع


#863607 [عزالدين]
5.00/5 (2 صوت)

12-22-2013 08:50 AM
الاستاذ جبرا..لك خالص الود والتحايا..الموضوع شيق وهام لان هذه الفوضى نشاهدها يوميا فى اعلانات التلفزيون وكأن الجهاز الاعلامى الحساس هذا لا يهمه سوى الربح...كثير هؤلاء الذين يتاجرون باسم الدين...كثير من الاعشاب والخلطات والدهانات ..الخ يروج لها فى السودان ولا احد يعرف ما هى مكوناتها...البعض يحتوع على ادوية طبية تم سحنها واضافتها للخليط دون مراعاة للجرعات او الاثار المترتبة على ذلك...فى واحد اسمو كافور ..قال ايه عايش فى جبال الهملايا ويتم الترويج لمنتجاته فى السودان... عشبة بن على اليمنى...منو بن على ده الساب اليمن وجا السودان!!!!.شفت نحن شعب ساذج كيف!!!الفلسطينيون..المصريون..وغيرهم يعلنون عن اوهامهم فى بلد الفوضى...لا توجد وزارة للصحة..ولا الاعلام ..ولا مجلس للادوية والسموم..ولا قانون..ولا ولا ..بس فى جن....


#863548 [هــدى]
0.00/5 (0 صوت)

12-22-2013 08:05 AM
تبادل الدجالـــين هذا يا سيد جبرة هــو من معالم مشروعنا الحضاري، وناكل مما نزرع ويا الامريكان ليكم تسلحــنا.

هي لله


#863509 [نص صديري]
0.00/5 (0 صوت)

12-22-2013 07:35 AM
"صورته و(لحيته) وبقية أدوات الشغل"!! الله يجازيك تستاهل أوسكار في دي.
لكن ياساخر سبيل المافاهمو انا انو نشر الاعلانات دي مخالفة جنائية بالقانون الحالي نفسه مفترض؟؟ حتى ولو قلنا بلد هاملة مافيها قانون ودي حقيقة كويس صحافة السجم الشغالين فيها دي دورها شنو اذا كانت هي نفسها مساهمة في تغبيش وعي شعبها؟؟ على الاقل ترفع التلفون لو ماقادر تحقق بنفسك وتفضح الناس ديل وتتوالي تغطية مثل هذه القضية حتى القضاء عليها ده المفترض دوركم ومهنتكم!!
ياريت لو الصحافة بس امس اطلعت على تصريح لوزير الصحة حول اللقطاء البقو يلقوهم ثلاثة في اليوم مجدوعين زي الكندوم المستعمل بدل يكون يتناول القضية في حدود مجاله بالتوعية حول الممارسة الجنسية الامنة وتوفير الكوندوم وحبوب منع الحمل ..الخ هرطق زي تقول وزير الشؤن الدينية
حقيقة منتهى الانحطاط في كل مناحي الحياة بقت في بلدنا حاجة تقرف ويتسألوا نحنا مصنفين افسد و اغبى شعب في العالم ليه؟؟


#863394 [ربش]
0.00/5 (0 صوت)

12-22-2013 12:40 AM
ههههههههههههه و الله شر البليه مايضحك .... أضحكتنا ياجبرة رغم المرارة الفي الحلوق ... تسلم .


#863340 [Husham Suliman]
5.00/5 (8 صوت)

12-21-2013 10:59 PM
الشخص الفلسطينى لديه اعلانات ورق ملصق فى العواميد وجنب الافران ومالى الواطة كلها طبعا بيكون جا من هناك حاير بيهو الدليل وبيكون جا هنا على مضض ولكن الشطارة هدته فلقد قالو له اعمل فيها شيخ فسيهابك ويحترمك السودانيون فقط كلمة قران دى تانى زول بقول كلمة مافى فهم متدينون لدرجة الغباء وفوق ذلك فيهم سذاجة لا تخطئها عين محتال والاهم تعمل اعلان وتوزع ورق زول حا يسئلك مافى بس المهم تكون المسئلة دينية وتدعمها بشوية ايات وياحبذا لو كان الورق مطبوع فيهو صورة غلاف المصحف مع المعلومات والتلفونات..... كدة دربك مرق .
وطبعا هو اضاف جنسيته الفلسطينى للتميز وعدم الخلط مع اخرين يسلكون نفس النهج من السودانيين وتحوط من ان ياتى واحد من جنسية اخرى يود ان يكنس شوية قروش بنفس الطريقة .
وهناك واحد اخر لبنانى عامل فيها دكتور متخصص فى الكلف والنمش وحب الشباب وطبعا دا جاء السودان معلم شاورمة فى مطعم (ستثمار) وطلبت منه واحدة زبونة ان يجلب لها بعض الكريمات وصابون تجميل ولفقت معاهو القصة حاليا عامل دعايات فى النيل الازرق ومرة عملو معاهو لقاء فى برنامج نسائى فى النيل الازرق ومقره الان لمن يريد ان يرى فى الخرطوم ٢,وطبعا قصص النجاح هذه لا تحدث الا فى السودان من معلم شاورما لاخصائى جلدية .
عندما يختلط الهوس الدينى مع السذاجة يكون الناتج بلاهة منقطعةالنظير.


#863294 [حق الكلام]
3.00/5 (2 صوت)

12-21-2013 09:59 PM
الفاتح جبرا ... إذا تكلم أوجع وإذا سكت ساااااااي أوجع ... واللي البيشتم ود جبرا هو ذاتو عنده أخبار البيسأل عنها ود جبرا ... لان لا كلام صواب تصوب قلوب البيشتموا الناس بلا كلام الله يكون معه معها... والتذكير والنون النسوة فيهم لا مشكلة فيا ود جبرا أنت حر أكتب ثم أكتب.


#863281 [ودالباشا]
5.00/5 (2 صوت)

12-21-2013 09:40 PM
دا عايز يبيع الموية فى حارة السقايين خليوه يا استاذ جبرا بعد شوية حاتلقاه فاتح محل شارومة او حلويات


#863257 [آدم محمد]
5.00/5 (1 صوت)

12-21-2013 09:07 PM
شكرا يأستاذ
لكن نحن حقيقة مكتفيين ذاتيا من الدجل والشعوذة وأظنك متزكر الكريمت تش والشجرة العملو ليها مجلس وغيرها.


#863248 [lama]
5.00/5 (2 صوت)

12-21-2013 08:57 PM
الاستاذ جبرا كمان هناك واحد سوري اسمه الدكتور منو كده قريب من سعد قشرة بيعالج من اي حاجة الكلف البهق الدودة الدرقية والخ الخ الخ وده يبدو انك ما شفت اعلاناته في تلفزيوننا القومي نرجو معاجة الامر بعد التاكد وما تلحقهم خط هيثرو بالله عليك


#863247 [سرحان]
5.00/5 (2 صوت)

12-21-2013 08:55 PM
الدجالين صاروا أكثر من الهم على القلب ، أي بلد يدخله الإسلام السياسي يقول للإبداع أرحل و للفن و الجمال غادروا و يقول للفقر و الدجل و القبح و التصحر الثقافي : اقبل ... في كل شارع إعلان عن فكي يعالج بالقرآن مما يدل على أنهم اكتشفوا علاجا لم يكن معروفا زمن النبوة ... الإنقاذ ببرامجها التعليمية و الدعائية و الإعلامية نجحت في أن تأخذنا حوالي سبعين سنة للوراء ... أعجبني تعليق الأخ الذي تخوّف من تخصص الدجالين في العلاج من العقم لأن البلاوي التي تحصل تجعل شعر الرأس يقف ... لعنة الله على أبو مين الفلسطيني الدجال الكذاب الملعون الزنيم و لعنة الله على كل الدجالين و لعنة الله على الإنقاذ التي نشرت المناخ الذي يفرخ الدجل و الكذب و الفساد و الفقر .


#863245 [mak]
5.00/5 (1 صوت)

12-21-2013 08:53 PM
شديدة الليلة دى دقلها يكركر ٠السودان٠ عايرة واديها سوط


#863244 [سودانى]
5.00/5 (1 صوت)

12-21-2013 08:53 PM
غلطان ومليون غلطان
يا اخونا الفاتح جبره كمان
الزلمة ده جاي كمان فهمان
انو يطلع جن وسرطان
سببو فلسطيبيين زيو
ابتلو بيو ناس السودان
الشغالين بى جد و اتقان
فى دول خليج والمرجان
قصدوهم فى اكل عيشهم
وغدروهم بى شكل جبان
اسال كل مغتربينا
هم حيردوا اكيد وضمان
انوجماعتك ديل زاتم
هم الجن فى شكل انسان
هم بلوتنا الفى الغربة
وهنا بلوتنا مع الكيزان


#863220 [امير]
5.00/5 (1 صوت)

12-21-2013 08:17 PM
يا جبرة انت راجل غير وطني دة اسمو تبادل خبرات مع الدجالين والمشعوذين العندنا وبجوز عايز يعمل دراسات عليا عندنا انت لازم تحقق في الموضوع قبل ما تكتب ساكت


#863204 [ابولكيلك]
5.00/5 (1 صوت)

12-21-2013 07:59 PM
جن وشياطين فى بلد الشيريا ذاااااتا ؟؟؟ ماممكن ..


ردود على ابولكيلك
United States [sudani bs] 12-22-2013 09:43 AM
ha ha haaaaaaaaaaaaaaaa


#863181 [حد بيعرف احسن م الحكومه!!]
5.00/5 (1 صوت)

12-21-2013 07:24 PM
يا انت يا الفاتح الجبرا.. وقافل الهندسه بالضبه والمفتاح وموارب ضلفة التكامل وحساب المثلثات .. اها سيد التوجيهات اللى بتسأل عنها كل مره.. يعنى انت ما قادر تشوف انها "تنزلت" (بضم حروف التاء والنون و كسرالزين وفتح اللام) الى ارض الواقع .. لو سألك: انت ايه دخلك؟ التوجيهات دى حقوتى انا سيدا .. مالك ومالآ .. انا وكلتك تتابعا وتعرف مصيرا!!! شوف ليك شغله تانى غيرا.. والله تفتح خشمك تانى فى الموضوع دا ألآ ألأعملا فيك الله وخلقو يتفرّجوا فبها.. والله وبالله اسمع تانى صوت ألآ اوريك اياهو.. موش أل "أياهو" بتاع ألأنترنت.. انا دا ذات نفسى ما بعرفو.. لكن والله اضربك بحديده فى عضم شيطانك ضربه يا لحقتك امّات طه و لآ خلتك.. تفضها سيره وما انسمع ليك حس تانى!!! و يكون ركبك شيطان خلآك تفتش على "ابو مين كده الفلسطينى" سيد ألأعلان..


#863167 [عنيد]
3.00/5 (2 صوت)

12-21-2013 07:06 PM
يكون مثتثمر اجنبى من جماعه الطفل العجزه


#863158 [زردية]
5.00/5 (1 صوت)

12-21-2013 06:52 PM
ونرجوك أسأل ابواللمين
الباع خط هيثرو مين؟؟؟؟؟


#863140 [ودالحاجة]
5.00/5 (7 صوت)

12-21-2013 06:25 PM
قمةالمتعة والاستمتاع وأنت تعالج قضايانا الحيوية . حفظك الله يا استاذ يا رائع فمهما تحدثنا لن نوفيك حقك يا مبدع


#863137 [Ameen]
5.00/5 (3 صوت)

12-21-2013 06:20 PM
لك التحية والعافبة يااستاذ جبرا فعلا البلد اصبحت جبانة هايصة وطبعا المواطن المسحوق اصبح في مرحلة الا وعي في ظل هذه ال 25 العجاف وهم اكيد قصدوا تغييب العقول عشان يمشي اللحس والفساد وكل انواع القهر والاستبداد والحصيلة الان البوار والانهيار في كل مناحي الحياة السودانية فلاغرابة أن تستباح البلد وتصبح قبلة لكل معتوه او مستهبل او نصاب اودجال ليمارسوا هواياتهم بكل اريحية وياقلبي عليك ياوطنييييييييييييييي اللهم خلصنا من هذا الكابوس سريعا ياالله


#863131 [mohammad saad]
5.00/5 (2 صوت)

12-21-2013 06:10 PM
الشياطين والجن والسرطان هينين... الكلام يكون بيعالج العقم!!!!!!!!!!!!!!!!!!!!!!


#863119 [من الاخر]
4.50/5 (6 صوت)

12-21-2013 05:55 PM
انت هسي ما ارتسزرقت من موضوعو ده
ليه ما فتحت بلاغ و سكيت الموضوع .

استغليت الاعلان لكتابة المقال وتاخد حقك وهو يواصل عادي

هسي ح يعمل بي كلامك ده؟؟؟؟


#863116 [دا كلام ما صاااااح]
5.00/5 (8 صوت)

12-21-2013 05:50 PM
حتى خبير فى النفط والزراعة والصناعة مجتمعات ما عاوزنه

نحن الله يفكنا من وزير المالية البيصدر الدكاترة
والنائب البرلمانى العاوز يستورد دكاترة مصريين


#863108 [ود البلد]
5.00/5 (1 صوت)

12-21-2013 05:38 PM
(((الإجابه يا ساده يا أفاضل هي لأنو نحنا بلد (سايبه سااااكت) .. أي زول ممكن يدخل البلد دي ويعمل العاوزو ومافيش حد ح يتعرض ليهو ))) هههههههههههههه واكثر من كده
والله نحن فى خدمات الدين ولا السعودية نفسها .. العايز يحج يكسر كرونه عندنا ويخلى الحج ذاتو ، والماعندو جواز يكسر كرونا عندنا ونطلع ليهو جواز يمشى يجيب باقى اهلوا كمان ..
وياسلاااااااااااام لو عندو دقن كبيرة مع عدة الشغل + تبروقه كبيييييييرة شوفنى بصلى اليوم كلو


#863091 [تينا]
5.00/5 (1 صوت)

12-21-2013 05:10 PM
ههههههههه عجبتنى الكلمات بالقافية انت شاعر ونحن ماعارفين ولا شنو ؟؟


الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |الفيديو |الصوتيات |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة