المقالات
مكتبة كتاب المقالات والأعمدة
الفاتح يوسف جبرا
قول كلام تاني
قول كلام تاني
01-07-2014 01:56 PM


بينما العبدلله يقرا في أحدى الصحف لفت نظره تصريحاً لرئيس القطاع التنظيمي بالمؤتمر الوطني المهندس حامد صديق يفيد بعدم إجراء تعديلات في الدستور قبل الانتخابات المقبلة، ويؤكد فيه بإن قيام الانتخابات في العام المقبل من مطلوبات الدستور ويبرئ في الوقت ذاته ساحة حزبه من استخدام أموال الدولة في الانتخابات مؤكداً عدم احتياجه لها قائلاً إن المؤتمر الوطني سيعتمد على اشتراكات عضويته التي تصل 8 مليون عضو …
ما أن قرات هذا التصريح حتي صحت : يا ولد جيب الكالكيوليتر (الآلة الحاسبة) !
طيب إذا افترضنا أن تعداد السكان قبل الإنفصال كان 50 مليون وبعد الإنفصال أصبح 40 مليون وأن 12 مليون منهم دون البلوغ يكون الباقي 40-12 = 28 مليون ، طيب نقوم نطرح منهم 4 مليون طلعوا تركوا البلد دي (مرغمين) 28-4=24 مليون (يعني الفاضل 24 مليون مواطن) فيهم 8 مليون – مؤتمر وطني- كما صرح الباشمهندس يعني 8 مليون مؤتمر وطني و16مليون (ما) مؤتمر وطني وهذا بقانون النسبة والتناسب يساوي2:1 يعني كل عدد 3 من المواطنين فيهم واحد (مؤتمر وطني) .. شفتو كيف؟
ما أن قمت بوضع الحاسبة جانباً حتي سألت نفسي :
– معقوله هسه كل 3 مواطنين فيهم واحد عضو في حزب المؤتمر الوطنى؟
بدأت بنفسى التي وجدتها تنتمي إلى حزب (المواطن) ثم جيراني من الثلاثة جهات .. ثم عرجت على أسرتى الصغيرة .. ثم الكبيرة .. توقعت أن أجد نسبة واحد من كل نفرين (مؤتمر وطني) .. لكنى للأسف الاسيف لم أجد زول وااااحد (من العائلة كوووولها) !!
قلت فى نفسى ربما (عائلتنا دى) عائلة (دورا ميت) ساااكت ولا تفهم فى السياسة وليس لها حس (وطنى) ولا تتوق أن يكون لها (مستقبل حضاري) كدى يا زول شوف أصحابك وأصدقائك، أمسكت بهاتفى الجوال وبدأت فى إستعراض أسماء معارفى وأصدقائى واحد .. واحد .. لم أجد منهم واحداً (من الـ 8 مليون) .. وهنا سمعت طرقات على الباب فتحته فوجدته (فوزي الجزار) :
- أهلاً فوزي
- إذيك يا استاذ .. والله قلنا نتفقدك ليك مده ما ظاهر وما قاعد تجي علينا
- يا فوزي نجيكم كيف مع الكيلو أبو ستين ألف ده ؟
- بكرة يا أستاذ مر علينا نجهز ليك حاجة كويسة
- تجهز ليا شنو يا فوزي نحنا بقينا شغالين عدس ساااكت
- طيب نجهز ليك حاجة كده (قدر ظروفك)
- خلينا من قصة اللحم دي يا فوزي .. دي فرصة أسالك سؤال !
- إن شاء الله خير يا استاذ
- لا خير .. إنتا يا فوزي (مؤتمر وطنى)؟
- تقصد شنو يا استاذ !
- قلتا ليكا إنتا عضو فى حزب المؤتمر الوطنى!
ضحك (فوزي) حتى كاد أن يستلقي على ظهره :
- يا أستاذ إنتا بتهظر .. هو أنحنا قادرين (ناكل) عشان نكون بتاعين أحزاب و(سياسة) وكلام فاضي ؟ .. خليها على الله يا أستاذ
- طيب إتفضل لى جوه يا فوزي نكرمك بى شاي بى أي حاجة
- إتفضل وين يا أستاذ أنا لاحق الجمرة قبل ما تقفل
نعم الحقيقة التى لا تحتاج لأى نوع من الشطارة تقول أن 90% من الشعب السودانى الفضل أصبحوا (ناس معايش سااكت) لا ينضمون (لأى حزب) وأن السياسة بالنسبة لهم (ترف) لا تحتمله (صعوبة الحياة) التي أصبحوا يعيشونها والجرى وراء (قفة الملاح) ومصاريف المدارس والجامعات .. والعلاج .. والمستشفيات والسكن والمواصلات و(الجمرة) والشنو ما عارف .. كما أن الحقيقة (الما عايزه ليها إحصائيات) تقول أن كل الأحزاب التى على الساحة الآن لا تزيد عضويتها الحقيقية (وليست المفبركة) فى أحسن الأحوال عن بضع ألوف لا تتجاوز أصابع اليد الواحدة .. هذا إن لم تكن أقل من ذلك بكثير بما فى ذلك حزب (أخونا الباشمهندس) .

كسرة :
8 مليون … يا رااااجل قول كلام تاني !!

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو)+و+و؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو)+و+و؟


تعليقات 19 | إهداء 0 | زيارات 7294

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#881287 [عصام الجزولى]
1.00/5 (1 صوت)

01-09-2014 12:09 PM
الاخ/ جبرة أرجو اضافة كسرة جديدة بعنوان ملف مقتل طلاب دارفور بجامعة الجزيرة العند النائب العام الحصل فيه شنو ؟


#881048 [ابو ابراهيم]
1.00/5 (2 صوت)

01-09-2014 09:42 AM
يا استاذ جبرا مالك تحكها حتي تجيب الدم الناس ديل الواحد فيهم بي الف رجل شوف الحال العليهم الثروات والاملاك وهلم جرا مش ممكن يساووا ال 8 مليون القالوها دي ؟ وبعدين في الانتخابات التي يتكلمون عنها دي انت متاكد انك ماصوت في الانتخابات الفائته للرئيس ؟ زي ما قال احد الساسه السابقين البلد بلدهم وهم اسيادا


#880572 [سامي]
1.00/5 (1 صوت)

01-08-2014 05:51 PM
التحية لك يااستاذ هل الوزراء البكوا لما شالوهم ديل بصوتوا للشجرة تاني؟ بعدين يااخي اللحام لما يطول بفك هل الكباتن ديل اقوى من اللحام؟ بعدين الناس ديل ليه مستعجلين على الانتخابات ماالزمن كتير لسع؟بعدين ديل ماحكموا جيل كامل مش كمان يرحموا الصغار ديل شوية وغايتوا نحنا قنعنا من خيرا فيها!!اصابنا الطشاش والتنمل والباقي راقدين على السراير بتاعتم راجين الموت ماعندهم حق العلاج بالله العظيم والكروش مليانة يمسحوا عليها اي حد منهم يخرج من المول يدحرج حاجات بالملايين المنهوبة من الغلابة العيانين ديل


#879826 [سيكو]
2.50/5 (3 صوت)

01-08-2014 06:13 AM
ثمانية مليون حرامي يعني موجودين في السودان


#879670 [الجابرابي 23]
0.00/5 (0 صوت)

01-07-2014 11:21 PM
رشو بي موية خليهو يصحي بتاع المؤتمر البطني ،،، طيب العمارات ف ماليزيا والامارات دي كنتو بتملكوها فبل ما تسرقو المال العام
يا حرامية


#879619 [omer]
2.50/5 (4 صوت)

01-07-2014 09:38 PM
يا جبره حسابك الششنه دا ما صاح اولا السودان قبل الانفصال كان اربعين مليون ناقص الجنوب يبقي 30 ناقص دون البلوغ12 يبقي 18 ناقص الهاجروا كما قلت الباقي14 ناس الوطني قالو مسجلين بالكومبيوتر 8 اذن الباقي 6 وديل مقسمين علي ستين حزب وناس معايش شفتا كيف


#879608 [abu khaled]
3.75/5 (3 صوت)

01-07-2014 09:14 PM
تصور يا عم جبرة الاصم طالب 630 مليون دولار للانتخابات والاحزان السياسية سوف تنسحب والصادق يعمل كبري وسوف يترشح كيجاب وكمال افرو وكامل وابو جلمبو ويفوز البشير بي 99% والميزانية خالطة زيت مع موية وعاوزة شمبر وكيلو اللحمة ابو ستين الف جنيه اسبابه انا عرفتها تقرير المراجع العام والنهب المصلح وحسني مبارك قال عضوية الحزب الوطني 4 مليون مصري لكن شعبة رقالة وهو الان في ابو زعبل ونتمنى لزولنا كوبر او عود القذافي او لاهاي على اقل تقدير يا رب


#879434 [عنيد]
5.00/5 (1 صوت)

01-07-2014 05:25 PM
وانا كمان يا استاز ما موتمر وطنى


#879420 [جنرال زمان]
0.00/5 (0 صوت)

01-07-2014 05:02 PM
يا أستاذ جبرا هسع جيب ليك صابون بدرة من أردأ نوع وأديه شوية موية وخجه شوفه يعمل رغوة كيف، بس ما تعشم أنه ينضف ليك منديلك دا. أها يا جبرة يا أخوي الجبهجية ديل وشوية خجة كدا يكتسحوا الانتخابات بنسبة 99.9% وبس. هسع دي محتاجة سؤآل ولا درس عصر. مع تحياتي لفوزي قدر ظروفكز


#879379 [التويجري]
3.50/5 (2 صوت)

01-07-2014 04:12 PM
ديل اتعلموا لغة الملايين عشان كده أي حاجة بالمليون ولو سألوه بقول ليك نحنا زي الدولار الوطني فينا بعادل سبعة الف مواطن عادي وقيس علي كده بحصلو الرقم ده


#879341 [abu shawarib]
5.00/5 (4 صوت)

01-07-2014 03:35 PM
سأكتب تعليقا قد ترونه مشاترا وأنا وكثير من الناس لا يرونه مشاترا , وأنا وهم ربطنا كل مواضيعنا بالسبب الأساسى ولقينا فى صلة وثيقة بينهما .....
فى هذه الاثناء سألنى ولدى الصغير عمر 8 سنوات : يا أبوى منتشه معناها شنو ؟ والله مازعلت وقلت ليهو دى حركات كده بيعملوها الناس الماكويسين خالص عشان يغيظوا بيها الناس القافلة معاهم ...
قال لى يا ابوى القافلة معاهم ديل زيك انت وعمو مجدى قلت ليهو آآآآآى قال والبيعملو الحركات بتاعت المنتشة دى زى عمو البيجى فى التلفزيون بالليل كل يوم ورابط ملاية السرير الدبل فى راسو ومامعاهو زول ويقنب يعمل حركات بيدينو داك تفتكروا قلت ليهو شنو!!!

يا عم بلا 8 مليون بلا برميل


#879340 [Abu Areej]
4.00/5 (2 صوت)

01-07-2014 03:35 PM
كلامه ده يقولو لزول ما عنده حديده..


#879330 [osama dai elnaiem]
5.00/5 (3 صوت)

01-07-2014 03:27 PM
كل عام وانتم بخير يا استاذ--- 8 مليون من الدواب وهي امم امثالنا----- شفت ناس المؤتمر الوطني كيف اشطر منك في الفهلوة!


#879322 [سفر البن]
4.50/5 (4 صوت)

01-07-2014 03:20 PM
يا عم جبرا السودان باقي فيه 8 مليون بس والباقي يا طلع بره يا مات وحايموت جوه يعني 8/8=1
كله واحد!!!!!


#879319 [سفر البن]
0.00/5 (0 صوت)

01-07-2014 03:17 PM
يا جبرا صحح كلامك السودان باقي فيه 8 مليون بس والباقي يا مرق بره يا مات ولا حايموت يعني 8/8=1
كله واحد!!!!!!!!!!


#879285 [ابوعبد الله]
3.00/5 (2 صوت)

01-07-2014 02:40 PM
ينصر دينك يااااااااااااااااستاذ


#879282 [A. Rahman]
4.50/5 (2 صوت)

01-07-2014 02:31 PM
و إيه رأيك انا ما لاقاني اي زول مؤتمر وثني، و حتى اللصوص اللي قبالتهم في حياتي كانوا لصوصا محترمين بالدرجة التي لا تسمح لهم كرامتهم بان يصلوا في اللصوصية الى درجة
التجرد من الاخلاق ليصلوا مرحلة يمكن ان يصفهم فيها احدنا بانهم مؤتمر وطنى'


#879269 [الناقشة جد !]
3.38/5 (4 صوت)

01-07-2014 02:20 PM
مساعد الرئيس الجديد لشئؤن الحزب الذي قام بتوطين وظيفة نافع وهو البروفيسور ابراهيم غندور شخصياً رد على كلام زولك بتاع التمانية مليون .. وقال دة كضب ونجر الحكاية ما قدر ده ! يعني الكلام ما من عندنا يا سي جبرة ..جاء من دقنه وفتلو !


#879263 [محمد]
4.00/5 (2 صوت)

01-07-2014 02:15 PM
يا أستاذ الفاتح نسيت تنقص المجموع من الجماعة الإنسلخوا


ردود على محمد
United States [abdo] 01-07-2014 08:45 PM
ودى اهم حااااااااااااجة


الفاتح جبرا
 الفاتح جبرا

مساحة اعلانية




الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة