لو ربنا كتب ليك
01-22-2014 07:37 PM


للعبدلله له تجارب مريرة مع بعض هذه المستشفيات الخاصة أسفرت عن إنتقال نصف أفراد أسرته إلى الرفيق الأعلى كل فى مستشفى غير التانى ! وتلك بلا شك هي إرادة الله عز وجل الذي لا راد لمشيئته ولكنها بالطبع (نسبة مقدرة 50%) تشير بما لا يدع مجالاً للشك بان المسالة فيها (إن) وأن هذه المستشفيات الخاصة ذات السرير (اليومو بالشئ الفلاني) تفتقر إلى زيارات الجهات الرقابية للتعرف على ما بداخلها فهنالك (على لسان وزارة الصحة نفسها) بعض المستشفيات الخاصة بها أدوية ومستهلكات (منتهية الصلاحية) كما أن بعضها يستعين بكوادر أجنبية غير مرخص لها بالعمل فى البلاد (يعني كيري ساااكت) وبعضها يخفق في أبسط الأشياء (حفظ الدم) بصورة سليمة كما أن بعضها بها معامل فحص تعمل دون ترخيص أما الطامة الكبرى يا سادتي الأماجد أن الوزارة (وبعضمة لسانها) تعترف بوجود تجاوزات خطيرة فى المؤسسات العلاجية الخاصة العاملة بالولاية تتمثل بوجود اشخاص ينتحلون صفات اطباء (شفتو كيف؟)
عموما بحكم تجارب العبدلله المريرة التي جاءت في فاتحة المقال فقد رأى أن يقدم للقارئ العزيز عصارة هذه التجارب والتي سبق ان قام بسردها وأن يرسم له خارطة طريق قد تفيده عند التفكير فى التعامل مع إحد هذه المستشفيات الخاصة … إحتمال الله يكضب الشينة !!
عليك أولاً وقبل البدء فى إختيار الورشة أقصد المستشفى الخاص الذى سوف تذهب إليه تكوين لجنة تقصى من بعض أصدقائك ومعارفك وذلك لعمل التحريات اللازمة عن المستشفى التى وقع إختيارك عليها ومن أهم طرق جمع المعلومات هو الوقوف لعده أيام أمام باب المستشفى لتسجيل عدد حالات الوفيات الطالعة والإنتباه لما يردده ذوى المرحوم فى تلك اللحظات من عبارات مثل :
- والله المرحوم جاها بى كرعينو !
- مستشفى شنو الما فيهو غير أنبوبة أوكسجين واحده ده !
كما تشمل هذه التحريات نوعية العلاج وتكلفته ومبلغ الأمنية المليونية التى توضع تحت الحساب وهل يقوم المستوصف بإستلام أشياء عينية (أمانات) لحين توفيق الأوضاع المادية (سلاسل – غويشات) ،وأيضاً تشمل هذه التحريات تقدير نسبة الإحتمال المتوقعه لخروجك سالما دون عاهات مستديمة !
بعد أن يقع إختيار لجنة التقصى على المستشفى المعنى بعد الدراسة أعلاه وقبل أن تذهب برجليك إلى حتفك يجب ان تستخير الله تعالى وتطلب منه أن ييسر لك الذهاب إلى ذلك المستشفى إن كان فيه لك خيراً وأن يمنعه عنك إن كان فيه شراً ولابد !
بعد أن تستخير الله سبحانه وتعالى وقبل الذهاب إلى المستشفى الذى قمت بتحديده عليك بأن تقوى إيمانك بالقضاء والقدر وأن تستعن بالله وتتوكل عليه وأن تعلم تماما أن ما يصيبك لم يكن ليخطئك وأن من لم يمت بالإهمال مات بالتيتانوس وأن الدنيا دار فناء وأن كل إبن آدم وإن طالت سلامته يوماً على نقالة محمول ! بعد ذلك أحضر ورقة وقلما وقم بكتابة وصيتك فالظروف ما معروفه إذ أن معظم هذه المستشفيات الداخل إليها مفقود والخارج منها لو خرج مولود !
بعد كتابة وصيتك تبدأ مرحلة تجهيز نفسك مادياً لمقابلة هذه الخطوة التى أصريت وألحيت أن تخطوها رغم عواقبها غير المضمونة وأعلم أنك سوف تحتاج إلى كل مليم لديك فهذه المستشفيات لم ينشأها أصحابها من أجل سواد عينيك بل من أجل بياض جيوبك وتنظيفها من أى مليم فحاول أن تجمع أكبر قدر من الفلوس بأي وسيلة كانت ، اقتراض ، رهن ، بيع ، ولا تنس أن هنالك قائمة من البنود فى إنتظارك بداية من رسوم فتح الملف مروراً بالتحاليل والفحصوصات ثم العملية فالعناية المكثفة ح تدخلا يعنى ح تدخلا نهاية برسوم إستلام الجثة !
إن كانت عمليتك ذات طبيعة إستئصالية فلا تنس ان تقوم بعملية لـجرد أعضائك عضو عضو وتسجيل ذلك فى ورقه وتسليمها لورثتك وذلك لمضاهاتها بما تبقى لديك من أعضاء وذلك فى حالة خروجك سالماً !
قبل إجراء العملية تفحص في يدين الجراح خاصة في أظافره فإن وجدت أي رواسب أو بقايا جير أو بوهية فهو (نقاش) أما إذا كانت الرواسب ذات طبيعة زيتية أو شحمية فمن المؤكد أنه ميكانيكي ينتحل صفة جراح ويفض إن كنت ممن يتحدثون اللغة الإنجليزية أن تباغته بسؤال من نوعية هل سوف تستخدمون بنج كامل أم موضعي ؟ فإذا لم يجب على سؤالك وعمل رايح وبيلبس في (الجونتيات)
فبعدين إنتا وحظك بقى !
ونسبة لأن هذا الطبيب الذى سوف يجرى لك العملية بيعمل ليهو 600 عملية فى اليوم وبيكون ما مركز فلا تنس وأنت تدخل إلى العملية أن تقوم بوضع علامة بالقلم الشينى على موضع العضو المصاب حتى لا يتم إستئصال عضو آخر !
كما يحبذ أن تقوم قبل إجراء العملية بوزن نفسك ومضاهاتها بوزنك بعد العملية لمعرفة وزن الشاش والمقصات وأى أدوات طبية أو مكتبية أخرى تركت بداخلك سهواً لو ربنا كتب ليك تطلع !

كسرة :
إبتسم أنت في السودان حيث لا رقابة إلا الرقابة … ولا مافي داعى !

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو)+و+و؟
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو)+و+و؟


تعليقات 26 | إهداء 0 | زيارات 8041

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#894945 [kamalomer]
1.00/5 (1 صوت)

01-24-2014 11:44 PM
اللة يفتح عليك


#893877 [habbani]
0.00/5 (0 صوت)

01-23-2014 05:35 PM
ومال بروفيسور مصطفى إدريس شالوهو من جامعة الخرطوم لى شنو؟ مارفض أقبل المجاهدين فى كلية الطب
وقال بعد إجيبوا شهاداتهم قالوا ليه ديل بقبلوهم بدون شهادات عشان فى توصية عليهم من فوق .
كلية الطب بدخلوها بى شهادة ( مجاهد وكمان كان بقى من الدبابين بحضروا ليه الماجستير من سنة أولى عشان ما إتأخر


#893789 [سودانى ساكت]
4.50/5 (2 صوت)

01-23-2014 04:09 PM
تدفع مليون امنية.انا كان عندى مليون مابشوف لا ملاريا لاغيرقان لاتايفود لا لفةراس لانزلة.اشيل منهم ميتييييين حنيه وهاك يارغيف وكمونية كاملة بس ملاح احمر وباسطة وكمان موز وبرتكان وبتيخ واحر كارو على حسابى الخاص.المستشفى الخاص دى شنو والله نحن بتاعين المستوصف بتاع الحلة الفحوصات كان بالغت للزول التعبان 12حنيه ودا لزوم بوبار لناس الحلة لانه عارفين مرضه شنو بس عايزين الدوا وفى الدوا كان فى واحد فات 9حنيه تقول لالا يا اخى دا عندى فى البيت.والغريبة العيان بعد يومين ببقى كويس بس بكلف غذاء خاص اول يوم عصير اورنحا ومديدة يعنى براه بقرض رطل السكر وتانى يوم رغيف وملاح احمر مافى زول بزعل من وضعه الخاص لانه بستحق.الشكلة فى الزول البممارض . انت اليوم داك مارضت عبدالله الدور حقى.


#893727 [fattah]
0.00/5 (0 صوت)

01-23-2014 03:16 PM
الله ينور عليك حبيبنا جبره ضحكنا رغم الضحك اصبح صعبا مثل دولار هذه الايام خاصة الحته بتاعت تفتيش الاصابع وهذه زكرتنى بحادثه حقيقيه حدثت لساعى صغير السن يعمل معنا منذ يومين المسكين اخذ ارنيك وذهب لخلع احد اضراسه فى مستوصف لديه تعاقد معنا بعد ان ارهقه من الالم تخيلو ماذا تم له لقد خلع الدكتور الضرس المجاور للعليل ثم خلع العليل واعتزر له لهذا الخطا البسيط الغير مقصود الولد المسكين وصل المكتب ودمومه تسيل ونحن بدورنا طبطبنا عليه وقلنا له الله يعوض عليك ويحفظ ليك الباقيات


#893509 [البانوشى]
2.75/5 (3 صوت)

01-23-2014 12:47 PM
مادام الطب بقى بالقروش اكيد الخريج جزار

جامعة ...........
كلية الطب
تخصص اغتيالات و موت بط
درجة النجاح ممتاز جداً

التوقيع
عميد الكلية


ردود على البانوشى
United States [sahar] 01-29-2014 08:49 PM
كلامك صحيح مليون %


#893456 [كاكا]
3.75/5 (5 صوت)

01-23-2014 12:11 PM
ديل ما النقاشين والكهريجية والمكانيكية ديل طباطيبية يعني فرو طب الانقاذ ده 6 سنين الا ياها دي قدرتم


#893445 [شختك بختك]
5.00/5 (2 صوت)

01-23-2014 12:05 PM
والله كلام عجيب ياجبراء وانا اقول ليك الناس تلعن الشيطان وترجع للقرض والمحريب والجردقة والذي منو ولا تنسو الحلبة فأنها تقوم مقام العملية الجراحية في قديم الزمان حيث تجمع الرواسب ليسهل فقعها مرة واحده
غلطان البمشي المستشفي بي رجلينو ويجي علي الة حدبا محمول


#893381 [موجوع شديد]
5.00/5 (2 صوت)

01-23-2014 11:13 AM
نعيب زماننا وما لزماننا عيب سوانا - لولا جبن هذا الشعب لما وجد هؤلاء الوسخ الفرصة بتدبير هذا البلد - التعليم خاص الصحة خاصة وكلو اصبح خاص وهو اسواء من السوء - حسبنا ونعم الوكيل


#893358 [سامي]
3.38/5 (8 صوت)

01-23-2014 10:50 AM
يااستاذ جبرا الله يجبر كسرنا جميعا ماذا ننتظر من اطباء دخلوا كليات الطب الغير محترمة التي تقبل الطالب بنسبة 60% مقابل الملايين التي تدفع وبعدين هذه هي الحصيلة الماثلة امامنا الله يجازي الخبثاء ماكلي السحت الذين دمروا كل اوجه الحياة في السودان


#893121 [ساب البلد]
3.50/5 (2 صوت)

01-23-2014 03:29 AM
********** ورش بشرية ****** human workshops *********


#893107 [ودعمر]
4.25/5 (3 صوت)

01-23-2014 02:59 AM
حسبنا الله ونعم الوكيل
شكلو يا استاذ عدم الرقابة ده لانو وزير الصحة ده من الهامش فعايز ينتقم من جماعة الخرطوم الجلابة ديل!!! هههه قال هامش قال.


#893068 [محجوب عبد المنعم حسن معني]
5.00/5 (1 صوت)

01-23-2014 01:41 AM
يديك العافية يا خال اهو انت البتفرج علينا
مع مؤدتي


#893019 [نص صديري]
4.75/5 (3 صوت)

01-23-2014 12:29 AM
الذي يحيرني اخبار خريجي جامعات الانقاذ من الطب بالعدد الهبطرش تطرش لمن بتشاكلوا في عقودات السعودية رغم تواضع تعليمهم وبعد ده كلو اطباء من الخارج كيري وانتحال شخصية اطباء وهلم جرا في السودان
في شيئ ما صاح بخصوص وزارة الطباببطة والهناي دي


#892967 [عصمتووف]
4.38/5 (4 صوت)

01-22-2014 10:40 PM
نواصل بعد القطع
اصلوا الجكاية لو الواحد خائف من الموت ولا العاهة اعتقد ومن الاسلم يفوض امره لرب العباد الشافي مانح وباسط الحياة وقابضها وبدلا لبعزقة القروش وتسليمهم جيبك لعبثوا فيه وفي النهاية ي تنضم لاتحاد المعاقين مع احترامي لهم (معاقين القطع )حادث حرب مرض افضل ان توزعها لورثتك من الابناء والاخوان والزوجات والبنات حتي الاهل والجيران او توزعها علي الفقراء طلبة اسر متعففة وغيرها بدلا من يستفيد منها حميدة واولاده او اللواء بتاع الاطباء اوعائلة فضيل وبرير وغيره اصلك ميت ميت يعني بعد كده ما نمرض


#892961 [عصمتووف]
5.00/5 (2 صوت)

01-22-2014 10:32 PM
دي سلخنات للبشر ومذابح للجيب


#892953 [أبو الحسن]
3.75/5 (3 صوت)

01-22-2014 10:15 PM
لو ربنا كتب ليك تدخل الزيتونة أو احدي صويحباتها ما تنسي تشيل كفنك معك في كيس و توصي الجماعة بدفع باقي الأمنية لمنظمة حسن الختام عقب خروجهم من المقابر .. عسي و لعل ان يشملك ربنا بحسن الخاتمة


#892951 [البيان الواضح]
5.00/5 (3 صوت)

01-22-2014 10:11 PM
طيب الناس البتمشي الجزارات المسماة حكومية اتحادية وولائية ديل يكون مصيرهم شنو ، ، يارب ياستير تستر وترحم ضعفنا وهواننا على حكومتنا


#892943 [كومي كوكو]
4.50/5 (2 صوت)

01-22-2014 10:02 PM
الحقيقة يالاخ جبرا مافي مفر لكن السودانيون اصبحوا ايضاً لا يؤمنوا بالقضاء والقدر والدليل انك تسمع ناس تقول: لو كان المريض دا اخدوه الاردن ما كان حصل ليه شيء وهذه حقيقة ايضاً.


#892930 [الكلس]
4.75/5 (3 صوت)

01-22-2014 09:46 PM
والله يا جبرة ضحكتنا في زمن اصبح الضحك فيه غالي جدا

اكثر جملة قوية في المقال ده
* والله المرحوم جاها بى كرعينو !
ههههههههاااااااي
اذن انت تشجع الذهاب الي الفكي (ام بتاري)


#892915 [aflaiga]
4.75/5 (3 صوت)

01-22-2014 09:30 PM
العزيز جبرا :
سلامات وانتا ما زلتا ماسك الجمرة لهيبا حمرا
مستشفيات شنو مرة وابوى راقد بين حياة وموت سمعت دكتورين بيقايضو عربيتين مع بعض والفرق اتنين بروستاتا وواحد منظار بس اختلفو فى المتابعة بعد العملية .
ام امهم


#892902 [الصليحابي]
4.00/5 (3 صوت)

01-22-2014 09:16 PM
صدقني يا جبرا ، والله العظيم كنت زهجان وقرفان ومكرضم من شنو لا تسأل ، لكن عندما قرأت مقالك هذا بدأت ابتسم ثم أضحك بأعلى صوتي ، فشكرا لك على هذه الأريحية الجميلة ،التي تعكس الواقع المرير الذي نعيشه ، ووصولنا لهذا الدرك الأسفل والانحطاط في جميع مناحي الحياة ...


#892878 [بركل بدري]
4.19/5 (5 صوت)

01-22-2014 08:48 PM
في اللحظة التي تجعل اخفاق طبيب أو مستشفى يؤدي بنصف أسرتك إلى الوفاة غير الطبيعية، ويؤدي إلى 95% من الشعب السوداني يُتوفَون عن طريق تلك المستشفيات هي لحظة قضاء وقدر من الله سبحانه وتعالي تكون بذلك قد أخرجت تلك المستشفى وهذا الطبيب من مسؤولية عهد؛ وأدخلت المشيئة الإلهية مسؤولة من ذلك الاخفاق؛ وهذا ما يؤدي إلى تكرار الموت لسبب بسيط جداً لأن الله لن ينزل إلى الأرض ويقول بملء فيهه هذه ليست إرادتي ويشير بأصبعه هذا ما جناه هذا الطبيب.

هكذا تكون الألعوبة بمسؤولية العهد وبتأكيد من الصحفيين.


ردود على بركل بدري
United States [الغضنفر] 01-23-2014 12:08 PM
يا أستاذ بركل بدري ... حاول تقرا ما ورا الكتابة الساخرة دي عشان تعرف المقصود.. عليك الله اقراها تاني

شكراً لسعة صدرك


#892870 [بت البلد]
4.50/5 (2 صوت)

01-22-2014 08:42 PM
أخونا الساخر الفاتح جبرا الله يفتح عليك ويجبر كسورنا موضوع ظريف وفي المليان ... أضحكتنا بقدر ما أخفتنا من الحاصل في بلدنا المكلوم وأبكيتنا على شعبنا العيان ... زي كلامك دا لو في مسئول بشوفو وقلبو على شعبو ووطنو كنا نلنا حظ من الأمن والأمان ... لكن يا اخوي مافيهم واحد عارف عشه في سوق الغزل ولا عم عبدالرحيم دقشو القطر ... والله يكضب الشينة ويمرقنا من الخطر ويطير هؤلاء البشر ...


#892855 [الركابي]
3.25/5 (3 صوت)

01-22-2014 08:24 PM
كلو راح في الكازوزا................................................


#892849 [كوز كنافه]
3.13/5 (4 صوت)

01-22-2014 08:14 PM
انت ياجبرة البشير ده يافي غيبوبة او متغبي فينا ياخ ده زول شنو وهو عايز شنو بالضبط مننا ممكن نحن نقعد معه امكن يقتنع ويمشي او يوصل معنا لحل معقول كل الشعب ده غلط وهو صاح والله انا كان لقيت فرصة واديتوني شريط كست ومسجل بقنعه ليكم ياخ ده بقري دمه


#892839 [همد]
4.97/5 (9 صوت)

01-22-2014 08:04 PM
بدل تمشوا تدفعوا وتموت تحت يد واحد سباك ولا مكنيكي ولا نقاش ولا كهربجي ولا واحد عاطل المجموعة ايها


العاملين فيها دكاترا بعد قراءة مقال الاستاذ الفاتح جبرا يدهوا الصحة والعافية وما يحوجوا للجماعة


ايهام لانه اصبح ملك للشعب الفضل .....؟



1- جيب قرض 2- كركدي 3- محريب 4- سنا مكه 5- قضيم 6- ينسون 7- قنقليس 8- واعشاب تعرفها اما عن جد ماتجاسف بي حقت الجماعة اليبيعوا عها في الشارع بالمكرفون

جيب شوية عسل معروف وشويت سمن بلدي وختهم في البيت اي واحد اتحسس بي حاجة اعمل مقادير اديهوا


والاهم بلاش تاكل حاجة ما طبيعية يعني تاكل عيش مطحون بالمحراكة وموية من قربة وتربي غمايتين لزوم الحليب والروب احسن بدل تتشحتف في صف رغيف والكهرباء تستعمل لمبة واحدة وتنوم الساعة 8بدري

وكل شي عندك يكون طبيعي ماتمشي تتشالق تعمل حاجة تقول انا حضاري وبعدين ناس الحضارة الدكاترا يودوك في داهية ......؟


الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة