(يللا) أشتموني..!!!
01-27-2014 11:45 AM


* أتريدون أن تعرفوا لم بقيت الإنقاذ إلى يومنا هذا كأطول أنظمة السودان عمراً؟!..
* حسناً، سنقول ما نراه حقاً وإن أغضب الكثيرين منكم..
* فأحد أسباب (توهط) الإنقاذ لأكثر من (24) عاماً ليس من قبيل أن مغنياً شاباً اسمه مهند تبيدي قال إنه (لا يعرف الغرور رغم شهرته!!)..
* ولا من قبيل أن مذيعة شابة - نسيت اسمها- قالت إنها أضطرت إلى تظليل سيارتها (هرباً من المعجبين!!)..
* ولا من قبيل أن مغنية (الدلوكة) إنصاف مدني قالت إنها ستقوم بجولة عربية/ أوربية بقصد (التعريف بالفن السوداني الراقي!!)..
* ولا من قبيل أن زعيمي أكبر حزبين معارضين يقبع (ولدان) لهما داخل القصر مساعدين للرجل الذي أطاح بنظامهما..
* ولا من قبيل أن بعض صحفيات موقع (حريات) الإلكتروني (المعارض!!) يمارسن الذي يعبن على جهاز الأمن ممارسته (نفسه!!).
* ولا من قبيل أن هنالك (ضبطا!!) يومياً - تقريباً - لشباب يقومون بطقوس زواج (مثلي!!) وهم (مخضبو) الأيدي
* ولا من قبيل أن صاحب برنامج (مع حسين خوجلي) الذي (يتمنى زوال رطانة الدناقلة والحلفاويين) - إنتصاراً للغة الضاد - (يفعل) في لغة الضاد هذه ما يكاد يجعل سيبويه (غير العربي!!) يتقلب غضباً في قبره..
* ولا من قبيل أن سائق (الركشة) الشاب ذاك الذي حين قلت له إننا (إنتفضنا) لما كنا في عمرك هذا أجاب ضاحكاً وهو يصوب نظراته نحو ظهر فتاة سائرة في الشارع (والله يكون كتر خيركم لو تميتوا جميلكم هسه برضو!!)..
* ليست الأسباب التي أدت إلى إطالة عمر الإنقاذ هي من القبيل هذا وحده ولكن هنالك أخرى أكثر دلالة - في نظرنا - على (العوار) السياسي الذي تفشى بيننا دون أن نلقي له بالاً..
* فكثيرون منا يشتمون «الإنتباهة» - مثلاً - وصفاً لها بالعنصرية والجهوية والتسبب في إنفصال الجنوب..
* ولكن (الشاتمين) هؤلاء أنفسهم هم من يحرصون على شراء «الإنتباهة» لتصير بـ (فضلهم!!) الصحيفة الأكثر إنتشاراً في السودان..
* والشيء ذاته ينسحب على صحيفة «المجهر» الذي يشتم المعارضون صاحبها ليلاً - في المواقع الإسفيرية - ثم يسارعون صباحاً إلى مطالعتها لتحتل بـ (سببهم!!) مكاناً متقدماً بين صحف البلاد (الأولى!!)..
* أما صحيفة مثل «الجريدة» لا تستحق (شتماً) - في نظر المعارضين هؤلاء - بل (تصفيقاً) تشجيعياً فشاتمو «الإنتباهة» و«المجهر» لا يقبلون على شرائها لخلوها مما (يغيظهم!!)..
* وزملاء مثل شبونة يمطرهم المعارضون هؤلاء بعبارات المدح والثناء والإشادة - في عدد من المواقع الإسفيرية - حتى إذا ما تعرضوا إلى (محنةٍ ما!!) لا يكاد يذكره أحد منهم وإن باتوا لا يجدون من (الأسودين) سوى أحدهما..
* بل إن من المشيدين بـ (رجولة!!) أمثال الزملاء المذكورين من ينطبق عليه - ربما - ما أشرنا إليه في كلمة سابقة لنا من ترديد لعبارة (بلها وأشرب مويتها!!) إذا ما قدمت له شهادة كُتب عليها بحبر الأسى (مناضل) توسلاً لإرجاء (دين)..
* أعرفتم الآن بعض مكامن (الخلل!!) الذي يجعلكم في حالة دهشة من تطاول سنوات الإنقاذ؟!..
* (يللا) أشتموني!!!!!



الصحافة
[email protected]


تعليقات 21 | إهداء 0 | زيارات 4539

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#899435 [مدحت عروة]
0.00/5 (0 صوت)

01-28-2014 02:39 PM
ده ما السبب براه ياودعووضة اقسم بالله فى سودانيين يقولوا ليك مصر احتلت حلايب قبل الانقاذ وفيهم البيقول ليك انه لمن جات الانقاذ قرنق كان محتلى الكرمك وقيسان وجات الانقاذ وحررتها واكيد ح تلقى من السودانيين البيقول ليك ويحلف بالله ان الجنوب انفصل فى عهد الصادق المهدى!!
كثير من السودانيين عندهم زهايمر سياسى و47 سنة حكم شمولى اغلبية الشعب بقى جاهل سياسيا ناس الديمقراطية ما بتنفع فى السودان!!! والجهل والزهايمر مصيبة عشان كده الانظمة الشمولية بتتطول فى الحكم!!! والكلام ده مش عند الما متعلمين اقسم بالله خريجين جامعات وحملة شهادات فوق الجامعية تلقاهم اجهل من مشى على قدمين فى السياسة والقلم ما بيزيل بلم!!


#898842 [سودانية]
0.00/5 (0 صوت)

01-28-2014 09:39 AM
ابشر ابشر

ومايجيبها الا رجالها نقول لك ذلك كما قلنا لزميلك ود شبونة

انت بس اقع زيو واحنا البقع بيناتنا بنسندو ماتخاف

والخير فينا الى قيام الساعة


#898572 [عمدة]
0.00/5 (0 صوت)

01-28-2014 03:30 AM
الرسالة وصلت. المقال الجاي وانت مؤتمر وطنى.


#898275 [صالة المغادرة]
5.00/5 (1 صوت)

01-27-2014 11:57 PM
والله يا عووضة كلامك فى محلو والازمة هى ان الانقاذ اشترت عديمى الضمائر داخل الاحزاب التى عليها الرك كما يقول دكتور مرتضى الغالى والان الاختراق وصل العصب الحى واصاب تلك الاحزاب بضمر العضلات وتكلس الاعصاب وتوقفت حركتها وخرجت من دائرة الفعل السياسي والقصة راقدة رز اعوذ بالله جعجعة مافى خليك من الطحين .


#898108 [عصمتووف]
3.00/5 (1 صوت)

01-27-2014 09:06 PM
اهتف معي يسقط عووضة (بديلا عن الشتم)


#898101 [ود كركوج]
3.00/5 (1 صوت)

01-27-2014 08:50 PM
نشتمك ليه عشان تشتهر بسببنا...حلاة لكلك


#897958 [الممغوص]
2.50/5 (3 صوت)

01-27-2014 05:37 PM
هوي يا عووضة ما تعمل فيها زي عبد الله إبراهيم و مصطفى الباطل و تجي لما الثورة تنجح تقول أنا كنت بهذب و أشذب في المعارضة و كنت بأفرز الصالح من الطالح. قديمة و حركة بايخة منك بصراحة. شوف الأزمة وين و أطعن فيها بدل شغل المشاطات بتاع المعارضة ذاتها ما نافعة و البديل منو.. هداك الله


#897916 [مهدي إسماعيل]
5.00/5 (2 صوت)

01-27-2014 04:54 PM
يا شبونة تعال زورنا في جنوب إفريقيا، وسوف نحاول ولن نُقصر، تحتاج لمثلك والكتابة من هنا ممكنة برضو!!


ردود على مهدي إسماعيل
United States [شخلول] 01-27-2014 06:30 PM
لو سمع الكيزان اقتراحك حيقطعوا له التزكرة خليه يكتب من وحى المعاناة


#897873 [عبدالرازق]
0.00/5 (0 صوت)

01-27-2014 04:09 PM
منتهي السذاجة """


#897853 [mustafa Mohd ali]
3.00/5 (1 صوت)

01-27-2014 03:55 PM
لن نشتم .. ولكن نتساءل : هل ينتظر المناضلون شهادة نضال من كائن من كان ، أم هل يتوقعون سداد ديون الدكان والايجار من الناس ؟هم أنبل من انتظار مكافأة من غيرهم ، فما يفعلونه هو قناعة ذاتية لا تهتز .. دعك من الادعاءات والتبريرات المتهافتة ، وأكل عيشك !!!!


#897852 [ودالبطانه]
0.00/5 (0 صوت)

01-27-2014 03:54 PM
يا عووضه قول كلام مليان هو نحن عندنا حق الجريدة ماهم بطبلوا للحكومة والحكومة بتشتري جرايدهم توزعها لي منسوبيها في مكاتبهم عشان تضرب الكوزين بنفس الحجر تنشر ثقافة فاشل لي افشل منه ونحن حق الجريدة نجازف بيهو طعميه يعني لامع العير ولا النفير لكن شايفين وعارفين .


ردود على ودالبطانه
European Union [العريبية] 01-28-2014 10:32 AM
والله ود عووضة ده اكلنا فى خاطرنا الليلة

كلامو كلو جرسه وشحده شديدة
ياخى الديون المجرساك دى كمها --والكتابة فى الجرايد كان مابجيب قروش زي الناس شوف ليك شغلة بالجنبة معاها--واقتراح تانى مالو لو مشيت لناس التمويل الاصغر وادوك قرض سويت ليك بيو ركشة وسقتها براك بعد الظهر زى صاحبك بتاع الركشة البعاين للبنات

واقول ليك كمان حاجة كان داير تبقى موتمر وطنى وتركب مكنة دعونى اعيش احنا عافين ليك ومافى اى شتيمة وقشة ماتعتر ليك


#897841 [احمد]
5.00/5 (1 صوت)

01-27-2014 03:46 PM
ولا من قبيل أن هنالك (ضبطا!!) يومياً - تقريباً - لشباب يقومون بطقوس زواج (مثلي!!) وهم (مخضبو) الأيدي
يوميا عديل كده انا سمعت بى حادثه واحده بقت يوميا وبعدين زى مافى زى ديل برضه فى امثال الشهيد السنهورى ورفاقه الميامين اللذين خرجو صدورهم للرصاص لماذا تصرون يا صحافه على ابراز الوجوه السالبه وتهملون خيره شبابنا اللذين ضحو بانفسهم عشان تقعد انت والذيك تكتبو فى الفارغه البتكتبو قيها دى قال انصاف مدنى قال


#897779 [احمد حسن]
5.00/5 (1 صوت)

01-27-2014 02:49 PM
رغم انى ممن يؤيدونه فى رايه المؤيد لاختفاء الرطانات وانا رطانى نمرة 1 الا ان اخطاء حسين خوجلى اللغوية فى رفع المنصوب ونصب المرفوع والمجرور اضافة او بحروفه شئ مخجل لاى شخص عادى ناهيك عن صحفى ومثقف فى مقام حسين خوجلى !!!!!


ردود على احمد حسن
United States [عبد القوى] 01-27-2014 06:26 PM
اعجب اشد العجب عندما اسمع ان حسين خوجلى مثقف وهو لايملك من الثقافة الا بعض الكلمات المنمقة والفلسفة فى غير موضعه بربكم هل وجدتم فى كل الفضائيات المحترمة مقدم برنامج يتحدث او يلوك الكلمات مثل هذا الدعى يا عالم حيرتونا


#897778 [mahmoudjadeed]
5.00/5 (1 صوت)

01-27-2014 02:47 PM
نشتمك ليه انت قلت حاجة ؟!!.


ردود على mahmoudjadeed
United States [التاج محمد احمد] 01-27-2014 03:46 PM
هههههههههههههههه


#897718 [كاجا]
4.50/5 (2 صوت)

01-27-2014 01:55 PM
اغلبنا يستحق الشتم
فعلا انماط سلوكنا محيرة ومتناقضة


#897693 [الصادق]
0.00/5 (0 صوت)

01-27-2014 01:36 PM
هل تطمح يا صلاح عووضة في ان تصل الى ما وصل اليه الهندي عزالدين والطيب مصطفى من خلال الشتم؟ والله فكرة انتهازية حلوة ولا لباس يسترها. وها اناذا اول الشاتمين ... احسب عندك العداد الذي وصل اليه الهندي!!


#897687 [الصادق]
0.00/5 (0 صوت)

01-27-2014 01:33 PM
هل تطمح يا صلاح عووضة ان تصل الى ما وصل اليه الهندي عزالدين والطيب مصطفى من خلال الشتم؟ والله فكرة انتهازية حلوة ولا لباس يسترها. وها اناذا اول الشاتمين ... احسب عندك العداد الذي وصل اليه الهندي!!


#897644 [مرتضى الحاج]
5.00/5 (6 صوت)

01-27-2014 12:55 PM
والله يا ود عووضة اصلو كلامك ما بناباهو اكان عجبنا ولا ماعجبنا تراهو راي..إلا النصيحة قعادك في صحيفة الصحافة ماااا بيعجب لكن برضو بنقول الناس ظروف وما جبرك ع المر إﻻ الامر منو !! قالوا بله اتحله فدحين يحلنا الحلاهوا


#897640 [جنوبي]
5.00/5 (1 صوت)

01-27-2014 12:51 PM
أُممممممممممممممممممح ,, عليك ..
فعلا لو كنا بنقاطع لبارت تجارتهم وافلسوا ..


#897626 [سودانى]
5.00/5 (3 صوت)

01-27-2014 12:33 PM
احسنت يا استاذ وفعلا لازم ننظم حملة لدعم الشرفاء امثال الاستاذ شبونه الذين يحاربون فى رزقهم حتى يكفوا عن قول الحق ولكم ان تمهدوا الطريق وجزاكم الله خيرا


#897587 [بعشوم]
5.00/5 (1 صوت)

01-27-2014 12:02 PM
علي الطلاق الانتباهة دي حفّاض للشافع ما أشتريها ..!!
الدعم المعنوي وحده لا يكفي للوقوف مع الكاتب الشجاع شبونة .. فالرجل وأمثاله قد حاربهم جهاز الامن في معيشتهم ورزقهم وهم لا زالوا يكتبون ، يجب ان تكون هنالك مبادرة رفيعة لبحث كيفية تعويض مادي يدفع لهم على الاقل يغطي منصرفات بيته ومواصلاته ..
ويلا "كمل جميلك" يا استاذنا فأمثال الشاب سائق الركشة كثر ويحتاجون لدفرة ..


ردود على بعشوم
[ود ابو زهانة] 01-27-2014 06:24 PM
كلام تمام ومعاكم 100% بس شوفوا تنظموها كيف؟ أقترح اضافة الى ذلك التزام كل المناضلين بشراء صحيفة الجريدة يوميا دعما لها ولما تتعرض له من خسائر جراء استمرار مصادرتها بعد الطبع لتكبيدها أكبر قدر من الخسائر المادية . ايد فى ايد تجدع بعيد

[ابو ملاذ] 01-27-2014 01:25 PM
ما يبقي كلام ساي هلموا لدعم عثمان شبونة مش نعديها مدح وكلام ودي دعوة لكل الناس داخل وخارج البلد ... انا اقترح ما يكون الدعم مادي بحت ان يكون في شكل مصدر رزق ثابت مثلا وظيفة خارج البلد في احدي دول الخليج او اوروبا او في شكل عمل ثابت داخل السودان ....

United States [الزول الكان سمح] 01-27-2014 01:09 PM
والله بعشوم ...ومعدى اللوم


صلاح الدين عووضة
صلاح الدين عووضة

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة