السودان مدرسة المشاغبين
01-15-2011 03:34 PM

السودان مدرسة المشاغبين

استيلا قايتانو

احدى قريباتنا لم يوفقها الله في مسألة القراية ولا حتى بالدق، وكانت دائما تأتي يا طيش الفصل وفي احسن نباغتها تأتي نائب طيش ايام كان في طيش ، وهكذا هي في منافسة دائما بالا تاتي طيش باي طريقة، يوم جات حزينة ومقلقة قلق شديد سألوها مالك : قالت الطيش (تاينا) نقلو مدرسة تاني؟ في حين انفجر كل من في البيت بالضحك لانهم يعرفون بانها سوف تصبح الاطيش دون منازع ، انفجرت هي بالبكاء رافضة للمنصب الذي خلا لها وحدها، كيف لا وقد افتقدت المنافس الوحيد وباي حال من الاحوال ارحم نائب الطيش والاطيش ذاتو.

استحضرت هذه القصة من حزن احدى البنات التى تعمل مع جارتي وهي من جبال النوبة بعد ان تقضي عملها تأتي وتتمحن وتقول هسي يا استيلا اهلك ديل دايرين ينفصلو وتمشو تخلونا برانا ؟ كلام دا بجي كيف ؟ اقول ليها نعمل شنو دا حكم القدر والايام ؟ ولا يشفي اجابتي غليلها تأتي تاني يوم وتسأل نفس السؤال.
يبدو ان الوجود الجنوبي في المشهد السوداني كان يدعم الكثيرين والآن بما انه قرر ان يذهب مدرسة اخرى يجرب حظه فيها فالكل خائف من النواب الكثيرين الذين سيحلون محله، حتى في الشمال فالشعب يخشى ان ينفرد به المؤتمر الوطني ويعملو فيهم عمايل اكثر ألماً من العمايل الفائتة كلها وقد بدأ فعلاً ، والاثنيات الافريقية الاخرى والذين كانوا يحسون بالجنوبيين بانهم رفقاء الدرب في الذل والمهانة ! كيف سيتركهم الجنوب هكذا في الصقيعة ويذهبوا للبحث عن سقف في مكان آخر بعيد حظيرة الوطن؟.

هذا المشهد اوحى لي بان البلاد اشبه بمدرسة المشاغبين ولكن المشاغب ليس الطالب وانما الاساتذة، اساتذة الفعل السياسي الذين تسببوا في فشل المدرسة السودانية المختلطة وبعدم القدرة على ادارة هذه المدرسة وكان الاهتمام دائما يصب على طالب واحد وهو المركز مما جعله يتميز بالنجابة والشطارة والفهلوة في ابتلاع حقوق الاخرين ، ويا ويل الاستاذ الذي لا يدعه في اولى اهتماماته، وهكذا نما شعور لدى باقي الطلبة بانهم ليسو مركز اهتمام وربما بالجد هم في غاية البلادة، المزري في هذه المدرسة ان اساتذتها لم يحاولوا تغيير نمط التدريس ولا المناهج التي يحفظها الطالب النجيب المركز الملظلظ عن ظهر قلب، وربما لو غيرو منهج ونمط التدريس لاكتشفوا نجابة باقي الطلبة وربما حولوها الى مدرسة نموذجية بدون منافس ولكن متى ؟؟ بعد ما فات الاوان !!.
ومن الحاجات المؤسفة اول ما عرف احد الطلبة مفاتيح الدخول الى قلب وعقل الاستاذ والسيطرة على المذكرات الاساسية لبلوغ النجاح واول ما نجح وجاء الاول خلى باقي الطيشة ولملم كتبو وشال شنيطو وقال باي باي .

وخلى باقي الطلبة المهمشين لذات الاساتذة المشاغبين وخشمن ملح ملح وهم الذين كانوا في انتظار الكثير منه خاصة وانهم كانوا شركاء له في كل شئ حتى وصل ما وصل اليه وهاهو يذهب وربما سيفتح مدرسة جديدة باسمه ونتمنى ان يقبل فيها من يأتوا مستجيرين به من سعير التبليد والاهمال، وها هم يرمقونه وهو يمرح خارج الاسوار وبعد خروجه مباشرة تعرضو لعقوبة دراسية قاسية وبدل ان كانوا يضعون لهم الامتحانات كل حسب عربيته التي يتفاصح بها مع اهله وليس له صله بالفصاحة مع العرب الاقحاح ، شي بعربي جوبا وشي بعربي بجا وشي بعربي الجزيرة وعربي الدناقلة والمحس وعربي الغرابة فقد هددوا بان الامتحانات ستكون باللغة العربية الفصحى على شاكلة (انتحت العتاريت) حتى لا تفهموا حاجة ، فقط ستقولون بلى بلى ثم بلاء يخمكم بعد ان يتخارج الاستاذ من الحصة.

رفعوا اياديهم بالدعاء لزمليهم الاول لاول مرة بان اذهب القشة ما تعتر ليك وكان هناك شيئا بائنا من المرارة والاحساس بالتخلى لانهم كانو يريدونه ان يمسك بايدهم ويرفعهم معه من مرتبة الشتارة والبلادة المقصودة الى مرتبة الشرف المنشودة وكان يمكن ان يغيرو معا المدرسة والمدرسين والمناهج ذاتها ولكن !!! مما حدا ان يدعو الاخرين سرا دعاً يتمنون عكسه على شاكلة ان شاء الله تجي الاول طوالي.

من قوانين هذه المدرسة اولاً الا يترك الاستاذ المدرسة عشان طالب حاسي انو مقصود في مسألة انو اخر زول دي، والما عاجبو قطر عجيب يودي وما بجيب ثانياً الاستاذ ياكل ويفطر في المكتب قبل الطلبة وبعد داك يجيب قُعرة العيش ويقول للطلبة تعال نعمل فتة وبعد داك يخرتم في ما لذ وطاب من الفتة لهط لهط ويخلي لهم القُعرة يكدكدو فيها.

كان العشم انو الاول دا يصبر شوية لكن اظنو كان قايل روحو انه آخر الطيشة، لو انو اتمهل شوية كان حيكتشف انو في ناس ما دخلوا مدرسة من اساسو، خليك بعد داك يطلع الاول ولا الطيش بدل نظرية كل زول ياكل نارو دي ما تتخيلوها حارة كيفن.

هامش :

قصة (انتحت العتاريت) دي سمعتها من دكتور عمرمحمود خالد في احدى حلقاته الصحية الجيدة في برنامج صحة وعافية عندما قال لاحد الاطباء بان يتكلم بلغة بسيطة خالية من المصطلحات العلمية حتى يفهم المشاهد، قال كان في واحد من العرب الزمان بيتكلم عربي مافي اي زول بيفهمو الا الخادم بتاعو ، مرة صحا من النوم وسأل الخادم : انتحت العتاريت ؟ الخادم ما فهم حاجة لكن جاوب قال : حبظلم. الراجل قام قال للخادم : يعني شنو حبظلم ؟ الخادم قام قال ليهو يعني شنو انتحت العتاريت ؟ الراجل قال : لقد قلت لك اصاحت الديكة ؟ الخادم قام قليهو : وانا قلت ليك : بلى ) .

آخر رنة

هنيئاً لكم شعب تونس لقد اردتم الحياة فانظروا كيف استجاب القدر؟


تعليقات 26 | إهداء 4 | زيارات 6704

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#79271 [كمش]
4.12/5 (10 صوت)

01-17-2011 04:06 AM
يا استيلا ... \" كلنا في البطش والتنكيل من الوطنى........ جنوبيين - لكِ حتما اخوة كُثر في كل اصقاع البلاد ...وإن ضاقت عليك تسعُكِ شغاف قلوبهم ، فلا تفقدي الأمل بأن يكون الغد أحلى وكما قال الشاعر : وقد يلتقي .... بعد أن يظنا كل الظن أن لا تلاقيا!!!!!


#79270 [على جمد ابراهيم ]
4.14/5 (9 صوت)

01-17-2011 03:46 AM
هذه أول مقالة أقرأها للدكتورة استيلا وعن طريق الصدفة .المحضة فاجأتى الكاتبة الرصينة دكتورة استيلا . و اتكتشفت كاتبة . رصينىة من جنوبنا الحبيب الرجاء ضعى بريدك على مقالاتك من اجل التواصل الفكرى .؟ انا منن ابناء الرنك - القيقر - يعنى دينكاوى شمالى مختلط . كان الجنوب مشى الكلام ده عندى ما بمشى ياستيلا .

دكتور على حمد ابراهيم - واشنطن


#79261 [osama ahmed]
4.16/5 (11 صوت)

01-17-2011 02:25 AM
really nice peace,first time to come across an article writting by you,but i assume,that is one of our problems ,not knowing the other,but from now on i will track all your articles,good luck.


#78891 [mystro]
4.15/5 (9 صوت)

01-16-2011 02:00 PM
بنحبك وبنموت في كتاباتك لعمري انت كاتبة السودان الاولي وسنفتقدك وكل عزائنا ان نلتقي بك ربما عالفيس او بالبريد اذا تكرمتي به علينا


#78858 [أبورماز]
4.17/5 (10 صوت)

01-16-2011 01:28 PM
والله يا دكتوره نضمك متل نضم الطواقى ..........


#78697 [New Sudan]
4.14/5 (9 صوت)

01-16-2011 10:31 AM
شكرا استيلا كل العنصريين في بلادي هم سبب الكارثة و سنظل اوفياء للجنوب و أهله الطيبيين فنحن منكم وانتم منا و عذرا لقذارة الساسة الانقاذيين الذين ادمنوا السلطة و المال على حساب الشعب الابي و التونسية قادمة لاولئك المرتزقة و الانتفاضة قادمة و القصاص القصاص ولو كان أبي هو المطلوب لان العدل اساس الحكم و الحرية لنا و لغيرنا و تصبحون على وطن


#78668 [عبدالمنعم ]
4.11/5 (8 صوت)

01-16-2011 10:02 AM
باي باي استيلا


#78661 [تومابى]
4.13/5 (7 صوت)

01-16-2011 09:54 AM
استيلا اهلك ديل دايرين ينفصلو وتمشو تخلونا برانا ؟ كلام دا بجي كيف


هنيئاً لكم شعب تونس لقد اردتم الحياة فانظروا كيف استجاب القدر؟

هنيئاً لكم شعب الجنوب لقد اردتم الحياة فانظروا كيف استجاب القدر؟
;( ;( ;( ;( ;( ;( ;(


#78602 [عبدالمنعم ]
4.18/5 (7 صوت)

01-16-2011 09:15 AM
باي باي استيلا


#78481 [M.E.Osman]
4.11/5 (8 صوت)

01-16-2011 02:14 AM
ملظلظ ،بس دى كفاية .الطالب الشاطر أول الفصل الفرتك لمدرسة تانيه ممكن يلقى

طلبه مشاغبين يكرهوه المدرسة حساده وغيره اها ممكن يرجع تانى لمدرسته الأولى

طبعا لو الأستاذ المشاغب نقلوه ولشنو قولك؟


#78466 [حلفاوي]
4.14/5 (9 صوت)

01-16-2011 12:57 AM
رجل في البيت والرجل التانيه في البيت التاني ... التردد ما كويس ... يجب حسم الامور او انتظار الايام بصمت وهدوء ولكل موقف حديث ... والعمار في الديار ادوم ... على الاقل حتى تكونوا في مامن من طواحين المشاغبين

تخريمه
عندك بودي قارد مخلص جدا ... حارمنا نعارض كلامك او نعاكسك قيد انمله ... مخلص ومدشدش


#78433 [zool sudani]
4.14/5 (10 صوت)

01-15-2011 10:57 PM
وينك يااستيلا وينك يااستيلا شنو ياخي الغيبه دي اولا حفظك الله ورعاك وابداعاتك المتفرده وارجو منك ان تضعي ايملك في راكوبتنا العزيزه حتي اذا لا قدر الله وعملت باى يمكننا التواصل معك وان شئت قدمت لك رسالة دعوه الي ايطاليا اهلا بك وسهلا وعلي الرحب والسعه اما لابالسه المؤتمر الذين يريدون ان يقطعوا الوطن قطع الله اوصالهم ستقتلع رياح الثوارجزورهم وترمى بهم في مزبله التاريخ وقريبا ان شاء الله وان قدا لناظره لقريب ودمتي ودامت ابداعتك المضيئه;) ;) ;)


#78422 [خرباش]
4.13/5 (9 صوت)

01-15-2011 10:39 PM
ياربي غطيها من عين الحسود ... أكثر من روعة ... أنت نعمة ... حرام أن يلاقي هذا الشعب الذي أنجبك ما يلاقي... ولكن نقول لابد أن يستجيب القدر للشعب السوداني كما أستجاب للتوانسة.

يا دكتورة نرجو أن لا تطولي غيبتك وتحرمينا من كتاباتك التي تزيل عنا الكآبة يابنت النيل وكوش.


ردود على خرباش
Sudan [سعد ] 01-15-2011 11:25 PM
بحكم متابعتي لميلاد صحيفة اجراس الحرية قرأت مقالا للرفيق دينج قوج حيث أبدى خوفه من انه قد كلف بكتابة مقال في الصفحة الاخيرة من الجريدة بصحبة زميلين وذكرهما وهما المفكر ادم ابكر والكاتبة استيلا حيث انه لا يستطيع مقارعتهما ساعتها اعتبرت ان هذا الكلام ما هو الا مزايدات سياسية بحكم معرفتي بالرفيق ولكني تأكدت من صحة مخاوفه عندما بدأت في قراءة ما تكتبين وأشفقت حقيقة على دينج قوج حفظك الرب اينما كنت لو في الشمال او الجنوب فانت سودانية احببناك وسنظل ونتمنى لك التوفيق والتقدم


#78415 [boiler]
4.13/5 (6 صوت)

01-15-2011 10:27 PM
استيلا الابنوسية ... سنظل نبكيك ياخلاسية كلما ظهرت نتائج مدرسة بلادى ... لاننا سنتذكر تلميذنا الذى هرب وتركنا ناكل نارنا الحارة مع اساتذة الرماد كال حماد ديل ..ابشرك كل الطلاب لن ينجح منهم احد ... وسيتدخل مجلس الاباء ومجلس الامن ذاتو ... وتبقى الشغلة احسن منها تشتغل عتالى فى سوق الله واكبر ... اتخيلى هناك مافى عربى انتحت العتاريت ده... العربى هناك احلى من العسل ..قدر قدرتك وقدر ظروفك ... واى كلمة حتى لو الفتها انت براك هى عربى حلو طالما بتعبر عن حلاوة روحك ونقاوتها... انحن ذاتو العربى بالتعبنا ده واقطع نفسنا ما دايرنو ... دايرين عربى حلو زى عربى جوبا انشاء الله نسميهو عربى واى واى ونضبح ليهو كمان ... ما مشكلة ... انحن المدرسة دى حنقد سلك منها ...وكل الطلاب حاينطوا الحيطة ما يفضل طالب ..ونخلى الاستاذ براه خشمو ملح ملح ..اه نشوفو حايدرس منو ؟؟ والله الا ادرس ضلو ..
بالله ياابنوسة ... ما تنسينا .. ان انشاء تدينا مقالات بالرقراق ... لاننا بنحبك ونحب لونك العاجى... لك ود كعشقى لسواد بلادى السودان الما عاجب الطيب مصطفى ده ..


#78401 [بابكر]
4.15/5 (8 صوت)

01-15-2011 10:04 PM
الطيش ده ما يحن لاخوانو نائب الطيش حتى خامس الطيش ويدخلهم المدرسه الجديده ويخلو الاساتزه يشوفو ليهم طيش


#78352 [الطيب سوبا]
4.14/5 (8 صوت)

01-15-2011 08:33 PM
مقال في غاية الروعة ولاجمل انة بلسان سودانية وليس الا .....لك التحية


#78351 [amel]
4.18/5 (7 صوت)

01-15-2011 08:32 PM
raheeeeba, yakhei inti, where is the Face Book Page I asked you to create?pls do it and let us join .


#78326 [monem musa]
4.17/5 (10 صوت)

01-15-2011 07:33 PM
عبقرية فذة في استحضار الامثلة،يا بخت الجنوب فقد حظي بكاتبة في قامة الكبار مزيدا من التقدم والنجاحات.


#78325 [Aseel]
4.17/5 (14 صوت)

01-15-2011 07:31 PM
الحى بلاقى يا استيلا يا رائعه روعة كتابتك


#78321 [دهب التلبي]
4.13/5 (7 صوت)

01-15-2011 07:25 PM
صلي فرضا صرمديا ايها البابا الامام في حضرة الوحده من اجل السلام


#78295 [السوداني ]
4.13/5 (9 صوت)

01-15-2011 06:35 PM
ربنا يحفظ عقلك ايوه خلينا نحد لتغير الاستاذة بدل ان نلعن الظلام والجهل


#78287 [سودانية]
4.12/5 (10 صوت)

01-15-2011 06:13 PM
منتهي الواقعية في الطرح الشيء الذي يبعث بالامل في الغد اذا كان هذا هو مستوي الفهم الذي كان عصيا علي الاخرين ........ مزيدا من التقدم


#78286 [خالد المبارك]
4.13/5 (9 صوت)

01-15-2011 06:13 PM
براعه


#78276 [فضل الله]
4.11/5 (9 صوت)

01-15-2011 05:53 PM
دع عنك المهمشين بالشمال واكتبي لنا عن بلدكم الروعة -حيث الحرية والرخاء والمساوة بين كل القبائل الجنوبية -- باي باي استيلا


#78223 [روان]
4.14/5 (17 صوت)

01-15-2011 04:41 PM
كلامك ابعاد عديل يااستيلا .. انت العسل زاتو : لك الود
اللهم احفظ سودان استيلا وخيال استيلا


استيلا قايتانو
استيلا قايتانو

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة