زبادي ساااكت
01-10-2014 01:49 AM


لدى الشعب السوداني الكثير من العادات والسلوكيات الجميلة والتي لا تتوافر في كثير كم شعوب العالم إن لم يكن كلها مثلاً (الشهامة) لم يحدث قط أن توقفت عربة العبدلله بسبب (نزول) لستك حتى هب لمساعدته المارة من الشباب فقاموا برفع العربة وتبديل اللستك ومضوا في حال سبيلهم دون إنتظار كلمة شكر .. هذا يا سادتي لا يحدث إلا في السودان !
لا يجد مواطن سوداني شخصاً مصاباً في حادث إلا وتوقف وأركبه في عربته غير آبه للدماء التي تنزف منه وثيابه التي تلطخت بتراب الرصيف و(الجرجرة) القانونية التي سوف تحدث له وأورنيك 8 وما أدراك ما أورنيك تمانية ، يوصله المستشفي ويتابع علاجه وكمان لو القصة عاوزه ليها حقن .. شاش مش عارف أيه يدفع من جيبو وينتظر معاهو لحدت ما أهلو يعرفو ويجوهو ، وهذه أيضاً لا أظن أنها تحدث في أي مكان في العالم .
وكما أننا شعب له إيجابيات فأيضاً نحن شعب لديه من السلبيات الكثير والتي لا تحدث إلا في السودان مثلاً جميع شعوب الأرض لديها إهتمام بمسألة الوقت .. يدق جرس طابور المدرسة الساعة 8 صباحاً تلاقي المدرسة كووولها موجودة المدير والوكيل والمعلمين والمشرفين وبتاع البوفية والعمال والفراشين لكن لدينا الأمر مختلف .. يدق الجرس .. يقيف الطابور تدخل الحصة المعلم ما يجي تسال يقولو ليك :
- أستاذ عوض ده ساكن بعيد !!
- يعني هو ما عارف نفسو ساكن بعيد وللا أيه ؟ طيب مش يطلع أبدر شوية؟
أما حكاية تقدير الوقت فحدث ولا حرج .. تقوم بإعطاء الطلاب مشروعاً أو بحثاً وتعطيهم شهراً لإنجازه إلا أن الواقع يقول أن معظمهم يبدأ ويشرع في عمله قبل أيام معدودات وهاك يا بحث في (الإنترنت) وهاك يا (كوبي أند بيست) وقطع ولزق وطباعة متسرعة عجلى مليئة بالأخطاء وتغليف مش ولا بد حتى أن بعضهم من فرط العجلة ينسى كتابة اسمه على (البحث) !
أما حكاية الموظفين والموظفات فده كوم تاني خليكم من الحضور والإلتزام بمواعيدو تعالو نمسك الحتة بتاعت الإستفادة من الوقت ذات نفسو .. تاتي لقضاء معاملة فتجد الشباك مقفول ، تسال :
- الشباك ده قافل ليه؟ الساعة يا دوبك تسعة ونص
- الموظفين ديل في الفطور
- (بعد مدة) : يا جماعة الساعة بقت حداشر وشوية
- (ست الشاي) : لا خلاص بيكون في السكة
- (في إندهاش) : السكة؟ يعني ما قاعد يفطر هنا؟
- لا الموظفين ديل أصلهم بيفطرو عند (الفوال الرهيب) في نمرة إتنين .. (وتكون الوزارة في شارع النيل)
ويأتي بعد شوية الموظف بسلامتو ويفتح الشباك تديهو الورق بتاعك يقوم يقول ليك :
- إنتا عرس ناس عصام ده في الصالة الذهبية وللا صالة المعلم؟
وقبل أن تقتلك الدهشة تقوم تكتشف إنو خاتي ليهو سماعة بتاعت موبايل وبيتكلم ليهو مع زول .
وشويتين الشباك يقفل :
- على وين يا أبو الشباب؟
- الصلاة يا جماعة الضهر وكتو دخل
- ودي ح تصليها في مسجد النور؟
- لا لا المسجد أهو داك !
ويسلم الإمام وتنتهي الصلاة .. وأبو الشباب ما يظهر .. نص ساعة .. ساعة.. ساعة وشوية ويفتح الشباك ويقوم صاحبنا بإجراء معاملة أو معاماتين ثم يلملم موبايلو .. ومفاتيحو .. وجرايدو :
- معليش يا جماعة اليوم إنتهى تعالو بكرة !

كسرة :

الوقت كالسيف إلا عندنا نحنا .. زبادي سااااكت !

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو)+و+و؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو)+و+و؟


تعليقات 11 | إهداء 0 | زيارات 6269

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#883225 [سكسك]
5.00/5 (1 صوت)

01-11-2014 10:03 PM
انا بقرل الكلام بالمنطق اغلب الموظفين ماقاعدين يفقرقون بين الحلال والحرام وانت اخذته مرتب تعال الشغل ولو ناعجبك امشي بيتكم ده مرتبنا مامكفيك انقلع امشي في مليون شخص ممكن يشتغلون بهذا المرتب ،الشي الثاني اي مجاملة اثناء ساعات الشغل حرام حرام لانه هذا وقت العمل وانت اخذته مرتبك علي هذا الاساس تلفونك خليه للامور الاسرية للزوجة والعيال لاي ظرف طاري ذي الدول الغربية وليس الاسلامية لانه اغلب الدول الاسلامية زفت ذينا في الزمن
اما الصلاة والحوامع في المكاتب فهذا المساجد مضيعة للوقت والونسة ممكن اي موظف يصلي وبخشوع في اي محل لكن تطلع للظهر من الساعة اطناشر وترجع اثين والله دي ماصلاة ده لعب علي الله وعباده ونحن من زمن عبود والانجليز ونميري وغيرهم لم نري لعب بالدين والصلاة والزمن الا في هذه الحكومة ووجدنا اهلنا موظفين والله صلاتهم عادية وفي البيت او المسجد في الحي او القرية لكن لم نري واحد منهم سرق او قصر في شغله وساعات الشغل شغل حتي لو هو بايته معه السكرة وياجبره العيب ليس في المواطن انما في جماعة التمكين وحرامية الدين واعزر الشعب لانه اغلبه ضاع وسط العفن الوطني وناس العفن الوطني اصبحو هم اغلبية الخدمة ومذرة ايها الطيبين الضاعو وسط العفنين


#883151 [كومي كوكو]
0.00/5 (0 صوت)

01-11-2014 07:14 PM
اثنين سودانيين بعملوا موعد مع بعض واحد قال للتاني نتلاقى بين الساعة اربعة لحدي الساعة خمسه والساعة سته لو جيت سبعة انا بمشي


#883033 [الفاتح]
0.00/5 (0 صوت)

01-11-2014 04:01 PM
ما قلنا ليكم المشكلة مشكلة شعب ما حكومة بس
كيفما تكونوا يول عليكم


ردود على الفاتح
[Hatim Babiker] 01-11-2014 07:18 PM
تماماً لا يغير الله ما بقومٍ حتى يغيروا ما بإنفسهم،، لكن نختلف معاك في ردك التحتاني فيما يتعلق بالشعب السوداني ما بتاع شغل،، عشان الكلام ما يمشي زي الشايع عن الشعب السوداني كسلان وخلااااص حتى زيدان الكسلان بقى مختنع إنو أنحنا كسلانيين اكتر منو بل كل شعووب الخليج وبالأخص السعودييين الجو في الترتيب قدامنا في الكسل خاتيننا كسلاااانين اكتر منهم وبيعملو نكت كمان،،
السودانيين لما يطلعوا برا البلد ليه بيشتغلوا بيدينم وكرعينوم وبياخدوا جوائز موظفين الشهر في المؤسسات وغيرها؟؟؟
زي ما قال أستاذ جبرا أنحنا شعب مليان خير مافي في غيرنا وعندنا مساوئ أكتر من غيرنا بس لا يحق لنا أن نطلق الوصف على علاته بأن السودانيين ما نااااس شغل!!!!
الموظف المثال في قصة الأستاذ في رائي لا يمكن يطلع منو كدا لو في نظام نظام نظام زي ما في كل الدول التي توظف الموظفين ويكون الدخول بنظام البصمة يعني التمام والخورج كذلك وهناك نظام متابعة من المشرف المباشر ونظام إنجاز يومي وشهري وتقارير شهرية مثلاً وزيارات ميدانية ومقصف داخلي ومكان لشرب القهوة أو الشاي وىخر للمدخنين فقط وووو وتققيم أداء سنوي على ضوئه تتم الزيادة السنوية في الراتب او عدمها وتدريب مستمر ودورات تدريبية وووهكذا من انظمة ولا ننسى الخطة الشهرية التي تخرج منها الخطةالإسبوعية ومن باب اولى اليومية ودا كلو في إطار الخطة السنوية للمؤسسة او مجال العمل المحدد،،، يعني نظام إداري متكامل فيه خطط إجازات وغيره من نظم تطوير الأداء المتعارف عليها دولياً والتي باتت تدرس،،،، يعني الموظف غير معزول عن بيئة عمله يؤثر ويتاثر،، الحكومات نتاج طبيعي لجمهور معين تؤثر وتتاثر ولا يغير الله ما بقومٍ حتى يغيروا ما بأنفسهم......


#882618 [ام الحسن]
0.00/5 (0 صوت)

01-11-2014 08:22 AM
الموظف ده ممكن ارد ليك ويسكتك كمان 000اذا قال ليك انا شغلى ده قدر قروشم

اى قدر الماهية الباخدها



ا


#882521 [هندسة]
0.00/5 (0 صوت)

01-11-2014 01:20 AM
ونحنا زاتنا اتعودنا وجلدنا تخن ماشاءالله لو الموظف قال ليك امشي وتعال بعد سنه بتقوليهو اجيك الساعه كم بالضبط؟


#882407 [Adam Ibrahim]
5.00/5 (1 صوت)

01-10-2014 09:54 PM
انت يا جبرا ما سمعت بنكتة الموظف الجاى الدوام متأخر المدير سأله يا زول جاى متأخر مالك؟ قال ليه كنت نايم!!.. المدير: هسى كنت نايم دا عذر؟.. الموظف: اعمل شنو؟ يعنى اجى نايم؟!!.. إلاّ كان يشيلنى حمار النوم..


#882074 [دا كلام ما صاااااح]
4.50/5 (5 صوت)

01-10-2014 11:39 AM
غايتو زمان كان بدقونا فى التأخير والأستاذ هو البجى بدرى
طيب اذا الأستاذ بقى يجى متأخر .. تانى منتظرين شنو من الباقين؟
يكون الأستاذ دا دفعتنا؟؟

عموما مسألة التقدير الحسابى عندنا فيها مشكلة .. سواء كان زمن او مسافة او وزن او غيره
مناهجنا مليانة بالمسائل بتحويل المسافات من نظام فرنسى لنظام انجليزى يعنى من الكيلومتر للميل
او من سنتمترات للبوصات .. وجمع وطرح الزمن .. من غير توضيح للطالب ..شنو يعنى سنتمتر .. وايه يعنى ثانية ودقيقة .. ودى بتخلى الطالب يعرف بالتقريب وبالتقدير يعنى شنو كيلو او لتر او حتى نص ساعة .. يعنى ما بنستفيد اى حاجة من كترة المسائل .. فالمسائل تظل مسائل وماليها علاقة بالواقع..
الحاجة العجوز فى اوربا تقول ليك امشى خمسين متر وتلف يمين .. وبعد داك امشى 35 متر .. تلقى الدكان ..

انعكاسات الموضوع دا كبيرة .. وهى ان اهتمامنا بالأرقام قليل جدا .. حتى على مستوى الخدمة المدنية ..تلقى ليك مقال يحلل فى الأقتصاد ومافيهو رقم واحد .. كله تنظير .. والتنظير ساااهل

ياخى اهم حاجة فى الدولة هى الأحصاء .. ماتقدر تخطط لأى حاجة من غير احصاء .. والأحصاء هى علم التنبوء بالمستقبل استنادا على ارقام حالية .. وانت ادرى بالموضوع .. فجهازنا الأحصائى من اضعف اجهزة الدولة


#882025 [ربش]
0.00/5 (0 صوت)

01-10-2014 09:55 AM
شرها ما يضحك ... سلمت يا رائع .


#881961 [شمال و جنوب فى محنة]
3.75/5 (3 صوت)

01-10-2014 07:14 AM
يا جدو انت جلكنت بقيت بتاع حكاوى زي ناس دكان الحلاق البلد في شنو و جدى جبرة في شنو


#881919 [بركل بدري]
0.00/5 (0 صوت)

01-10-2014 04:23 AM
مقال غير موفق على الإطلاق
أولاً كن دقيقاً ولا تعمم مثلاً: انعدام الالتزام بالزمن بدأ في الخدمة العامة ببداية [تعويم الجنيه] وقد ساهم [بنك فيصل] كثيراً في هذا التعويم؛ فتناقصت هذه الخدمة المدنية بتناقص المرتبات وازدياد التضخم؛ فأصبحت المرتبات لا تسد حاجات موظفي الخدمة المدنية. فالذين مهدوا لهذا الخراب في الخدمة المدنية هم [الإخوان المسلمون]؛ فمنذ بنك فيصل انهالت القروض الحسنة على أعضاء الإخوان؛ وببداية المصالحة الوطنية التي سرقها الترابي والصادق المهدي بدأ تنظيم الإخوان يضاعف من عضويته بإغراءات كثيرة منها هذه القروض. كل هذا التخريب مباشرة من الإخوان المسلمين عبر ستارة المصالحة الوطنية. الآن عند استلامهم السلطة شردوا كل المؤهلين ذوي الخبرات العالية والكفاءات؛ وأدخلوا أعضاءهم فانهارت؛ ثم بدأت تتآكل بدخول التلاوة في المكاتب وإقامة الصلوات وترك الخدمة.


ردود على بركل بدري
United States [الفاتح] 01-11-2014 04:05 PM
الما موفق هو تحليلك
بتبسط المور وما بتخت يدك ف الجرح الشعب السوداني مااااا بتاع شغل


#881898 [abushady]
3.50/5 (2 صوت)

01-10-2014 02:24 AM
بي مناسبة الموظفين دي احكي ليك موقف حصل لي اليوم مشيت مكتب الاراضي لاستخراج شهادة بحث بعد الدخول الموظف المسؤل من سحب الاستمارات غير موجود في موقعه انتظرت لفترة طويلة بعد مجيئه طلب مني احضار صورة ملونة ولم تكن معي اخبرني احد الحضور بان الاستديو تحت فنزلت وتصورت صورة سريعة وعندما عدت لم اجده حاولت البحث عنه وجدت عسكري في الباب منعني من الدخول فقلت له اني ذهنت لاحضار هذه الصورة وان الموظف منتظرني فقال لي ان الخزنة قفلت تعال يوم الاحد وان الموظف ذهب فنظرت الي الساعة وجدتها 12:30 ظهر. فقلت له زمن قفل الخزنة لم ياتي بعد انظر الي الساعة فاخذني من يدي الي شباك الخزنة وقال لي انظر فوجدت الكرسي فارغ ولا احد داخل المكتب وقال لي الليلة الخميس الخزنة بتقفل بدري...!!!


ردود على abushady
United States [محمدو] 01-11-2014 09:59 PM
والله نفس الموقف حصل لي بحزافيره..!!

European Union [ابو الجود ابن الاكرمين] 01-10-2014 05:26 PM
الاخ ابو شادى
مالك متور نفسك وعامل من الحبة قبة يعنى شنو لو قال ليك الخزنة قفلت وتعال بكرة مش احسن من ان يقوليك تعال بعد شهر وبرضو عادى زى الزبادى


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة