المقالات
السياسة
شمال كردفان والنفير الاونطة رجعوا لينا قروشنا !!!
شمال كردفان والنفير الاونطة رجعوا لينا قروشنا !!!
01-23-2014 12:35 PM

*** الغلوطية الحاصلة فوق شمال كردفان وجابت لينا الحكومة بقول ليها حكومة النفير ومحل ما تمشي تدفع ودخل يدك فوق جيبك بس تدفع وانتو الناس ديل قايلننا انحن ماعارفيين النفير ولا شنو يجو يقول لينا عندنا نفير حق كردفان محسوبكم بعرف النفير كويس ما انا ود ضهاري وعندناالنفير عشان حياتنا هناك جماعية دائما وقت يكون عندنا نفير بنلبسوا العراريق وبنمصلوا الجلاليب والمراكيب وبرضوا نلبسوا النعال البقول ليها ام جنق سيدها لابسها والكلب حارسها ونمشوا الزراعة وطبعا سيد الزراعة بجهز لينا الجرايات دي اسمها لكن بقول ليها الحشاشات كان لحش المر ولا الجنكاب وكان في دق العيش بجيب المدقاقة وبعدين البراميل بتكون حاضرها والتيس بكون فوق النار وكان النفير لبناية سريف ولا قطية ولا كرنك برضوا القداحة والصفائح وكل محل حضرت فوق نفير لقيت نفس الحال وبعدين بتلقي دي ماسك الارساية ودي عندو المطارق عشان يعملوا الكاجا بس ما بفرض علينا الزول العندو نفير نشتغل معة بالقوة وبعدين الحلة بتكون محمية ومحروسة ولو كلنا مشينا الوادي لنفير ما زي نفير مولانا دي *** نفير نهضة مولانا دي حيرنا بشيلوا فوقو القروش من الناس وبدون ما يشاورهم تدفع بس ولا علي كيفك دي كلام شنو ودي ما سمعنا بة قبل كدي ولا في البرقال في المدي وقت يسخن دي قايتوا حاجة غلبتنا عشان قاعدين نعرف النفير ما حصل عملنا لينا نفير وقلعنا من الناس وبعدين مسعوليين من الخير انتو وقت كل الناس مشو النفير البحرس الحلة منو عشان ما يجي زولا يعقبنا يقوم يتحرش ولا يغتصب ولا يقتل لينا زول يبقي لينا زي موضوع الهادي جمعة ياجماعة البتقولوا دي ما نفير ولا ممكن يكون دي القنزب في الخطة لكن ما بطرقة دي البنعرفوا في لمة القنزب بكون باتفاق ناس الحلة كلهم كان دايرين مضخة ولا حفير ولا جامع وبمشوا الناس بجيبوا الحاجات وشيخ الحلة بكون قاعد ما بمشي ولا بخشي اللجنة هو بتفرج من بعيد وقت الناس ينتهوا من شغلهم بجو هو وبعدين بكون حارس الحلة هو ما المسئول عشان ما يجو ام باقة للحلة ويسوطوها ويعوسوا فوقها زي ما دايرين . البتسو فوق دي قلع عديل
*** بس نفير مولانا خلي راسنا ماراكب عدل سمعت قالوا في حاجة اسمها البطاقة القومية قلت كدي امشي ونعرفها قمت دقش في الشتاء والسقط فوفاية ولبست جلابيتي الاسموكن ديك وترقشتة طاغيتي الحميرة واتلفحتة وجيت لناس البطاقات والجناسي وقاموا قالوا لي رسوم البطاقة وبرضوا قال فوقها رسوم النفير قلت ياجماعة البطاقة دي خلتيها كدي نمشي محل بمرقوا الورق بتاع الاراضي من سجلات الاراضي برضوا هناك دايرين حق نفير خلتها ومشيت للطرمبة موصيني ناس الحلة لجاز البابور برضوا لقيت فوقو قروش النفير خاتنها والله استغربت واتعجبت وقلت دي صح كدي نفير السجم والرماد واللفافة ما بتخليني قلت ليهم انتو النفير دي لشنو قالوا عايزين يصلحوا الموية والجامع وحاجات تانية انا ما مسكين قايل النفير نفير قلت ليهم اها نجيكم بضراعي متين قالوا لا جابو شركات .. ههههههه ضحكت انتو مش القروش دي شالوها مننا انحن ما خلو لينا في جيوبنا ولا السممة طيب الناس حقين الشركات ديل الجابوم منو وجابوهم كيف ولا الشغلانة جبانة هايصة ساكت قدو جيوبنا بدون شورتنا ومافي زول عارف الحاصل شنو بس عارفين انو جابو لينا زولا بغني وغنا في الخمسيات وقالوا ليكم القليب يسيب الجوجوا اسع دي علاقتو بالنفير شنو ولا بقرية الهشاب المات فوقها الهادي جمعة بالرصاص شنو صحي القليب مجوجو كان ما كان كدي بالجيب الناس الحفلة وهم ماقادرين يعرف الحاصل فوق نفير ولا القتل الهادي منو ولا الحاول يصارع فضيلة منو وبعدين قلت نبدا من الصفر عشان النهضة لازم تستمر بس عايز اقول نهضة اونطة رجعوا لينا قروشنا وبعدين برضوا يجي زول كبيرتقول لينا ياناس الابيض يا غنم خمنت انو انحن غنم عشان انتو ساقننا ساكت قدامكم
kambos99@gmail.com


تعليقات 6 | إهداء 0 | زيارات 1329

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#895277 [تاكسي]
0.00/5 (0 صوت)

01-25-2014 11:23 AM
تحياتنا للاستاذ/عمر , النفير دا في منهج المشروع الحضاري يختلف عن الفهموك ليهو اهلك

المحترمين,دا مشروع للنهب(المصلح) والاسترزاق تحت مسميات (فزعة ونفير ونهضة ),يمين

الولاية ماتسمع بتنمية ولا تسمع بالنفير الا في الاعلام. 25 عام من الكذب والدجل,من يصدق

هذا الهراء .


#895212 [ودمتقل]
0.00/5 (0 صوت)

01-25-2014 10:43 AM
خلونا من نفير مولانا في مجموعه هنا في الخرطوم سوت ليها اجسام نفير والله انا ما عارف كردفان دي حظها كدا مالو يلمو فيها الا ...النهابه قسما سوف نسخن عليهم وترقبوا بيانات وكتابات وحملة كبري ضدهم جميعا من طريق الانقاذ لي نفير مولانا


#894127 [حامد]
0.00/5 (0 صوت)

01-24-2014 12:50 AM
عارف الزول دا قال فالح وبالغ فى الجبايات المختوته على المواطن يا احمد هارون لميت القروش بقرارات بدون ما تمر على المجلس المعطل اصلا ، وصرفها بتم بطريقه ما فيها شفافيه ولا تنافس بين الشركات المنفذه بس عندكم شركات ما معروفه جات كيف وما معيار رسو العطاء دا اذا كان فى عطاء


#893837 [مدروش]
0.00/5 (0 صوت)

01-23-2014 04:50 PM
يديك العافيه


#893709 [ابولكيلك]
0.00/5 (0 صوت)

01-23-2014 03:03 PM
نفير بتاع ايه بترولكم ويورانيوم ودهب وقروش حقكم كل عند حمدى عشان مثلث بتاعه اما انتم شاكلوا لغاية ما تكملوا وانتظروا البشير يصلى عندكم عجائب .


#893598 [محمد عثمان]
0.00/5 (0 صوت)

01-23-2014 01:47 PM
ولماذا كردفان هي الوحيدة من بين ولايات السودان العايزين يعمروها بالنفير ؟ لية هي يتيمة ولا عجوز عشان يعملوا ليها نفير ما يعمروها من قروش الصمغ والسمسم والفول والضأن والكركدي والحب والبطيخ ذاتو ما ثروة كبيرة وكنا بنسخة العربات وينبذها في سوق ليبيا عادي ؟ يعني كانت منسية طيلة الفترة وهي ساكتة وبرضو عايزين يقبلوا على جيوب اهلها الغلابة اللهم لا حول ولا قوة الا بالله !!!


عمر محمد عمر ود اب كر
مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة