المقالات
السياسة
معقول مبادرة من (الميرغني)شخصيا!!!
معقول مبادرة من (الميرغني)شخصيا!!!
01-12-2014 06:39 AM


مشكلة الوطن تكمن بممارسة الابوية المفرطة من رؤساء احزاب الطائفية،
إستغلوا الدين إستغلالا مشينا من اجل ولاء ات الشعب لهم بطوائف (الختمية)و(الانصار)ينسبون نسلهم الي الحبيب المصطفي صلي الله علية وسلم،
‏*زعماء الطوائف لاتختلفون عن العسكر ،لتشابة فرض الامرالواقع علي الاتباع وحديث الختم او الامام كانما قرآن ،لايستطيع الموالون لة قول (بغم)وهو مامكن قادة الطائفتين من تقرير مصيرالوطن وشعبة وفق رؤية قاصرة لن تخدم الوطن وشعبة ،بل تخدم حاجياتهم الشخصية،لكن لا الزمان والمكان كما كان
تبدلت الاحوال وحدث الإنفتاح وتفتقت العقول ونشأت اجيال لاتؤمن بقداسة الاشخاص امثال من ينصبون انفسهم وكلاء واوصياء علي الشعب والوطن،منذ قديم الزمان ،ويمنون انفسهم بقيادة الشعب والوطن بعد ان بلغ العمرمنهم مبلغا،وكما يقول المثل(ابوالجركم مابتأكل خريفين)ياخي السيدين ديل الخريف عندهم نصف قرن عديل كدة؟
‏***
اعلن الحزب الإتحادي الديمقراطي الاصل عن طرح رئيس الحزب محمدعثمان الميرغني مبادرة قومية لتحقيق وفاق وطني شامل في البلاد،كاشفا عن لقاء يجمعة مع كافة القوي السياسية والشخصيات الوطنية ومنظمات المجتمع الوطني للوصول لرؤية موحدة لحل قضايا البلادفي الايام القادمة،ومن بنودالمبادرة
‏-الإتفاق علي دستور دائم للبلاد يشارك فية الجميع.بجانب الإسراع بحل مشكلة(دارفور)،ابيي،جنوب كردفان،النيل الأزرق يودي لوقف الحرب وتحقيق الامن والاستقرار،المبادرة تحوي،مراجعة قانون الاحزاب،الإنتخابات،القوانين المرتبطة بالحريات،حقوق الإنسان،والتحول الديمقراطي،مثل إتفاق جدة الإطاري،اتفاق اسمرا،-الفريق /عبدالرحمن سعيد الرئيس المكلف بطرح مبادرة الميرغني(‏smc‏)
‏**دفع الثمن غاليا الشرفاء الذين تركوا كل مايزين لهم الحياة الدنيا من النساء والولدان والاموال وحملوا السلاح لإسقاط نظام الإنقاذ(التجمع الوطني الديمقراطي)،تنصلت الحركة الشعبية،عاد الصادق الي الداخل وتنكرلجيش الامة والقضية مشهورة،الميرغني يعمل توافقا سري مع الإنقاذ توج بما هوماثل الأن بمشاركة نجلة سلطة الإنقاذ،
لايوجدحزب يسمي بالاتحاد الديمقراطي ،بل طائفة الختمية التي يتزعمها الميرغني،ولعل حزبة هذا يغلب علية تحالف الطائفية والمصالح السياسية،كيف يكون حزبا وهو لم يعقد مؤتمره العام لتحديد برامج سياسية تتماشي مع المتغييرات في الساحة السياسية،واختيارقيادات سياسية منتخبة من المؤتمرالعام،وهوماادي لتكريس السلطة الدينية والسياسية بيد الميرغني.
‏-خلافات الإتحاديين والإنشقاق (الدقير،الهندي،ووو)نتائج خلافات بين (السياسة -الطائفية)!
‏¤مبادرة الاولي بالسيد الميرغني ان يقدمها لحزبة لان حزبة يجتاج ان يؤسس لة
‏-الاتفاق علي دستوردائم-كيف يؤسس لدستور والإنقاذ باقية في السلطة وترفض ايما شروط تخدم الديمقراطية
‏-الإسراع لحل مشكلة دارفور وابيي وو
كل الاحزاب السياسية لديها موقف واضح تجاة حرب دارفور المندلعة منذعام2003م،ولم نسمع يوما ان الميرغني قدم مؤاساة وتطييب خواطرلضحاياالحرب وينطبق الحال في ابيي والنيل الازرق وجبال النوية
‏-مراجعة قانون الاحزاب والانتخابات والقوانين المرتبطة بالحريات العامة،انتخابات عام2010،وقبض حزبكم 4مليار ولا اية انتخابت تتحدث عنهاالمبادرة؟لكن الإنتخابات قربت ودة طعم جديد للأحزاب حال لم يسقط النظام ولا حاجة تانية!!
‏-اشار باتفاق جدة ،واتفاق اسمرا
اتفاق جدة في عهد الملك فهد الذي جمع الميرغني والبشير في مكة ؟يمكن ادي القسم الميرغني بعدم التشاكس مع النظام،وضمن البشير لة الاموال؟
‏-اتفاق اسمرا وهومايعرف (مؤتمراسمرا للقضايا المصيرية)في العام1995ممن بنودة"
‏-إيقاف الحرب وإحلال السلام في السودان،وإن كان المقصود حينها جنوب السودان الآانة لاينفي تطابق مقرارات اسمرا تجاة مناطق مشتعلة بعد توقيع المعارضة علي الوثيقة،
مما جاء في مقررات اسمرا نصا"
‏-برامج وآليات تصعيد النضال لإسقاط النظام
‏-مشروعية العمل المسلح الذي تقوم بة فصائل التجمع الوطني الديمقراطي من اجل إسقاط النظام،
البندالرابع نصا،سودان المستقبل لإرساء دعائم السودان الجديد،برنامج إقتصادي،برنامج سياسي،إزالة أثارنظام الجبهة الإسلامية
نقول للسيد الميرغني التحالف شبع موتا عندما هربتم تاركين ورآءكم انصاركم وطاب بكم المقام في فنادق الخمسة نجوم
قوي الإجماع الوطني الذي كنت من المؤسسين لة نفضت يدك منة،شاركت نظام الإنقاذ بوزراء ومدراء والابن مساعد الرئيس جعفر الميرغني المقيم دوما بلندن والقاهرة ويدير مكتبة ربما من الهاتف،وربما لا المهم المخصصات تكون ماشة،مش دة اللي قال دائر2مرسيدس بيضاء للزيارات وسوداء للعمل الرسمي ومعاة ولد الامام المساعد عبدالرحمن؟يابختكم آباءكم ملوك وأنتم الورثة الجدد؟
‏*بس سؤال قبول حزبك بمشاركة الانقاذ في السلطة ما الدافع منة؟
لماذا إقحام مسودة مؤتمراسمرا وانتم من تسببتم في إجهاضة؟هل حليفكم الوطني يقبل باتفاق اسمرا مبائ يؤسس عليها الحوار بين القوي السياسية المعارضة؟
‏*لانكتب الاوقائع السيد الميرغني دائم الهروب خارج الوطن إذا ما احس بسخونة المشهد السياسي وهو دائم المرض عندما يود الخروج من ارض الوطن بذريعة إجراء الفحوصات الطبية،وآخرها مغادرتة الي عاصمة الضباب(لندن)إبان قرار الحكومة رفع الدعم عن المحروقات وتوجة الي لندن مستشفيا ولم يعد الي الآن
‏-المعادلة الآن مختلفة ليس كالسابق
حركات شبابية،منظمات مجتمع مدني تتمتع بإستقلالية،حركات الهامش المسلحة ،الوعي ،إبتعاد الشعب عن الإنتماء للطائفية وخاصة الاجيال الحديثة
نصيحة
شوف جماعتك الختمية ،والله السلفيين جننوهم ليكم جن
ياخي الجماعة ما لاقين حق الفتة ام توم بتحمي النوم
اجمغ شتات حزبك الذي تمزق شرممزق بإنفرادك واسرتك بالقرار
ياخي لوكنت فاكر ناس السودان الزمان اللي بيبوسو يدك ياهم الموجودين ،تكون عائش علي احلام وردية،
اخبار الانواط والنياشين شنو ياجماعة
السيد سليل بيت النبؤة في لندن وما إستلم النيشان
لوماتظاهرات سبتمبر كان حضرالتكريم وتسلم الجائزة ،لكن نقول شنو اولاد سبتمبر كانوا سبب مغادرة ابو المبادرات البلد ،لقيت رفيق سيدصادق

[email protected]


تعليقات 9 | إهداء 0 | زيارات 1475

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#884315 [العلم نور]
5.00/5 (1 صوت)

01-13-2014 10:51 AM
يا وليدكل واحد يايد كلامك تلحقوا عافي منك تعفي منو انت امو ول ابوهوهذه مصيبتنا في الاسافير الواحد يلغط ليهو موضوع مدة شهر كامل من صفحات المواقع الاخرى ويركبوا تركيب وينشروا ويخلي شغلوعشان يشوف الناس بعلقوا يقولوا شنو يا وليد شوف ليك شغلة تانيه غير السياسه مادام انت قاعد تقرا تعليق الناس وتعلق معاهم انت زول منفصم الشخصية وعايز علاج كي في راسك قال سياسي آل شوف ليك سوق لفة وافرش ليك خردوات الله يصلح حالك.


ردود على العلم نور
United States [خالد آدم إسحق] 01-13-2014 11:58 AM
ياوليد دي حلوة
آل أية
فصحت عن دونيتك لتقمص اللهجة المصرية ،ماكلكم تبع الخديوية ،
خلي بالك سلبة


#883971 [رانيا]
5.00/5 (2 صوت)

01-12-2014 09:59 PM
والله عشنا وشفنا.. وانا ما بعرف ليهو غير خطاب وااااحد والغريب قاله مرة بعد انفصال الجنوب مفادة وحدة السودان وسيادته على كامل اراضيه ومرة تانى ( شطح) وقال فيهابانه سيعمل على توفير امصال للحمى الصفراء..وبس !


ردود على رانيا
United States [رانيا] 01-13-2014 03:04 PM
حاجة كلتوم مع الأسف أنا ما بسمع أغاني إلا أغاني قناة براعم للصغار لأنها مفروضة علي بسبب الصغار العندنا اللـه يحفظهم .. أما حزب أمة وكلامك كله فأنا ما شايفة ليه داعي لأنك ما بتعرفينى ولا أنا بعرفك وتعرفي كيف إني حزبية من الأساس ؟؟؟ حتى الصادق المهدي أنا لا بقول عليه إمام ولا حبيب ولا هم يحزنون ولا أريد أن أتأكد من نسبه للحبيب ! إحنا لو إنتقدناه فلأنه (مخ)بغض النظر عن تصرفاته وللا حتى أفعال إبنه الماعاجبانا لكن غيرهم لو عملوا (حاجة) كنا نشكرهم أو نتكلم عنها ...بعدين يا حاجة يا المفروض تكوني في مقام جدتي اللـه يرحمها ده أسلوب !!!!!غايتو أنا بقول دعائي الدائم (الله يدي كل زول قدر نيته )...ونقول ليك كل سنة وإنت طيبة بمناسبة المولد . وإذا ما كنت حاجة ومنتحلة شخصية أنثى وفي الواقع إنت (العلم نور ) وراجل كمان فعذرا لأني خاطبتك بلفظ التأنيث ! وبدال ما تكتبها لوقو أعمل بها لأنه فعلا العلم نوووووووووووووور .

United States [حاجة كلتوم] 01-13-2014 01:38 PM
دي انتي بتتكلمي عن نفسك اما لصغر سنك اوجهلك عن الساسة في السودان وتاريخ موقفهم بالامس القريب تم لقاء مع السر قدور طبعا بتعرفيهو كويس دى بتاع البرنامج حقكم الخاص بالغناء ماعارف اسمو لكن بتجيبوهو لينا في رمضان ومعاهو فنانين اعتقد في عمرك ... المهم سألوه عن السيد/محمد عثمان الميرغني قال كلمة واحدة سياسي مكرب ...يكربك السقط يعني كلمة جامعة بالرغم من انه حزب امه جهلك وجهل خالد آدم اسحق ابكر لايقلل من شأن الرجل وارعي بي قيدكم.

[خالد آدم إسحق] 01-12-2014 11:17 PM
الأخت رانيا
عافي منك تب والله حكاية سيادة السودان علي كامل اراضية ،وحكاية امصال الحمي الصفراء فاتت علي
شكرا كتير علي ملاحظاتك الثرة


#883932 [العلم نور]
5.00/5 (1 صوت)

01-12-2014 08:36 PM
الي خالد الفكي
يا راجل انت داخل السياسة من الباب الخلفي وماعندك اي فكرة عن تاريخ الطوائف التي تنتقدهاكل الطوائف والبيوت والتي تتحدث عنها سواء كانت الختميه او غيرها والختمية بالذات هي من علمت الناس امور دينهم راجع دخول الصوفية في السودان في التاريخ الحديث راجع تحرير الكرمك وقيسان براجمات ابوهاشم من العراق / اتفاقية الميرغني -قرنق لو لا المتنطعين في السياسة من امثالك (الجبهة القومية االاسلاميه ) وتفشيل الاتفاقية لحقنا دماء الملايين وارواحهم ولما حدث الانفصال الذى ندفع ثمنه- ثانيا كل اعضاء المؤتمر الوطني الذين درسوا بالجامعات السودانيه كان بتذكية الميرغني وبعد ان علموهم انقلبوا عليهم وصاروا أخوان شياطين وآخر واحد اعترف بذلك اخو البشير د. عبدالله ذهب لمصر لقراية الطب بتذكية المراغنه والله يا من تكتبون في النت اشك في انكم سودانيين وتعرفون تاريخ السودان بشر ربنا سلطهم علي الحقيقه عبر الاسافير يهرفون بما لايعرفون والله لوحاولت ان اكتب عن مواقف الميرغني الوطنية بالذات ما اتسع لها هذا الموقع وعقلك بالذات وكفي سفاه وسوق لهذه الاتفاقية قبل ما تنفصل دارفور والنيل الازرق وانت محلك سر لاتعرف غير الفلسفة.


#883915 [صلاح كوكو]
1.00/5 (1 صوت)

01-12-2014 07:55 PM
الاستاذ الكريم / خالد آدم اسحق المحترم تحية وتقدير


اثلجت صدري وارفع القبعة احتراما وتقديرا لما جاء في موضوع درج الناس وخاصة


الاتحاديين وبالاخص الشرائح الحزب الوطني الاتحادي ان يكتبوا عنه وعيونهم تفيض دمعا


ودما وهم يرون حزبهم الكبير يتشرذم الي حزيبات الاصل و المسجل و و و وكانهم


جميعا ورثوا هذا الحزب الذي كان عملاقا وكان قادته كبارا وكانت تهمهم مصلحة


السودان . وعرف قادة المؤتمر الوطني كيف يتغلغلون في جسم هذا الحزب ويسعون


الي توزظيعة الي جزئيات دخلوا علي من يسمون انفسهم بالقادة دخلوا عليهم


باغراءات المال والسلطة والمشاركة الي أن تم مسح الحزب نهالئيا وانا اعتبر


أن الحزب انتهي وتم مسحه نهائيا وكيف يمكن ان يكون حزبا ولم ينعقد له مؤتمر


طوال السنوات الماضيه . كيف لحزب كان السيد ينادي (( سلم تسلم )) والان اصبح


اقوي سند للمؤتمر الوطني الذي بداء قادته يغادرونه ( غازي ومجموعته ) كيف


يكون الدقير أمين عام للحزب الترله وهو مساعد رئيس وشقيقه وزير حكومة الخرطوم


من هو جعفر الصادق اليس هنالك من هم أعلم واقدر منه علي تمثيل الحزب لو اردنا


طبعا المؤتمر يريد افرادا كهؤلاء صعفاء لايعهرفون حدود الميل الابيض من الازرق ؟


تعبنا من الكتابه وبداء بعض القادة يتململون ويتحسرون علي الحزب الذي كان


أما هذه المبادرة فسقومون بوقفها عند حد اطلاقها والاعلان عنها حتي يقولون نحن


موجودون رحم الله كبارنا الازهري والشريفين حسين وزين العابدين ويقية العقد الفريد


كل قواعد الاتحاديين تطالب بعقد المؤءتمرات والتي يمكن ا، تثمر عن اشياء جميلة


لعودة الحزب الكبير لما كان عليه والله المستعان


ردود على صلاح كوكو
United States [خالد آدم إسحق] 01-13-2014 12:38 AM
الأخ صلاح كوكو لك التقدير والإجلال
اشكرك علي التعليق البين
كيف لحزب ينادي بسلم تسلم واصبح السند القوي للنظام
الرحمة والمغفرة للسيدين الشريف حسين والزعيم الخالد الازهري
لايمكن ان نطلق للإتحادي حزب وهو رهن اشارة زعيمة ان قال نعم او قال لا
ماعلي التبع الا السمع والطاعة
هل يمكن إطلاق حزب وهو يعتمد إعتمادا مباشرا علي رئيس حزب
الله يرحم الاحزاب لوتدار بهذة الأحادية


#883888 [ودالشريف]
2.00/5 (2 صوت)

01-12-2014 06:55 PM
نسال الله يفكنا من هولاء الميرغنى والصادق ونقول ليهم العايز الطرق الصوفيه يمشي المسجد ويقعد وسط انصاره وتابعيه اما في السياسة ماعندنا سيد سيدنا محمد صلى الله عليه وسلم في السياسة عندنا برنامجك شنو وبيقدم للبلد شنو وحلولك شنو غير كده امشو العبو بعيد مننا وحقيقة زمن الناس البيجرو ورى سيدى انتهى ورقدو الترب ونقول ليك يا الميرغنى تانى تشمها قدحة واذكرك واعلم ان الشعوب تنتصر وتاكد انك ماحتكون من اصحاب الحظوة في الانتخابات وحزبك ماحيكون ليهو عشر ماكان في 86 عشان كده احسن ليك اعقد مؤتمرك العام ونظم حزبك ويوم واحد ابقي سودانى اصيل كفاية هوان بعقولنا سيدى طلع سيدى نزل ده زمن ولى ولن يعود ومبادرة شنو كمان هو الميرغنى ولادو بيعرفو شنو عن السودان والسودانين قعدو معانا في الفصول ولا اكلو معانا البوش ديل يمشو لندن ولا القاهرة هنا مامكانهم لابيشبهونا ولا انحنا بنشبهم ونحمدالله المابنشبهم كان مصيبة حسبنا الله ونعم الوكيل منكم انتو


ردود على ودالشريف
European Union [خالد آدم إسحق] 01-13-2014 01:01 AM
الأخ /ود الشريف
والله اجمل دعوة ربنا يستجيب للشعب السوداني من هولاء الذين يحسبون ان الوطن ملكا لهم
آميييييين


#883820 [ربك ابا كوستى]
5.00/5 (1 صوت)

01-12-2014 04:56 PM
الاخوة صناع المجد الالكتروني يا من تنتظرون الغيث وانتم بين الاسرة تحركون اصابعكم المرتعشة لتكتبو تعليقاتكم السخيفة هذه ماذا تريدون؟ سوال حري بكم ان تسالوه انفسكم لكي تجيبو عليه بامانه تامة اربعة وعشرون عاما ونحن ننام علي حلم ان تنغشي عنا ظلمة هذا النظام فحاربناه تنظيرا ونحن نقول ان هذا النظام لن يعيش اكثر من شهر و..و.. حتي صارت الشهور سنينا واحسبها ستصير دهورا لعدم ايجاد آلية موحدة للقضاء علي النظام حتي التجمع الديمقراطي الذي وضع خطة المئة يوم عصف باحلام غرسها فصارت هباء منثورا وجاء سبتمبر بجذوتها المتقدة من حطام شباب كنا قد ظننا انه صار مسخا مشوها الا انه اثبت لنا بتصديه لنيران الامن باننا لانستحق التضحية واننا لسنا بقدر المسؤلية التي دفعوا ثمنها شباب نضر يرجي منه.
ماذا تريدون يا من جلستم وراء غرف النت المغلقة وتضليل البروكسي لتكتبوا اراءكم المخزئة حتي سقطت عنكم ورقة التوت فما عاد يرجي منكم حتي تائدكم للجبهة الثورية فهو من وراء حجاب وانتم تعلمون جيدا بانها لن تستطيع ان تفعل شئ سوي ذلك الاقتتال الماحق لبني جلدتنا والمتضرر منه نفر كريم من ابناء الوطن الذين تحصدهم طائرات الاباتشي كل حين زايدا قتلي الطرفين من ابناء الوطن الذي ضاع فيه عمرنا ونحن نحلم بالامن والاستقرار والعيش الكريم.
ان مبادرة الميرغني ومناداته لمبادرةالوفاق الوطني ليست وليدة اليوم حتي تسخرون منهاومما نادي به الرجل الذي تجتمع فيه كل الطوائف الاسلامية منها والمسيحية لما يحظي به من قبول اقليمي ودولي وليس طائفة الختمية وحسب والتاريخ ملئ بمجاهداته الوطنية وحتي السلفية التي تظن انها جننت الختمية عندما تقف عند الرجل تجمع عليه لانه خيارهم الوحيد وسط كل القيادات الموجودة ولك ان تستبين الامر باستبيان علمي مدروس .
فالوفاق هو ديدن الصالحين لان الصلاح الذي نعلمه هوان المؤمن الصالح كالغيث النافع؛ لا تطيب الحياة إلا به، ولا يحلو العيش إلا معه .
فدعو عنكم التنكر وضعوا حلولكم ان كان لكم حل.


ردود على ربك ابا كوستى
United States [خالد آدم إسحق] 01-13-2014 12:50 AM
ربك ابا كوستي
مالي اراك منزعجا
ان تكون انصاريا اوختميا هذا شأن يخصك
حكاية صناع المجدالالكتروني دة حديث مالية مكان في المذكوربالمقال
شباب سبتمبر اين كنت ؟لماذا لم تقدم نفسك قربانا من اجل الحرية والخلاص من ربقة المؤتمرالوطني
ابسط نضال مقابل نضال الشباب الذي هب منتفضا في ثورة سبتمبر
الاولي منك يا ربك ابا كوستي

United States [العلم نور] 01-12-2014 08:43 PM
بارك الله فيك واكثر من أمثالك أما أمثال كاتب المقال يبدو لي انه صغير السن وتعلم ثقافته من فقه المهاترات وتم ضبطة علي الميرغني والصادق يعتقد انه مناضلا بنقد هؤلاء وهو نفس الاسلوب الذى اتبعه الاخوان الشياطين حتي وصلوا للسلطه علي اكتاف علي هؤلاء السذج الذين ليس لهم هم غير هدم تاريخنا التليد لبناء تاريخ مذيف سازج. وكان نهايته تدمير السودان بكامله وحمل السلاح ليس غاية وذا وجدت اتفاقيات تحقن الدماء وتعطي الحقوق اهلا بها اما الحرب الذى يدور منذ عشرات السودان الكل تضرر منه ولافائده منه ترتجي غير مذيدا من سفك الدماء وفي نهاية المطاف تكون الحلول سياسيه.


#883536 [ابو محمد]
1.00/5 (1 صوت)

01-12-2014 11:38 AM
فاقد الشىء لايعطيه


ردود على ابو محمد
United States [خالد آدم إسحق] 01-12-2014 02:56 PM
الأخ ابومحمد
صدقت فيما قلت
فاقد الشيء لايعطيه


#883463 [mohajir sudani]
4.00/5 (1 صوت)

01-12-2014 10:01 AM
فعلا الناس في السودان اتغيرت ....بس للاسوا رجعونا للطائفية ...رضيانين وامشوا يا شعبيين دولة الشام والعراق الاسلامية وسوقوا معاكم شيخكم صاحب التفسير التوحيدي معاكم ..رجعونا لزمن الجلال السيوطي وجوهرة اللقاني والخلفاء الختمية ودائرة السيد عبد الرحمن كريم اليد عف اللسان ....سوقوا بتاع مساواة الرجال والنسوان وامشوا قندهار او الشيشان ...
الطائفية في ديمقراطيتها الاولي جنيه السودان يعادل ٣ من جنيهات البريطان وفي اخر ديمقراطية حينما جئتم يا جرزان كان السودانان سودان ...فيه الجمال والجمال والغزلان ....


ردود على mohajir sudani
United States [خالد آدم إسحق] 01-12-2014 11:39 AM
مهاجر سوداني
انت ضد مساواة النساء بالرجال ياخي ارجع لكتب حقوق المرأة،
الطائفية اللي إنت بتفتخربيها هي أس مشاكل السودان
الختم اللي بتشكرفيهو اديني نموذج واحد قدمة للشعب والوطن،ياخي خيرات البلد واراضية ووووكلها استخدموها لمصالحهم الشخصية
ياخي انظرللشباب وقس إنتماءهم للطائفية،
حكاية الجنية كان يساوي3‎دولار،حكومات السودان المتعاقبة افرغت إحتياطي السودان من البنك البريطاني الذي يقدر بي 1000000‎جنية من الذهب الخالص،وهو مايفسر قوة الجنية مقابل الدولار
بخصوص مطالباتك بارجاع الطائفية اقول لك أخي الفاضل
ممارسة نظام الإنقاذ السئ للدين في السلطة ‏
جعل غالبية الشعب غير محبذ للاحزاب التي تتخذ من الدين مطية لتحقيق اهدافها
بخصوص وصفك ارجع لكتاباتي بصحيفة الراكوبة للتأكدمن إنتمائي التنظيمي ‏
لك شكري‎ ‎


#883412 [abubaeker]
2.00/5 (2 صوت)

01-12-2014 08:47 AM
اي مبادرة تصدر عن شيخ خرفان وبعد ما لبس الوسام من الراجل جاي يطلق مبادرة (الا رحم الله رجل عرف قدر نفسه)


ردود على abubaeker
United States [خالد آدم إسحق] 01-12-2014 11:43 AM
الأخ ابوبكر
لك التحية والتقدير
صدقت الزول دة مما كرموه بالنيشان عمل فيهو ابو المبادرات
ياخي مبادرات شنو والقتال يدور في ولايات السودان المختلفة


خالد آدم إسحق
مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة