المقالات
السياسة
سودانير: الي عثمان يوسف وعبدالرحمن فضل.
سودانير: الي عثمان يوسف وعبدالرحمن فضل.
01-09-2014 09:25 AM



إهداء: الي روح صديقي كابتن سر الختم مالك الجزولي. فقد كنته معلما للاخلاق النبيله في سودانير.
بمناسبه وفد سودانير الي دوله الامارات العربيه برئاسه المديرالعام الجديد وعضويه عثمان يوسف وعبد الرحمن فضل اسال نفسي: انتو ياعثمان وعبدالرحمن لسع قاعدين في سودانير؟ الرشيد ومعتز ومحمد خلف الله و70 في الميه من مؤسسي سودانير هجرو وانتو لسه قاعدين؟ وكل الحصل لي سودانير دا ماهزاكم ولسع قاعدين؟ لا خط هيثرو لا بيع الطيارات لا اعلانات اشانه السمعه في دبي ولا الديون ماهزت فيكم شعره؟ وكمان بتسافرو؟ السفر دا لسع ماشبعتو منو؟ بيوتكم ماكملت ولا اولادكم ما اتعلمو؟ والله حرام عليكم. انتو الاتنين بالذات حرام عليك. زي النبت الشيطاني. انا لمن سمعته الخبر دا افتكرتكم مسافرين عشان موضوع محكمه دبي. ماتخيلته انكم كمان بتخططو لي مجزره تانيه. ياخ هي سودانير دي فضل فيها حاجه؟ والله حرام عليكم. بلاي مافيكم واحد يقول لينا (نحنا بنضحي من اجل السودان) دا والله السودان البضحي من اجلكم. سودانير دي تقول خلقوها ليكم انتو بس.
عندي احساس قوي انو انتو وامثالكم السبب الرئيسي في تدهور سودانير. لا بتهشو ولا بتنشو. سفر بس. لو الليله الحكومه دي جابت نتنياهو زاتو وبقي المدير طوالي حاتقترحو ليو سفريه وتنطو معاهو. لكن زي ماقال احد الزملاء الحمد لله مامشيتو لندن وسكنتو هنالك عشان تحلو موضوع خط هيثرو.
في راي ان مشكله سودانير تتمثل في (عثمان يوسف وعبد الرحمن فضل). البدعم كلامي دا انو الاتنين ديل لمن سودانير كانت في قمتها, الاول كان موظف عادي في مكتب الحجز والتاني كان موظف في قسم الكمبيوتر لمن الكمبيوتر كان (مين فريم). كل الناس الجهابزه اتساقطو وفضلو هم متشعلقين ورجال كل اداره. يتنقلو من التخطيط لي التسويق لي المحطات الخارجيه وكانو الصالح العام مابعرفهم. الكلام دا بتفسر بي طريقه واحد مافي تاني ليها. انو انتو الطابور الخامس البي سببو الناس المؤهله بتطلع. وانته بالذات ياعثمان يوسف مؤهلاتك الوحيده انو (اخلاقك عاليه). ماقلنا حاجه بنحترمك عشان اخلاقك العاليه دي, بس الموضوع اكبر من كده بي كتير. الموضوع سودانير اتدفنت خلاص واخلاقك العاليه ماقدرت توقف دا. تجي والناس في بيت العزاء تسافر عشان حفنه دولارات؟ ياخ علي الاقل قول للسيد المدير الجديد انو الناس البتعرف سودانير مافي شئ بجننها غير سفر المسؤولين. نلغي الموضوع دا وننادي ناس دبي ديل هنا. طوالي مستف شنطتك ومسافر؟ شوف ياعثمان يوسف وياعبد الرحمن فضل نحنا هسع بقينا نفرز في الكيمان. وانتو في وش المدفع وحكومتنا دي بعد نافع وعلي عثمان بقي ماعندها كبير, اذا حصل اي تغير انتو الاتنين (مع ناس اخرين طبعا في الادارات التانيه)حاتكونو مسؤولين امام القضاء. وحانجي نقيف ضدكم في المحاكم وحانرفع محامين اتهام عشان ندفعكم اي مليم اخدتوها بدون وجهه حق. حاجه تانيه. الاتفاقيه الجديده الدايرين تعملوها دي نحنا حنكون ليها بالمرصاد واي حاجه نشم فيها ريحه ذفره (ونحنا بقينا متخصصين في الريحه الذفره) , طوالي حانكتبها عشان نوري الراي العام انو في حصان طرواده في سودانير بالداخل, وانكم (القرقرينه) البتاكل في جسدها السنين دي كلها.
اما انته يالسيد المدير العام نرجوك بطل حكايه السفر بتاعتك دي لانو بترفع ضغطنا والاتفاقيات البتتعمل بره السودان ممكن تتعمل جوه السودان. وماتقول لينا انا قريت وين ولا كنته مدير شنو وهي لله هي لله. سودانير دايره زول يعرف انو سفر مافي والشغل كلو في (عبيد ختم) بس. داير تعمل كده ونديك فرصه مرحب بيك, داير تعملا سفر امشي في ستين داهيه كفانا المرض العملو لينا المدرا القبلك.
اخيرا رساله الي الحكومه. ياخ والله نحنا زعلانين منك شديد. الناس دي بتجيبوها لينا من وين؟ المدير دا قالو كان عندواقفاص بيض وصيوانات للايجار بقريه فداسي. الكلام دا علاقتو شنو بالطيران. ياجماعه الطيران دا مازي اي حاجه تانيه. بي هدوء كده قلنا ليكم جيبو لينا د شمبول ماعبرتونا. هسع ممكن نقترح زول تاني. كابتن وداعه مدير نوفا للطيران مالو عيبو لي. اول حاجه ماعجوز. اسس نوفا للطيران دي من الزيرو وتعتبر من انجح شركات الطيران الخاصه في السودان لانها بتشتغل بي كل مهنيه. واذا جينا للتهذيب افتكر كابتن وداعه بفوت الناس في التهذيب. وتهذيبو كمان ليس وراهو مصالح. اضف الي ذالك, انو زول بعرف خبايا الطيران اكتر من كل المدراء الجبتوهم. واها دي فرصه تثبتو للناس انو موضوع التمكين دا انتهي والشلليات دي اصبحت من الماضي. مع انو اشك في ذالك فكابتن وداعه لا بعرف جمال الوالي ولا اي راس كبيره في الحكومه.
[email protected]


تعليقات 3 | إهداء 0 | زيارات 2918

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#881366 [osman]
5.00/5 (1 صوت)

01-09-2014 01:06 PM
مع كامل الاحترام لك يااخي الكريم – سودانير مدمرة تدميرا كاملا –مثلها مثل الخطوط البحرية والسكة حديد والنقل النهري ومشروع الجزيرة والمصانع .....ووووووالخ من التدمير الذي الحقته الانقاذ بالسودان- وتحتاج كل هذه المرافق الي ان تعاد للحياة –ولعمل ذلك يلزمنا الاتي:1-الرجال الامناء والمخلصين واصحاب الخبرات-علما بان الاخلاص والامانة تاتي اولا
2- راس المال
3-البنية التحتية اللازمة
4-الكادر العمالي والمهندسين المؤهلين بخبرات من خارج السودان والذين تتوفر فيهم الامانة والاخلاص
واما تغيير واحد فرد او اثنين فلن يغير من حال تلك المرافق
اخيرا انا اشك في ان تتوفر أي من هذه البنود حاليا في وجود طغمة الانقاذ المجرمة ولك التحية والاحترام


#881204 [ابو السارة]
0.00/5 (0 صوت)

01-09-2014 11:12 AM
ديل الطاعون زااااااتو . والراجل دا كلمناهو كتيييير ولازال مكنكش فيهم واقل حاجة خسروه الحج وهو عارف وعامل ما عارف
اما هو متفق معاهم اما سودانير ماقدروا والشغلانة تمكين ساي
تيمان برقو ديل شغالين بنظرية لا قضاء يهم و لا حكومة تلم
ديل بس يقدر عليهم شغل رب العباد بس


#881180 [hafiz]
3.00/5 (1 صوت)

01-09-2014 10:56 AM
أخى الكريم دكتور الرازى ... مسألة دعوة الشركات والمسثتمرين للحضور للسودان هذه الدعوة تحكمها أشياء كثيرة ، وبصراحة أصبحنا وش مرمطة وحاجتنا للغير جعلتنا نمد أيادينا خجلاً وعلى استحيا ، شركة منهارة إلى هذا الحد ليست لديهم قاعدة يستندون اليها حتى يدعو كبار المستثمرين ويحددوا شروطهم ، وهذه الصفقة إسمها (أرميها فى عبهم) وخلص نفسك ، السؤال المهم/ منْ وراء هذا الإتفاق وكم قبض من العملية من الطرفين؟ لا اعتقد ان الأمر دون وسيط ووسيط قد يكون مقرب يهمه المال وسودانير تذهب اينما تذهب...

(لو جنبك سكر سف ليك شوية حتى تزول هذه المرارة التى نتزوقها جمعيا بين السطور وخارج السطور ).....


د الرازي الطيب ابوقنايه
مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة