المقالات
السياسة
حسين خوجلى ناطق رسمى بإسم كل السودانين يسعى لتجميل صورة عبود والنميرى لشىء فى نفسه
حسين خوجلى ناطق رسمى بإسم كل السودانين يسعى لتجميل صورة عبود والنميرى لشىء فى نفسه
12-23-2013 12:29 PM

مادام لاتحملون غبينة على عبود والنميرى - فأنتم شعب طيب - فلا تحملون غبينة على البشير
يا حسين لا غفر الله لك لو لم تعتذر أو تنقطنا بسكاتك وتترك الحديث ( مع حسين خوجلى ) لأنه سيتحول الى ( على حسين خوجلى )
حسين خوجلى وبعد أن حكمنا بحزبه لربع قرن بقيادات عسكرية ومدينة من الحركة الإسلامية السودانية وبعد أن وصل السودان للقاع فى كل شىءجاء لينصب نفسه ناطقا متحدثا عن كل شعب السودان ويقول جماعته لم يفعلوا شىء يسبب الغبن !!!!!
يحكمنا الكيزان وينطق نيابة عنهم كوز - يعنى البلد يا كيزان يامافيش رجال
حسين خوجلى دون أى مقدمات قال
الشعب السودانى دا مافى زول عنده غبينة على عبود - كدى أمشى قول الكلام دا فى حلفا دغيم لو ما أكلوك بسنونهم - دا باع تاريخ السودان وأثاره بثمن بخس وتسبب فى غرق حلفا عروس السودان وهجر أذكى شعب لبيئة غريبة عليهم ومنذ ترحيل أهالى حلفا لم تنتج الذاكرة النوبية كاتب أو أديب أو شاعر أو فنان - عبود ومجموعة هبل العساكر المعاهو كان فى إمكانهم أن يفرضوا على مصر مناصفة التيار الكهربائى الذى ينتجه السد العالى وأن تتكفل حكومة بمصر بنقل حصتنا فى الكهرباء لداخل السودان وتحديدا لخشم القربة حيث تم ترحيل أهل حلفاء - عبود غبينتنا عليه نحن الرباطاب لن تنسى حين إستقبلنا قطارات التهجير وبها أهلنا النوبة يبكون ويندبون حظهم العاسر - غبينتنا على عبود حين هجر ابناء حلفا الثانوية لعطبرة وذهبنا لإستقبالهم بمحطة السكة حديد بعطبرة - تخيل أسرتك تغادر لقريتها فى خشم القربة وأنت تنزل طالب صغير فى الصف الول الثانوى وتفصل عن أسرتك لتدرس فى عطبرة ولكم أن تقدروا المسافة بين عطبرة والقربة ولكم أن تقدروا حجم الماساءة التى سببها حكم عبود وعسكره لأهلنا بحلفا - فنزل أخوتنا أبوعوف وضرغام وبهاء الدين حنفى وحيش سفيرنا الحالى فى ألمانيا وشاركونا السكن بداخلية فريجون ودقنة بعطبرة الثانوية لأن المصريين ما كانش عندهم صبر حتى تبنى لهم مدرسة بجوار زويهم فى حلفا الجديدة خوفا من أن تهب ثورة تلغى إتفاقية عبود عبد الناصر وقالوا خلونا نبنى السد ونغرق النوبة السودانية ولمان جات إكتوبر كانت حلفا تقول إنى اغرق أغرق أغرق
لياتى حسين خوجلى ويقرر أن شعب السودان ماعنده غبينه ضد عبود - والله أنا لست بحلفاوى ولكن كنت من بين عشرات المئات التى كانت تبكى وهى تشاهد أسر بحالها ترحل من أعز وطن - وطن ترهاقا وحتشبسوت -
حسين خوجلى الناطق الجديد باسم السودانيين قال الشعب السودانى ماعنده غبينة على النميرى
كدى يا حسين كلامك دا قوله للأستاذ فاطمة أحمد إبراهيم أرملة الشهيد الشفيع وقوله لأرامل وأبناء وأحفاد شهداء محاكمات الشجرة التى كانت بالسجن وحولها النميرى كلها للإعدام ووقع عليها بصفته رئيس جمهورية وهو سكران بشهادة الجميع - النميرى قتله لعبد الخالق محمجوب والشفيع ولهاشم العطا وفاروق حمد الله وبابكر النور وآخرين كان يمنعه النوم فجاء بمشايخ الإتحاد الإشتراكى يقرأون له القرأن - لو خصصنا مياه البحار والمحيطات مدادا وورق الشجر صحفا لما أحصينا الغباين التى نحملها على النميرى وبداية تدمير السودان بدأت بالنميرى وبدات تحديدا فى سلم الزبالة التعليمى الذى صممه محى الدين صابر الذى كان ينتهج فكر قومى عربى واراد أن يخرج بالسودان من المناهج البريطانية التى كنت من المحظوظين بتلقى جميع مراحلى التعليمية بها الى مناهج عربية أخذتنا من موقعنا المرموق لزيل القائمة - كنا نقول للماء فى الكيمياء H2O والصف الذى بجوارنا يقول يد كاف 2 ألف - فنضحك - لعنة الله على النميرى ومحى الدين صابر - نميرى الذى شرد الرأسمالية الوطنية النظيفة بسياساتها اليسارية فى بداية حكمه ولن أنسى حين أعلن تأميم البنوك فى لقاء جماهيرى بإستاد الخرطوم - فجاء الدور على بنك مصر - فصفق له عبد الناصر - لعنة الله عليهما - دمرا السودان
كنت فى إجتماع عمل بالسعودية وجرت العادة أن يتبادل الحضور الـ ID CARDS - سلمنى الكرت - إسمه ... قرنفلى - قلت له بصوت سمعه الجميع - قرنفلى ؟ قال نعم - قلت له ماهى جنسيتك ؟ قال لى سودانى بالميلاد - كبير مهندسين وعضو المنتدب بشركة يوكسل التركية من أصول سودانية شامية - خرج ولم يعد - وتقول لى يا حسين مافى غبينة على نميرى - فى مقال آخر سننشر لك قوائم بمن قتلهم النميرى أنتو قايلين دخول الحمام زى خروجه
حسين خوجلى ليته توقف عن قوله ( الشعب السودانى ماعنده غبينة شديدة على عبود ونميرى ) لا واصل وهو أصلا بدأ الموضوع دا عشان يصل للمحطة دى ( شعب السودان ماعنده غبينه شديدة على البشير )
طيب يا حسين لو إفترضنا كلامك دا كلام صحيح وصادر من رجل لرجال - أنت قلت غبينة شديدة - تقصد شنو يعنى عندنا غبينة وبس وعاوزين نعرف شنو الفرق بين الغبينة والغبينة الشديدة - وغبينة أتت من الغبن
نأتى لتعريف كلمة ( غبن ) وهى تعنى الظلم أو الضرر بالخداع TO AGGRIEVE OT TO TRAET UNJUSTLY OR IUNEQUITABILY والغبن اسوأ كل حالات الكراهية - لو حد خدعك وقال أن المنطقة التى بها منزلك معرضة لكارثة بيئية كتلك التى حدثت بشرق النيل لأهلنا فى مرابيع الشريف وانه بصدد عرض بيته للبيع وأنت صدقته وبعت بيتك بثمن بخص وبعد فترة إكتشفت أن المشترى الحقيقى هو نفس الجار الذى ابلغك بالخبر الكاذب - فأنت قد غبنت ويحق لك رفع دعوى غبن والمحكمة بعد التأكدتلغى البيع وتعيد لك بيتك - دا الغبن وأنا مش فقيه قانونى ويمكن إخوتنا المحامين يزودونا بتعريف أدق واشمل للغبن
نحن غبنا فى البشير - الرجل دا لا بنعرفه ولا بيعرفنا - دخل علينا بيوتنا قبل ربع قرن وقرأ بيانه الأول وكان كلام جميل وكنا نحن فى زمن نحتاج فيه لسماع مثل هذا القول - خرجنا أيدناه وبايعناه وبعد فترة طلع كذاب وغير كلامه وقال أنا منظم مع جماعة الإخوان المسلمين وشيخى الترابى هو اللى قال لى أرسلنى للسجن وأمشى للقصر للتمويه - وبعد شوية جاب شيخه ونائب شيخه وشردنا من الخدمة المدنية والعسكرية وقال دا لصالحكم - بعد 11 سنة قال الترابى دا ضايقنى فى الحكم - شاله بره - بعد 24 سنة وكم شهر قال غازى دا ضايقنى - شاله بره - وبعد كم إسبوع شال نائبة الأول على عثمان ونائبه الحاجساطور ومساعده نافع
طيب مابين قراءة بيانه الأول وبيانه الأخير اللى شاله فيه على ونافع وقال والله العظيم والله العظيم على عثمان دا مرق براه ومافى زول شاله - لكن ماحلف لى شيلة نافع
طيب يا سلمان - غباينك على عبود وقلتها وغباينك على نميرى وقلتها
غباينك على البشير شنو
بشير شنو البنشيل عليه غباين - دا أريته رئيس السرور - يا مشبعنا ويا مهستكنا هستكنا وبستكنا ياريس
لا مشتمنا ولا مبهدلنا
لا مجموعنا لا معطشنا
لا مغلى لينا البنزين
لا منقص لينا وزن الرغيف
لا قاتلنا لو طلعنا فى مظاهرات - اللى قتلونا ياريس ديل جماعة مرسلاهم الجبهة الثورية
اللى أعدموا مجدى وجرجس ديل جماعة الطابور التاسع
اللى أعدموا الضباط فى نهار رمضان ديل أعداء الثورة
اللى قتلوا أهلنا فى المناصير والمحس كجبار دى وشاعه وشاعه ساكت ماتصدق مافيش حد مات - هو المناصير والمحس ميتبن منذ ربع قرن
أما اللى قتلوا الطفل محمد فى أمدوم ديل جماعة ثورة مضادة من أهل أمدوم نفسهم وأنا بعرفهم نفر نفر
اللى قتل طلاب الثانوى فى معسكر أم دوم - ماتوا براهم - عجبهم الاكل ملوا بطونهم أكثر من حاجتها
لا دمرت لينا مشروع الجزيرة
لا دمرت لينا الخطوط البحرية
لا دمرت لينا الخطوط الجوية
لا دمرت لينا السكة الحديد
لا فصلت جنوب السودان
لا أشعلتها حرب فى عدد من ولايات السودان
لا شردتنا للإغتراب
يا مشبعنا ويا مهستكنا هستكنا وبستكنا ياريس
واللى بقول عنده غبينه عليك دا كلب يحتاج الضرب بالجزمة وسحب الجنسية منه
وعاش المشير وسير سير يابشير
وشكرا للأستاذ حسين خوجلى
بتجرجرنا عشان نقع فى فخ أمن الدولة - ماتخافش ود العطا من جماعتنا
والريس عسل وكده ( لا حظ الأصبع لى فوق - بكره مايجى واحد عميان يقول أنا شفت أصبع سلمان لتحت - فوق فوق ريئسنا فوق )
مادام الطيارة عندنا بقوا يلزوها الركاب قريب حنكون من الدول ( العضمي )
الله يخجلك ياحسين غبن شنو ضد الرئيس البشير وكمان تقول غبن شديد - هو نحن غبن شويه شايلنه عليه عشان تقول لينا غبن شديد
حاسب فى كلامك مش غناتك دى والله ما تكلفهم بوكس من زوار الليل
بعدين اسر شنو يا حسين خوجلى اللى أتشردت فى عهد الخليفة عمر أمد الله فى عمره - أنت بتقول فى عهد الإنقاذ والمشروع الحضارى فى اسر تشردت وضاع أمانها الأسرى وضاعت كلها - عن أى عهد تتكلم - دا مش أسر تشردت ديل خرجوا يتفسحوا وراجعين - وبعدين يا حسين ليه بتطلب من الفريق بكرى عشان يعمل من اليوم لرد مظالم الأسر الصغيرة - كلامك دا وكأنك عاوز تقول يابكرى الناس مغبونين من حكم البشير وشيخ على عثمان ولمان ربنا جابك رد المظالم - دا كلامك أنت وبالمناسبة مسجل على اليو تيوب بالصورة والصوت وبالألوان كمان - طيب على عثمان دا لمان طيلة مايزيد عن 24 سنة لا عمل شىء لا رد مظالم عاوزنا ندفع ليه إيجار بيته ليه - إنته قايل على بتاع زمان حيسكن بيت طين فى السجانة - دى قصر فى الرياض وإيجاره لسنة يحل مشكلة كل مرضي الفشل الكلوى بالسودان -
يا حسين نصيحة لله ماتتكلم من الذاكرة وبس خلى كلامك يكون مكتوب حتى لا تقع فى المحظور - أنت قلت فى كلامك لى بكرى يحل مشكلة وقوع المستثمرين فى أحضان ناس سمموا سمعة السودان - تقصد منو ؟ أوع يكون اللواء الدكتور أخ الرئيس - كلامك دا له عدة تفسيرات وبما أنى رباطابى والرباطابى دايما بيميل للتفسير المش جميل - كلامك دا لبكرى كله بيقول ليهو - يابكرى أنت قاعد فى القصر من 1989م حتى ديسمبر 2013م ما عملت شىء - كدى عليك الله أتحرك وارفع الغبن وعالج مشاكل المستثمرين
الكلام دا كبير كبير يا حسين - يمكن يجى 200 كيلو
وغبينتنا شديدة على عبود
وغبينتنا شديدة على النميرى
أما فخامة الرئيس عمر البشير لن نصرح بأى غبن ضده ليس جبنا ولكن ( جبنةً ) لأنه لا يزال على راس الحكم وبنحكم عليه كما قال حكيم الرباطاب الشيخ الصايم لمان يغوروا - فقد جاء الشيخ الصائم عليه الرحمة للخرطوم للعلاج فى اول ايام الإنقاذ فأقام له إبن منطقتنا صلاح كرار مأدبة غداء بمنزله ( منزل الشعب ) بحى المطار دعاء لها عدد من أعضاء مجلس قيادة الثورة وعرفهم به قال لهم هذا هو إبن عمنا الشيخ الصائم الذى قال نميرى زى الديك الفوق العدة خليته وسخها ( ببرازه ) نهرته نطه كسره - قالوا ليهو والإنقاذ - قال نحن النظام لحد مايغور بعدين نتكلم فيه - المرحوم الزبير محمد صالح كان رجل يحب الداعبه قال له نعطيك الأمان - واعطاه الأمان - قال ليهم إنتو يا جماعة الإنقاذ عارفين نفسكم زى شنو - قالوا ليه كلهم - زي شنو - قال زى الفلاتية الرابطة جناها فى ضهرها وماسكة يد الفندك تدك وتنظف وجناها فى ضهرها يطرش ما سائله فيهو - يسهل ماسائله فيهو - تجيهوا حمى - ماسائله فيهو - وشغاله فى شغله لحد ما تنتهى - جماعتك ضحكوا لأن الشيخ الصائم شبههم بإمرأة منتجه ودا كلام طيب - فضحكوا ليواصل الشيخ الصائم حديثه - الفلاتية بعدما أنتهت عاينت لقت أن الفندك كان فاضى - ودا معناه أنتم شغالين على الفاضى - شيخ الصائمين عرف هذه الجماعة وحللها فى سنوات الأنقاذ الأولى والفندك الفاضى دا هو اللى وصلنا لهذه المكانة المرموقة بين الأمم ودى والله يا حسين تانى لا بكرى ولا غيره مابيقدر يصلحها دا كرنك خرطة 60

[email protected]


تعليقات 13 | إهداء 0 | زيارات 2555

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#866340 [سودانى]
0.00/5 (0 صوت)

12-24-2013 06:10 PM
والله يا رجل طلعت خاوى وبتكتب من غبن وليس عن وقائع وحقيقة
اولا هل يجب ان اتفق معك فى خزعبلاتك حتى اكون سودانى ؟ اذن انت لو كان ربنا اداك وبقيت رئيس كنت جردت كمية من الشعب من جنسياتهم والحمد لله انك انت ماانت عليه الان
انت اطلقت الاتهام وانا فندت وتطلب منى دليل عدم تورط نميرى وانت لا تملك دليل اتهامه ثم تقول ان المحكمة التى لا تعترف بها لم تثبت شيء لكنها حكمت عليهم بالسجن بكيف يعنى ؟؟وانت لم تثبت شيء وتاخذ بالحكايات وترفض حتى الادلة الدامغة التى شهد بها الشهود على الملاً؟ هو شنو هو بالقوة عاوز تغير التاريخ؟
حجة انو فلان كان فى لندن لمن حدث الانقلاب دى بتشبه تماما اذهب انت الى القصر رئيسا وانا الى السجن حبيسا بس انشاء الله تكون فهمت القصة دى

يا اخى احترم القراء وانت ككاتب ورجل كبير لا تتهم الناس وتجردهم من حقوقهم لمجرد الخلاف لكن تعلم مقارعة الحجة بالحجة والراى بالراى حتى تكمل شجاعتك فى الكتابة ونقد التظام

ارتقى لمستوى الحوار ومساحة الحرية وجمال المكان فى الراكوبة الرحبة
*


ردود على سودانى
United States [المهندس سلمان إسماعيل بخيت على] 12-24-2013 09:15 PM
يا سودانى والله العظيم أنت لم تفهم كلامى لشىء فى نفسك وعلاقتك بنظام نميرى الرجل السيىء جدا
بابكر النور كان فى لندن وتسلمه نميرى من القذافى بعدما الإنقلاب فشل بأيام يعنى حتى لو إفترضنا أن من كان بقصر الضيافة قتلوا بواسطة أتباع لهاشم العطا ، فبابكر النور وناس كتيرين أعدموا لم تكن لهم يد وأنت عارف أن من قتلهم ليس له علاقة بالإنقلابيين
وحقول الوقت مناسب عشان ابو القاسم محمد إبراهيم يكتب مذكراته
بعدين حقوق ايه اللى بتديها للنميرى قاتل حفظة القرأن فى الجزيرة ابا وودنوباوى وفى أى مكان نميرى الذى رحل اليهود عبر أراضيه لإسرائيل - بالمناسبة لا تقول لى أرتقى لمستوى الحوار ومايدور بيننا ليس بحوار ولكنه إثبات حقائق من جانبى ونكرانها دون تقديم دليل من جانبك
يعنى عشان حسين خوجلى قال السودانين ماشايلين غبينة على عبود ونميرى والبشير كل واحد يؤيد عبود أو منتفع من نظام عبود أو نميرى او البشير عاوزنا بصم ليهو أننا لا نحمل غبينه - لا والله ناس خلفا بيحملوا غبائن مش غبينة على عبود - والأنصار والشيوعين بيحملوا غبائن شديدةعلى نميرى ولو جينا للرئيس الحالى البشير سيبوا أى شىء أم مجدى وأم جرس بيحملن غبينة أم لا


#865782 [ود العمدة]
0.00/5 (0 صوت)

12-24-2013 09:18 AM
في جامعة الفرع في الثمانييان في ركن نقاش حسين خوجلي استهزاء بواحدة من الجبهة الديمقراطية علي انها ومتبرجة وغيرها من خزعبلاتهم المهم ردت عليه قالت ليهو انا انثى والانثى خلفت للرجل (إثارة - وغرف نوم ) لكن انت قبل بصلبك الكبير تثير الرجال كلهم- عمك لملم اوراقه وترك الركن.
نبدأ من البشير . احسن وصف لهم ما وصفهم الشيخ الصائم زي الفلاتية شغال النهار كله وما طفلها علي ظهرها من غير فائدة وهم كذلك.
عدد غبائننا علي البشير:
1 - مشروع الجزيرة اصبح اثر بعد عين وانا مزارع
2 - السكة حديد حالها يغنى عن سؤالها
3 - الخطوط البحرية
4- الخطوط الجوية (سودانير الرجاء مشاهدة برنامج المحطة الوسطي ) وكتابات الفاتح جبره
5 - الخدمة المدنية
6 - الصالح العام وقطع ارزاق العباد ( قطع العنق ولا قطع الرزق).
7- القوات المسلحة ( قبائل معينة مستأثرةبالكلية العسكريةوالامن والمخابرات
8- مشكلة دارفور
9- فصل الجنوب
10- مشاكل النيل الازرق وجبال النوبة
11- التعليم العام والجامعي.( لدي تجربه شخصية في الخليج في معانية في شركة اجنبية احد المتقدمين سوداني خريج الاهلية ادارة اعمال . ما بعرف يعمل يطبع عربي انجليزي وماسح انجليزي خالص. حتى المدير سألتى هل انت متأكد هذا الزول خريج. هذا من ضحايا عمرالبشير.


#865363 [المهندس سلمان إسماعيل بخيت على]
0.00/5 (0 صوت)

12-23-2013 08:11 PM
كثير من القراء قدلا تكون لديهم ثقافة بمكانيكا السيارات ، فقد إتصل بى على الهاتف صديق يسألنى ماذا أقصد بعبارة كرنك خرطة 60 وهو فهم خرطة من خريطة خارطة MAP بينما المقصود خرطة من خراطة TURNER OR LATHER فحين تشترى سيارة آخر موديل يكون الكرنك والقمصان والبساتم والشنابر والسبيكة والضراعات كل إستاندر وبمرور الزمن كلما إحتاجت السيارة لعمر وتم ربط الكرنك فى المخرطة ليتناسب مع القمصان وغيرها قلت درجة كفاءة السيارة من خراطه10 الى 20 الى 40 وحتى آخر خرطه 60 بعدها مافيش عمره ترمى المكينة وتجيب مكينة جديدة وأنا بقول لحسين خوجلى جماعتك كانوا بيسوووووووقوا فى السودان دون غيار زيت والمكينة هلكت والكرنك مقاسه 60 وزى ماقال الفنان السودان أزاهو الريد ومابتنفع العملية كدى إتخارجوا لى بره وخلونا نشوف لينا أولاد بلد كويسين يقودوه لبر الأمان أو نستعين بالخواجات المريض وصل مرحله حرجة


#865279 [المهندس سلمان إسماعيل بخيت على]
0.00/5 (0 صوت)

12-23-2013 06:47 PM
يا جماعة الإخوان المسلمين ديل الماعندهم غبينه على نميرى لو ما هماهم دم الإمام الهادى ورجاله مابيهم دم أخوهم محمد صالح عمر - نميرى شنو المابنشيل عليه غبينه والله الغبائن الشايلنها على عبود والنميرى والبشير خايفنها تجيب لينا ( كوكه ) والمابيعرف الكوكه نقول له لا علاقة لها بالكولا إلا أن فى الإثنين سائل


#865276 [سودانى]
0.00/5 (0 صوت)

12-23-2013 06:43 PM
ارجوك لا تكون اخى مثل القرضاوى وهو يدين انقلاب السيسي وفى الجانب الاخر يدعم انقلاب البشير فجعفر نميرى لم يغتال الشيوعيين قنصا بل حاكمهم واعدمهم لانهم مسئولين عن الانقلاب وقتلوا العشرات من الضباط العزل النائمين فى بيت الضيافة وحتى اذا بقى الموضوع جدلى ارجو ان لا نجامل على حساب التاريخ

ولك الشكر


ردود على سودانى
European Union [Hussein] 12-24-2013 03:47 PM
قمت على اللخبطة يا باشمهندس؟؟؟ من قال لك ان جوزيف قرنق شقيق جون قرنق؟؟؟!!

خليك زول دقيق ولا تطلق القول على عواهنه!!!!

United States [المهندس سلمان إسماعيل بخيت على] 12-24-2013 08:45 AM
انت مش سودانى يا أنت من السدنة يا من الجماعة - من قال لك أن من قتل ضباط قصر الضيافة من الشيوعيين حتى المحكمة لم تستطع إثبات ذلك والعقوبة كانت السجن للجميع - النميرى جاء مخمور شتم القاضى وعدل قرار الحكم من السجن للإعدام حتى أن المحامى جوزيف قرنق شقيق جون قرنق لمان سمع أنه سيعدم قال دا كلام شنو إعدام فى شنو - ويا سودانى عاوزك تورينى ناس بابكر النور كانوا فى لندن وجاءوا بطائرة أنزلها القذافى الملعون فى طرابلس وسلمهم للنميرى فأعدمهم ديل برضوا شاركوا فى قتل ضباط بيت الضيافة - فى حقائق كثيرة غايبه ولكن تاريخ جديد للسودان سيكتب مادام منابر زى الراكوبة فتحت صفحاتها للتاريخ ليسجل - أنت قلت ( فجعفر نميرى لم يغتال الشيوعيين قنصا بل حاكمهم واعدمهم لانهم مسئولين عن الانقلاب وقتلوا العشرات من الضباط العزل النائمين فى بيت الضيافة ) ورينا دليلك شنو أن القاتل كان من جماعة هاشم العطا - ما تأخذ لى تصريحات صحفية أو لقاءات تمت فى عهد الإنقاذ وبرامج ناس التوم الطاهر - دى كلها فبركات - وهل الجنود اللى كان حارسين الضباط فى قصر الضيافة جاءت أوامر من هاشم العطا لقتل من كانوا بالقصر - تاريخ أيه اللى بنجادل عليه - دا حسين خوجلى بيقول لا عندنا غبينه شديده على عبود ولا نميرى ولا البشير - طيب الغبينة القلبت جلدنا دا أسود نحن شايلنها على منو ؟ أكيد أزهرى يا الهندى
ثم ماهى علاقة كلامى دا بعبارتك ( ارجوك لا تكون اخى مثل القرضاوى وهو يدين انقلاب السيسي وفى الجانب الاخر يدعم انقلاب البشير ) وضح افصح


#865224 [أبوالكجص]
5.00/5 (1 صوت)

12-23-2013 05:58 PM
كما قال د. بشرى الفاضل "أدع الشعب لإسماع صوته عبر قناتك إن كنت صادقاً ياحسين".

أنا كأحد السودانيين الذين يدعي حسين خوجلي بتمثيلهم مطلبي بسيط وهو أن يترك حسين خوجلي مساحة للجمهور في برنامجه المثير للجدل هذا للمداخلات ودون ذلك فهو مجرد بوق للنظام مدفوع له مقدماً لكي يقول ما يقول.


#865067 [المؤمل خير]
0.00/5 (0 صوت)

12-23-2013 03:16 PM
والله كلام في المليان...! يديك العافية


#865047 [moh]
0.00/5 (0 صوت)

12-23-2013 03:01 PM
والله كلام صحيح ومنطقى
بالله كيف يقول حسين خوجلى هذا الكلام الا يستحى على نفسه


#865023 [daim mitry]
0.00/5 (0 صوت)

12-23-2013 02:42 PM
جيت من الآخر يا م. سلمان فشيت غبينتنالكن المرارة مفقوعةوالآن ازالة المرارة بالليزر دون جراحة


#865014 [صالح]
0.00/5 (0 صوت)

12-23-2013 02:34 PM
يا باشمهندس كلام حسين خوجلي لي بكري حسن صالح واضح بيحرش فيهو يقلبها على صاحبه البشير وبالتالي يفسح لينا المجال نتكلم بي راحتنا عن غبننا على البشير . بالمناسبة انت نسيت غبننا نحنا اهل الجزيرة ابا على نميري والابادة الجماعية والمذابح التي اباد فيها اهلنا الله ينتقم منه كما نسأله ان ينتقم من البشير وحسين خوجلي وكل جماعة المشروع الحصاري


#864972 [حليل السودان في زمن الانقاذ]
0.00/5 (0 صوت)

12-23-2013 01:50 PM
مشاهدي برنامج ( مع حسين خوجلي ) احصوا وعدوا كلمة ( انا ) في هذا البرنامج....حاجة تقرف؟؟؟؟؟؟؟


#864969 [ابراهيم1£2]
0.00/5 (0 صوت)

12-23-2013 01:49 PM
يكفى عبود شؤما ولؤما
انه اول رئيس فى افريقيا كلها سن سنة الانقلابات العسكرية ضد حكومات ديمقراطية .. هو أب الديكتاتورية بجدارة فى افريقيا
ويتحمل كل أوزارها ،، من قتل ألهوتو و التوتسى ،، الى دماء المواطنين فى مالي ، والصحراء الغربية ،، وحتي دماء الاخوان المسلمين( جماعة حسين خوجلى) فى مصر عبدالناصر ، لا ينقص ذلك من ذنوب مقترفيها شيئا ، وتقول لا غبينة شديدة علي عبود..
اما نميري فحدث ولا حرج .. اول من سن قتل أهل قري السودان ( الجزيرة أباً ) بالطائرات المصرية .. وللبشير اسؤة سيئة فيه .. فى قتل أهل القري فى جبال النوبة والانقسنا بطائرات الانتنوف الروسية ، وطيارين ايرانين ..
ليس هناك جريمة اعظم من القتل الا الفتنة التى تؤدى اليه،.
ومع ذلك يزعم حسين خوجلى الا غبينة شديدة علي النميري ..
سؤال برئ
هل جريدة ألوان فى عهد الديمقراطية الثالثة مثلت رأس الفتنة ؟؟؟


#864956 [[email protected]]
0.00/5 (0 صوت)

12-23-2013 01:35 PM
ابو جدوووم


م.سلمان إسماعيل بخيت على
م.سلمان إسماعيل بخيت على

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة